‏2 تے شام دے کھانڑے دا وَیلہ ہا اِبلیس پہلے ای شمعون دے پوتر یہُوداہ اِسکریُوتی دے دِل ءچ اُونکُوں پکڑوا ڈیوݨ دا خیال پا ڈِتا ہا ۔ ‏3 یسُوع ایہہ جاݨ تے جو باپ نیں ساریاں چیزاں میڈے ہَتھ ءچ کر ڈِتیاں ہِن تے میں خُدا دے کولُھوں آیا تے خُدا ای دے کولھ وَیندا ہاں ‏4 تاں دسترخوان تُوں اُٹھی تے آپنڑا چولا لہا ڈِتا تے ہِک تولیہ گِھن تے آپنڑیں کمر نال بَدھیا ۔ ‏5 اِیں دے بعد اُونیں ہِک تھاں ءچ پانڑی گھتیا تے آپنڑے شاگرداں دے پیر دھوتے ، تے جیہڑا رومال آپنڑیں کمر نال بَدھیا ہا اُوندے نال پونجھنڑ شروع کیتے ۔ ‏6 وَل اوہ شمعون پطرس تَئیں پُجیا ۔ اُونیں اُونکُوں آکھیا اے خُداوند !کیا تُوں میڈے پیر دھوندیں ؟

‏7 یسُوع جواب ءچ اُونکُوں آکھیا جیہڑا کُجھ میں کریندا ہاں تُوں اُونکُوں ہُنڑ نئیں جانڑدا پَر بعد ءچ جاݨ ویسیں ۔

‏8 پطرس اُونکُوں آکھیا تُوں میڈے پیر کڈھائیں نہ دھوسیں ۔

یسُوع نیں اُونکُوں جواب ڈِتا جو جے میں تیکُوں نہ دھوواں تاں تیڈی میڈے نال کوئی شراکت نئیں ۔

‏9 شمعون پطرس اُونکُوں آکھیا اے خُداوند ! صرف میڈے پیر ای نئیں بلکہ ہَتھ تے سِر وی دھو ڈے ۔

‏10 یسُوع اُونکُوں آکھیا جئیں دھا گِھدے اُونکُوں پیراں دے سِوا بِیا کُجھ دھووݨ دی ضرورت نئیں بلکہ اوہ بالکل پاک ہے، تے تُساں پاک ہِوے پَر سارے نئیں ۔ ‏11 (کیوں جو اُوں کُوں معلوم ہا جو کوݨ اُونکُوں پکڑویسی ، اِیں واسطے اُونیں آکھیا جو تُساں یکے پاک نئیں )۔

‏12 جِیں وَیلے اُونیں اُنہاں دے پیر دھو گِھدے تاں آپنڑے کپڑے پا تے آپنڑیں جاہ تے وَل بہہ گِیا تاں اُنہاں کُوں آکھیا میں تُہاڈے نال جیہڑا کُجھ کیتے ، کیا تُساں اُوندا مطلب سمجھدے ہِوے؟ ‏13 تُساں میکُوں اُستاد تے خُداوند آہدھے ہِوے تے تُہاڈا آکھنڑ ٹھیک ہے کیوں جو میں ہاں ۔ ‏14 بس جِیں وَیلے میں تُہاڈے اُستاد تے خُداوند نیں تُہاڈے پیر دھوتے تاں تُہاڈا وی فرض ہے جو ہِک ڈوجھے دے پیر دھوتا کرو۔ ‏15 کیوں جو میں تُہاکُوں ہِک نمونہ ڈِتے جو جیویں میں کیتا تُساں وی کرو ۔ ‏16 میں تُہاکُوں سچ آہدھا ہاں جو کوئی نوکر آپنڑے مالک کنُوں وَڈا نئیں ہوندا تے نہ ای کوئی بھیجیا ہویا آپنڑے بھیجنڑ آلے کنُوں ۔ ‏17 جے تُساں اِنہاں گالھیں کُوں جانڑدے ہِوے تاں مُبارک ہِوے پَر شرط ایہہ ہے جو اُنہاں اُتے عمل وی کرو ۔

‏18 میں تُساں ساریاں دے بارے ءچ نئیں آہدھا ، جنہاں کُوں میں چُنڑیا ہے میں اُنہاں کُوں جانڑدا ہاں۔ پَر ایہہ اِیں واسطے تھیّا تاں جو کلام دی گالھ پوری تھیوے جو جیہڑا میڈی روٹی کھاندے اُوہو میڈے اُتے لَت چَیندے ۔ ‏19 ہُنڑ میں اُوندے تھیوݨ تُوں پہلے ای تُہاکُوں ڈسا ڈیندا ہاں تاں جو جِیں وَیلے ایہہ تھی وَنجے تاں تُساں اِیمان گِھن آؤ جو میں اُوہو ^aہاں ۔ ‏20 میں تُہاکُوں سچ آہدھا ہاں جو جیہڑا میڈے بھیجے ہوئے کُوں قبول کریندے اوہ میکُوں قبول کریندے تے جیہڑا میکُوں قبول کریندے اوہ میڈے بھیجنڑ آلے کُوں قبول کریندے ۔

