پطرس تے یُوحنّا دی صدر ِ عدالت ءچ پیشی
4
1 پطرس تے یُوحنّا لوکاں کُوں آہدھے ای پئے ہَن تاں کاہِن تے ہیکل دے سپاہیاں دا سردار تے صدوقی اُنہاں اُتے چڑھ آئے۔ 2 اوہ بہُوں کاوڑ ءچ ہَن کیوں جو اوہ لوکاں کُوں یسوع دی مثال ڈے تے مُردیاں ءچوں زندہ تھیوݨ دی تعلیم ڈیندے ہَن۔ 3 اُنہاں نیں اُنہاں کُوں پکڑ تے ڈُوجھے ڈینہہ تَئیں قید خانہ ءچ رکھیا کیوں جو شام تھی گئی ہئی۔ 4 پَر کلام سُننڑ آلیاں ءچوں بہُوں سارے اِیمان گِھن آئے، اِتھوں تَئیں جو اِیماندار مَرداں دی تعداد پَنج ہزار تھی گئی۔5 ڈوجھے ڈینہہ اِینویں تھیّا جو سردار، بزُرگ، فقیہہ، 6 سردار کاہِن حنّا، کائفا، یُوحنّا، اِسکندر تے جِتی سردار کاہِن دے گھرانے دے ہَن، یروشلیم ءچ جمع تھئے۔ 7 تےپطرس تے یُوحنّا کُوں اَدھ ءچ کھڑا کر تے پُچھنڑ لگے جو”تُساں کِیندی قُدرت تے ناں دے نال ایہہ کَم کیتے؟“
8 وَل پطرس نیں رُوح القُدس کنُوں معمور تھی تے اُنہاں کُوں آکھیا، ”اے اُمت دے سردارو تے بزُرگو! 9 جے اَج ساڈے کنُوں ہِک نیک کَم کیتے پُچھ گُچھ کیتی وَیندی ہے جو ایہہ معذور کیویں شِفا یاب تھی گِیا، 10 تاں تُساں تے ساری اِسرائیل قوم ایہہ جانڑ گِھنے جو یسوع مسیح ناصری جِینکُوں تُساں مصلُوب کیتا تے خُدا نیں مُردیاں ءچوں زندہ کیتا، اُوندے ناں نال ایہہ شخص تُہاڈے سامنڑے تندرُست کھڑا ہے۔ یسوع
11 ’اُوہو پتھر ہے جِینکُوں تُساں مِستریاں نیں رَد کر ڈِتا
تے اوہ کونے دے سِرے دا پتھر تھی گِیا ۔ ‘
12 تے کہیں بئے دے وسیلے نجات نئیں کیوں جو اَسمان دے تَلے لوکاں کُوں کوئی ڈوجھا ناں نئیں بخشیا گِیا جِیندے وسیلے نال اَساں نجات پا سگوں۔“
13 جِیں وَیلے اُنہاں پطرس تے یُوحنّا دی جرأت ڈِٹھی تے معلوم تھیّا جو اوہ اَن پڑھ تے عام آدمی ہِن تاں بہُوں حیران تھئے تے اُنہاں جاݨ گِھدا جو ایہہ یسوع دے نال رہ چکے ہِن۔ 14 تے اُوں آدمی کُوں جیہڑا چنگا تھیّا ہا، اُنہاں دے نال کھڑا ڈیکھ تے کُجھ خِلاف نہ آکھ سگے۔ 15 پَر اُنہاں کُوں عدالت کنُوں باہر وَنجنڑ دا حُکم ڈے تے آپس ءچ صلاح کرݨ لگے جو 16 ”اَساں اِنہاں آدمیاں دے نال کیا کروں؟کیوں جو یروشلیم دے سارے لوک جانڑدے ہِن جو اُنہاں نیں ہِک معجزہ کیتے تے اَساں اِیندا اِنکار نئیں کر سگدے۔ 17 پَر اِیں واسطے جو ایہہ گالھ لوکاں ءچ بہُوں مشہور نہ تھیوے، اَساں اُنہاں کُوں دڑکے ڈیسوں جو وَلا یسوع دا ناں گِھن تے کہیں نال گالھ نہ کرݨ۔“
