ہِک مَنڈے بھکاری کُوں شِفا ڈِتی ویندی ہے
3
1 پطرس تے یُوحنّا دُعا دے وَیلے یعنی تَریجھے پہر a ہیکل کُوں وَیندے پئے ہَن، 2 لوک ہِک آدمی کُوں جیہڑا جماندرُوں مَنڈا ہا، چاتی آندے ہَن۔ اوہ اُونکُوں اَندر وَنجنڑ آلیاں کنُوں خیرات منگنڑ کیتے ہر روز ہیکل دے دَروازے اُتے جیہڑا خُوبصُورت اَکھویندا ہے، چھوڑ وَیندے ہَن۔ 3 جِیں وَیلے اُونیں پطرس تے یُوحنّا کُوں ہیکل ءچ وَیندے ڈِٹھا تاں اُنہاں کنُوں خَیرات منگی۔ 4 پطرس تے یُوحنّا نیں اُوندے اُتے غور نال نگاہ کیتی تے پطرس نیں آکھیا، ”ساڈے اَل ڈیکھو۔“ 5 اوہ اُنہاں کنُوں کُجھ مِلنڑ دی اُمید تُوں اُنہاں اَل متوجہ تھیّا۔ 6 پطرس نیں آکھیا ”چاندی، سونا تاں میڈے کولھ نئیں پَر جیہڑا کُجھ میڈے کولھ ہے میں تیکُوں ڈے ڈیندا ہاں۔ یسوع مسیح ناصری دے ناں نال اُٹھی، تے ٹُر پِھر۔“ 7 وَل پطرس نیں اُوندا سَجا ہَتھ پکڑ تے اُونکُوں چاتا، تے فوراً اُوندے پیر تے گِٹے مضبوط تھی گئے۔ 8 اوہ ٹَپا مار تے کھڑا تھی گِیا تے ٹُرݨ پِھرݨ لگا تے ٹَپے مریندا تے خُدا دی حمد کریندا ہویا اُنہاں دے نال ہیکل ءچ داخل تھی گِیا۔ 9 سارے لوکاں نیں اُونکُوں ٹُردے پِھردے تے خُدا دی حمد کریندے ڈیکھ تے 10 اُونکُوں پچھاݨ گِھدا جو ایہہ تاں اُوہو ہے جیہڑا ہیکل دے خُوب صُورت دَروازے اُتے بہہ تے خَیرات منگدا ہا،تے اُوں واقعہ کنُوں جیہڑا اُوندے نال تھیّا ہا، بہُوں ای حیران تھئے۔ہیکل ءچ پطرس دا پیغام
11 جِیں وَیلے اوہ پطرس تے یُوحنّا دے نال لِپٹیا کھڑا ہا تاں سارے لوک بہُوں حیران تھی تے اُوں برانڈے اَل اُنہاں دے کولھ بھجے آئے جیہڑا سُلیمان دا اَکھویندے۔ 12 پطرس ایہہ ڈیکھ تے لوکاں کُوں آکھیا ”اے اِسرائیلیو! تُساں اِیں اُتے کیوں حیران تھیندے ہِیوے تے ساکُوں اِینویں کیوں ڈیدھے پئے ہِیوے جِیویں اَساں آپنڑی قُدرت یا دینداری دی وجہ کنُوں اِیں مَنڈے کُوں ٹُرݨ پِھرݨ دے لائق بنڑا ڈِتے؟ 13 ابرہام، اِضحاق تے یعقوب دے خُدا یعنی ساڈے پیُو ڈاڈا دے خُدا نیں آپنڑے خادم یسوع کُوں جلال ڈِتا، جِینکُوں تُساں پکڑوا ڈِیا تے جِیں وَیلے پِیلاطُس اُونکُوں چھوڑ ڈیوݨ دا اِرادہ کِیتا تاں تُساں پِیلاطُس دے سامنڑے اُوندا اِنکار کیتا۔ 14 تُساں اُوں قدُوس تے راستباز دا اِنکار کیتا تے درخاست کیتی جو ہِک خُونی تُہاڈے کیتے رِہا کر ڈِتا وَنجے۔ 15 پَر زندگی دے مالک کُوں قتل کر ڈِتا جِینکُوں خُدا نیں مُردیاں ءچوں زندہ کِیتا۔ اِیندے اَساں گواہ ہیں۔ 16 یسوع دے ناں اُتے اِیمان رکھنڑ نال اِیں آدمی نیں جِینکُوں تُساں ڈیدھے تے جانڑدے ہِیوے، شِفاپاتی۔ اُوں اِیمان نیں جیہڑا یسوع دے وسیلے نال ہے اُونکُوں سبھ دے سامنڑے ایہہ کامل تندرستی ڈِتی۔
17 تے ہُنڑ میڈے بِھراؤ! میں جانڑدا ہاں جو تُساں ایہہ کَم نادانی ءچ کیتا تے اِینویں ای تُہاڈے سرداراں نیں وی۔ 18 پَر خُدا نیں اوہ سارے گالھیں جیہڑیاں اُونیں آپنڑے نبیاں دی زبانی آکھیاں ہَن جو اُوندا مسیح ڈُکھ چیسی، اِیں طرحاں پوریاں کیتیاں۔ 19 بس توبہ کرو تے رجوع گِھن آؤ تاں جو تُہاڈے گُناہ مِٹائے وَنجنڑ تے خُداوند دی طرفوں تُہاڈے کیتے رُوحانی تازگی دا وقت آوے، 20 تے اُونیں المسیح یعنی یسوع کُوں، جِینکُوں اُونیں تُہاڈے کیتے مُقرر کیتا، بھیجے۔ 21 پَریسوع دا اَسمان اُتے رَہنڑ ضرور ہے جئیں تَئیں اوہ ساریاں چیزاں جِیندا ذِکر خُدا نیں دُنیا دے شروع کنُوں آپنڑے پاک نبیاں دی زبانی کیتے، بحال نہ کر ڈِتیاں وَنجنڑ۔ 22 اِیں واسطے موسیٰ آکھیا جو ’خُداوند خُدا تُہاڈے بِھراواں ءچوں میڈے وانگوں ہِک نبی پیدا کریسی۔ جیہڑا کُجھ اوہ تُہاکُوں آکھے اُوندی سُنڑائے۔ 23 جیہڑا شخص اُوں نبی دی نہ سُنڑسی اوہ اُمت ءچوں فَنا کر ڈِتا ویسی ۔‘ 24 بلکہ سموئیل کنُوں گِھن تے پِچھلیاں تَئیں جِتی نبیاں کلام کیتا اُنہاں ساریاں اِنہاں ڈینہاں دی خبر ڈِتی ہے۔ 25 تُساں نبیاں دی اولاد تے اُوں عہد ءچ شریک ہِیوے جیہڑا خُدا تُہاڈے پیُو ڈاڈا نال کیتا جِیں وَیلے ابرہام کُوں آکھیا جو ’تیڈی اولاد کنُوں دُنیا دے سبھ لوک برکت پے سن۔‘ 26 خُدا نیں آپنڑے خادم یسوع کُوں زندہ کر تے پہلے تُہاڈے کولھ بھیجیا تاں جو تُہاڈے ءچوں ہر ہِک کُوں اُوندی بدکاریاں تُوں ہَٹا تے برکت ڈیوے۔“