شروع ءچ میں اِیں واسطے تُہاکُوں نئیں آکھیا جو میں تُہاڈے نال ہم ، ‏5 پَر ہُنڑ میں آپنڑے بھیجنڑ آلے دے کولھ وَیندا ہاں تے تُہاڈے ءچوں کوئی میکُوں نئیں پُچھدا جو تُوں کِتھاں وَیندا ہیں ؟ ‏6 بلکہ اِیں واسطے جو میں ایہہ گالھیں تُہاکُوں آکھیاں تے تُہاڈا دِل غم نال بھریج گِیا ، ‏7 پَر میں تُہاکُوں سچ آہدھا ہاں جو میڈا وَنجنڑ تُہاڈے کیتے فائدہ مند ہے کیوں جو جے میں نہ وَنجاں تاں اوہ مددگار تُہاڈے کولھ نہ آسی پَر جے میں ویساں تاں اُونکُوں تُہاڈے کولھ بھیج ڈیساں۔ ‏8 اوہ آ تے دُنیا کُوں گُناہ تے راستبازی تے عدالت دے بارے ءچ قصور وار قرار ڈیسی ۔ ‏9 گُناہ دے بارے ءچ اِیں واسطے جو اوہ میڈے اُتے اِیمان نئیں گِھن آندے ، ‏10 راستبازی دے بارے ءچ اِیں واسطے جو میں باپ دے کولھ وَیندا ہاں تے تُساں میکُوں وَلا نہ ڈیکھسو ، ‏11 عدالت دے بارے ءچ اِیں واسطے جو دُنیا دا سردار مُجرم قرار ڈِتا گِیا ہے ^a۔

‏12 میکُوں تُہاکُوں بِیا وی بہُوں کُجھ آکھنڑا ہے پَر حالی تُساں اُوندی برداشت نئیں کر سگدے ، ‏13 پَر جِیں وَیلے اوہ یعنی رُوح ِ حق آسی تاں تُہاکُوں ساری سچائی دی راہ ڈکھیسی کیوں جو اوہ آپنڑیں طرفوں کُجھ نہ اَکھیسی بلکہ تُہاکُوں صرف اُوہو ڈسیسی جیہڑا کُجھ اوہ سُنڑسی تے تُہاکُوں آوݨ آلے گالھیں دی خبر ڈیسی ۔ ‏14 اوہ میڈا جلال ظاہر کریسی کیوں جو اوہ میڈے گالھیں میڈی زبانی سُنڑ تے تُہاکُوں خبراں ڈیسی ۔ ‏15 جیہڑا کُجھ باپ دا ہے اوہ سبھ میڈا ہے، اِیں واسطے میں آکھیا جو اوہ میں کنُوں ای حاصل کریندے تے تُہاکُوں خبراں ڈیسی ۔

‏16 کُجھ دیر بعد تُساں میکُوں نہ ڈیکھسو تے کُجھ دیر بعد وَلا میکُوں ڈیکھ گِھنسو ۔

‏17 اِیں تُوں اُوندےبعض شاگرداں آپس ءچ آکھیا جو ایہہ کیا ہے جیہڑا اوہ ساکُوں اَکھیندے جو کُجھ دیر بعد تُساں میکُوں نہ ڈیکھسو تے کُجھ دیر بعد وَلا ڈیکھ گِھنسو تے کیوں جو میں باپ دے کولھ وَیندا ہاں ؟ ‏18 بس اوہ آہدھے ریہے جو تھوڑی دیر اوہ آہدھا ہے، ایہہ کیا گالھ ہے ؟اَساں نئیں جانڑدے جو کیا آہدھا ہے ۔

