‏7 جِیں وَیلے اوہ سوال کریندے ای وَیندے ہَن تاں اُونیں سِر چا تے اُنہاں کُوں آکھیا تُساں ءچوں جیہڑا بے گُناہ ہووے اُوہو سبھ کنُوں پہلے اُونکُوں پتھر مارے۔ ‏8 تے وَلا سِر سَٹ تے زمین اُتے اَنگل نال لکھنڑ لگ پیا ۔ ‏9 اوہ ایہہ سُنڑ تے وَڈے کنُوں چھوٹے تَئیں ہِک ہِک کر تے کِھسک گئے تے یسُوع کلھا رہ گِیا تے اوہ عورت اُتھاں اَدھ ءچ کھڑی رہ گئی ۔ ‏10 یسُوع نیں سِدھا کھڑ تے اُونکُوں پُچھیا اے عورت ! ایہہ لوک کِتھاں چلے گئے ؟ کیا کہیں تیکُوں مُجرم نئیں بنڑایا ؟

‏11 اُونیں آکھیا اے خُداوند ! کہیں نئیں ۔

یسُوع آکھیا میں وی تیکُوں سَزا نئیں سُنڑیندا ، چلی وَنج تے وَلا گُناہ نہ کریں ۔

‏12 یسُوع نیں وَلا لوکاں نال کلام کریندے ہوئے آکھیا دُنیا دا نُور میں ہاں ، جیہڑا کوئی میڈی پیروی کریندے اوہ کڈھائیں اندھارے ءچ نہ چلسی بلکہ اُونکُوں زندگی دا نُور مِل ویسی ۔

‏13 فریسیاں اُونکُوں آکھیا تُوں خود ای آپنڑے حق ءچ گواہی ڈیندیں ، تیڈی گواہی سچی نئیں ۔

‏14 یسُوع جواب ءچ اُنہاں کُوں آکھیا بھانویں میں آپ ای آپنڑیں گواہی ڈیندا ہاں تاں وَل وی میڈی گواہی سچی ہے کیوں جو میں جانڑدا ہاں جو میں کِتھوں آیا ہاں تے کِتھاں وَیندا ہاں ، پَر تُساں نئیں جانڑدے جو میں کِتھوں آندا ہاں یا کِتھاں وَیندا ہاں ۔ ‏15 تُساں ظاہری شکل دے مطابق فیصلہ کریندے ہِوے ، میں کہیں دا فیصلہ نئیں کریندا۔ ‏16 تے جے میں کہیں دا فیصلہ کراں وی تاں میڈا فیصلہ سچا ہے کیوں جو میں کلھا نئیں بلکہ باپ ، جئیں میکُوں بھیجیا ہے میڈے نال ہے۔ ‏17 تے تُہاڈی تَورَیت ءچ وی لکھیا ہے جو ڈو آدمیاں دی گواہی سچی ہوندی ہے ۔ ‏18 ہِک تاں میں خود آپنڑیں گواہی ڈیندا ہاں تے ہِک میڈا باپ میڈی گواہی ڈیندے جئیں میکُوں بھیجیا ہے ۔

‏19 اُنہاں پُچھیا تیڈا باپ کِتھاں ہے ؟

یسُوع جواب ڈِتا نہ تُساں میکُوں جانڑدے ہِوے ، نہ ای میڈے باپ کُوں۔ جے میکُوں جانڑدے تاں میڈے باپ کُوں وی جانڑدے ۔

‏20 اُونیں ہیکل ءچ تعلیم ڈیندے وَیلے ایہہ گالھیں بیت المال ءچ آکھیاں تے کہیں اُونکُوں نہ پکڑیا کیوں جو اَجنڑ اُوندا وقت نہ آیا ہا ۔

‏21 یسوع وَلا اُنہاں کُوں آکھیا میں وَیندا ہاں تے تُساں میکُوں گولھیسو تے آپنڑے گُناہاں ءچ مَرسو ۔ جِتھاں میں وَیندا ہاں ، تُساں نئیں آ سگدے ۔

‏22 بس یہُودی آکھنڑ لگے کیا اوہ آپنڑے آپ کُوں مار گھنسی ، جو اَکھیندے جِتھاں میں وَیندا ہاں تُساں نئیں آ سگدے ؟

‏23 اُونیں اُنہاں کُوں آکھیا تُساں زمین اُتے رَہنڑ آلے ہِوے پَر میں اَسمان کنُوں ہاں ، تُساں دُنیا دے ہِوے تے میں دُنیا دا نئیں ۔ ‏24 اِیں واسطے میں تُہاکُوں ڈسا ڈِتے جو تُساں آپنڑے گُناہاں ءچ مَر سو ، کیوں جو جے تُساں اِیمان نئیں گِھن آندے جو میں اُوہو ہاں^b تاں تُساں آپنڑے گُناہاں ءچ مَرسو ۔

