‏5 بس اوہ سامریہ دے ہِک شہرءچ آیا جیہڑا سُوخار اَکھویندا ہے ۔ ایہہ اُوں قطعہ زمین دے نیڑے ہے جیہڑا یعقوب آپنڑے پوتر یُوسف کُوں ڈِتا ہا ‏6 تے یعقوب دا کھوہ اُتھائیں ہا ۔ یسُوع سفر کنُوں تھک تے اُوں کھوہ اُتے بہہ گِیا ۔ ایہہ ڈوپہر دا وَیلہ ہا ۔

‏7 سامریہ دی ہِک عورت اُتھاں پانڑی بھرݨ آئی۔ یسُوع اُونکُوں آکھیا میکُوں پانڑی پِلا ۔ ‏8 کیوں جو اُوندے شاگرد کھانڑا مُل گِھننڑ شہر گئے ہَن ۔

‏9 اُوں سامری عورت اُونکُوں آکھیا جو تُوں یہُودی تھی تے میں سامری کنُوں پانڑی کیوں منگدیں ؟ (کیوں جو یہُودی سامریاں نال کہیں قِسم دا میل مِلاپ نہ رکھیندےہَن ) ۔

‏10 یسُوع جواب ءچ اُونکُوں آکھیا جے تُوں خُدا دی بخشش کُوں جانڑدی تے ایہہ وی جو اوہ کوݨ ہے جیہڑا تَیں کنُوں پانڑی منگدے تاں تُوں اُوں کنُوں منگدی تے اوہ تیکُوں زندگی دا پانڑی ڈیندا ۔

‏11 عورت اُونکُوں آکھیا اےمالک ! تیڈے کولھ پانڑی بھرݨ کیتے کوئی چیز نئیں تے کھوہ وی بہُوں جِھکا ہے ، وَل اوہ زندگی دا پانڑی تیڈے کولھ کِتھوں آیا ؟ ‏12 کیا تُوں ساڈے پیُو یعقوب کنُوں وی وَڈا ہیں جئیں ایہہ کھوہ ساکُوں ڈِتا تے خود اُونیں تے اُوندے پوتراں تے اُوندے مویشیاں اُوندے ءچوں پیتا ؟

‏13 یسُوع جواب ءچ اُونکُوں آکھیا جیہڑا کوئی اِیں پانڑی ءچوں پیندے اوہ وَلا تِرسا تھیسی ‏14 پَر جیہڑا کوئی اُوں پانڑی ءچوں پیندے جیہڑا میں ڈیساں اوہ کڈھائیں تِرسا نہ تھیسی بلکہ جیہڑا پانڑی میں اُونکُوں ڈیساں اوہ اُوندے ءچ چشمہ بنڑ ویسی جیہڑا ہمیشاں دی زندگی کیتے جاری رَہسی ۔

‏15 عورت اُونکُوں آکھیا اے مالک! میکُوں وی ایہہ پانڑی ڈے تاں جو میں تِرسی نہ رہواں تے نہ ای میکُوں پانڑی بھرݨ کیتے اِتھاں آونڑا پووے ۔

‏16 یسُوع اُونکُوں آکھیا وَنج تے آپنڑے پائے کُوں اِتھاں سَڈ آ۔

‏17 عورت جواب ڈِتا جو میڈا پایا کائنیں ۔

یسُوع اُونکُوں آکھیا تُوں ٹھیک آہدھی ہیں جو تیڈا پایا کائنیں ‏18 کیوں جو تُوں پَنج پائے کیتی بیٹھی ہیں تے جِیں کولھ ہُنڑ ہیں اوہ تیڈا پایا کائنیں ۔ تُوں سچ آہدھی ہیں ۔

‏19 عورت اُونکُوں آکھیا اے مالک! میکُوں لگدے جو تُوں نبی ہیں ۔ ‏20 ساڈے پیُو ڈاڈا اِیں پہاڑ اُتے عبادت کیتی پَر تُوں آہدھیں جو اوہ جاہ جِتھاں عبادت کرنڑی چاہیدی ہے ، یروشلِیم ءچ ہے ۔

