‏4 یسُوع ایہہ سُنڑ تے آکھیا جو ایہہ بیماری مَوت کیتے نئیں بلکہ خُدا دا جلال ظاہر کرݨ کیتے ہے تاں جو اِیندے ذریعے خُدا دے پوتر دا جلال ظاہر تھیوے ۔

‏5 تے یسُوع مَرتھا تے اُوندی بھینڑ مریم تے لعزر نال محبت رکھیندا ہا ۔ ‏6 بس جِیں وَیلے اُونیں سُنڑیا جو اوہ بیمار ہے تاں جِتھاں ہا اُتھائیں ڈو ڈینہہ بئے ٹِک پیا ۔ ‏7 وَل ایندے بعد شاگرداں کُوں آکھیا آؤ وَلا یہُودیہ کُوں جُلوں ۔

‏8 شاگرداں اُونکُوں آکھیا اے ربّی! کُجھ ڈینہہ پہلے تاں یہُودی تیکُوں سنگسار کرݨ چاہندے ہَن تے وَلا وی تُوں اُتھاں وَنجنڑ چاہندا ہیں ؟

‏9 یسُوع جواب ڈِتا کیا ڈینہہ ءچ بارہاں گھنٹے نئیں ہوندے ؟ جیہڑا آدمی ڈینہہ ءچ چلدے ، تُھڈا نئیں کھاندا، اِیں واسطے جو اوہ دُنیا دے سوجھلے کُوں ڈیدھے، ‏10 پَر جے اوہ رات دے وَیلے چلدے تاں اَندھارے دی وجہ کنُوں تُھڈا کھاندے ، کیوں جو اُوندے ءچ سوجھلا نئیں ۔ ‏11 اُونیں ایہہ گالھیں آکھیا ں تے اِیندے بعد اُنہاں کُوں آکھنڑ لگا جو ساڈا دوست لعزر سَم گِیا ہے پَر میں اُونکُوں نیندر کنُوں جگاوݨ وَیندا پیا ہاں ۔

‏12 بس شاگرداں اُونکُوں آکھیا اے خُداوند!جے اوہ سَم گِیا ہے تاں چنگا تھی ویسی۔

‏13 یسُوع نیں تاں لعزر دی مَوت دے بارے ءچ آکھیا ہا پَر اُنہاں سمجھیا جو اوہ سکون دی نیندر دی گالھ کریند ے ۔ ‏14 وَل یسُوع اُنہاں کُوں صاف لفظاں ءچ ڈسایا جو لعزر مَر گِیا ہے ‏15 تے میں تُہاڈے سببّوں خوش ہاں جو اُتھاں نہ ہم تاں جو تُساں اِیمان گِھن آؤ، پَر آؤ اَساں اُوندے کولھ جُلوں ۔

‏16 وَل توما جِینکُوں جُڑواں آہدھے ہَن باقی شاگرداں کُوں آکھنڑ لگا جو آؤ اَساں وی جُلوں تاں جو اُوندے نال مَروں ۔

‏17 اُتھاں پُج تے یسُوع کُوں معلوم تھیّا جو لعزر کُوں قبر ءچ رکھے چار ڈینہہ تھی گئے ہِن ۔ ‏18 بیت عنیاہ یروشلِیم کنُوں تقریباً ڈو مِیل دے فاصلے اُتے ہا ‏19 تے بہُوں سارے یہُودی مَرتھا تے مریم کُوں اُوندے بِھرا دے بارے تسلی ڈیوݨ آئے ہَن ۔

‏20 بس مَرتھا یسُوع دے آوݨ دی خبر سُنڑ تے اُونکُوں مِلنڑ کیتے باہر نکلی پَر مریم گھر ءچ ای ریہی۔ ‏21 مَرتھا یسُوع کُوں آکھیا اے خُداوند! جے تُوں اِتھاں ہوندا تاں میڈا بِھرا نہ مَردا ، ‏22 تے میں جانڑدی ہاں جو ہُنڑ وی تُوں خُدا کنُوں جیہڑا کُجھ منگسیں اوہ تیکُوں ڈیسی ۔

