‏5 میں اَنگور دا درخت ہاں تے تُساں لَڑیاں ہِوے ۔ جیہڑا میڈے ءچ قائم رہندے تے میں اُوندے ءچ ، اُوہو بہُوں پھل ڈیندے^a کیوں جو مَیں کنُوں اَنج تھی تے تُساں کُجھ نئیں کر سگدے ۔ ‏6 جے کوئی میڈے ءچ قائم نہ رہوے تاں اوہ لَڑی دے وانگوں سَٹ ڈِتا وَیندے تے سُک وَیندے تے لوک اُنہاں کُوں کَٹھا کر تے بھاہ ءچ سَٹ ڈیندے ہِن تے اوہ سَڑ وَیندیاں ہِن ۔ ‏7 جے تُساں میڈے ءچ قائم رَہو تے میڈا کلام تُہاڈے دِل ءچ قائم رَہوے تاں جیہڑا کُجھ منگو اوہ تُہاڈے کیتے تھی ویسی ۔ ‏8 میڈے باپ دا جلال اِیں تُوں تھیندے جو تُساں بہُوں سارا پھل گِھن آؤ ، وَل ای تُساں میڈے شاگرد ہوسو ۔ ‏9 جیویں باپ نیں میڈے نال محبت کیتی ہے اُونویں ای میں تُہاڈے نال محبت کیتی ہے ، تُساں میڈی محبت ءچ قائم رَہو ۔ ‏10 جے تُساں میڈے حُکماں اُتے عمل کریسو تاں میڈی محبت ءچ قائم رَہسو ، جیویں میں آپنڑے باپ دے حُکماں اُتے عمل کیتے تے اُوندی محبت ءچ قائم ہاں ۔

‏11 میں ایہہ گالھیں تُہاکُوں اِیں واسطے آکھیاں ہِن جو میڈی خوشی تُہاڈے ءچ ہووے تے تُہاڈی خوشی پوری تھی وَنجے ۔ ‏12 میڈا حُکم ایہہ ہے جو جیویں میں تُہاڈے نال محبت رکھی تُساں وی ہِک ڈوجھے نال محبت رکھو ۔ ‏13 اِیں کنُوں زیادہ محبت کوئی نئیں کریندا جو آپنڑیں جان آپنڑے دوستاں کیتے ڈے ڈیوے ۔ ‏14 جے تُساں میڈے حُکماں اُتے عمل کریسو تاں میڈے دوست ہوسو ۔ ‏15 ہُنڑ کنُوں میں تُہاکُوں نوکر نہ اَکھیساں کیوں جو نوکر نئیں جانڑدا جو اُوندا مالک کیا کریندے بلکہ میں تُہاکُوں دوست آکھیا ہے کیوں جو سبھ کُجھ جیہڑا میں آپنڑے باپ کنُوں سُنڑیا ہے تُہاکُوں ڈسا ڈِتے ۔ ‏16 تُساں میکُوں نئیں چُنڑیا بلکہ میں تُہاکُوں چُنڑیا تے مقرر کیتے جو تُساں وَنج تے پھل گِھن آؤ تے تُہاڈا پھل قائم رَہوے تاں جو جیہڑا کُجھ تُساں میڈے ناں تُوں باپ کنُوں منگو اوہ تُہاکُوں ڈیوے ۔ ‏17 میں اِنہاں گالھیں دا حُکم تُہاکُوں اِیں واسطے ڈیندا ہاں جو تُساں آپس ءچ محبت رکھو ۔

‏18 جے دُنیا تُہاڈے نال عداوت رکھیندی ہے تاں تُساں جانڑدے ہِوے جو اُونیں تُہاڈے کنُوں پہلے میڈے نال وی عداوت رکھی ہے ۔ ‏19 جے تُساں دُنیا دے ہوندے تاں دُنیا تُہاکُوں آپنڑا سمجھ تے عزیز رکھیندی پَر چونکہ تُساں دُنیا دے نئیں بلکہ میں تُہاکُوں دُنیا ءچوں چُنڑ گِھدے اِیں واسطے دُنیا تُہاڈے نال عداوت رکھیندی ہے ۔ ‏20 جیہڑی گالھ میں تُہاڈے نال کیتی ہئی اُونکُوں یاد رکھو جو نوکر آپنڑے مالک کنُوں وَڈا نئیں ہوندا ۔ جے اُنہاں میکُوں ستایا ہے تاں اوہ تُہاکُوں وی ستیسن ، جے اُنہاں میڈی گالھ اُتے عمل کیتا تاں تُہاڈی گالھ اُتے وی عمل کریسن ، ‏21 پَر اوہ ایہہ سبھ کُجھ میڈے ناں دی وجہ کنُوں تُہاڈے نال کریسن کیوں جو اوہ میڈے بھیجنڑ آلے کُوں نئیں جانڑدے ۔ ‏22 جے میں آ تے اُنہاں نال کلام نہ کریندا تاں اوہ گُنہگار نہ تھیندے پَر ہُنڑ اُنہاں دے گُناہ دا اُنہاں کولھ کوئی عُذر نئیں ۔ ‏23 جیہڑا میڈے نال عداوت رکھیندے اوہ میڈے باپ نال وی عداوت رکھیندے ۔ ‏24 جے میں اُنہاں ءچ اوہ کَم نہ کریندا جیہڑے کہیں ڈوجھے نئیں کیتے تاں اوہ گُنہگار نہ ہوندے پَر ہُنڑ اُنہاں ایہہ سبھ ڈِٹھا وَل وی میڈے تے میڈے باپ ڈوہائیں نال عداوت رکھی ہے ۔ ‏25 پَر ایہہ اِیں واسطے تھیّا جو اُنہاں دی شریعت ءچ لکھی ہوئی گالھ پوری تھی وَنجے جو اُنہاں میڈے نال بِلاوجہ عداوت رکھی۔

‏26 پَر جِیں وَیلے اوہ مددگار آسی جِینکُوں میں تُہاڈے کولھ باپ دی طرفوں بھجیساں یعنی رُوح ِ حق جیہڑا باپ دی طرفوں صادر تھیندا ہے تاں اوہ میڈی گواہی ڈیسی ۔ ‏27 تے تُساں وی گواہی ڈیسو کیوں جو شروع کنُوں میڈے نال ہِوے ۔