‏7 فِلپُس نیں جواب ءچ اُونکُوں آکھیا جو اِنہاں کیتے ڈو سو دینار^a دی روٹیاں وی پوری نہ تھیسن جو ہر ہِک کُوں کُجھ مِل سگے۔

‏8 اُوندے شاگرداں ءچوں ہِک نیں، یعنی اندریاس جیہڑا شمعون پطرس دا بِھرا ہا ، اُونکُوں آکھیا ‏9 اِتھاں ہِک چھوہر ہے جِیندے کولھ جَوں دیاں پَنج روٹیاں تے ڈو مچھیاں ہِن ، پَر اِتی لوکاں ءچ اِنہاں نال کیا تھیسی؟

‏10 یسُوع آکھیا جو لوکاں کُوں بلہاؤ ۔ اُتھاں بہُوں گھاہ ہئی ، اِیں واسطے اوہ مَرد جیہڑے تقریباً پَنج ہزار ہَن ، تَلے بہہ گئے ۔ ‏11 یسُوع اوہ روٹیاں گِھدیاں تے شُکر ادا کیتا تے اُنہاں ءچ جیہڑے بیٹھے ہَن وَنڈ ڈِتیاں۔ تے اِیویں ای مچھیاں وی جِتی جِینکُوں ضرورت ہئی وَنڈ ڈِتیاں ۔ ‏12 جِیں وَیلے اوہ پیٹ بھر تے کھا چُکے تاں اُونیں آپنڑے شاگرداں کُوں آکھیا جو بچے ہوئے ٹکڑیاں کُوں جمع کر گِھنو تاں جو کُجھ وی ضائع نہ تھیوے ۔ ‏13 بس اُنہاں جَوں دیاں روٹیاں کنُوں بچے ہوئے ٹکڑیاں کُوں جمع کیتا تے اُنہاں دیاں بارہاں ٹوکریاں بھر تے چاتیاں ۔

‏14 بس جیہڑا معجزہ اُونیں ڈِکھایا ، اوہ لوک اُونکُوں ڈیکھ تے آکھنڑ لگے یقیناً اِیہو اوہ نبی ہے جیہڑا دُنیا ءچ آوݨ آلا ہا ^b۔ ‏15 بس یسُوع ایہہ معلوم کر تے جو اوہ میکُوں زبردستی بادشاہ بناوݨ چاہندے ہِن ، وَل اوہ کلھا پہاڑ دو روانہ تھی گِیا ۔

‏16 جِیں وَیلے شام تھئی تاں اُوندے شاگرد جھیل دو روانہ تھئے، ‏17 تے کشتی ءچ بہہ تے جھیل دے پا رشہر کفرنحُوم کیتے روانہ تھی گئے ۔اُوں وَیلے اَندھارا تھی گِیا ہا تے یسُوع اُنہاں دے کولھ حالی تَئیں نہ آیا ہا، ‏18 تے اَندھاری دے سببّوں جھیل ءچ چھلاں اُٹھنڑ پے گئیاں ۔ ‏19 بس جِیں وَیلے اوہ کشتی کُوں ٹوریندے ٹوریندے تَرے چار مِیل اَگُوں نِکل آئے تاں اُنہاں یسُوع کُوں جھیل اُتے ٹُردے تے کشتی دے نیڑے آندے ڈِٹھا تے ڈَر گئے، ‏20 پَر اُونیں اُنہاں کُوں آکھیا ڈرو نہ ، میں ہاں ۔ ‏21 بس اوہ اُونکُوں کشتی ءچ سوار کرݨ کیتے راضی تھی گئے تے کشتی فوراً اُوں جاہ تے پُج گئی جِتھاں اوہ وَیندے پئے ہَن ۔