‏23 یسُوع اُونکُوں آکھیا تیڈا بِھرا وَلا زندہ تھی ویسی ۔

‏24 مَرتھا جواب ڈِتا میں جانڑدی ہاں جو اوہ قیامت دے ڈینہہ زندہ تھی ویسی ۔

‏25 یسُوع اُونکُوں آکھیا قیامت تے زندگی تاں میں ہاں ، جیہڑا میڈے اُتے اِیمان گِھن آندےبھانویں اوہ مَر وی وَنجے، وَلا وی زندہ رَہسی، ‏26 تے جیہڑا کوئی زندہ ہے تے میڈے اُتے اِیمان گِھن آندے اوہ کڈھائیں نہ مَرسی۔ کیا تُوں اِیں گالھ اُتے اِیمان رکھیندی ہیں ؟

‏27 اُونیں اُونکُوں آکھیا ہاں اے خُداوند! میڈا اِیمان ہے جو خُدا دا پوتر المسیح جیہڑا دُنیا ءچ آوݨ آلا ہا تُوں ای ہیں ۔

‏28 ایہہ گالھ آکھ تے مَرتھا چلی گئی تے آپنڑیں بھینڑ مریم کُوں اَنج سَڈ تے آکھنڑ لگی جو اُستاد آ گئے تے تیکُوں سَڈیندے۔ ‏29 اوہ سُنڑدے ای فوراً اُٹھی تے اُوندے کولھ آئی ۔ ‏30 (یسُوع حالی دیہات ءچ داخل نہ تھیّا ہا بلکہ اُوہو جاہ اُتے ہا جِتھاں مَرتھا اُونکُوں مِلی ہئی)۔ ‏31 بس یہُودی جیہڑے گھر ءچ مریم کُوں تَسلی ڈیندے پئے ہَن ایہہ ڈیکھ تے جو مریم جلدی نال اُٹھی تے باہر گئی ہے ، اِیں خیال نال اُوندے پچُھوں ٹُر پئے جو اوہ قبر اُتے روݨ وَیندی پئی ہے ۔

‏32 جِیں وَیلے مریم اُوں جاہ اُتے پُجی جِتھاں یسُوع ہا تاں اُونکُوں ڈیکھ تے اُوندے پیراں ءچ ڈھے تے آکھیا اے خُداوند ! جے تُوں اِتھاں ہوندا تاں میڈا بِھرا نہ مَردا ۔

‏33 جِیں وَیلے یسُوع اُونکُوں تے یہُودیاں کُوں جیہڑے اُوندے نال آئے ہَن ، روندے ڈِٹھا تاں دِل ءچ بہُوں ڈُکھی تھیّا تے گھبرا تے آکھیا ‏34 تُساں اُونکُوں کِتھاں رکھیا ہے ؟

اُنہاں آکھیا اے خُداوند ! ساڈے نال آ تے خود ڈیکھ گِھن ۔

‏35 یسُوع دے اَکھیں ءچ ہنجُو آ گئے ۔ ‏36 بس یہُودی آکھنڑ لگے ڈیکھو اوہ اُونکُوں کتنا عزیز ہا ۔

‏37 پَر اُنہاں ءچوں کُجھ نیں آکھیا کیا ایہہ شخص جئیں اَندھے دے اَکھیں کھولیاں ، اتنا وی نہ کر سگیا جو ایہہ آدمی نہ مَردا ؟

‏38 یسُوع بہُوں ڈُکھی دِل نال قبر اُتے آیا ۔ اوہ ہِک غار ہا تے اُوندے اَگُوں ہِک پتھر رکھیا ہویا ہا ۔ ‏39 یسُوع آکھیا پتھر کُوں ہٹا ڈیوو۔

مَرتھا نیں جیہڑی موئے شخص دی بھینڑ ہئی ، اُونکُوں آکھیا اے خُداوند ! اُوندے ءچوں تاں ہُنڑ بد بُو آندی ہے کیوں جو اُونکُوں موئے ہوئے چار ڈینہہ تھی گئے ہِن ۔

