یسُوع دی گرفتاری
18
1 جِیں وَیلے یسُوع ایہہ سارے گالھیں آکھ گِھدیاں تاں اوہ آپنڑے شاگرداں دے نال قِدرون دے نالے دے پار گِیا ۔اُتھاں ہِک باغ ہا ، اوہ تے اُوندے شاگرد اُوندے ءچ داخل تھئے۔ 2 یہُوداہ ، اُوندا پکڑواوݨ آلا وی اُوں جاہ کنُوں واقف ہا کیوں جو یسُوع اکثر آپنڑے شاگرداں کُوں اُتھاں مِلدا ہا ۔ 3 بس یہُوداہ سپاہیاں دی پلٹن تے سردار کاہناں تے فریسیاں تُوں کُجھ سپاہی aگِھن تے اُتھاں آیا ۔ اوہ آپنڑے ہَتھاں ءچ مشعلاں ، ڈیوے تے ہتھیار چاتے ہوئے ہَن ۔ 4 یسُوع اُنہاں سارے گالھیں کُوں جانڑدے ہوئے جیہڑیاں اُونکُوں پیش آوݨ آلیاں ہَن ، اَگُوں وَدھ تے اُنہاں کنُوں پُچھیا جو کئیں کُوں گولھیندے ہِوے ؟5 اُنہاں جواب ڈِتا یسُوع ناصری کُوں ۔
یسُوع اُنہاں کُوں آکھیا اوہ میں ای ہاں ۔( اُوندا پکڑواوݨ آلا یہُوداہ وی اُنہاں دے نال کھڑا ہا )۔ 6 اُوندے ایہہ آہدھے ای جو اوہ میں ای ہاں ، اوہ گھبرا تے پچُھوں ہَٹ گئے تے زمین اُتے ڈھے پئے ۔ 7 بس اُونیں اُنہاں کُوں وَل پُچھیا تُساں کئیں کُوں گولھیندے ہِوے ؟ اُنہاں آکھیا یسُوع ناصری کُوں ۔
8 یسُوع جواب ڈِتا جو میں آکھ تاں ڈِتے جو اوہ میں ای ہاں ۔بس جے تُساں میکُوں گولھیندے ہِوے تاں اِنہاں کُوں وَنجنڑ ڈیوو۔ 9 ایہہ اُونیں اِیں واسطے آکھیا جو اُوندا اوہ قول پورا تھیوے جو جنہاں کُوں تُوں میکُوں ڈِتا میں اُنہاں ءچوں کہیں کُوں وی گُم نہ تھیوݨ ڈِتا ۔
10 بس شمعون پطرس نیں ہِک تلوار جیہڑی اُوندے کولھ ہئی ، چھیک تے سردار کاہن دے نوکر اُتے چلا تے اُوندا سَجا کَن اُڈا ڈِتا ۔ اُوں نوکر دا ناں ملخُس ہا ۔ 11 یسُوع پطرس کُوں آکھیا آپنڑیں تلوار نیام ءچ رکھ ، کیا میں اوہ پیالہ نہ پیواں جیہڑا میڈے باپ میکُوں ڈِتے ؟
یسُوع دی حنّا دے سامنڑے پیشی
12 وَل رومی افسر ، اُوندے فوجی تے یہُودیاں دے سپاہیاں یسُوع کُوں گرفتار کر تے بَدھ گِھدا 13 تے اُونکُوں پہلے حنّا دے کولھ گِھن گئے کیوں جو اوہ اُوں سال دے سردار کاہن کائفا دا سُسر ہا۔ 14 ایہہ اُوہو کائفا ہا جئیں یہُودیاں کُوں صلاح ڈِتی ہئی جو ساری اُمت کیتے ہِک شخص دا مَر وَنجنڑ چنگا ہے ۔
پطرس یسُوع دا اِنکار کریندے
15 شمعون پطرس یسُوع دے پچُھوں تھی پِیا تے ہِک بِیا شاگرد وی ۔ اِیں شاگرد دی سردار کاہن نال واقفیت ہئی تے اوہ یسُوع دے نال سردار کاہن دے صحن ءچ داخل تھی گِیا ، 16 پَر پطرس باہر پھاٹک اُتے ای کھڑا ریہا ۔ بس اوہ ڈوجھا شاگرد جیہڑا سردار کاہن دا جاݨ پچھاݨ آلا ہا ،باہر آیا تے کنیز کُوں آکھ تے پطرس کُوں اَندر گِھن گِیا ۔ 17 کنیز پھاٹک اُتے پطرس کنُوں پُچھیا کیا تُوں وی اُوں شخص دے شاگرداں ءچوں ہیں ؟
اُونیں آکھیا میں نئیں ۔
18 سردی دی وجہ کنُوں نوکر تے سپاہی بھاہ بال تے کھڑے سَکیندے پئے ہَن تے پطرس وی اُنہاں دے نال کھڑا تھی تے بھاہ سَکیندا پِیا ہا ۔
سردار کاہن یسُوع اُتے سوال کریندے ہِن
19 وَل سردار کاہن نیں یسُوع کنُوں اُوندے شاگرداں تے اُوندی تعلیم دے متعلق پُچھیا۔ 20 یسُوع اُونکُوں جواب ڈِتا جو میں دُنیا نال سر ِعام گالھیں کیتیاں ہِن ، میں ہمیشاں عبادت خانیاں تے ہیکل ءچ تعلیم ڈیندا ریہا ہاں جِتھاں سارے یہُودی جمع ہوندے ہِن تے میں لُک تے کڈھائیں وی کُجھ نئیں آکھیا ۔ 21 تُوں میڈے کنُوں کیوں پُچھدیں ؟ جنہاں میڈے گالھیں سُنڑیاں ہِن اُنہاں کنُوں پُچھ ۔ ڈیکھ اوہ چنگی طرح جانڑدے ہِن جو میں کیا آکھیا ہے ۔