‏22 ڈوجھے ڈینہہ اُوں بِھیڑ نیں جیہڑی جھیل دے پار کھڑی ہئی ایہہ ڈِٹھا جو اِتھاں ہِک کشتی دے علاوہ کوئی بئی چھوٹی کشتی نہ ہئی تے یسُوع آپنڑے شاگرداں نال کشتی اُتے سوار نہ تھیّا ہا بلکہ صرف اُوندے شاگرد چلے گئے ہَن ۔ ‏23 پَر کُجھ چھوٹی کشتیاں تِبریاس تُوں اُوں جاہ دے نیڑے آیاں جِتھاں اُنہاں نیں خُداوند دے شُکر کرݨ دے بعد روٹی کھادی ہئی ۔ ‏24 بس جِیں وَیلے بِھیڑ ڈِٹھا جو نہ تاں یسُوع اُتھاں ہے ، نہ اُوندے شاگرد تاں اوہ خود چھوٹی کشتیاں ءچ بہہ تے یسُوع کُوں گولھنڑ کیتے کفرنحُوم آئے۔

‏25 تے اُونکُوں جھیل دے پار مِل تے آکھیا اے ربّی! تُوں اِتھاں کِیں وَیلے آئیں؟

‏26 یسو ع جواب ڈِتا میں تُہاکُوں سچ آہدھا ہاں جو تُساں میکُوں اِیں واسطے نئیں گولھیندے جو میڈے معجزے ڈِٹھے بلکہ اِیں واسطے جو تُہاکُوں پیٹ بھر تے کھاوݨ کُوں روٹیاں مِلیا ہَن ۔ ‏27 فانی خوراک کیتے محنت نہ کرو بلکہ اُوندے کیتے جیہڑی ہمیشاں دی زندگی تَئیں باقی رَہندی ہے جیہڑی ابن ِآدم تُہاکُوں عطا کریسی، کیوں جو باپ یعنی خُدا نیں اُونہئی اُتے مُہر کیتی ہے ۔

‏28 بس اُنہاں اُونکُوں آکھیا جو اَساں خُدا دے کَم کرݨ کیتے کیا کروں ؟

‏29 یسُوع جواب ڈِتا خُدا دا کَم ایہہ ہے جو جِینکُوں اُونیں بھیجیا ہے ، اُوندے اُتے اِیمان گِھن آؤ۔

‏30 بس اُنہاں اُوں کنُوں پُچھیا وَل تُوں کیہڑا نشان ڈکھیندیں جِینکُوں ڈیکھ تے اَساں تیڈے اُتے اِیمان گِھن آؤں ؟ تُوں کیہڑا کَم کریندیں ؟ ‏31 ساڈے پیُو ڈاڈا نیں بیابان ءچ مَنّ کھادا اِیں واسطے لکھیا ہے جو اُونیں اُنہاں کُوں کھاوݨ کیتے اَسمان کنُوں روٹی ڈِتی ۔

‏32 یسُوع نیں اُنہاں کُوں آکھیا میں تُہاکُوں سچ آہدھا ہاں جو موسیٰ نیں تاں تُہاکُوں اَسمان تُوں اوہ روٹی نہ ڈِتی بلکہ میڈا باپ تُہاکُوں اَسمان تُوں حقیقی روٹی ڈیندا ہے ۔ ‏33 کیوں جو خُدا دی روٹی اوہ ہے جیہڑی اَسمان کنُوں لہہ تے دُنیا کُوں زندگی بخشدی ہے ۔

‏34 اُنہاں اُونکُوں آکھیا اے خُداوند ! ایہہ روٹی ہمیشاں ساکُوں ڈِتا کر ۔

‏35 یسُوع اُنہاں کُوں آکھیا زندگی دی روٹی میں ہاں ، جیہڑا میڈے کولھ آسی کڈھائیں بُھکا نہ رَہسی تے جیہڑا میڈے اُتے اِیمان گِھن آسی کڈھائیں تِرسا نہ رَہسی۔ ‏36 پَر میں تُہاکُوں آکھیا جو تُساں میکُوں ڈیکھ گِھدا ہے وَل وی اِیمان نئیں گِھن آندے ۔ ‏37 جیہڑا کُجھ باپ میکُوں ڈیندے میڈے کولھ آ ویسی تے جیہڑا کوئی میڈے کولھ آسی میں اُونکُوں ہرگز نہ کڈھیساں۔ ‏38 کیوں جو میں اَسمان کنُوں اِیں واسطے نئیں لَتھا جو آپنڑیں منشا پوری کراں بلکہ اِیں واسطے جو آپنڑے بھیجنڑ آلے دی منشا پوری کراں، ‏39 تے میڈے بھیجنڑ آلے دی منشا ایہہ ہے جو جیہڑا کُجھ اُونیں میکُوں ڈِتا ہے میں اُوندے ءچوں کہیں کُوںوَنجا نہ ڈیواں بلکہ سبھ کُوں قیامت آلے ڈینہہ وَلا زندہ کر ڈیواں ۔ ‏40 کیوں جو میڈے بھیجنڑ آلے دی منشا ایہہ ہے جو جیہڑا کوئی پوتر کُوں ڈیکھے تے اُوندے اُتے اِیمان گِھن آوے اوہ ہمیشاں دی زندگی پاوے تے میں اُونکُوں قیامت دے ڈینہہ وَلا زندہ کراں ۔