‏21 یسُوع اُونکُو ں آکھیا اے عورت ! میڈایقین کر جو اوہ وقت آوݨ آلا ہے جِیں وَیلے تُساں باپ دی عبادت نہ تاں اِیں پہاڑ اُتے کریسو نہ یروشلِیم ءچ ۔ ‏22 تُساں جِینکُوں نئیں جانڑدے اُوندی عبادت کریندے ہِوے۔ اَساں جِینکُوں جانڑدے ہاں ، اُوندی عبادت کریندے ہاں کیوں جو نجات یہُودیاں ءچوں ہے^a ، ‏23 پَر اوہ وقت آوݨ آلا ہے بلکہ ہُنڑ ای ہے جو سچے عبادت کرݨ آلے رُوح تے سچائی نال باپ دی عبادت کریسن کیوں جو باپ آپنڑے کیتے ایجھے ای عبادت کرݨ آلے گولھیندا ہے ۔ ‏24 خُدا رُوح ہے تے ضرور ہے جو اُوندے عبادت گزار رُوح تے سچائی نال اُوندی عبادت کرݨ۔

‏25 عورت اُونکُوں آکھیا میں جانڑدی ہاں جو المسیح جِینکُوں خرِستُس آہدھے ہِن ، آوݨ آلا ہے ۔ جِیں وَیلے اوہ آسی تاں ساکُوں سارے گالھیں ڈسا ڈیسی ۔

‏26 یسوع اُونکُوں آکھیا میں جیہڑا تیڈے نال گالھیں کریندا پیا ہاں اُوہو ہاں ۔

‏27 اِتی دیر ءچ اُوندے شاگرد آئے تے اُونکُوں ہِک عورت نال گالھیں کریندے ڈیکھ تے حیران تھئے۔ وَل وی کہیں نہ آکھیا جو تُوں کیا چاہندا ہیں ؟ یا اُوندے نال کِیں واسطے گالھیں کریندا پیا ہیں ؟

‏28 بس عورت آپنڑا پانڑی دا گھڑا اُتھائیں سَٹ تے پچُھوں تے وَلا شہر چلی گئی تے لوکاں کُوں آکھنڑ لگی ‏29 آؤ، ہِک آدمی نال مِلو، جَئیں میکُوں سبھ کُجھ جیہڑا میں ہُنڑ تَئیں کیتا ہا ، ڈساڈِتے ۔ کیا اِیہو المسیح تاں نئیں ؟ ‏30 اوہ شہر کنُوں نِکل تے اُوندے کولھ آوݨ لگے ۔

‏31 اِیں دوران اُوندے شاگرد اُونکُوں ایہہ درخاست کرݨ لگے جو اے ربّی !کُجھ کھا گِھن ۔

‏32 پَر اُونیں اُنہاں کُوں آکھیا میڈے کولھ کھاوݨ کیتے ایجھا کھانڑا ہے جِینکُوں تُساں نئیں جانڑدے ۔

‏33 بس شاگرد آپس ءچ آکھنڑ لگے کیا کوئی اُوندے کیتے کھانڑا گِھن آئے ؟

‏34 یسُوع اُنہاں کُوں آکھیا میڈا کھانڑا ایہہ ہے جو میں آپنڑے بھیجنڑ آلے دی مَنشا پوری کراں تے اُوندا کَم پورا کراں ۔ ‏35 کیا تُساں آہدھے نئیں جو فصل پکنڑ ءچ اَجنڑ چار مہینے رَہندے ہِن ؟ڈیکھو میں تُہاکُوں آہدھا ہاں جو آپنڑے اَکھیں چا تے کھیتاں اُتے نِظر کرو جو فصل کپنڑ کیتے پَک گئی ہے، ‏36 تے کپنڑ آلا مزدُوری پیندے تے ہمیشاں دی زندگی کیتے پھل جمع کریندے، تاں جو رہاوݨ آلا تے کپنڑ آلا ڈوہائیں رَ ل تے خوشی مناوݨ۔ ‏37 اِیں واسطے ایہہ اکھاݨ سچ تھیندے جو رَہاوݨ آلا بیا تے کپنڑ آلا بیا ہے ۔ ‏38 میں تُہاکُوں اُوں فصل کُوں کپنڑ کیتے بھیجیا جِیندے اُتے تُساں محنت نئیں کیتی۔ بئیاں محنت کیتی تے تُساں اُنہاں دی محنت دے پھل ءچ شریک تھئے ۔

