‏5 ایہہ گالھ ساری جماعت کُوں پسند آئی۔ بس اُنہاں ستِفُنس ناں دے ہِک شخص کُوں جیہڑا اِیمان تے رُوح القُدس نال بھریا ہویا ہا تے فِلِپُّس، پرُخُرس، نِیکانور، تِیمون، پرمناس تے نیکُلاؤس کُوں چُنڑ گِھدا۔ نیکُلاؤس انطاکیہ دا نو مُرید یہُودی ہا۔ ‏6 تے اِنہاں کُوں رسُولاں دے اَگُوں کھڑا کیتا ،تے اُنہاں اُتے ہَتھ رکھ تے دُعا کیتی۔

‏7 خُدا دا کلام پھیل دا ریہا تے یروشلیم ءچ شاگرداں دی تعداد بہُوں ای وَدھ گئی تے کاہِناں دی وَڈی جماعت اِیمان گِھن آئی۔

‏8 تے ستِفُنس فضل تے قوت نال بھریا ہویا لوکاں ءچ وَڈے وَڈے عجیب کَم تےمعجزے ظاہر کریندا ہا۔ ‏9 کُرینیاں، اِسکندریاں، کلِکیہ تے آسیہ دے کُجھ لوک اُوں عبادت خانہ دے ہَن جیہڑا لِبرتینیاں^a دا اَکھویندے۔ اوہ ستِفُنس نال بحث کرݨ لگے۔ ‏10 پَراوہ اُوں دانائی تے رُوح دا جِیندے نال ستِفُنس کلام کریندا ہا، مقابلہ نہ کر سگے۔ ‏11 اِیں اُتے اُنہاں نیں کُجھ آدمیاں کُوں سِکھا تے اَکھوا بھیجیا جو ” اَساں اِینکُوں موسیٰ تے خُدا دے بر خِلاف کُفر بَکدے سُنڑیا۔“ ‏12 وَل اوہ عوام تے بزُرگاں تے فقیہاں کُوں اُکسا تے ستِفُنس اُتے چڑھ گئے تے اُونکُوں پکڑ تے صدر ِ عدالت ءچ گِھن گئے۔ ‏13 تے کُوڑے گواہ پیش کیتے جنہاں آکھیا جو ”ایہہ شخص اِیں پاک مقام تے شریعت دے بر خِلاف بولنڑ کنُوں باز نئیں آندا، ‏14 کیوں جو اَساں اُونکُوں ایہہ آدھے سُنڑیا ہے جو اُوہو یسوع ناصری اِیں مقام کُوں برباد کر ڈیسی تے اُنہاں رَسماں کُوں بدل ڈیسی، جیہڑیاں موسیٰ ساکُوں ڈِتیاں ہِن۔“ ‏15 اُنہاں ساریاں، جیہڑے عدالت ءچ بیٹھے ہَن ،ستِفُنس اُتے نِگاہ کیتی تاں ڈِٹھا جو اُوندا چہرہ فرشتہ وانگوں ہے۔