‏19 یسُوع ڈِٹھا جو اوہ مَیں کنُوں پُچھنڑ چاہندے ہِن ، تاں اُنہاں کُوں آکھیا کیا تُساں آپس ءچ میڈی گالھ دی بابت پُچھدے پئے ہِوے جو کُجھ دیر بعد تُساں میکُوں نہ ڈیکھسو تے کُجھ دیر بعد وَلا میکُوں ڈیکھ گِھنسو ؟ ‏20 میں تُہاکُوں سچ آہدھا ہاں جو تُساں تاں روسو تے ماتم کریسو پَر دُنیا خوش تھی سی ، تُساں ڈُکھی تاں ہوسو پَر تُہاڈا ڈُکھ ای خوشی ءچ بدل ویسی ۔ ‏21 جِیں وَیلے عورت کُوں بال جمنڑ آلا ہوندے تاں اوہ ڈُکھی تھیندی ہے ، اِیں واسطے جو اُوندی تکلیف دا وَیلہ آ وَیندے پَر جیویں ای بال پیدا تھی وَیندے تاں اِیں گالھ تُوں خوش تھیندی ہے جو اِیں دُنیا ءچ ہِک اِنسان آ گِیا ہے ، اوہ آپنڑا ڈُکھ بُھل وَیندی ہے ۔ ‏22 بس تُہاکُوں وی ہُنڑ ڈُکھ تاں ہے پَر میں تُہاکُوں وَلا مِل ساں تے تُہاڈا دِل خوش تھیسی تے تُہاڈے کنُوں تُہاڈی خوشی کوئی کَھس نہ گِھنسی ۔

‏23 اُوں ڈینہہ تُساں میڈے نال کوئی سوال نہ کریسو ۔ میں تُہاکُوں سچ آہدھا ہاں جو جے تُساں باپ تُوں میڈے ناں تُوں کُجھ منگسو تاں اوہ تُہاکُوں ڈیسی ۔ ‏24 ہُنڑ تَئیں تُساں میڈے ناں تُوں کُجھ نئیں منگیا ، منگسو تاں مِلسی تاں جو تُہاڈی خوشی پوری تھیوے ۔

‏25 میں ایہہ گالھیں تُہاڈے نال تمثیلاں ءچ کیتیاں ہِن پَر اوہ وَیلہ آندا ہے جو وَل تُہاکُوں تمثیلاں ءچ نہ اَکھیساں بلکہ آپنڑے باپ دے بارے ءچ تُہاکُوں صاف صاف ڈسیساں ۔ ‏26 اُوں ڈینہہ تُساں میڈے ناں تُوں منگسوتے میکُوں تُہاڈے کیتے باپ کُوں درخاست کرݨ دی ضرورت نہ ہوسی۔ ‏27 اِیں واسطے جو باپ تاں خود تُہاڈے نال محبت رکھیندے کیوں جو تُساں میڈے نال محبت رکھی ہے تے اِیمان گِھن آئے ہِوے جو میں خُدا دی طرفوں آیا ہاں ۔ ‏28 میں باپ ءچوں نِکل تے دُنیا ءچ آیا ہاں ، وَل دُنیا تُوں رُخصت تھی تے باپ دے کولھ وَیندا ہاں ۔

‏29 اُوندے شاگرداں آکھیا ڈیکھ !ہُنڑ تُوں صاف صاف آہدھیں تے تمثیل ءچ نئیں آہدھا ۔ ‏30 ہُنڑ اَساں جاݨ گئے جو تُوں سبھ کُجھ جانڑدا ہیں تے اِیندا مُتھاج نئیں جو کوئی تیکُوں پُچھے^b اِیں سببّوں اَساں اِیمان گِھن آئے ہاں جو تُوں خُدا ءچوں نِکلیا ہیں ۔

‏31 یسُوع نیں اُنہاں کُوں جواب ڈِتا کیا ہُنڑ تُساں اِیمان گِھن آندے ہِوے ؟ ‏32 ڈیکھو! اوہ وَیلہ آندا ہے بلکہ آ گِیا ہے جو تُساں سارے تِتر بِتر تھی تے آپنڑے آپنڑے گھراں کُوں ٹُر پوسو تے میکُوں کلھا چھوڑ ڈیسو ، وَل وی میں کلھا نئیں کیوں جو باپ میڈے نال ہے ۔ ‏33 میں تُہاڈے نال ایہہ گالھیں اِیں واسطے کیتیاں ہِن جو تُساں میڈے ءچ اِطمینان پاؤ۔ دُنیا ءچ ڈُکھ جھلیندے ہِوے پَرحوصلہ رکھو ، میں دُنیا اُتے غالب آیا ہاں ۔