‏6 خُدا نیں ہِک بندے کُوں بھیجیا جِیندا ناں یُوحنّا ہا ۔ ‏7 اوہ اِیں واسطے آیا جو اوہ نُور دی گواہی ڈیووے تاں جو سارے اُوندے وسیلہ نال اِیمان گِھن آوݨ ۔ ‏8 یُوحنّا خود تاں نُور نہ ہا پَر نُور دی گواہی ڈیوݨ آیا ہا ۔ ‏9 سچا نُور جیہڑا ہر ہِک اِنسان کُوں روشن کریندے ، دُنیا ءچ آوݨ آلا ہا ۔

‏10 اوہ^a دُنیا ءچ ہا تے دُنیا اُونکُوں نہ پچھانڑیا بھانویں جو دُنیا اُوندے وسیلے نال پیدا تھئی۔ ‏11 اوہ آپنڑیاں ءچ آیا تے اُوندے آپنڑیاں اُونکُوں قبول نہ کیتا ، ‏12 پَر جتنیاں نیں اُونکُوں قبول کیتا، اُونیں اُنہاں کُوں خُدا دے فرزند بننڑ دا حق بخش ڈِتا یعنی جیہڑے اُوندے ناں اُتے اِیمان گِھن آندے ہِن ۔ ‏13 اوہ نہ خون کنُوں نہ جِسمانی خواہش کنُوں تے نہ اِنسان دے ارادے کنُوں بلکہ خُدا کنُوں پیدا تھئے ۔

‏14 تے کلام مُجسم تھیّا تے فضل تے سچائی نال بھریج تے ساڈے ءچ رَہندا ریہا تے اَساں اُوندا ایجھا جلال ڈِٹھا یعنی باپ دے اِکلوتے پوتر دا جلال ۔

‏15 اونہئی دے متعلق یُوحنّا گواہی ڈِتی تے چِلا تے آکھیا جو ایہہ اُوہو ہے جِیندے حق ءچ میں آکھیا ہا جو جیہڑا میڈے بعد آوݨ آلا ہے ، اوہ میڈے کنُوں افضل ہے کیوں جو اوہ میڈے کنُوں پہلے موجود ہا ۔

‏16 کیوں جو اوہ فضل کنُوں بھریا ہا تے اَساں اُوندی معموری ءچوں فضل اُتے فضل پایا ۔ ‏17 اِیں واسطے جو شریعت تاں موسیٰ دی معرفت ڈِتی گئی پَر فضل تے سچائی یسُوع مسیح دے طفیل مِلی ۔ ‏18 خُدا کُوں کڈھائیں کہیں نئیں ڈِٹھا پَراِکلوتا پوتر جیہڑا باپ دی گود ءچ ہے ،اُونیں ای ظاہر کیتا ۔

‏19 تے یُوحنّا دی گواہی ایہہ ہے جو جِیں وَیلے یہُودیاں یروشلِیم تُوں کاہن تے لاوی یُوحنّا دے کولھ ایہہ پُچھنڑ کیتے بھیجے جو تُوں کوݨ ہیں تاں

‏20 اُونیں اِنکار نہ کیتا بلکہ صاف صاف اِقرار کیتا جو میں تاں المسیح ^b نئیں ۔

‏21 اُنہاں یُوحنّا کنُوں پُچھیا وَل تُوں کوݨ ہیں ؟ کیا تُوں ایلیّاہ ہیں ؟

یُوحنّا جواب ڈِتا ، میں نئیں۔

کیا تُوں اوہ نبی ہیں ؟

یُوحنّا جواب ڈِتا جو نئیں ۔

‏22 بس اُنہاں پُچھیا و َل تُوں کوݨ ہیں ؟ تاں جو اَساں آپنڑے بھیجنڑ آلیاں کُوں ڈسا سگوں جو تُوں آپنڑے حق ءچ کیا آہدھیں ؟

‏23 اُونیں آکھیا جیویں یسعیاہ نبی آکھیا ہے

‏24 ایہہ فریسیاں وَلُوں بھیجے گئے ہَن ۔ ‏25 اُنہاں اُوں کنُوں ایہہ پُچھیا جو جے تُوں نہ المسیح ہیں ، نہ ایلیّاہ ، نہ اوہ نبی تاں وَل بپتسمہ کیوں ڈینداہیں ؟

‏26 یُوحنّا جواب ءچ اُنہاں کُوں آکھیا جو میں تاں پانڑی نال بپتسمہ ڈیندا ہاں پَر تُہاڈے ءچ ہِک شخص موجود ہے جِینکُوں تُساں نئیں جانڑدے ۔ ‏27 اوہ میڈے بعد آوݨ آلا ہے تے میں تاں اُوندی جُتی دا تسمہ کھولنڑ دے وی لائق نئیں ۔

‏28 ایہہ واقعات یردن دریا دے پار بیت عنیاہ ءچ پیش تھئے جِتھاں یُوحنّا بپتسمہ ڈیندا ہا ۔

‏29 ڈوجھے ڈینہہ یُوحنّا نیں یسُوع کُوں آپنڑے کولھ آندے ڈیکھ تے آکھیا ڈیکھو ایہہ خُدا دا برّہ ہے جیہڑا دُنیا دا گُناہ چا تی ویندے ۔ ‏30 ایہہ اُوہو ہے جِیندے بارے ءچ میں آکھیا ہا جو میڈے بعد ہِک شخص آوݨ آلا ہے جیہڑا میں کنُوں افضل ہے اِیں واسطے جو اوہ میں کنُوں پہلے ای موجود ہا ، ‏31 تے میں تاں خود اُونکُوں نہ جانڑدا ہم پَر میں اِیں واسطے پانڑی نال بپتسمہ ڈیندا آیا تاں جو اوہ بنی اِسرائیل اُتے ظاہر تھی وَنجے ۔