18 بس اُنہاں کُوں سَڈ تے تاکید کیتی جو یسوع دا ناں گِھن تے ہر گز کہیں نال گالھ نہ کرݨ تے نہ تعلیم ڈیوݨ۔ 19 پَر پطرس تے یُوحنّا نیں جواب ڈِتا جو ”تُساں ای فیصلہ کرو جو کیا خُدا دے نزدیک ایہہ ٹھیک ہے جو اَساں تُہاڈی گالھ مَنوں تے خُدا دی نہ مَنوں؟ 20 کیوں جو ممکن نئیں جو اَساں جیہڑا کُجھ ڈِٹھا تے سُنڑیا ہے اُوندا تذکرہ نہ کروں۔“ 21 عدالت آلیاں نیں اُنہاں کُوں بِیا دھمکا تے چھوڑ ڈِتا کیوں جو لوکاں دی وجہ کنُوں اُنہاں کُوں سزا ڈیوݨ کیتے کوئی موقع نہ مِلیا ۔اِیں واسطے جو سارے لوک اُوں واقعہ دے سببّوں خُدا دی تعریف کریندے ہَن۔ 22 کیوں جو جیہڑا آدمی اِیں معجزے کنُوں شِفا پا گِیا ہا، چالیہ سالہاں کنُوں زیادہ عُمر دا ہا۔
اِیماندار دلیری کیتے دُعا منگدے ہِن
23 جِیویں ای اوہ رہا تھئے، آپنڑے لوکاں دے کولھ چلے گئے تے جیہڑا کُجھ سردار کاہِناں تے بزُرگاں اُنہاں کُوں آکھیا ہا، بیان کیتا۔ 24 جِیں وَیلے اُنہاں ایہہ سُنڑیا تاں یک دِل تھی تے خُدا کنُوں دُعا کیتی جو ”اے مالک! تُوں اَسمان، زمین تے سمندر تے جیہڑا کُجھ اُنہاں ءچ ہے، سبھ کُوں بنڑایا۔ 25 تُوں رُوح القُدس دے وسیلے نال ساڈے پیُو، آپنڑے خادم داؤد دی زبانی فرمایا جو
’قوماں کیوں کاوڑ ءچ ہِن
تے اُمتاں نیں کیوں احمقانہ منصوبے بنڑائے ہِن؟
26 خُداوند تے اُوندے المسیح دی مخالفت ءچ
زمین دے بادشاہ اُٹھی کھڑے تھئے
تے سردار جمع تھی گئے ۔‘
27 واقعی تیڈے قُدوس خادم یسوع دے خِلاف جِینکُوں تَیں مسیح مقرر کیتا، ہیرودیس تے پنطیُس پِنلاطُس، بنی اِسرائیلیاں تے غیر قوماں دےنال جمع تھی گئے 28 تاں جو جیہڑا کُجھ تیڈی قُدرت تے ارادہ دے مطابق پہلے ای مقرر کر ڈِتا گِیا ہا اُوہو تھیوے۔ 29 ہُنڑ اے خُداوند، اُنہاں دی دھمکیاں کُوں ڈیکھ تے آپنڑے بندیاں کُوں آپنڑا کلام بہُوں جرأت نال سُنڑاوݨ دی توفیق ڈے۔ 30 تے تُوں آپنڑا ہَتھ شِفا ڈیوݨ کُوں وَدھا تے تیڈے قُدوس خادم یسوع دے ناں نال معجزے تے عجیب کَم تھیوݨ۔“
31 جِیں وَیلے اوہ دُعا کر چکے تاں اوہ جاہ جِتھاں اوہ جمع ہَن کمب گئی تے اوہ سارے رُوح القُدس نال بھریج گئے تے اوہ خُدا دا کلام جرأت نال سُنڑاوݨ لگے۔
اِیماندار آپنڑی املاک ءچ ڈوجھیاں کُوں شامل کریندے ہِن
32 اِیمانداراں دی جماعت یک دِل تے ہِک جان ہئی تے کہیں وی آپنڑے مال کُوں آپنڑا نہ آکھیا بلکہ اُنہاں ساریاں دی چیزاں سانجھیاں ہَن۔ 33 تے رسُول وَڈی قُدرت دے نال خُداوند یسوع دے مُردیاں تُوں زندہ تھیوݨ دی گواہی ڈیندے ہَن۔ تے اُنہاں ساریاں اُتے خُدا دا وَڈا فضل ہا 34 کیوں جو اُنہاں ءچوں کوئی مُتھاج نہ ہا، اِیں واسطے جو جیہڑے لوک زمیناں یا گھراں دے مالک ہَن، اُنہاں کُوں ویچ ویچ تے وِکی ہوئی چیزاں دے پیسے گِھن آندے ہَن۔ 35 تے اُونکُوں رسُولاں دے قدماں ءچ رکھ ڈیندے ہَن تے اوہ ہر ہِک کُوں اُنہاں دی ضرورت دے مطابق وَنڈ ڈیندے ہَن۔