‏39 تے اُوں شہر دے بہُوں سارے سامری اُوں عورت دی گواہی سُنڑ تے جو اُونیں میکُوں سبھ کُجھ جیہڑا میں ہُنڑ تَئیں کیتا ہا ، ڈسا ڈِتے ، اُوندے اُتے اِیمان گِھن آئے ۔ ‏40 بس جِیں وَیلے اوہ سامری اُوندے کولھ آئے تاں اُونکُوں درخاست کرݨ لگے جو ساڈے کولھ رہ ۔بس اوہ ڈو ڈینہہ اُتھاں ریہا ۔

‏41 تے اُوندے کلام دے سببّوں بئے وی بہُوں سارے لوک اُوندے اُتے اِیمان گِھن آئے ۔ ‏42 تے اُوں عورت کُوں آکھیا ہُنڑ اَساں تیڈے آکھنڑ تے ای اِیمان نئیں گِھن آئے کیوں جو اَساں خود سُنڑ گِھدے تے جانڑدے ہاں جو ایہہ فی الحقیقت دُنیا دا نجات ڈیوݨ آلا ہے ۔

‏43 وَل اُنہاں ڈو ڈینہاں دے بعدیسوع اُتھوں روانہ تھی تے گلیل کُوں گِیا ‏44 کیوں جو یسوع نیں خود گواہی ڈِتی جو نبی کُوں آپنڑے وطن ءچ عزت نئیں مِلدی ۔ ‏45 بس جِیں وَیلے اوہ گلیل ءچ آیا تاں گلیل دے لوکاں اُوندا اِستقبال کیتا ،کیوں جو اُنہاں یروشلیم ءچ عید دے دوران اُوندے سارے کماں کُوں ڈِٹھا ہا جیہڑے اُونیں کیتے ہَن ۔

‏46 بس اوہ وَل گلیل دے دیہات قانا ءچ آیا جِتھاں اُونیں پانڑی کُوں مَے بنڑایا ہا تے بادشاہ دا ہِک ملازم ہا جِیندا پوتر کفرنحُوم ءچ بیمار ہا ۔ ‏47 اوہ ایہہ سُنڑ تے جو یسُوع یہُودیہ تُوں گلیل ءچ آ گِیا ہے ، اُوندے کولھ گِیا تے اُونکُوں درخاست کرݨ لگا جو میڈا پوتر مَرݨ دے نیڑے ہے تُوں وَنج تے اُونکُوں شِفا ڈے ۔ ‏48 یسُوع اُونکُوں آکھیا جئیں تَئیں تُساں لوک نشان تے عجیب کَم نہ ڈیکھ گِھنو ، اَصلُوں اِیمان نہ گِھن آسو ۔

‏49 بادشاہ دے ملازم اُونکُوں آکھیا اے خُداوند ! میڈے پوتر دے مَرݨ تُوں پہلے چل۔

‏50 یسُوع اُونکُوں جواب ڈِتا وَنج تیڈا پوتر زندہ رَہسی ۔اُوں شخص اُوں گالھ دا یقین کیتا جیہڑی یسُوع اُونکُوں آکھی ہئی تے چلیا گِیا ۔ ‏51 اوہ رستے ءچ ای ہا جو اُوندے نوکر اُونکُوں مِلے تے آکھنڑ لگے جو تیڈا پوتر زندہ ہے ۔

‏52 اُونیں اُنہاں کنُوں پُچھیا جو اُونکُوں کیہڑے وَیلے آرام تھیوݨ پیا ہا ؟ اُنہاں ڈسایا جو اُوندا بخار سَتویں گھنٹے^b دے نیڑے لہہ گِیا ہا ۔ ‏53 وَل پیُو جانڑ گِیا جو اُوہووقت ہا جِیں وَیلے یسُوع اُونکُوں آکھیا ہا جو تیڈا پوتر زندہ رَہسی تے اوہ خود تے اُوندا سارا گھرانہ اِیمان گِھن آیا ۔

‏54 ایہہ ڈوجھا معجزہ ہا جیہڑا یسُوع نیں یہُودیہ تُوں گلیل ءچ آ تے ڈِکھایا ۔