‏32 تے یُوحنّا ایہہ گواہی ڈِتی جو میں رُوح القُدس کُوں کبوتر دی شکل ءچ اَسمان کنُوں لَہندے ڈِٹھے تے اوہ اُوندے اُتے کھڑ گِیا ۔ ‏33 تے میں تاں اُونکُوں پچھانڑدا نہ ہم پَر جئیں میکُوں پانڑی نال بپتسمہ ڈیوݨ کیتے بھیجیا ہا اُونہئی میکُوں ڈسایا جو جِیندے اُتے رُوح القُدس کُوں لَہندے تے کھڑ دا ڈیکھیں ، اُوہو رُوح القُدس نال بپتسمہ ڈیسی۔ ‏34 چنانچہ میں ڈِٹھے تے گواہی ڈِتی ہے جو ایہہ خُدا دا پوتر ہے ۔

‏35 ڈوجھے ڈینہہ یُوحنّا آپنڑے ڈو شاگرداں دے نال اُتھاں کھڑا ہا ۔ ‏36 اُونیں یسُوع کُوں اُتھوں لنگھدا ڈیکھ تے آکھیا ڈیکھو ! ایہہ خُدا دا برّہ ہے ۔

‏37 ایہہ گالھ سُنڑ تے اُوندے ڈوہائیں شاگرد یسُوع دے پِچُھوں تھی پئے۔ ‏38 یسُوع مُڑ تے اُنہاں کُوں پچُھوں آندا ڈِٹھا تاں اُنہاں کنُوں پُچھیا تُساں کیا گولھیندے ہِوے؟

اُنہاں آکھیا اے ربّی (یعنی اے اُستاد)! تُوں کِتھاں رَہندھیں؟

‏39 اُونیں جواب ڈِتا جُلو ڈیکھ گِھنو۔بس اوہ نال ٹُر پئے تے اوہ جاہ ڈِٹھی جِتھاں اوہ رَہندا ہا تے باقی ڈینہہ اُوندے نال گزار ڈِتا ، ایہہ ڈاہویں گھنٹے دے نیڑے دا وَیلہ ہا ۔

‏40 اُنہاں ڈوہاں ءچوں جیہڑے یُوحنّا دی گالھ سُنڑ تے یسُوع دے پچُھوں تھی پئے ہَن ، ہِک اندریاس ہا جیہڑا شمعون پطرس دا بِھرا ہا ۔ ‏41 اندریاس پہلا کَم ایہہ کیتا جو آپنڑے بِھرا شمعون کُوں گولھ تے اُونکُوں آکھیا جو ساکُوں المسیح مِل گِیا ہے جِیندا ترجمہ خرِستُس^c ہے ۔ ‏42 اوہ اُونکُوں یسُوع دے کولھ گِھن آیا ۔

یسُوع اُوندے اُتے نگاہ کیتی تے آکھیا جو تُوں یُوحنّا دا پوتر شمعون ہیں ، ہُنڑ کنُوں تیڈا ناں کیفا یعنی پطرس ^d ہوسی ۔

‏43 ڈوجھے ڈینہہ یسُوع نیں گلیل ءچ وَنجنڑ دا اِرادہ کیتا تے فِلپُّس کُوں آکھیا میڈے پچُھوں تھی پو ۔ ‏44 اندریاس تے پطرس وانگوں فِلپُّس دا وطن وی بیت صیدا شہر ہا ۔ ‏45 فِلپُّس ، نتن ایل کُوں مِلیا تاں اُونکُوں آکھنڑ لگا جو جِیندا ذِکر موسیٰ تَورَیت ءچ تے نبیاں آپنڑیں کِتاباں ءچ کیتے اوہ ساکُوں مِل گِیا ہے ، اوہ یُوسف دا پوتر یسُوع ناصری ہے ۔

‏46 نتن ایل پُچھیا کیا ناصرت ءچوں کوئی چنگی چیز نِکل سگدی ہے ؟ فِلپُّس آکھیا جُل تے خود ای ڈیکھ گِھن ۔

‏47 یسُوع نتن ایل کُوں آندے ڈِٹھا تاں اُوندے بارے آکھیا ڈیکھو! ایہہ اَصلی اِسرائیلی ہے ، اِیندے ءچ مکر نئیں ۔

‏48 نتن ایل اُوں کنُوں پُچھیا تُوں میکُوں کیویں جانڑدا ہیں ؟

یسُوع اُونکُوں جواب ڈِتا فِلپُّس دے سَڈݨ کنُوں پہلے جیہڑے وَیلے تُوں ہنجیر دے درخت تَلے ہویں میں تیکُوں ڈیکھ گِھدا ہا ۔

‏49 نتن ایل آکھیا اے ربّی ! تُوں خُدا دا پوتر ہیں ، تُوں اِسرائیل دا بادشاہ ہیں ۔

‏50 یسُوع جواب ءچ اُونکُوں آکھیا کیا تُوں ایہہ سُنڑ تے جو میں تیکُوں ہنجیر دے درخت دے تَلے ڈِٹھا ہا ، اِیں واسطے اِیمان گِھن آئیں ؟ تُوں اِیں کنُوں وی وَڈے وَڈے کَم ڈیکھسیں ۔ ‏51 وَل اُونکُوں آکھیا میں تُہاکُوں سچ آہدھا ہاں جو تُساں اَسمان کُوں کُھلا تے خُدا دے فرشتیاں کُوں اُتے وَیندے تے ابن ِآدم اُتے لَہندے ڈیکھسو ^e۔