‏25 اُنہاں اُوں کنُوں پُچھیا تُوں کوݨ ہیں ؟

یسُوع جواب ڈِتا میں اُوہو ہاں جیہڑا شروع کنُوں تُہاکُوں اَکھیندا آیا ہاں ۔ ‏26 میکُوں تُہاڈےخلاف بہُوں کُجھ آکھنڑا تے فیصلہ کرنڑا ہے پَر میڈا بھیجنڑ آلا سچا ہے تے جیہڑا کُجھ میں اُوں کنُوں سُنڑیا ہے اُوہو دُنیا کُوں اَکھیندا ہاں ۔

‏27 اوہ نہ سمجھے جو اوہ ساکُوں باپ دے بارے ءچ اَکھیندے ۔ ‏28 بس یسُوع آکھیا جِیں وَیلے تُساں ابن ِآدم کُوں اُچائی اُتے چڑھیسو^c تاں تُہاکُوں معلوم تھیسی جو میں اُوہو ہاں تے آپنڑیں طرفوں کُجھ نئیں کریندا بلکہ جیویں باپ میکُوں سِکھایا ہے اُونویں ای ایہہ گالھیں آہدھا ہاں۔ ‏29 تے جئیں میکُوں بھیجیا ہے اوہ میڈے نال ہے ،اُونیں میکُوں کلھا نئیں چھوڑیا ، کیوں جو میں ہمیشاں اُوہو کَم کریندا ہاں جیہڑا اُونکُوں پسند ہے ۔

‏30 جِیں وَیلے اوہ ایہہ گالھیں آہدھا پیا ہا تاں بہُوں سارے اُوندے اُتے اِیمان گِھن آئے ۔

‏31 بس یسُوع نیں اُنہاں یہُودیاں کُوں جیہڑے اُوندے اُتے اِیمان گِھن آئے ہَن ، آکھیا جو جے تُساں میڈے کلام اُتے قائم رہسو تاں حقیقت ءچ میڈے شاگرد ہوسو ‏32 تے سچائی کُوں جاݨ گِھنسو تے سچائی تُہاکُوں آزاد کریسی ۔

‏33 اُنہاں اُونکُوں جواب ڈِتا اَساں تاں ابرہام دی اولاد ہیں تے کڈھائیں کہیں دی غلامی ءچ نئیں ریہے ۔ تُوں کیوں آہدھیں جو تُساں آزاد کیتے ویسو ؟

‏34 یسُوع نیں اُنہاں کُوں جواب ڈِتا میں تُہاکُوں سچ آہدھا ہاں جو جیہڑا کوئی گُناہ کریندے اوہ گُناہ دا غلام ہے۔ ‏35 غلام ہمیشاں تَئیں گھر ءچ نئیں رَہندھا پَر پوتر ہمیشاں رَہندھا ہے ۔ ‏36 بس جے پوتر تُہاکُوں آزاد کریسی تاں تُساں واقعی آزاد تھیسو ۔ ‏37 میں جانڑدا ہاں جو تُساں ابرہام دی اولاد ہِوے ، وَل وی تُساں میڈے قتل دی کوشش ءچ ہِوے کیوں جو تُہاڈے دِلاں ءچ میڈا کلام جاہ نئیں پَیندا ۔ ‏38 میں جیہڑا کُجھ آپنڑے باپ دے نال ڈِٹھے ، تُہاکُوں اَکھیندا ہاں تے تُساں وی اُوہو کریندے ہِوے جیہڑا تُساں آپنڑے باپ کنُوں سُنڑیا ہے ۔

‏39 اُنہاں جواب ءچ اُونکُوں آکھیا ساڈا باپ تاں ابرہام ہے ۔

یسُوع اُنہاں کُوں آکھیا جے تُساں ابرہام دی اولاد ہوندے تاں ابرہام وانگوں کَم وی کریندے ‏40 پَر ہُنڑ تُساں میکُوں قتل کرݨ چاہندے ہِوے ، جئیں تُہاکُوں اُوہو حق گالھ ڈسائی جیہڑی خُدا کنُوں سُنڑی ۔ ابرہام تاں اِیویں کڈھائیں نہ کیتا ۔ ‏41 تُساں اُوہو کریندے ہِوے جیہڑا تُہاڈا پیُو کریندا ہا ۔ اُنہاں اُونکُوں آکھیا اَساں ناجائز اولاد نئیں ، ساڈا باپ ہِکو ہے یعنی خُدا ۔

