‏3 یسُوع نیں جواب ڈِتا جو نہ اِیں آدمی گُناہ کیتا ہا نہ اِیندے ماں پیُو ، بلکہ ایہہ اِیں واسطے تھیّا جو خُدا دے کَم اُوندے ءچ ظاہر تھیوݨ ۔ ‏4 جئیں میکُوں بھیجیا ہے اُوندا کَم ساکُوں ڈینہہ دے سوجھلے ءچ کرݨ ضرور ہے ، اوہ رات آندی پئی ہے جِیندے ءچ کوئی شخص کَم نئیں کر سگدا ۔ ‏5 جئیں تَئیں میں دُنیا ءچ ہاں ، دُنیا دا نُور ہاں ۔

‏6 ایہہ آکھ تے اُونیں زمین اُتے تُھک سَٹی تے تُھک نال مِٹی لو گِھدی تے اوہ مِٹی اَندھے دے اَکھیں اُتے لا ڈِتی ، ‏7 تے اُونکُوں آکھیا وَنج شِیلوخ ( جَیندا مطلب ہے بھیجیا ہویا ) دے حَوض ءچ دھو گِھن ۔ بس اُونیں وَنج تے دھو گِھدیاں تے سُجاکھا تھی تے وَل آیا ۔

‏8 بس ہمسایاں تے ڈوجھے لوک جنہاں پہلے اُونکُوں منگدے ڈِٹھا ہا ، آکھنڑ لگے کیا ایہہ اُوہو آدمی نئیں جیہڑا بیٹھا مَنگدا ہوندا ہا ؟

‏9 کُجھ آکھیا ایہہ اُوہو ہے ، ڈوجھیاں آکھیا نئیں بلکہ کوئی اُوندا ہم شکل ہے ۔

اُونیں آکھیا میں اُوہو ہاں ۔

‏10 بس اوہ اُونکُوں آکھنڑ لگے وَل تیڈے اَکھیں کیویں کُھل گئیاں ؟

‏11 اُونیں جواب ڈِتا جو اُوں شخص جِینکُوں یسُوع آہدھے ہِن ، مِٹی لو تے میڈے اَکھیں اُتے لائی تے آکھیا وَنج تے شِیلوخ ءچ دھو گِھن ۔ بس میں گِیا تے دھو تے سُجاکھا تھی گِیا ۔

‏12 اُنہاں اُونکُوں آکھیا اوہ کِتھاں ہے ؟

اُونیں آکھیا میں نئیں جانڑدا ۔

‏13 لوک اُوں آدمی کُوں جیہڑا پہلے اَندھا ہا ، فریسیاں دے کولھ گِھن گئے۔ ‏14 جیہڑے ڈینہہ یسُوع مِٹی لو تے اَندھے دے اَکھیں کھولیاں ہَن ، اوہ سَبت دا ڈینہہ ہا ۔ ‏15 وَل فریسیاں وی اُوں کنُوں پُچھیا تیکُوں اَکھیں دی روشنائی کیویں مِلی ؟ اُونیں اُنہاں کُوں آکھیا اُونیں میڈے اَکھیں اُتے مِٹی لائی ، وَل میں دھو گِھدا تے ہُنڑ میں سُجاکھا ہاں ۔

‏16 بس فریسیاں ءچوں کُجھ آکھنڑ لگے ایہہ آدمی خُدا دی طرفوں نئیں کیوں جو اوہ سَبت دے ڈینہہ کُوں نئیں مَنیندا ، پَر کُجھ آکھنڑ لگے جو کوئی گنہگار آدمی ایجھے معجزے کیویں ڈِکھا سگدے ؟ بس اُنہاں ءچ پُھٹ پئے گئی ۔

‏17 وَل اُنہاں اُوں اَندھے کُوں آکھیا جو جئیں آدمی تیڈے اَکھیں کھولیاں ہِن اُوندے بارے ءچ تیڈا کیا خیال ہے ؟

اُونیں جواب ڈِتا اوہ نبی ہے ۔

‏18 پَر یہُودیاں کُوں یقین نہ آیا جو ایہہ پہلے اَندھا ہا تے سُجاکھا تھی گِیا ہے ۔ جئیں تَئیں اُنہاں اُوندے ماں پیُو کُوں جیہڑا سُجاکھا تھی گِیا ہا سَڈوا تے ‏19 اُنہاں کنُوں نہ پُچھ گِھدا جو کیا ایہہ تُہاڈا پوتر ہے ، جِیندے بارے ءچ تُساں آہدھے ہِوے جو اوہ اَندھا جمیا ہا ؟ وَل اوہ ہُنڑ کیویں سُجاکھا تھی گِیا ؟