22 جِیں وَیلے اُونیں ایہہ آکھیا تاں سپاہیاں ءچوں ہِک جیہڑا کولھ کھڑا ہا ، یسُوع کُوں چاٹ ماری تے آکھیا تُوں سردار کاہن کُوں اِیویں جواب ڈیندیں ؟
23 یسُوع اُونکُوں جواب ڈِتا جو جے میں کُجھ غلط آکھیا ہے تاں اُونکُوں غلط ثابت کر پَر جے ٹھیک آکھیا ہے تاں میکُوں کیوں مریندیں ؟
24 اِیں گالھ تے حنّا نیں یسُوع کُوں بَدھیا ہویا سردار کاہن کائفا دے کولھ بھیج ڈِتا ۔
پطرس یسُوع دا دوبارہ اِنکار کریندے
25 جِیں وَیلے شمعون پطرس کھڑا بھاہ سَکیندا پِیا ہا تاں کہیں اُوں کنُوں پُچھیا کیا تُوں وی اُوندے شاگرداں ءچوں ہیں ؟ اُونیں اِنکار کریندے ہوئے آکھیا جو میں نئیں ۔
26 سردار کاہِن دے نوکراں ءچوں ہِک جیہڑا اُوں نوکر دا رشتہ دار ہا جِیندا کَن پطرس تلوار نال اُڈا ڈِتا ہا ، پطرس کنُوں پُچھنڑ لگا کیا میں تیکُوں اُوندے نال باغ ءچ نہ ڈِٹھا ہا ؟
27 پطرس وَلا اِنکار کیتا تے اُوں وَیلے ای کُکڑ بانگ ڈِتی ۔
یسُوع دی رُومی گورنر پِیلاطُس دے سامنڑے پیشی
28 وَل اوہ سویر نال ای یسُوع کُوں کائفا دے کولُھوں گورنر دے قلعہ ءچ گِھن گئے۔ پَر اوہ خود قلعہ دے اَندر نہ گئے تاں جو نا پاک نہ تھی وَنجنڑ بلکہ فسح دا کھانڑا کھا سگن ۔ 29 بس پِیلاطُس اُنہاں دے کولھ باہر آیا تے آکھیا تُساں اِیں شخص اُتے کیا اِلزام لیندے ہِوے؟
30 اُنہاں جواب ڈِتا جے ایہہ مُجرم نہ ہوندا تاں اَساں اِینکُوں تیڈے سپُرد نہ کریندے ۔
31 پِیلاطُس آکھیا تَساں اِینکُوں گِھن وَنجو تے آپنڑیں شریعت دے مطابق خود ای اِیندا فیصلہ کرو ۔
یہُودیاں اُونکُوں آکھیا کہیں کُوں موت دی سزا ڈیوݨ ساکُوں اِجازت نئیں ۔ 32 ایہہ اِیں واسطے تھیّا جو یسوع دی اوہ گالھ پوری تھیوےجو اوہ کِیں طرحاں دی موت مَرسیb ۔
33 وَل پِیلاطُس قلعہ ءچ چلیا گِیا تے یسُوع کُوں اُتھاں طلب کیتا تے اُوں کنُوں پُچھیا کیا تُوں یہُودیاں دا بادشاہ ہیں ؟
34 یسُوع جواب ڈِتا جو تُوں ایہہ گالھ آپنڑیں طرفوں آہدھیں یا بئیاں میڈے حق ءچ تیکُوں آکھی ہے ؟
35 پِیلاطُس جواب ڈِتا کیا میں یہُودی ہاں ؟ تیڈی ای قوم تے سردار کاہناں تیکُوں میڈے سپُرد کیتے۔ تُوں کیا کیتے ؟
36 یسُوع جواب ڈِتا جو میڈی بادشاہی اِیں دُنیا دی نئیں ۔ جے میڈی بادشاہی اِیں دُنیا دی ہوندی تاں میڈے خادم لَڑدے تاں جو میں یہُودیاں دے حوالہ نہ کیتا وَیندا ، پَر حالی میڈی بادشاہی اِتھوں دی نئیں ۔
37 پِیلاطُس اُونکُوں آکھیا بس کیا تُوں بادشاہ ہیں ؟
یسُوع جواب ڈِتا تُوں خود آہدھیں جو میں بادشاہ ہاں ۔ میں اِیں واسطے پیدا تھیّا تےاِیں مقصد نال دُنیا ءچ آیا ہاں جوسچائی دی گواہی ڈیواں ۔ جیہڑا کوئی سچّا ہے ، اوہ میڈی آواز سُنڑدے ۔
یسُوع کُوں سزائے موت سُنڑائی وَیندی ہے
38 پِیلاطُس اُونکُوں آکھیا سچائی کیا ہے ؟ ایہہ آکھ تے اوہ وَلا یہُودیاں دے کولھ باہر گِیا تے آکھنڑ لگا میں تاں اُوں شخص کُوں مُجرم نئیں سمجھدا ، 39 پَر تُہاڈا دستور ہے جو میں فسح دے موقع اُتے تُہاڈے کیتے ہِک قیدی چھوڑ ڈیندا ہاں ۔بس کیا تُہاکُوں منظور ہے جو میں تُہاڈے کیتے یہُودیاں دے بادشاہ کُوں چھوڑ ڈیواں؟
40 اوہ وَلا چیخنڑ لگ گئے جو اِینکُوں نئیں بلکہ بَرابّا کُوں۔ تے بَرابّا ہِک ڈاکو ہا ۔