‏21 اِنہاں گالھیں دے بعد یسُوع آپنڑے دِل ءچ بہُوں گھبرایا تے ایہہ گواہی ڈِتی جو میں تُہاکُوں سچ آہدھا ہاں جو تُساں ءچوں ہِک شخص میکُوں پکڑویسی ۔

‏22 شاگرد ہِک بئے کُوں شک دی نگاہ نال ڈیکھنڑ لگے جو اوہ کِیندے متعلق آہدھے ۔ ‏23 اُوندے شاگرداں ءچوں ہِک شخص جِینکُوں یسُوع عزیز رکھیندا ہا ، دسترخوان اُتے اُوندے پاسوں جِھکا تھی تے بیٹھا ہا ۔ ‏24 بس شمعون پطرس اُونکُوں اِشارہ کر تے آکھیا جو ڈس تُوں اوہ کِیندے بارے ءچ آہدھا ہیں ۔

‏25 اُونیں یسُوع دو جُھک تے پُچھیا اے خُداوند !اوہ کوݨ ہے ؟

‏26 یسُوع جواب ڈِتا جو جِینکُوں میں گِراں بوڈ تے ڈیساں اُوہو ہوسی ۔ وَل اُونیں گِراں بوڈیا تے شمعون اِسکریُوتی دے پوتر یہُوداہ کُوں ڈِتا، ‏27 تے اِیں گِراں کھاوݨ دے بعد شیطان اُوندے ءچ سما گِیا ۔بس یسُوع اُونکُوں آکھیا جو جیہڑا کُجھ تیکُوں کرنڑا ہے جلدی کر گِھن ، ‏28 پَر دسترخوان اُتے کہیں کُوں معلوم نہ تھیّا جو اُونیں اُونکُوں اِیویں کیوں آکھیا۔ ‏29 کیوں جو یہُوداہ دے کولھ رقم دی تھیلی رَہندی ہئی اِیں واسطے کُجھ سوچیا جو یسُوع اُونکُوں عید کیتے ضروری سامان مُل گِھننڑ دا آہدھا پیا ہے یا ایہہ جو غریباں کُوں کُجھ ڈیوے ۔

‏30 بس اُونیں روٹی دا گِراں گِھدا تے فوراً باہر چلیا گِیا تے رات تھی گئی ہئی ۔

‏31 جِیں وَیلے اوہ باہر چلیا گِیا تاں یسُوع آکھیا ہُنڑ ابن ِآدم نیں جلال پایا ہے تے خُدا نیں اُوندے ءچ جلال پایاہے۔ ‏32 وَل خُدا اُوندے تُوں جلال پے سی تاں خُدا اُونکُوں وی جلال ڈیسی بلکہ فوراً ڈیسی ۔ ‏33 بالو ! میں بِیا کُجھ دیر تُہاڈے نال ہاں ، تُساں میکُوں گولھیسو تے جیویں میں یہُودیاں کُوں آکھیا جو جِتھاں میں وَیندا ہاں ، تُساں نئیں آ سگدے ، اُونویں ای ہُنڑ تُہاکُوں وی آہدھا ہاں ۔ ‏34 میں تُہاکُوں ہِک نَواں حُکم ڈیندا ہاں جو ہِک ڈوجھے نال محبت رکھو ، جیویں میں تُہاڈے نال محبت رکھی تُساں وی ہِک ڈوجھے نال محبت رکھو ۔ ‏35 جے تُساں ہِک ڈوجھے نال محبت رکھیسو تاں سارے لوک جاݨ گِھنسن جو تُساں میڈے شاگرد ہِوے ۔

‏36 شمعون پطرس اُونکُوں آکھیا اے خُداوند ! تُوں کِتھاں وَیندا ہیں ؟

یسُوع جواب ڈِتا جو جِتھاں میں وَیندا ہاں ہُنڑ تاں تُوں میڈے پچُھوں نئیں آ سگدا پَر بعد ءچ میڈے پچُھوں آسیں ۔

‏37 پطرس اُونکُوں آکھیا اے خُداوند ! میں حالی تیڈے پچُھوں کیوں نئیں آ سگدا ؟ میں تاں آپنڑیں جان تَئیں تیڈےکیتے ڈے ڈیساں ۔

‏38 یسُوع جواب ڈِتا کیا تُوں واقعی میڈے کیتے آپنڑیں جان ڈیسیں ؟ میں تیکُوں سچ آہدھا ہاں جو کُکڑ بانگ نہ ڈیسی جئیں تَئیں تُوں تَرے پھیری میڈا اِنکار نہ کر گِھن سیں ۔