تمہید
1
1 اے تھِیُفِلُس! میں آپنڑیں پہلی کِتاب ءچ اُنہاں گالھیں کُوں لکھے جیہڑیاں یسوع شروع ءچ کریندا تے سَکھیندا ریہا، 2 اُوں ڈینہہ تَئیں جِیندے ءچ اوہ اُنہاں رسُولاں کُوں جنہاں کُوں اُونیں چُنڑیا ہا رُوح القُدس دے وسیلہ نال حُکم ڈے تے اَسمان اُتے چایا گِیا۔ 3 ڈُکھ سہنڑ دے بعد اُونیں آپنڑے زندہ تھی وَنجنڑ دے بعد بہُوں سارے ثبوت وی اُنہاں کُوں ڈِتے تے چالیہہ ڈینہہ تَئیں اُنہاں کُوں نِظردا ریہا تے خُدا دی بادشاہی دے گالھیں سُنڑیندا ریہا۔ 4 تے اُنہاں نال مِل تے اُنہاں کُوں حُکم ڈِتا جو ”یروشلیم کنُوں باہر نہ وَنجائے بلکہ باپ دے اُوں وعدے دے پورے تھیوݨ دا اِنتظار کرائے جِیندا ذِکر تُساں مَیں کنُوں سُنڑ چکے ہِیوے ۔ 5 کیوں جو یُوحنّا تاں پانڑی نال بپتسمہ ڈِتا پَر تُساں تھوڑے ڈینہاں دے بعد رُوح القُدس نال بپتسمہ پےسو۔“یسوع دا اَسمان اُتے چایا وَنجنڑاں
6 جِیں وَیلےرسُول یسوع دے نال ہِک جاہ تے جمع ہَن تاں اُوں کنُوں ایہہ پُچھیا جو ”اے خُداوند! کیا تُساں اِیں وَیلے ای اِسرائیل دی بادشاہی بحال کریسو a ؟ “
7 اُونیں اُنہاں کُوں آکھیا ”اُنہاں وقتاں تے معیاداں کُوں جاننڑاں جِنہاں کُوں باپ نیں آپنڑے اِختیار ءچ رکھے، تُہاڈا کَم نئیں۔ 8 پَر جِیں وَیلے رُوح القُدس تُہاڈے اُتے نازل تھیسی تاں تُہاکُوں قوت مِلسی تے یروشلیم تے یہُودیہ تے سامریہ دے سارے علاقے ءچ بلکہ زمین دی اِنتہا تَئیں میڈے گواہ ہوسو۔“ 9 ایہہ آکھ تے اوہ اُنہاں دے ڈیدھے ڈیدھے اُتے چا گِھدا گِیا تے بَدل نیں اُونکُوں اُنہاں دے اَکھیں کنُوں لُکا گِھدا۔
10 اوہ جِیں وَیلے اُونکُوں اَسمان دو ویندے ہوئے غور نال ڈیدھے پئے ہَن تاں ڈیکھو ڈو مَرد سفید پُشاک ءچ اُنہاں دے کولھ آ کھڑے تھئے۔ 11 تے آکھنڑ لگے ”اے گلیلیو، تُساں کھڑے کھڑے اَسمان دو کیوں ڈیدھے پئے ہِیوے؟ اِیہو یسوع جیہڑا تُہاڈے سامنڑے اَسمان اُتے چا گِھدا گِیا ہے اِینویں ای وَلا آسی جیویں تُساں اُونکُوں اَسمان دو ویندے ہوئے ڈِٹھے۔“
یہُوداہ اِسکریُوتی دا جانشین
