یسُوع تے اُوندے بِھرا
7
1 اِنہاں گالھیں دے بعد یسُوع گلیل ءچ پِھردا ریہا کیوں جو یہُودیہ ءچ وَنجنڑ نہ چاہندا ہا ، اِیں واسطے جو اُتھاں یہُودی اُوندے قتل دی کوشش ءچ ہَن۔ 2 تے یہُودیاں دی عِید ِ خیام a نیڑے ہئی ۔ 3 بس اُوندے بِھراواں اُونکُوں آکھیا اِتُھوں کنُوں نِکل تے یہُودیہ دے علاقے ءچ چلیا وَنج تاں جو تیڈے شاگرد وی ایہہ معجزے جیہڑے تُوں کریندیں ، ڈیکھ سگن ۔ 4 کیوں جو کوئی ایجھا نئیں جیہڑا مشہور تھیوݨ چاہندا ہووے تے لُک تے کَم کرے۔ جے تُوں اِنہاں کَماں کُوں کریندیں تاں آپنڑے آپ کُوں دُنیا اُتے ظاہر کر۔ 5 کیوں جو اُوندے بِھرا وی اُوندے اُتے اِیمان نہ گِھن آئے ہَن ۔6 بس یسُوع اُنہاں کُوں آکھیا جو میڈا تاں اَجنڑ وقت نئیں آیا پَر تُہاڈے کیتے سارا وقت ہے ۔ 7 دُنیا تُہاڈے نال عداوت نئیں رکھ سگدی پَر میڈے نال رکھیندی ہے ،کیوں جو میں اُوندے خِلاف گواہی ڈیندا ہاں جو اُوندے کَم بُرے ہِن ۔ 8 تُساں عید ءچ وَنجو ، میں اَجنڑ اِیں عید ءچ نئیں وَیندا ، کیوں جو ہُنڑ تَئیں میڈاوقت پورا نئیں تھیّا ۔ 9 ایہہ گالھیں آکھ تے اوہ گلیل دے علاقے ءچ ای ریہا ۔
یسُوع خَیمیاں دی عید دے موقع تے
10 جِیں وَیلے اُوندے بِھرا عید ءچ چلے گئے تاں اوہ خود وی گِیا ، پَر ظاہری نہ بلکہ خُفیہ۔ 11 بس یہُودی عید ءچ اُونکُوں گولھیندے تے پُچھدے پِھردے ہَن جو اوہ کِتھاں ہے ؟
12 تے لوکاں ءچ اُوندے بارے ءچ بہُوں سرگوشیاں تھیندیاں پِیا ہَن ۔ کُجھ آہدھے ہَن جو اوہ نیک آدمی ہے تے کُجھ آہدھے ہَن جو اوہ لوکاں کُوں گُمراہ کریندے ۔ 13 وَل وی یہُودی سرداراں دے ڈر تُوں کوئی اُوندے بارے ءچ کُھل تے گالھ نہ کریندا ہا ۔
14 جِیں وَیلے عید دے اَدھے ڈینہہ گزر گئے تاں یسُوع ہیکل ءچ وَنج تے تعلیم ڈیوݨ لگا ۔ 15 بس یہُودی حیران تھی تے آکھنڑ لگے جو اِیں کُوں بغیر پڑھے عِلم کِتھوں آ گِیا ؟
16 یسُوع جواب ءچ اُنہاں کُوں آکھیا میڈی تعلیم میڈی نئیں بلکہ میڈے بھیجنڑ آلے دی ہے ۔ 17 جے کوئی اُوندی مَنشا دے مطابق چلنڑ چاہوے تاں اوہ اِیں تعلیم دے بارے ءچ جاݨ گِھنسی جو خُدا دی طرفوں ہے یا میں آپنڑے کولُھوں آہدھا ہاں ۔ 18 جیہڑا آپنڑے کولُھوں کُجھ آہدھے اوہ آپنڑیں عزت چاہندے پَر جیہڑا آپنڑے بھیجنڑ آلے دی عزت چاہندے اوہ سچا ہے تے اُوندے ءچ بُرائی نئیں ۔ 19 کیا موسیٰ تُہاکُوں شریعت نئیں ڈِتی ؟تاں وی تُہاڈے ءچوں کوئی شریعت اُتے عمل نئیں کریندا ۔ تُساں کیوں میکُوں قتل کرݨ دی کوشش ءچ ہِوے ؟