‏20 اُوندے ماں پیُو اُنہاں کُوں جواب ڈِتا اَساں جانڑدے ہاں جو ایہہ ساڈا ای پوتر ہے تے ایہہ وی جو اوہ اَندھا جمیا ہا ، ‏21 پَر ہُنڑ اوہ کیویں سُجاکھا تھی گئے ایہہ نئیں جانڑدے تے نہ ایہہ جانڑدے ہاں جو کئیں اُوندے اَکھیں کھولیاں ۔ تُساں اُوں کنُوں پُچھو ، اوہ بالغ ہے ، اوہ آپ ڈسیسی ۔ ‏22 اُوندے ماں پیُو نیں ایہہ یہُودی سرداراں دے ڈر کنُوں آکھیا ہا کیوں جو اُنہاں ایکا کر گِھدا ہا جو جیہڑا کوئی وی اُوندے المسیح ہوݨ دا اقرار کریسی ، اوہ عبادت خانہ تُوں خارج کر ڈِتا ویسی ۔ ‏23 اِیں واسطے اُوندے ماں پیُو نیں آکھیا جو اوہ بالغ ہے ، اُوندے کنُوں پُچھو ۔

‏24 بس اُنہاں اُوں آدمی کنُوں جیہڑا پہلے اَندھا ہا وَلا سَڈوایا تے آکھیا خُدا دی حمد کر^a ۔ اَساں تاں جانڑدے ہاں جو ایہہ آدمی گنہگار ہے ۔

‏25 اُونیں جواب ڈِتا میں ایہہ نئیں جانڑدا جو اوہ گنہگار ہے یا نئیں ، ہِک گالھ ضرور جانڑدا ہاں جو میں پہلے اَندھا ہم تے ہُنڑ سُجاکھا ہاں ۔

‏26 وَل اُنہاں اُوں کنُوں پُچھیا جو اُونیں تیڈے نال کیا کیتا ؟ کیویں تیڈے اَکھیں کھولیاں ؟

‏27 اُونیں اُنہاں کُوں جواب ڈِتا میں تاں تُہاکُوں پہلے ڈسا ڈِتے ، تے تُساں نئیں سُنڑیا ، وَل کیوں سُننڑ چاہندے ہِوے ؟ کیا تُساں وی اُوندے شاگرد بننڑ چاہندے ہِوے ؟

‏28 اوہ اُونکُوں بُرا بھلا آکھنڑ لگے تے آکھیا جو تُوں ای اُوندا شاگرد ہوسیں ، اَساں تاں موسیٰ دے شاگرد ہاں ۔ ‏29 اَساں جانڑدے ہاں جو خُدا موسیٰ دے نال کلام کیتا پَر اِیں آدمی کُوں نئیں جانڑدے جو ایہہ کِتھوں دا ہے ۔

‏30 اُوں آدمی جواب ءچ اُنہاں کُوں آکھیا ایہہ بہُوں عجیب گالھ ہے جو تُساں نئیں جانڑدے جو اوہ کِتھوں دا ہے بھانویں اُونیں میڈے اَکھیں کھول ڈِتیاں ۔ ‏31 اَساں جانڑدے ہاں جو خُدا گُنہگاراں دی نئیں سُنڑدا پَر جے کوئی خُدا دا خوف رکھے تے اُوندی مَنشا اُتے چلے تاں اوہ اُوندی سُنڑدے ۔ ‏32 دُنیا دے شروع کنُوں اِیویں کڈھائیں نئیں سُنڑیا جو کہیں نیں جماندرُو اَندھے کُوں روشنائی ڈِتی ہووے ۔ ‏33 جے ایہہ آدمی خُدا دی طرفوں نہ ہوندا تاں کُجھ نہ کر سگدا۔

‏34 اُنہاں جواب ءچ اُونکُوں آکھیا تُوں تاں اَصلُوں گُناہاں ءچ جمیں ، تُوں ساکُوں کیا سَکھیندیں ؟ تے اُنہاں اُونکُوں عبادت خانہ تُوں باہر کَڈھ ڈِتا ۔

‏35 یسُوع ایہہ سُنڑیا جو اُنہاں اُونکُوں باہر کَڈھ ڈِتے ، تے جِیں وَیلے اُونکُوں مِلیا تاں آکھیا کیا تُوں خُدا دے پوتر اُتے اِیمان گِھن آندیں ؟

‏36 اُونیں جواب ڈِتا اے مالک ! اوہ کوݨ ہے جو میں اُوندے اُتے اِیمان گِھن آواں ؟

‏37 یسُوع اُونکُوں آکھیا تَیں اُونکُوں ڈِٹھے تے جیہڑا تیڈے نال گالھیں کریندا پئے، اُوہو ہے ۔

‏38 اُونیں آکھیا اے خُداوند ! میں اِیمان گِھن آندا ہاں تے اُونکُوں سِجدہ کیتا ۔

‏39 یسُوع آکھیا میں دُنیا دی عدالت کرݨ آیا ہاں تاں جو جیہڑے نئیں ڈیدھے اوہ ڈیکھنڑ تے جیہڑے ڈیدھے ہِن ، اوہ اَندھے تھی وَنجنڑ۔

‏40 فریسی جیہڑے اُوندےنال ہَن ایہہ سُنڑ تے پُچھنڑ لگے ، کیا اَساں وی اَندھے ہاں ؟

‏41 یسُوع اُنہاں کُوں آکھیا جو جے تُساں اَندھے ہوندے تاں گُنہگار نہ سمجھے وَیندے ، پَر ہُنڑ جیہڑے وَیلے تُساں آہدھے ہِوے جو اَساں ڈیدھے ہاں ، تاں تُہاڈا گُناہ قائم رہندے ۔