آجڑی دی تمثیل
10
1 میں تُہاکُوں سچ آہدھا ہاں جو جیہڑا کوئی واڑے ءچ دروازے کنُوں داخل نئیں تھیندا بلکہ کہیں بئے طریقے نال اَندر آندے اوہ چور تے ڈاکو ہے ۔ 2 پَر جیہڑا دروازے کنُوں اندر آندے اوہ بھیڈاں دا آجڑی ہے ۔ 3 چوکیدار اُوندے کیتے دروازہ کھولیندے تے بھیڈاں اُوندی آواز کُوں سُنڑدیاں ہِن تے اوہ آپنڑیاں بھیڈاں کُوں اُنہاں دے ناواں نال سَڈیندے تے اُنہاں کُوں باہر گِھن وَیندے ۔ 4 جِیں وَیلے اوہ آپنڑیاں ساریاں بھیڈاں کُوں باہر کَڈھ گِھندے تاں اُنہاں دے اَگُوں اَگُوں ٹُردے تے اُوندیاں بھیڈاں اُوندے پچُھوں پچُھوں ٹُردیاں ہِن ، کیوں جو اوہ اُوندی آواز سُنجڑیندیاں ہِن ، 5 پَر اوہ کہیں غیر دے پچُھوں کڈھائیں نہ ویسن بلکہ اُوں کنُوں دُور بَھج سن کیوں جو اوہ غیراں دی آواز کُوں نئیں سُنجڑیندیاں ۔6 یسُوع اُنہاں کُوں ایہہ تمثیل سُنڑائی پَر اوہ نہ سمجھے جو اوہ اُنہاں نال کیا گالھیں کریندے ۔
یسُوع چنگا آجڑی ہے
7 بس یسُوع اُنہاں کُوں وَلا آکھیا میں تُہاکُوں سچ آہدھا ہاں جو بھیڈاں دا دروازہ میں ہاں ۔ 8 اوہ سارے جیہڑے مَیں کنُوں پہلے آئے چور تے ڈاکو ہِن ، اِیں واسطے بھیڈاں اُنہاں دی نہ سُنڑی ۔ 9 دروازہ میں ہاں ، جے کوئی میڈےءچوں داخل تھیوے تاں نجات پے سی تے اندر باہر آندا وَیندا رَہسی تے چارہ پے سی ۔ 10 چور صرف چوری کرݨ ، مار گھتنڑ تے برباد کرݨ آندے، میں اِیں واسطے آیا ہاں جو لوک زندگی پاوݨ تے کثرت نال پاوݨ ۔
11 چنگا آجڑی میں ہاں۔ چنگا آجڑی آپنڑیاں بھیڈاں کیتے جان ڈیندے ۔ 12 پَر مَزدور جیہڑا نہ تاں بھیڈاں دا آجڑی ہوندے تے نہ ای مالک ، اوہ بھیڈیے کُوں آندا ڈیکھ تے بھیڈاں کُوں چھوڑ تے بھج وَیندے تے بھیڈیا گلہ کُوں پکڑیندے تے تِتربِتر کر ڈیندے ۔ 13 اوہ اِیں واسطے بھج وَیندے کیوں جو اوہ مَزدور ہے تے اُونکُوں بھیڈاں دی فِکر نئیں ۔ 14 چنگا آجڑی میں ہاں ۔ جیویں باپ میکُوں جانڑدے ، میں باپ کُوں جانڑدا ہاں ۔ 15 اِیویں ای میں آپنڑیاں بھیڈاں کُوں جانڑدا ہاں تے اوہ میکُوں جانڑدیاں ہِن تے میں بھیڈاں کیتے آپنڑیں جان ڈیندا ہاں۔ 16 تے میڈیاں بِیا وی بھیڈاں ہِن جیہڑیاں اِیں واڑے دیاں نئیں ، میکُوں ضرور ہے جو میں اُنہاں کُوں وی گِھن آواں تے اوہ میڈی آواز سُنڑسن ۔ وَل ہِکو گلہ تے ہِک ای آجڑی ہوسی ۔
17 میڈا باپ میکُوں اِیں واسطے پیار کریندے ، جو میں آپنڑیں جان قربان کریندا ہاں تاں جو اُونکُوں وَلا گِھن گِھناں ۔ 18 اُونکُوں کوئی مَیں کنُوں کھسیندا نئیں بلکہ مَیں آپنڑیں مَنشا نال اُونکُوں قُربان کریندا ہاں ۔ میڈے کولھ اُونکُوں ڈیوݨ دا وی اِختیار ہے تے اُونکُوں وَلا گِھننڑ دا وی اِختیار ہے ۔ ایہہ حکم میکُوں میڈے باپ کنُوں مِلیا ہے ۔
19 اِنہاں گالھیں دے سببّوں یہُودیاں ءچ وَل پُھٹ پئے گئی ۔ 20 اُنہاں ءچوں بہُوں سارے تاں آکھنڑ لگے جو اُوندے ءچ بدرُوح ہے تے اوہ دیوانہ ہے ۔ تُساں اُوندی کیوں سُنڑدے ہِوے ؟