20 لوکاں جواب ڈِتا تیڈے ءچ تاں کوئی بد رُوح ہے ۔ کوݨ تیڈے قتل دی کوشش ءچ ہے ؟
21 یسُوع جواب ءچ اُنہاں کُوں آکھیا میں ہِک کَم کیتے تے تُساں حیران تھیندے ہِوے۔ 22 اِیں سببّوں جو موسیٰ تُہاکُوں ختنہ دا حکم ڈِتا ہے (حالانکہ اوہ موسیٰ دی طرفوں نئیں بلکہ پیُو ڈاڈا کنُوں آندا پِیا ہے ) تُساں سَبت دے ڈینہہ آدمی دا ختنہ کریندے ہِوے ۔ 23 جِیں وَیلے سَبت دے ڈینہہ آدمی دا ختنہ کیتا وَیندے تاں جو موسیٰ دی شریعت نہ تروٹے، تاں تُساں میں کنُوں کیوں ناراض تھی گئے ہِوے جو میں ہِک آدمی کُوں سَبت دے ڈینہہ بالکل ٹھیک کر ڈِتے ؟ 24 صرف ظاہر کُوں ڈیکھ تے فیصلہ نہ کرو بلکہ اِنصاف نال کرو ۔
کیا اوہ مسیح مَوعُود ہے ؟
25 وَل کُجھ یروشلِیم دے رَہنڑ آلے آکھنڑ لگے کیا ایہہ اُوہو نئیں جِیندے قتل دی کوشش تھیندی پئی ہے ؟ 26 پَر ڈیکھو اوہ اعلانیہ اَکھیندے تے اوہ اِیں کُوں کُجھ نئیں آہدھے ۔ کیا سرداراں سَچ مَن گِھدے جو اِیہو المسیح ہے ؟ 27 اِیں آدمی کُوں تاں اَساں جانڑدے ہاں جو کِتھوں دا ہے ، پَر جِیں وَیلے المسیح ظاہر تھیسی تاں کوئی نہ جانڑسی جو اوہ کِتھوں دا ہے ۔
28 بس یسُوع ہیکل ءچ تعلیم ڈیندے وَیلے ہوکا ڈے تے آکھیا جو تُساں میکُوں وی جانڑدے ہِوے تے ایہہ وی جانڑدے ہِوے جو میں کِتھوں دا ہاں ۔ میں آپنڑے آپ کنُوں نئیں آیا پَر جئیں میکُوں بھیجیا ہے ، اوہ سچا ہے ۔ تُساں اُونکُوں نئیں جانڑدے ۔ 29 میں اُونکُوں جانڑدا ہاں اِیں واسطے جو میں اُوندی طرفوں ہاں تے اُونہئی میکُوں بھیجیا ہے ۔
30 بس اوہ اُونکُوں پکڑن دی کوشش کرݨ لگے پَر کہیں اُوندے اُتے ہَتھ نہ پایا کیوں جو اَجنڑ اُوندا وقت نہ آیا ہا ، 31 پَر بِھیڑ ءچوں بہُوں سارے اُوندے اُتے اِیمان گِھن آئے تے آکھنڑ لگے جو جِیں وَیلے المسیح آسی تاں کیا اِیں کنُوں زیادہ معجزے ڈکھیسی ، جیہڑے اِیں ڈکھائے ہِن ؟
یسُوع کُوں گرفتار کرݨ کیتے سپاہی بھیجے گئے
32 فریسیاں لوکاں تُوں سُنڑیا جو اُوندے بارے ءچ ہولے ہولے ایہہ گالھیں کریندے ہِن ۔ بس سردار کاہناں تے فریسیاں اُونکُوں پکڑن کیتے سپاہی بھیجے ۔ 33 یسُوع آکھیا میں بِیا کُجھ ڈینہاں تَئیں تُہاڈے کولھ ہاں ، وَل ،میں آپنڑے بھیجنڑ آلے دے کولھ چلیا ویساں ۔ 34 تُساں میکُوں گولھیسو پَر نہ پیسو ، تے جِتھاں میں ہاں ،تُساں نئیں آ سگدے ۔
