‏4 یسُوع اُونکُوں آکھیا اے خاتون ! میکُوں ایہہ کیوں آہدھی ہیں ؟اَجنڑ میڈا وقت نئیں آیا ۔

‏5 اُوندی ماں نوکراں کُوں آکھیا جیہڑا کُجھ اوہ تُہاکُوں آکھے ، اوہ کرو ۔

‏6 اُتھاں پتھر دے چھی مَٹکے رکھے ہَن جنہاں کُوں یہُودی طہارت کیتے اِستعمال کریندے ہَن ۔ ہر مَٹکے ءچ ڈو ڈو تَرے تَرے مَن پانڑی دی گُنجایش ہئی ۔ ‏7 یسُوع اُنہاں کُوں آکھیا مَٹکیاں ءچ پانڑی بھر ڈیوو۔ بس اُنہاں مَٹکیاں کُوں مُنہ تَئیں بھر ڈِتا ۔ ‏8 وَل اُونیں اُنہاں کُوں آکھیا ہُنڑ کَڈھ تے میر ِ مجلس دے کولھ گِھن وَنجو ۔ بس اوہ گِھن گئے ۔ ‏9 جِیں وَیلے میر ِ مجلس اوہ پانڑی چَکھیا جیہڑا ہُنڑ مَے بنڑ گِیا ہا تے اُونکُوں پتا نہ ہا جو اوہ مَے کِتھوں آئی ہے پَر نوکر جِنہاں پانڑی بھریا ہا جانڑدے ہَن ، تاں میر ِ مجلس گھوٹ کُوں سَڈیا تے اُونکُوں آکھیا ‏10 ہر شخص شروع ءچ چنگی مَے پیش کریندے تے بعد ءچ جیہڑے وَیلے مہمان پی گِھندن ہَلکی مَے پیش کریندے ، پَر تَیں چنگی مَے ہُنڑ تَئیں رکھ چھوڑی ہے ۔

‏11 ایہہ یسُوع دا پہلا معجزہ ہا جیہڑا اُونیں گلیل دے دیہات قانا ءچ ڈِکھا تے آپنڑاں جلال ظاہر کیتا تے اُوندے شاگرد اُوندے اُتے اِیمان گِھن آئے ۔

‏12 اِیندے بعد اوہ تے اُوندی ماں تے بِھرا تے اُوندے شاگرد کفرنحُوم کُوں چلے گئے تے اُتھاں کُجھ ڈینہہ ریہے ۔

‏13 جِیں وَیلے یہُودیاں دی عید ِ فسح نیڑے ہئی تاں یسُوع یروشلِیم دو روانہ تھیّا ۔ ‏14 اُونیں ہیکل دے اندر ڈاند ، بھیڈاں تے کبوتر ویچنڑ آلیاں کُوں تے صرافیاں کُوں بیٹھے ڈِٹھا ‏15 تے رسیاں دا کوڑا بنڑا تے ساریاں کُوں یعنی بھیڈاں تے ڈانداں کُوں ہیکل ءچوں کَڈھ ڈِتا تے صرافیاں دے سِکے کھنڈا ڈِتے ، تے اُنہاں دے پھٹے پُٹھے کر ڈِتے ، ‏16 تے کبوتر فروشاں کُوں آکھیا اِنہاں کُوں اِتھوں گِھن وَنجو ، میڈے باپ دے گھر کُوں مَنڈی نہ بنڑاؤ ۔ ‏17 اُوندے شاگرداں کُوں یاد آیا جو لکھیا ہے تیڈے گھر دی غیرت میکُوں کھا ویسی ۔

‏18 بس یہُودیاں جواب ءچ اُونکُوں آکھیا اِنہاں کَماں کُوں کر تے تُوں ساکُوں کیہڑا نِشان ڈکھا سگدیں ؟

‏19 یسُوع جواب ءچ اُنہاں کُوں آکھیا اِیں مَقدِس کُوں سَٹ ڈیوو تاں میں تَرے ڈینہہ ءچ وَلا کھڑا کر ڈیساں ۔

‏20 یہُودیاں جواب ڈِتا اِیں مَقدِس دے بناوݨ ءچ چھتالیہ سال لگ گئے ہِن، تے کیا تُوں تَرے ڈینہہ ءچ اِینکُوں وَلا بنڑا ڈیسیں ؟

‏21 پَر اُونیں آپنڑے جِسم دے مَقدِس دےبارے ءچ آکھیا ہا ۔ ‏22 بس جیں وَیلے اوہ مُردیاں ءچوں زندہ تھیّا تاں اُوندے شاگرداں کُوں یاد آیا جو اُونیں ایہہ آکھیا ہا تے اُنہاں کُوں خُدا دے کلام تے یسُوع دے آکھے ہوئے لفظاں اُتے یقین آ گِیا ۔

‏23 جیں وَیلے اوہ فسح دی عید اُتے یروشلِیم ءچ ہا تاں بہُوں سارے لوک اُوندے معجزے ڈیکھ تے اُوندے اُتے اِیمان گِھن آئے ، ‏24 پَر یسُوع کُوں اُنہاں اُتے اعتبار نہ ہا ، اِیں کیتے جو اوہ ساریاں کُوں جانڑدا ہا ، ‏25 تے اُونکُوں ایہہ حاجت نہ ہئی جو کوئی اُونکُوں اِنسان دے بارے ڈساوے کیوں جو اوہ اِنسان دے دِل دا حال جانڑدا ہا ۔