‏7 اُوں بیمار نیں جواب ڈِتا اے مالک ! جیہڑے وَیلے پانڑی ہَلایا ویندے تاں میڈا کوئی نئیں جیہڑا حَوض ءچ لہاوݨ کیتے میڈی مدد کر سگے بلکہ میڈے حَوض تَئیں ویندے ویندے کوئی بیا اُوندے ءچ لہہ ویندے ۔

‏8 یسُوع اُونکُوں آکھیا اُٹھی تے آپنڑا بسترا چا تےٹُر پھر ۔ ‏9 اوہ آدمی فوراً ٹھیک تھی گِیا تے آپنڑا بسترا چا تے ٹُرݨ پھرݨ لگ پیا ۔

اوہ سَبت دا ڈینہہ ہا ۔ ‏10 بس یہُودی اُوں آدمی کُوں جیہڑا ٹھیک تھی گِیا ہا آکھنڑ لگے جو اَج سَبت دا ڈینہہ ہے، تیکُوں تیڈا بسترا چا تے ٹُرݨ پِھرݨ جائز نئیں ^a۔

‏11 اُوں جواب ڈِتا جَئیں آدمی میکُوں شِفا بخشی اُونیں میکُوں آکھیا ہا جو آپنڑا بسترا چا تے ٹُر پھر ۔

‏12 اُنہاں اُونکُوں پُچھیا جو اوہ کوݨ ہے جَئیں تیکُوں بسترا چا تےٹُرݨ پھرݨ دا آکھیا ہے ؟

‏13 پَر شِفا پاوݨ آلے آدمی کُوں پتا نہ ہا جو اُونکُوں آکھنڑ آلا کوݨ ہا کیوں جو یسُوع بِھیڑ دے سببّوں اَگُوں نِکل گِیا ہا ۔

‏14 اِیندے بعد اوہ یسُوع کُوں ہیکل ءچ مِلیا ۔ اُونیں اُونکُوں آکھیا ڈیکھ تُوں ٹھیک تھی گئیں ، وَل گُناہ نہ کریں ۔ اِیویں نہ تھیوے جو تَیں اُتے اِیں کنُوں وی وَڈی آفت آوے ۔

‏15 اُوں وَنج تے یہُودیاں کُوں ڈسایا جو جَئیں میکُوں شِفا ڈِتی ہے اوہ یسُوع ہے ۔ ‏16 اِیں واسطے یہُودی یسُوع کُوں ستاوݨ لگے کیوں جو اوہ ایجھے کَم سَبت دے ڈینہہ کریندا ہا ۔ ‏17 پَر یسُوع اُنہاں کُوں آکھیا جو میڈا باپ ہُنڑ تَئیں آپنڑا کَم کریندے تے میں وی کریندا ہاں ۔

‏18 اِیں وجہ کنُوں یہُودی اُونکُوں قتل کرݨ دی زیادہ کوشش کرݨ لگے کیوں جو اوہ نہ صرف سَبت دے حکم دی خِلاف ورزی کریندا بلکہ خُدا کُوں خاص آپنڑا باپ آکھ تے آپنڑے آپ کُوں خُدا دے برابر بنڑیندا ہا ۔

‏19 بس یسُوع اُنہاں کُوں ایہہ جواب ڈِتا میں تُہاکُوں سچ آہدھا ہاں جو پوتر آپنڑیں مَنشا نال کُجھ نئیں کر سگدا ،اوہ اُوہو کریندے جیہڑا اوہ آ پنڑے باپ کُوں کریندا ڈیدھے ، کیوں جو جیہڑے کَم اوہ کریندے پوتر وی اُونویں ای کریندے ۔ ‏20 کیوں جو باپ پوتر کُوں پیار کریندے تے آپنڑے سارے کَم جیہڑے اوہ کریندے اُونکُوں ڈکھیندا ہے بلکہ اِنہاں کنُوں وی وَڈے وَڈے کَم اُونکُوں ڈکھیسی ، تاں جو تُساں حیران تھی وَنجو ۔ ‏21 کیوں جو جیویں باپ مُردیاں کُوں چَیندے تے زندگی ڈیندے ، اُونویں ای پوتر وی جِنہاں کُوں چاہندے زندگی ڈیندے ۔ ‏22 باپ کہیں دی عدالت نئیں کریندا بلکہ اُونیں عدالت دا سارا کَم پوتر کُوں ڈے ڈِتے ‏23 تاں جو سبھ لوک پوتر دی وی عزت کرݨ جیویں باپ دی عزت کریندے ہِن ۔جیہڑا پوتر دی عزت نئیں کریندا اوہ باپ دی وی جَئیں پوتر کُوں بھیجیا ہے ، عزت نئیں کریندا ۔