35 یہُودی آپس ءچ آکھنڑ لگے ایہہ کِتھاں ویسی جو اَساں اُونکُوں گولھ نہ سگسوں؟ کیا اوہ اُنہاں دے کولھ جیہڑے یُونانیاں دے ءچ اِڈے اُڈے وسدے ہِن چلیا ویسی تے یُونانیاں کُوں تعلیم ڈیسی ؟ 36 ایہہ کیا گالھ ہے جیہڑی اُونیں آکھی جو تُساں میکُوں گولھیسو پَر نہ پیسو تے جِتھاں میں ہاں ، تُساں نئیں آ سگدے ؟
زندگی دے پانڑی دیاں ندیاں
37 وَل عید دے آخری ڈینہہ جیہڑا خاص ڈینہہ ہے، یسُوع کھڑا تھیّا تے ہوکا ڈے تے آکھنڑ لگا جے کوئی ترِسا ہووے تاں میڈے کولھ آوے تے پِیوے ۔ 38 جیہڑا کوئی میڈے اُتے اِیمان گِھن آسی اُوندے دِل ءچوں ، جیویں خُدا دے کلام ءچ لکھیا ہے ، زندگی دے پانڑی دیاں ندیاں وَیہہ پوسن۔ 39 اُونیں ایہہ گالھ اُوں رُوح دے بارے ءچ آکھی جیہڑا اُنہاں اِیمان گِھن آوݨ آلیاں اُتے نازل تھیوݨ آلا ہا کیوں جو رُوح القُدس اَجنڑ تَئیں نازل نہ تھیّا ہا ، اِیں واسطے جو یسُوع اَجنڑ آپنڑے جلال کُوں نہ پُجیا ہا ۔
لوکاں ءچ اِختلاف
40 بس بِھیڑ ءچوں بعض نیں ایہہ گالھیں سُنڑ تے آکھیا بیشک اِیہو اوہ نبی ہے ۔
41 کُجھ آکھیا ، ایہہ المسیح ہے تے کُجھ آکھیا کیوں ؟ کیا مسیح گلیل تُوں آسی ؟ 42 کیا خُدا دے کلام ءچ ایہہ نئیں لکھیا جو المسیح داؤد دی نسل تے بیت لحم دے دیہات ءچوں آسی ، جِتھوں دا داؤد ہا ؟ 43 بس لوکاں ءچ اُوندے سببّوں اِختلاف تھیّا 44 تے اُنہاں ءچوں کُجھ اُونکُوں پکڑن چاہندے ہَن پَر کہیں اُوندے اُتے ہَتھ نہ پایا ۔
مُعتبر تے اِقتدار آلے یہُودیاں ءچ بے اِعتقادی
45 بس سپاہی سردار کاہناں تے فریسیاں دے کولھ آئے تے اُنہاں، اُنہاں کنُوں پُچھیا جو تُساں اُونکُوں کیوں نئیں گِھن آئے ؟
46 سپاہیاں جواب ڈِتا جو اِنسان کڈھائیں ایجھا کلام نئیں کیتا ۔
47 فریسیاں اُنہاں کُوں جواب ڈِتا کیا تُساں وی اُوندے دھوکے ءچ آ گئے ؟ 48 کیا سرداراں یا فریسیاں ءچوں وی کوئی اُوندے اُتے اِیمان گِھن آئے ؟ 49 پَر ایہہ عام لوک جیہڑے شریعت کنُوں واقف نئیں لَعنتی ہِن ۔
50 نِیکُدِیمُس جیہڑا یسُوع دے کولھ پہلے آیا ہا تے اُنہاں دے ءچوں ہا ، اُونیں آکھیا 51 کیا ساڈی شریعت کہیں شخص کُوں مُجرم بنیڑیندی ہے جئیں تَئیں اُونکُوں سُنڑ تے ایہہ معلوم نہ کر گِھنے جو اوہ کیا کریندے ؟