‏42 یسُوع نیں اُنہاں کُوں آکھیا جے خُدا تُہاڈا باپ ہوندا تاں تُساں میڈے نال محبت کریندے ، اِیں واسطے جو میں خُدا ءچوں نکلیا تے آیا ہاں ۔ میں آپ خود نئیں آیا بلکہ اُونیں میکُوں بھیجیا ہے ۔ ‏43 تُساں میڈے گالھیں کیوں نئیں سمجھدے ؟ اِیں واسطے جو میڈا کلام سُنڑ نئیں سگدے ۔ ‏44 تُساں آپنڑے پیُو اِبلیس کنُوں ہِوے تے آپنڑے پیُو دیاں خواہشاں کُوں پورا کرݨ چاہندے ہِوے ۔ اوہ شروع کنُوں ای خُونی ہے تے سچائی اُتے قائم نئیں ریہا کیوں جو اُوندے ءچ سچائی نئیں ۔ جِیں وَیلے اوہ کُوڑ بُلیندا ہے تاں آپنڑیں ای آہدھے ، کیوں جو اوہ کُوڑا ہے بلکہ کُوڑ دا پیُو ہے ۔ ‏45 پَر میں جو سچ آہدھا ہاں ، تے تُساں میڈا یقین نئیں کریندے ۔ ‏46 تُہاڈے ءچوں کوݨ ہے جو میڈے ءچ گُناہ ثابت کر سگدے ؟ جے میں سچ آہدھا ہاں تاں تُساں میڈا یقین کیوں نئیں کریندے ؟ ‏47 جیہڑا خُدا دا ہوندے ، اوہ خُدا دے گالھیں سُنڑدے۔ تُساں اِیں واسطے نئیں سُنڑدے کیوں جو تُساں خُدا تُوں نئیں ۔

‏48 یہُودیاں جواب ءچ اُونکُوں آکھیا اَساں نہ آہدھے ہاسے جو تُوں سامری ہیں تے تیڈے ءچ بدرُوح ہے ؟

‏49 یسُوع جواب ڈِتا جو میڈے ءچ بدرُوح نئیں پَر میں آپنڑے باپ دی عزت کریندا ہاں تے تُساں میڈی بے عزتی کریندے ہِوے۔ ‏50 پَر میں آپنڑیں عزت نئیں چاہندا ۔ ہاں ، ہِک ہے جیہڑا چاہندے تے اُوہو فیصلہ کریندے ۔ ‏51 میں تُہاکُوں سچ آہدھا ہاں جو جیہڑا کوئی میڈے کلام اُتے عمل کریسی اوہ کڈھائیں مَوت دا مزہ نہ چکھسی ۔

‏52 یہُودیاں اُونکُوں آکھیا جو ہُنڑ ساکُوں پتا لگ گئے جو تیڈے ءچ بدرُوح ہے۔ ابرہام مَر گِیا تے نبی مَر گئے پَر تُوں آہدھیں جو جیہڑا کوئی میڈے کلام اُتے عمل کریسی اوہ کڈھائیں مَوت دا مزہ نہ چکھسی ۔ ‏53 کیا تُوں ساڈے پِیُو ابرہام تُوں وی وَڈا ہیں ، جیہڑا مَر گئے ؟ تے نبی وی مَر گئے ۔ تُوں آپنڑے آپ کُوں کیا سمجھدیں ؟

‏54 یسُوع نیں جواب ڈِتا جے میں آپنڑیں تعریف آپ کراں تاں اوہ تعریف کہیں کَم دی نئیں ، پَر میڈا باپ جِینکُوں تُساں آپنڑا خُدا آہدھے ہِوے ، اُوہو میڈی تعریف کریندے ۔ ‏55 تُساں اُونکُوں نئیں جانڑیا ، پَر میں اُونکُوں جانڑدا ہاں تے جے آکھاں جو اُونکُوں نئیں جانڑدا تاں تُہاڈے وانگوں کُوڑا ہوساں ، پَر اُونکُوں جانڑدا ہاں تے اُوندے کلام اُتے عمل کریندا ہاں ۔ ‏56 تُہاڈا پیُو ابرہام میڈا ڈینہہ ڈیکھنڑ دی تَمنا ءچ بہُوں خوش ہا تے اُونیں ڈِٹھا تے خوش تھیّا ۔

‏57 یہُودیاں اُونکُوں آکھیا تیڈی عُمر تاں حالی پَنجھاہ سال وی نئیں، وَل کیا تُوں ابرہام کُوں ڈِٹھے ؟

‏58 یسُوع نیں اُنہاں کُوں آکھیا میں تُہاکُوں سچ آہدھا ہاں جو اِیں کنُوں پہلے جو ابرہام پیدا تھئے ، میں ہاں ۔

‏59 بس ایہہ سُنڑ تے اُنہاں اُونکُوں مارݨ کیتے پتھر چاتے پَر یسُوع اُنہاں دی نظراں کنُوں بچ تے ہیکل کنُوں نِکل گِیا ۔