‏41 بس یہُودی اُوندے اُتے بُڑ بُڑ کرݨ لگے اِیں واسطے جو اُونیں آکھیا ہاجو جیہڑی روٹی اَسمان کنُوں لَتھی ہئی اوہ میں ہاں ۔ ‏42 تے اوہ آکھنڑ لگے جو کیا ایہہ یُوسف دا پوتر یسُوع نئیں جِیندے ماں پیُو کُوں اَساں جانڑدے ہاں ؟ ہُنڑ اوہ کیویں آہدھے جومیں اَسمان کنُوں لَتھا ہاں؟

‏43 یسُوع نیں جواب ءچ اُنہاں کُوں آکھیا آپس ءچ بُڑ بُڑ نہ کرو ، ‏44 میڈے کولھ کوئی نئیں آ سگدا جئیں تَئیں باپ جئیں میکُوں بھیجیا ہے اُونکُوں چھیک نہ گِھنے ،تے میں اُونکُوں قیامت دے ڈینہہ وَلا زندہ کریساں ۔ ‏45 نبیاں دے صحیفیاں ءچ ایہہ لکھیا ہے جو اوہ سبھ خُدا کنُوں تعلیم گِھنسن ۔ جئیں کہیں باپ تُوں سُنڑیا تے سِکھیا ہے ، اوہ میڈے کولھ آندے ۔ ‏46 ایہہ نئیں جو کہیں باپ کُوں ڈِٹھا ہے سِوا اُوندے جیہڑا خُدا دی طرفوں ہے، اُونیں ای باپ کُوں ڈِٹھا ہے ۔ ‏47 میں تُہاکُوں سچ آہدھا ہاں جو جیہڑا کوئی اِیمان گِھن آندے ، ہمیشاں دی زندگی اُوندی ہے ۔ ‏48 زندگی دی روٹی میں ہاں ۔ ‏49 تُہاڈے پیُو ڈاڈا نیں بیابان ءچ مَن کھادا تے مر گئے ۔ ‏50 ایہہ اوہ روٹی ہے جیہڑی اَسمان کنُوں لَہندی ہے تاں جو آدمی اُوں روٹی ءچوں کھاوے تے نہ مَرے ۔ ‏51 میں اوہ زندگی دی روٹی ہاں جیہڑی اَسمان کنُوں لَتھی۔ جے کوئی اِیں روٹی ءچوں کھاوے تاں ہمیشاں تَئیں زندہ رَہسی۔ ایہہ روٹی میڈا گوشت ہے جیہڑا میں ساری دُنیا دی زندگی کیتے ڈیساں ۔

‏52 بس یہُودیاں ءچ جھیڑا شروع تھی گِیا تے اوہ آکھنڑ لگے ، ایہہ آدمی کیویں ساکُوں آپنڑا گوشت کھاوݨ کیتے ڈے سگدے ؟

