‏5 توما اُونکُوں آکھیا اے خُداوند! اَساں نئیں جانڑدے جو تُوں کِتھاں وَیندا ہیں ، وَل راہ کیویں جانڑوں ؟

‏6 یسُوع اُونکُوں آکھیا جو راہ ، حق تے زندگی میں ہاں ، میڈے وسیلہ دے بغیر کوئی باپ دے کولھ نئیں آندا ۔ ‏7 جے تُساں میکُوں جاݨ گِھدا ہوندا تاں میڈے باپ کُوں وی جانڑدے ۔ ہُنڑ تُساں اُونکُوں جاݨ گئے ہِوے بلکہ اُونکُوں ڈیکھ گِھدے ۔

‏8 فِلپُس اُونکُوں آکھیا اے خُداوند ! ساکُوں باپ ڈِکھا ، ساڈے کیتے اِیہو بہُوں ہے ۔

‏9 یسُوع اُونکُوں آکھیا اے فِلپُس !میں اِتی عرصے تُوں تُہاڈے نال ہاں، کیا تُوں میکُوں نئیں جانڑدا ؟ جئیں میکُوں ڈِٹھے ، اُونیں باپ کُوں ڈِٹھے ۔ تُوں کیوں آہدھا ہیں جو ساکُوں باپ ڈِکھا ؟ ‏10 کیا تیکُوں یقین نئیں جو میں باپ ءچ ہاں تے باپ میڈے ءچ ؟ میں جیہڑے گالھیں تُہاکُوں آہدھا ہاں آپنڑیں طرفوں نئیں آہدھا بلکہ میڈا باپ میڈے ءچ رہ تے آپنڑا کَم کریندے ۔ ‏11 میڈا یقین کرو جو میں باپ ءچ ہاں تے باپ میڈے ءچ ، نئیں تاں میڈے کَماں دے سببّوں ای میڈا یقین کرو ۔ ‏12 میں تُہاکُوں سچ آہدھا ہاں جو جیہڑا میڈے اُتے اِیمان رکھیندے اوہ وی اُوہو کَم کریسی جیہڑے میں کریندا ہاں بلکہ اِنہاں کنُوں وی وَڈے کَم کریسی کیوں جو میں باپ دے کولھ وَیندا ہاں۔ ‏13 تے جیہڑا کُجھ تُساں میڈے ناں تُوں منگسو میں اُوہو کریساں تاں جو باپ دا جلال پوتر دے وسیلے ظاہر تھیوے ۔ ‏14 جے تُساں میڈے ناں نال میڈے کنُوں کُجھ وی منگسو تاں میں اُوہو کریساں ۔

‏15 جے تُساں میڈے نال محبت کریندے ہِوے تاں میڈے حکماں اُتے عمل کرو ‏16 تے میں باپ کنُوں درخاست کریساں تے اوہ تُہاکُوں ڈوجھا مددگار بخش ڈیسی تاں جو اوہ ہمیشاں تَئیں تُہاڈے نال رہوے ‏17 یعنی رُوح ِ حق، جِیں کُوں دُنیا حاصل نئیں کر سگدی کیوں جو نہ تاں اُونکُوں ڈیدھی ہے نہ جانڑدی ہے ، پَر تُساں اُونکُوں جانڑدے ہِوے کیوں جو اوہ تُہاڈے نال رَہندے تے تُہاڈے اندر ہوسی ۔

‏18 میں تُہاکُوں یتیم نہ چھوڑیساں ، میں تُہاڈے کولھ آساں ۔ ‏19 ایہہ دُنیا کُجھ دیر بعد میکُوں نہ ڈیکھ سگسی پَر تُساں میکُوں ڈیدھے رہسو۔ چونکہ میں زندہ ہا ں ، تُساں وی زندہ رہسو۔ ‏20 اُوں ڈینہہ تُساں جاݨ گِھنسو جو میں آپنڑے باپ ءچ ہاں تے تُساں میڈے ءچ ہِوے تے میں تُہاڈے ءچ ۔

‏21 جِیندے کولھ میڈے حُکم ہِن تے اوہ اُنہاں کُوں مَنیندے ، اُوہو میڈے نال محبت کریندے تےاوہ میڈے باپ دا پیارا ہوسی تے میں اُوندے نال محبت رکھیساں تے آپنڑے آپ کُوں اُوندے اُتے ظاہر کریساں ۔

‏22 اُوں یہُوداہ نیں جیہڑا اِسکریُوتی نہ ہا اُونکُوں آکھیا اے خُداوند! کیا وجہ ہے جو تُوں آپنڑے آپ کُوں ساڈے اُتے ظاہر کریندیں پَر دُنیا اُتے نئیں ؟

‏23 یسُوع جواب ءچ اُونکُوں آکھیا جو جے کوئی میکُوں محبت کریندے تاں اوہ میڈے کلام اُتے عمل کریسی تے میڈا باپ اُوندے نال محبت کریسی تے اَساں اُوندے کولھ آسوں تے اُوندے نال رہسوں ۔ ‏24 جیہڑا میڈے نال محبت نئیں رکھیندا اوہ میڈے کلام اُتے عمل نئیں کریندا۔ تے جیہڑا کلام تُساں سُنڑدے ہِوے اوہ میڈا نئیں بلکہ باپ دا ہے جئیں میکُوں بھیجیا۔

‏25 میں ایہہ گالھیں تُہاڈے نال رَہندے ہوئے تُہاڈے نال کیتیاں ، ‏26 پَر اوہ مددگار یعنی رُوح القُدس جِینکُوں میڈا باپ میڈے ناں نال بھجیسی ، اُوہو تُہاکُوں سارے گالھیں سِکھیسی تے جیہڑا کُجھ میں تُہاکُوں آکھیا ہے ، اوہ سبھ تُہاکُوں یاد ڈیویسی۔

‏27 میں تُہاکُوں اِطمینان ڈِتی وَیندا ہاں ، آپنڑا اِطمینان تُہاکُوں ڈیندا ہاں ۔ ایہہ ایجھا اِطمینان نئیں جیہڑا دُنیا ڈیندی ہے ۔تُہاڈا دِل نہ گھبراوے تے نہ ڈرے ۔ ‏28 تُساں سُنڑ چکے ہِوے جو میں تُہاکُوں آکھیا ہے جو میں وَیندا ہاں تے تُہاڈے کولھ وَلا آساں ۔ جے تُساں میڈے نال محبت کریندے تاں اِیں گالھ تُوں خوش تھیندے جو میں باپ دے کولھ وَیندا ہاں کیوں جو باپ میں کنُوں وَڈا ہے۔ ‏29 تے ہُنڑ میں سارے گالھیں ہووݨ تُوں پہلے تُہاکُوں ڈسا ڈِتیاں ہِن تاں جو جِیں وَیلے اوہ پوریاں تھی وَنجنڑ تاں تُساں یقین کرو ۔ ‏30 اِیندے بعد میں تُہاڈے نال مزید گالھیں نہ کریساں کیوں جو اِیں دُنیا دا سردار^a آندا ہے تے اُونکُوں میڈے اُتے کوئی اِختیار نئیں۔ ‏31 پَر ایہہ اِیں واسطے تھیندے جو دُنیا جاݨ گِھنے جو میں باپ نال محبت کریندا ہاں تے جیویں باپ میکُوں حُکم ڈِتے میں اُونویں ای کریندا ہاں ۔

اُٹھو اِتھوں جُلوں ۔