12 وَل اوہ اُوں پہاڑ تُوں جیہڑا زیتون دا اَکھویندے تے یروشلیم کنُوں سَبت دی منزلb دے فاصلے تے ہے، یروشلیم کُوں پِھرے۔ 13 تے شہر ءچ داخل تھی تے اوہ اُوں چوبارے اُتے گئے جِتھاں پطرس، یُوحنّا، یعقوب ، اندریاس، فِلِپُّس، توما، برتُلمائی، متّی، حلفئی دا پوتر یعقوب، شمعون زیلوتیس cتے یعقوب دا پوتر یہُوداہ رَہندے ہَن۔ 14 ایہہ سارے اُنہاں عورتاں تے یسوع دی ماں مریم تے اُوندے بِھراواں دے نال کَٹھے تھی تے دُعا ءچ مشغول ریہے۔
15 اُنہاں ڈینہاں ءچ پطرس بِھرانواں دی جماعتd ءچ جیہڑے تقریباً ہِک سو ویہہ دے نیڑے ہَن، کھڑا تھی تے آکھنڑ لگا، 16 ”اے بِھراؤ! اُوں نوِشتہ دا پورا تھیوݨ ضرور ہا، جیہڑا رُوح القُدس نیں پہلے ای داؤد دی زبان کنُوں اَکھوا ڈِتا ہا۔ اوہ گالھ یہُوداہ دے متعلق ہئی جئیں یسوع کُوں پکڑواوݨ آلیاں دی رہنمائی کیتی ہئی۔ 17 حالانکہ اوہ ساڈے نال شمار کیتا گِیا تے اُوں اِیں خدمت دا حصہ پاتا۔“
18 (اُونیں بدکاری نال کمائی ہوئی رقم نال ہِک کھیت مُل گِھدا تے اوہ سِر دے بھرنے ڈَھٹھا تے اُوندا پیٹ پھٹ گِیا تے اُوندیاں آندراں باہر نِکل آیاں۔ 19 یروشلیم دے سارے باشندیاں کُوں اِیں گالھ دا پتا لگ گِیا، اِتھوں تَئیں جو اُنہاں آپنڑی زبان ءچ اُوں کھیت دا ناں ای ہَقَل دما رکھ ڈِتا جِیندا مطلب ہے خون دا کھیت)۔
20 پطرس نیں وَل آکھیا جو”زبُور ءچ لکھیا ہے جو
’اُوندا گھر برباد تھی وَنجے
تے اُوندے ءچ کوئی وَسنڑ آلا نہ ہووے‘
تے
’اُوندی خِدمت کوئی بِیا گِھن گِھنے۔ ‘
21 بس جِتی عرصہ تَئیں خُداوند یسوع ساڈے نال آندا وَیندا ریہا یعنی یُوحنّا دے بپتسمہ تُوں گِھن تے خُداوند دے ساڈے کولُھوں اُتے چا گِھدے وَنجنڑ تَئیں جیہڑے برابر ساڈے نال ریہے، 22 چاہیدا ہے جو اُنہاں ءچوں ہِک شخص ساڈے نال یسوع دے زندہ تھیوݨ دا گواہ بنڑے۔“
23 وَل اُنہاں نیں ڈو شخص پیش کیتے، ہِک دا ناں یُوسف جیہڑا برسبّا اَکھویندے تے جِیندا لَقب یُوستُس ہے، تے ڈوجھا متّیاہ کُوں۔ 24 تے ایہہ آکھ تے دُعا کیتی جو ”اے خُداوند !تُوں جیہڑا سب دے دِلاں کُوں جانڑدا ہیں، ساڈے اُتے ظاہر کر جو اِنہاں ڈوہاں ءچوں تُوں کئیں کُوں چُنڑیا ہے، 25 جو اوہ اِیں خِدمت تے رسالت دی جاہ گِھنے جِینکُوں یہُوداہ چھوڑ تے آپنڑی جاہ گِیا۔“ 26 وَل اُنہاں نیں ڈوہاں دے ناں دا قُرعہ پاتا تے متّیا ہ دا ناں نِکلیا۔ بس اوہ اُنہاں یارہاں رسُولاں دے نال شُمار کیتا گِیا۔