‏40 یسُوع اُونکُوں آکھیا کیا میں تیکُوں نہ آکھیا ہا جو جے تُوں اِیمان گِھن آسیں تاں خُدا دا جلال ڈیکھسیں ؟ ‏41 بس اُنہاں پتھر کُوں پَرے ہَٹا ڈِتا ۔ وَل یسُوع اَکھیں اُتے چا تے آکھیا اے باپ !میں تیڈا شُکر کریندا ہاں جو تُوں میڈی سُنڑ گِھدی۔ ‏42 میں جانڑدا ہاں جو تُوں ہمیشاں میڈی سُنڑدا ہیں پَر میں اِنہاں لوکاں دی خاطر جیہڑے اِتھاں کھڑے ہِن، ایہہ آکھیا تاں جو اوہ اِیمان گِھن آوݨ جو تَیں ای میکُوں بھیجیا ہے۔ ‏43 ایہہ آکھنڑ دے بعد اُونیں اُچی آواز ءچ سَڈیا جو اے لعزر باہر نِکل آ ۔ ‏44 جیہڑا مَر گِیا ہا اوہ کفن نال ہَتھ پیر بَدھے ہوئے نِکل آیا تے اُوندا مُنہ رومال نال وَلھیٹیا پیا ہا ۔یسُوع اُنہاں کُوں آکھیا اُونکُوں کھول تے وَنجنڑ ڈیوو۔

‏45 بس بہُوں سارے یہُودی جیہڑے مریم دے کولھ آئے ہَن تے جنہاں یسُوع دا ایہہ کَم ڈِٹھا ، اُوندے اُتے اِیمان گِھن آئے ، ‏46 پَر اُنہاں ءچوں کُجھ نیں فریسیاں دے کولھ وَنج تے اُنہاں کُوں یسُوع دے کَماں دی خبر ڈِتی ۔ ‏47 بس سردار کاہناں تے فریسیاں نیں صدرِ عدالت دا اَکٹھ کیتا تے آکھنڑ لگے اَساں کیا کریندے ہیں ؟ ایہہ آدمی تاں بہُوں معجزے کریندا ہے ۔ ‏48 جے اَساں اُونکُوں اِیویں چھوڑ ڈِیوؤں تاں سبھ اُوندے اُتے اِیمان گِھن آسن تے رُومی اِتھاں آ تے ساڈی جاہ تے ساڈی قوم ڈوہائیں کُوں برباد کر ڈیسن ۔

‏49 اُنہاں ءچوں ہِک آدمی جِیندا ناں کائفا ہا تے جیہڑا اُوں سال سردار کاہن ہا ، آکھنڑ لگا تُساں کُجھ نئیں جانڑدے، ‏50 تے نہ سوچیندے ہِوے جو ساڈے کیتے ایہہ چنگا ہے جو قوم دی خاطر ہِک شخص مار ڈِتا وَنجے نہ جو ساری قوم برباد تھیوے ۔ ‏51 پَر اُونیں ایہہ آپنڑیں طرفوں نئیں بلکہ اُوں سال دے سردار کاہن دی حیثیت نال نبوت کیتی ہئی جو یسُوع پوری قوم کیتے آپنڑیں جان ڈیسی۔ ‏52 تے نہ صرف یہُودی قوم کیتے بلکہ اِیں واسطے وی جو خُدا دے فرزنداں کُوں جیہڑے تِتر بِتر تھی گئے ہَن جمع کر تے ہِکو بنڑا ڈیوے ۔

‏53 بس اوہ اُونہئی ڈینہہ تُوں اُوندے قتل دا منصوبہ بناوݨ لگے ۔ ‏54 اِیں واسطے یسُوع نیں یہُودیاں ءچ سرِعام گھُمنڑ پھرݨ چھوڑ ڈِتا تے بیابان دے نیڑے دے علاقے ءچ اِفرائیم ناں دے شہر دو چلیا گِیا تے اُتھاں آپنڑے شاگرداں دے نال رہنڑ لگا ۔

‏55 جِیں وَیلے یہُودیاں دی عید ِ فسح نیڑے ہئی تاں بہُوں سارے لوک دیہات دے علاقیاں کنُوں یروشلِیم گئے تاں جو عید ِ فسح کنُوں پہلے آپنڑے آپ کُوں پاک کرݨ ۔ ‏56 بس اوہ یسُوع کُوں گولھنڑ تے ہیکل ءچ جمع تھی تے ہِک بئے کُوں آکھنڑ لگے تیڈا کیا خیال ہے؟کیا اوہ عید ءچ نہ آسی ؟ ‏57 تے سردار کاہناں تے فریسیاں حکم ڈِتا ہویا ہا جو جے کہیں کُوں معلوم تھیوے جو اوہ کِتھاں ہے تاں اوہ فوراً اطلاع ڈیوے تاں جو اُونکُوں گرفتار کر سگوں ۔