‏3 یسُوع جواب ءچ اُونکُوں آکھیا میں تیکُوں سچ آہدھا ہاں جو جئیں تَئیں کوئی نویں سِرے تُوں پیدا نہ تھیوے ، اوہ خُدا دی بادشاہی کُوں ڈیکھ نئیں سگدا ۔

‏4 نِیکُدِیمُس اُونکُوں آکھیا آدمی جِیں وَیلے بُڈھا تھی وَنجے تاں اوہ کیویں وَلا پیدا تھی سگدے ؟ کیا اوہ وَلا آپنڑیں ماں دے پیٹ ءچ داخل تھی تے پیدا تھی سگدے ؟

‏5 یسُوع جواب ڈِتا میں تیکُوں سچ آہدھا ہاں جو جئیں تَئیں کوئی شخص پانڑی تے رُوح نال پیدا نہ تھیوے اوہ خُدا دی بادشاہی ءچ داخل نئیں تھی سگدا ۔ ‏6 جیہڑا جِسم کنُوں پیدا تھئے اوہ جِسم ہے تے جیہڑا رُوح کنُوں پیدا تھئے اوہ رُوح ہے ۔ ‏7 حیران نہ تھی جو میں تیکُوں آکھے ، تُہاکُوں نویں سِرے تُوں پیدا تھیوِݨ ضرور ہے ۔ ‏8 ہوا جیہڑے پاسوں چاہندی ہے گُھل وَیندی ہے۔ تُوں اُوندی آواز سُنڑدا ہیں پَر ایہہ نئیں جانڑدا جو اوہ کِتھوں آندی ہے تے کِتھاں وَیندی ہے ۔ رُوح کنُوں پیدا تھیوݨ آلے آدمی دا حال اِیہو ہے ۔

‏9 نِکُدِیمُس جواب ءچ اُونکُوں آکھیا ایہہ کیویں تھی سگدے؟

‏10 یسُوع جواب ءچ اُونکُوں آکھیا بنی اِسرائیل دا اُستاد تھی تے وی تُوں ایہہ گالھ نئیں جانڑدا؟ ‏11 میں تیکُوں سچ آہدھا ہاں، جو اَساں جانڑدے ہاں اُوہو آہدھے ہاں، تے جِینکُوں اَساں ڈِٹھے اُوندی گواہی ڈیندے ہاں، پَر تُساں ساڈی گواہی قبول نئیں کریندے ۔ ‏12 جِیں وَیلے میں تُہاکُوں زمین دے گالھیں آکھیاں تے تُساں یقین نہ کیتا تاں جے میں تُہاکُوں اَسمان دے گالھیں آکھاں تاں تُساں کیویں یقین کریسو ؟ ‏13 کوئی اَسمان اُتے نئیں گِیا سِوائے اُوندے جیہڑا اَسمان کنُوں لَتھے یعنی ابن ِآدم ۔

‏14 جیویں موسیٰ بیابان ءچ ناگ کُوں اُچائی اُتے چڑھایا ، اُونویں ای ضرور ہے جو ابن ِآدم وی اُچائی اُتے چڑھایا وَنجے۔ ‏15 تاں جو جیہڑا کوئی اُوندے اُتے اِیمان گِھن آوے ہمیشاں دی زندگی پاوے ۔ ‏16 کیوں جو خُدا نیں دُنیا نال ایجھی محبت کیتی جو اُونیں آپنڑا اِکلوتا پوتر بخش ڈِتا تاں جو جیہڑا کوئی اُوندے اُتے اِیمان گِھن آوے ، ہلاک نہ تھیوے بلکہ ہمیشاں دی زندگی پاوے ۔ ‏17 کیوں جو خُدا نیں آپنڑے پوتر کُوں دُنیا ءچ اِیں خاطر نئیں بھیجیا جو دُنیا کُوں سزا دا حکم سُنڑاوے بلکہ اِیں واسطے جو دُنیا اُوندے وسیلے نال نجات پاوے ۔