21 بئیاں آکھیا ایہہ ایجھے شخص دے گالھیں نئیں جِیندے ءچ بدرُوح ہووے ۔ کیا کوئی بدرُوح اَندھیاں دے اَکھیں کھول سگدی ہے ؟
یسُوع کُوں رَد کیتا وَیندے
22 یروشلِیم ءچ مخصوصیت دی عیدa ہئی تے سِیالا ہا۔ 23 یسُوع ہیکل ءچ سُلیمانی برانڈے ءچ ٹہلدا پِیا ہا ۔ 24 بس یہُودی اُوندے چودھارُوں جمع تھی تے آکھنڑ لگے تُوں کَڈھاں تَئیں ساکُوں شک ءچ رکھیسیں ؟جے تُوں المسیح ہیں تاں ساکُوں صاف صاف ڈسا۔
25 یسُوع جواب ڈِتا جو میں تاں تُہاکُوں ڈسا ڈِتے پَر تُساں میڈا یقین ای نئیں کریندے ۔ میں جیہڑے کَم کریندا ہاں آپنڑے باپ دے ناں نال کریندا ہاں ، اُوہو میڈے گواہ ہِن ، 26 پَر تُساں اِیں واسطے یقین نئیں کریندے کیوں جو تُساں میڈیاں بھیڈاں ءچوں نئیں ۔ 27 میڈیاں بھیڈاں میڈی آواز سُنڑدیاں ہِن تے میں اُنہاں کُوں جانڑدا ہاں تے اوہ میڈے پچُھوں پچُھوں ٹُردیاں ہِن ۔ 28 میں اُنہاں کُوں ہمیشاں دی زندگی ڈیندا ہاں تے اوہ کڈھائیں ہلاک نہ تھیسن تے کوئی اُنہاں کُوں میڈے ہَتھ کنُوں کَھس نہ سگسی ۔ 29 میڈا باپ جئیں اُنہاں کُوں میڈے سپُرد کیتے ساریاں کنُوں وَڈا ہے تے کوئی اُنہاں کُوں میڈے باپ دے ہَتھ کنُوں نئیں کَھس سگدا ۔ 30 میں تے میڈا باپ ہِکو ہاں ۔
31 یہُودیاں وَلا اُونکُوں سنگسار کرݨ کیتے پتھر چاتے ۔ 32 تاں یسُوع اُنہاں کُوں آکھیا جو میں تُہاکُوں آپنڑے باپ دی طرفوں وَڈے وَڈے کَم ڈِکھائے ہِن ، تُساں اُنہاں ءچوں میکُوں کیہڑے کَم دی وجہ کنُوں سنگسار کریندے ہِوے ؟
33 یہُودیاں اُونکُوں جواب ڈِتا جو چنگے کَم دی وجہ کنُوں نئیں بلکہ کُفر دے سببّوں سنگسار کریندے ہیں کیوں جو تُوں محض اِنسان ہوندے ہوئے آپنڑے آپ کُوں خُدا بنڑیندیں ۔
34 یسُوع اُنہاں کُوں جواب ڈِتا کیا تُہاڈی شریعت ءچ خُدا نیں ایہہ نئیں آکھیا جو تُساں خُدا ہِوےb؟ 35 جِیں وَیلےاُونیں اُنہاں کُوں خُدا آکھیا جنہاں کولھ اُوندا کلام آیا تے کِتاب ِ مُقدّس غلط نئیں تھی سگدی ، 36 تاں تُساں اُوں شخص دے بارے ءچ جِینکُوں باپ مُقرر کر تے دُنیا ءچ بھیجیا ، کیویں اَکھیندے ہِوے جو تُوں کُفر بُلیندا ہیں ، اِیں واسطے جو میں آکھیا میں خُدا دا پوتر ہاں ؟ 37 جے میں آپنڑے باپ دے کَم نہ کراں تاں میڈا یقین نہ کرو ، 38 پَر جے میں کریندا ہاں تاں بھانویں میڈا یقین نہ کرو پَر اُنہاں کَماں دا یقین تاں کرو تاں جو جاݨ گِھنو تے سمجھ گِھنو جو باپ میڈے ءچ ہے تے میں باپ ءچ ۔
39 اُنہاں وَلا اُونکُوں پکڑن دی کوشش کیتی پَر اوہ اُنہاں دے ہَتُھوں نِکل گِیا ۔
40 اوہ وَل یردن دے پار اُو ں جاہ اُتے چلیا گِیا جِتھاں یُوحنّا شروع ءچ بپتسمہ ڈیندا ہا تے اُتھائیں ریہا۔ 41 تے بہُوں سارے لوک اُوندے کولھ آئے تے آکھنڑ لگے یُوحنّا تاں کوئی معجزہ نئیں ڈِکھایا پَر جیہڑا کُجھ یُوحنّا اِیندے بارے ء چ آکھیا ہا اوہ سچ ہا۔ 42 تے اُتھاں بہُوں سارے اُوندے اُتے اِیمان گِھن آئے ۔