‏24 میں تُہاکُوں سچ آہدھا ہاں جو جیہڑا میڈا کلام سُنڑدے تے میڈے بھیجنڑ آلے دا یقین کریندے ، ہمیشاں دی زندگی اُوندی ہے تے اُوندے اُتے سزا دا حکم نئیں تھیندا بلکہ اوہ موت کنُوں بچ تے زندگی ءچ داخل تھی گِیا ہے ۔ ‏25 میں تُہاکُوں سچ آہدھا ہاں جو اوہ وقت آندا پئے بلکہ آ گِیا ہے جِیں وَیلے مُردے خُدا دے پوتر دی آواز سُنڑسن تے جیہڑے سُنڑسن اوہ زندہ رہسن ‏26 کیوں جو جیویں باپ آپنڑے آپ ءچ زندگی رکھیندے اُونویں ای اُونیں پوتر کُوں وی ایہہ بخشیا جو آپنڑے ءچ زندگی رکھے ‏27 بلکہ اُونیں اُونکُوں عدالت کرݨ دا وی اِختیار بخشیا ، کیو ں جو اوہ ابن ِآدم ہے ۔ ‏28 اِیں گالھ کنُوں حیران نہ تھیؤ، کیوں جو اوہ وقت آندا پیا ہے جو جِتی قبراں ءچ ہِن ،اُوندی آواز سُنڑ تے نِکل آسن ۔ ‏29 جِنہاں نیکی کیتی ہے اوہ قیامت دے ڈینہہ زندگی پے سن تے جِنہاں بُرائی کیتی ہے اوہ قیامت دے ڈینہہ سزا پے سن۔

‏30 میں آپنڑے آپ کنُوں کُجھ نئیں کر سگدا ، جیویں سُنڑدا ہاں عدالت کریندا ہاں۔ تے میڈی عدالت سچی ہے کیوں جو میں آپنڑیں مَنشا نئیں بلکہ آپنڑے بھیجنڑ آلے دی مَنشا چاہندا ہاں ۔

‏31 جے میں آپنڑیں گواہی خود ڈیواں تاں میڈی گواہی سچی نئیں ۔ ‏32 ہِک بِیا ہے جیہڑا میڈی گواہی ڈیندے تے میں جانڑدا ہاں جو میڈے متعلق اُوندی گواہی سچی ہے ۔ ‏33 تُساں یُوحنّا دے کولھ سنیہا بھیجیا تے اُونیں حق دی گواہی ڈِتی ‏34 پَر میں آپنڑے متعلق اِنسان دی گواہی منظور نئیں کریندا وَل وی میں ایہہ گالھیں اِیں واسطے کریندا ہاں جو تُساں نجات پاؤ۔ ‏35 یُوحنّا چمکدا تے بَلدا ہویا چراغ ہا تے تُہاکُوں کُجھ عرصے تَئیں اُوندے سوجھلے ءچ خوش رَہنڑ منظور ہا ‏36 پَر میڈے کولھ یُوحنّا دی گواہی کنُوں وَڈی گواہی موجود ہے کیوں جو جیہڑے کَم باپ میکُوں کرݨ کیتے ڈِتے یعنی جیہڑے میں کریندا ہاں اوہ میڈے گواہ ہِن جو باپ نیں میکُوں بھیجیا ہے۔ ‏37 تے باپ جَئیں میکُوں بھیجیا ہے ، خود اُونہئی میڈے حق ءچ گواہی ڈِتی ہے۔ تُساں نہ تاں کڈھائیں اُوندی آواز سُنڑی ہے نہ ای اُوندی شکل ڈِٹھی ہے، ‏38 تے اُوندے کلام کُوں آپنڑے دِلاں ءچ قائم نئیں رکھیندے کیوں جو جِینکُوں اُونیں بھیجیا ہے اُوندا یقین نئیں کریندے ۔ ‏39 تُساں خُدا دے کلام ءچ گولھیندے ہِوے کیوں جو سمجھدے ہِوے جو اُوندے ءچ تُہاکُوں ہمیشاں دی زندگی مِلدی ہے تے ایہہ اوہ ہے جیہڑا میڈی گواہی ڈیندا ہے ۔ ‏40 وَل وی تُساں زندگی پاوݨ کیتے میڈے کولھ نئیں آوݨ چاہندے ۔

‏41 میں آدمیاں کنُوں عزت نئیں چاہندا ‏42 پَر میں تُہاکُوں جانڑدا ہاں جو تُہاڈے ءچ خُدا دی محبت کائنیں ۔ ‏43 میں آپنڑے باپ دے ناں تُوں آیا ہاں تے تُساں میکُوں قبول نئیں کریندے ، پَر جے کوئی بِیا آپنڑے ای ناں کنُوں آوے تاں تُساں اُونکُوں قبول کر گِھنسو ۔ ‏44 تُساں ہِک ڈوجھے کنُوں عزت چاہندے ہِوے تے جیہڑی عزت خُدائے واحد دی طرفوں مِلدی ہے اُونکُوں حاصل کرݨ نئیں چاہندے ۔ تُساں کیویں اِیمان گِھن آ سگدے ہِوے ؟ ‏45 ایہہ نہ سمجھو جو میں باپ دے سامنڑے تُہاڈے اُتے الزام لے ساں ۔ تُہاڈے اُتے الزام لاوݨ آلا تاں ہے یعنی موسیٰ جَئیں کنُوں تُساں اُمید لائی ہے ۔ ‏46 کیوں جو جے تُساں موسیٰ دا یقین کریندے تاں میڈا وی کریندے ، اِیں واسطے جو اُونیں میڈے متعلق لکھیا ہے۔ ‏47 پَر جِیں وَیلے تُساں اُوندے لکھے گالھیں دا یقین نئیں کریندے تاں میڈے گالھیں دا کیویں یقین کریسو؟