‏18 جیہڑا اُوندے اُتے اِیمان گِھن آندے اُوندے اُتے سزا دا حکم نئیں تھیندا، پَر جیہڑا اُوندے اُتے اِیمان نئیں گِھن آندا اُوندے اُتے سزا دا حکم تھی گئے ، اِیں واسطےجو اوہ خُدا دے اِکلوتے پوتر دے ناں اُتے اِیمان نئیں گِھن آیا ۔ ‏19 تے سزا دے حکم دی وجہ ایہہ ہے جو نُور دُنیا ءچ آیاتے لوکاں نُور دی بجائے اَندھارے کُوں پسند کیتا،اِیں واسطے جو اُنہاں دے کَم بُرے ہَن ۔ ‏20 کیوں جو جیہڑا کوئی بَدی کریندے ، اوہ نُور کنُوں نفرت کریندے تے نُور دے کولھ نئیں آندا ، ایویں نہ تھیوے جو اُوندے کَم ظاہر تھی وَنجنڑ ۔ ‏21 پَر جیہڑا سچائی دے کَم کریندے، اوہ نُور دے کولھ آندے تاں جو ظاہر تھیوے جو اُوندے کَم خُدا ءچ ^a کیتے گئے ہِن ۔

‏22 اِنہاں گالھیں دے بعد یسُوع تے اُوندے شاگرد یہُودیہ دے علاقے ءچ آئے تے اوہ اُتھاں اُنہاں دے نال رہ تے بپتسمہ ڈیوݨ لگا ‏23 تے یُوحنّا وی عینون ءچ بپتسمہ ڈیندا ہا ، جیہڑا شالیم دے نیڑے ہا کیوں جو اُتھاں پانڑی بہُوں ہا، تے لوک آ تے بپتسمہ گِھندے ہَن ۔ ‏24 کیوں جو یُوحنّا اَجنڑ تَئیں قید خانہ ءچ سَٹیا نہ گِیا ہا ۔

‏25 بس یُوحنّا دے شاگرداں دی، کہیں یہُودی نال، طہارت دی بابت تکرار تھی گئی ۔ ‏26 اِیں واسطے اوہ یُوحنّا دے کولھ آ تے آکھنڑ لگے اے ربّی! اوہ شخص جیہڑا یردن دے پار تیڈے نال ہا تے جِیندے متعلق تُوں گواہی ڈِتی ہئی ، ڈیکھ اووی بپتسمہ ڈیندا ہے تے سبھ اُوندے کولھ آندے ہِن ۔

‏27 یُوحنّا جواب ءچ آکھیا اِنسان کُجھ نئیں گِھن سگدا جئیں تَئیں اُونکُوں اَسمان دی طرفوں نہ ڈِتا وَنجے ۔ ‏28 تُساں خود گواہ ہِوے جو میں آکھیا ہا جو میں المسیح نئیں بلکہ اُوندے اَگُوں بھیجیا گِیا ہاں۔ ‏29 جِیندی کنوار ہے اوہ گھوٹ ہے پَر گھوٹ دا دوست جیہڑا کولھ کھڑا تھی تے اُوندی سُنڑدے تے گھوٹ دی آواز سُنڑ تے خوش تھیندے ۔بس میڈی ایہہ خوشی پوری تھی گئی ۔ ‏30 ضرور ہے جو اوہ وَدھے تے میں گَھٹاں۔

‏31 جیہڑا اُتوں آندے اوہ سبھ کنُوں اُچا ہے ۔ جیہڑا شخص زمین کنُوں ہے اوہ زمینی ہے تے زمین دے گالھیں کریندے ۔ جیہڑا اَسمان کنُوں آندے ، اوہ ساریاں کنُوں اُچا ہے۔ ‏32 جیہڑا کُجھ اُونیں ڈِٹھا تے سُنڑیا اُونہئی دی گواہی ڈیندے ،پَر اُوندی گواہی کوئی قبول نئیں کریندا ۔ ‏33 جئیں اُوندی گواہی قبول کیتی اُونیں اِیں گالھ اُتے مُہر کر ڈِتی جو خُدا سچا ہے ۔ ‏34 کیوں جو جِینکُوں خُدا نیں بھیجیا ہے اوہ خُدا دے گالھیں اَکھیندے، اِیں واسطے جو خُدا رُوح القُدس ناپ ناپ تے نئیں ڈیندا ۔ ‏35 باپ پوتر نال محبت رکھیندے تے اُوں سبھ کُجھ پوتر دے سپُرد کر ڈِتے ۔ ‏36 جیہڑا پوتر اُتے اِیمان گِھن آندے ، ہمیشاں دی زندگی اُوندی ہے ، پَر جیہڑا پوتر دی نئیں منیندا ، اوہ زندگی کُوں نہ ڈیکھسی بلکہ اُوندے اُتے خُدا دا غضب رَہسی ۔