‏53 یسُوع اُنہاں کُوں آکھیا میں تُہاکُوں سچ آہدھا ہاں جو جِیں وَیلے تَئیں تُساں ابن ِآدم دا گوشت نہ کھاؤ تے اُوندا خون نہ پیؤ، تُہاڈے ءچ زندگی نئیں ۔ ‏54 جیہڑا میڈا گوشت کھاندے تے میڈا خون پیندے ، اُوندے ءچ ہمیشاں دی زندگی ہے تے میں اُونکُوں قیامت دے ڈینہہ وَلا زندہ کریساں ۔ ‏55 کیوں جوحقیقی کھانڑا میڈا گوشت، تے پیہوݨ کیتے حقیقی چیز میڈا خون ہے ۔^c ‏56 جیہڑا کوئی میڈا گوشت کھاندے تے میڈا خون پِیندے ، اوہ میڈے ءچ قائم رہندے تے میں اُوندے ءچ ۔ ‏57 جیویں زندہ باپ میکُوں بھیجیا تے میں باپ دی وجہ کنُوں زندہ ہاں ، اِیویں ای جیہڑا میکُوں کھاسی اوہ میڈی وجہ کنُوں زندہ رَہسی۔ ‏58 جیہڑی روٹی اَسمان کنُوں لَتھی ہے ، اِیہو ہے ۔ پیُو ڈاڈا دے وانگوں نئیں جو کھادا تے مَر گئے ۔ جیہڑا ایہہ روٹی کھاسی اوہ ہمیشاں تَئیں زندہ رَہسی۔

‏59 ایہہ گالھیں اُونیں کفرنحُوم دے ہِک عبادت خانہ ءچ تعلیم ڈیندے ہوئے آکھیاں۔

‏60 ایہہ گالھیں سُنڑ تے اُوندے شاگرداں ءچوں بہُوں ساریاں آکھیا جو ایہہ تعلیم بہُوں سخت ہے ، اِینکُوں کوݨ سُنڑ سگدے؟

‏61 یسُوع نیں ایہہ جاݨ تے جو اُوندے شاگرد اِیں گالھ اُتے آپس ءچ بُڑ بُڑ کریندےہِن ، اُنہاں کُوں آکھیا کیا تُساں اِیں کنُوں ٹھوکر کھاندے ہِوے ؟ ‏62 جے تُساں ابن ِآدم کُوں اُتے وَیندے ڈیکھسو ، جِتھاں اوہ پہلے ہا ، تاں کیا تھیسی؟ ‏63 زندہ کرݨ آلی تاں رُوح ہے ، اِنسانی طاقت کنُوں کُجھ نئیں تھی سگدا ۔ جیہڑے گالھیں میں تُہاکُوں آکھیاں ہِن ، اوہ رُوح ہِن تے زندگی وی ہِن ۔ ‏64 پَر تُساں ءچوں کُجھ ایجھے ہِن جیہڑے اِیمان نئیں گِھن آئے کیوں جو یسُوع شروع کنُوں جانڑدا ہا جو جیہڑے اِیمان نئیں گِھن آندے اوہ کوݨ ہِن تے کوݨ میکُوں پکڑویسی۔ ‏65 وَل اُونیں آکھیا اِیں واسطے میں تُہاکُوں آکھیا ہا ، جو کوئی میڈے کولھ نئیں آ سگدا جئیں تَئیں باپ اُونکُوں توفیق نہ ڈیوے ۔

‏66 اِیں تُوں اُوندے شاگرداں ءچوں بہُوں سارے اُونکُوں چھوڑ تے چلے گئے تے وَلا اُوندے نال نہ ریہے ۔ ‏67 بس یسُوع اُنہاں بارہاں کنُوں پُچھیا کیا تُساں وی وَنجنڑ چاہندے ہِوے ؟

‏68 شمعون پطرس اُونکُوں جواب ڈِتا اے خُداوند !اَساں کِیندے کولھ وَنجوں ؟ ہمیشاں دی زندگی دے گالھیں تاں تیڈے ای کولھ ہِن، ‏69 تے اَساں اِیمان گِھن آئے تے جانڑ گئے ہاں جو خُدا دا قُدُوس تُوں ای ہیں ۔

‏70 یسُوع نیں اُنہاں کُوں جواب ڈِتا کیا میں تُساں بارہاں کُوں نئیں چُنڑ گِھدا؟ تے تُساں ءچوں ہِک شیطان ہے ۔ ‏71 اُونیں ایہہ شمعون اِسکریُوتی دے پوتر یہُوداہ دے بارے ءچ آکھیا کیوں جو اِیہو جیہڑا اُنہاں بارہاں ءچوں ہا ، اُونکُوں پکڑواوݨ آلا ہا ۔