ستِفُنس دا وعظ
7
‏1 وَل کاہِنِ اعظم، ستِفُنس تُوں پُچھیا، ”کیا ایہ گالھیں سچیاں ہِن؟“
‏2 اُوں آکھیا ”بِھراؤ تے بزُرگو سُنڑو! جلالی خُدا ساڈے پِیُو ابرہام اُتے اُوں ویلے ظاہر تھیّا جِیں ویلے او حاران شہر ءچ آباد تھیوݨ کنُوں پہلے مسوپتامیہ ءچ ہا،
‏3 تے اُونکُوں آکھیا جو ’آپنڑے مُلک تے آپنڑے رشتہ داراں کُوں چھوڑ تے اُوں مُلک ءچ چلیا وَنج جیہڑا مَیں تیکُوں ڈِکھیساںa۔‘
‏4 اِیں اُتے ابرہام کسدیاں دے مُلک کنُوں نِکل تے حاران ءچ آباد تھیّا۔ تے اُوندے پِیُو دے مرݨ تُوں بعد خُدا اُونکُوں اُتھوں کنُوں اِیں مُلک ءچ وسا ڈِتا جیندے ءچ تُساں ہُنڑ وسدے ہیوے۔
‏5 خُدا اُونکُوں اُوندے ءچ کوئی میراث نہ ڈِتی بلکہ پیر رکھنڑ دی جاہ وی نہ ڈِتی پر وعدہ کیتا جو ’مَیں ایہ زمین تیڈے تے تیڈے بعد تیڈی نسل دے قبضہ ءچ کر ڈیساں،‘ بھانویں اُوں ویلے ابرہام دی اولاد نہ ہئیb۔
‏6 خُدا ایہ وی فرمایا، ’تیڈی نسل غیر مُلک ءچ پردیسی ہوسی۔ اُتھاں دے لوک اُنہاں کُوں غُلامی ءچ رکھیسن تے چار سو سال تئیں اُنہاں نال بدسلُوکی کریسن۔‘
‏7 وَل خُدا آکھیا جو ’جِیں قوم دی او غُلامی ءچ راہسن، اُونکُوں مَیں سزا ڈیساں تے اُوندے بعد او نِکل تے اِیں جاہ تے میڈی عبادت کریسنc۔‘
‏8 تے خُدا ابرہام نال عہد کیتا جِیندا نشان ختنہ کرواوݨ ہاd۔ تے اِینویں ابرہام تُوں اِضحاق پیدا تھیّا تے اٹھویں ڈینہہ اُوندا ختنہ کیتا گِیا تے اِضحاق تُوں یعقُوب تے یعقُوب تُوں بارہاں قبیلیاں دے بزُرگ پیدا تھئے۔
‏9 بزُرگاں حسد ءچ آ تے یُوسف کُوں مِصریاں دے ہتھ ویچ ڈِتا۔ پر خُدا اُوندے نال ہا،
‏10 تے اُوندیاں ساریاں مُصیبتاں تُوں اُونکُوں بچایا، تے اُونکُوں اِتنی حِکمت بخش ڈِتی جو او مِصر دے بادشاہ فرعون دی نِگاہ ءچ مقبول تھی گِیا۔ تے فرعون اُونکُوں مِصر تے آپنڑے سارے گھر دا سردار بنڑا ڈِتا۔
‏11 وَل سارے مِصر تے کنعان ءچ کال پے گِیا تے وڈی مُصیبت آئی تے ساڈے پِیُو ڈاڈا کُوں کھانڑا نہ مِلدا ہا۔
‏12 پر جِیں ویلے یعقُوب ایہ سُنڑیا جو مِصر ءچ اناج ہے تاں اُوں ساڈے پِیُو ڈاڈا کُوں پہلی پھیری بھیجیا۔
‏13 ڈُوجھی پھیری یُوسف آپنڑے بِھرانواں اُتے ظاہر تھی گِیا تے یُوسف دی قومیت فرعون کُوں معلوم تھی گئی۔
‏14 وَل یُوسف آپنڑے پِیُو یعقُوب تے اُوندے سارے خاندان کُوں جیہڑے پنجھتر بندے ہَن، سڈوا بھیجیا۔
‏15 تے یعقُوب مِصر ءچ گِیا۔ اُتھاں او تے ساڈے پِیُو ڈاڈا مر گئےe۔
‏16 بعد ءچ اُنہاں دیاں لاشاں کُوں سِکم شہر ءچ پُچایا گِیا تے اُوں مقبرہ ءچ دفن کیتے گئے جِینکُوں ابرہام پیسے ڈے تے سِکم ءچ بنی ہمور کنُوں مُل گِھدا ہاf۔
‏17 پر جِیں ویلے اُوں وعدہ دے پُورے تھیوݨ دا ویلا نیڑے آیا جیہڑا خُدا ابرہام نال کیتا ہا تاں مِصر ءچ ساڈے لوکاں دی تعداد بہُوں ودھ گئی۔
‏18 وَل ڈُوجھا بادشاہ جیہڑا یُوسف کُوں نہ جانڑدا ہا، مِصر اُتے حکُومت کرݨ لگ پِیاg۔
‏19 اُوں ساڈی قوم نال چالاکی کر تے ساڈے پِیُو ڈاڈا نال اِتُھوں تئیں ظلم کیتا جو او آپنڑے بالاں کُوں باہر سٹنڑ اُتے مجبور تھی گئے تاں جو او زندہ نہ راہنڑ۔
‏20 اُوں ویلے مُوسیٰ پیدا تھیّا جیہڑا بہُوں ای خُوبصُورت ہا۔ او ترے مہینے تئیں آپنڑے پِیُو دے گھر ءچ پالیا گِیا،
‏21 پر جِیں ویلے او باہر سَٹ ڈِتا گِیا تاں فرعون دی دِھی اُونکُوں چا گِھدا تے آپنڑے پوتر آلی کار پالیا۔
‏22 تے مُوسیٰ مِصریاں دی ساری تعلیم و تربیت حاصل کیتی تے او کلام تے کم ءچ قوت آلا ہاh۔
‏23 جِیں ویلے او تقریباً چالیہہ سالہاں دا تھیّا تاں اُوندے دل ءچ آیا جو مَیں آپنڑے بِھرانواں بنی اِسرائیل دا حال پتہ کراں۔
‏24 اُوں اُنہاں ءچوں ہِک کُوں ظلم سہندے ڈیکھ تے اُوندی مدد کیتی تے مِصری کُوں مار تے مظلوم دا بدلہ گِھداi۔
‏25 اُوں تاں خیال کیتا جو میڈے بِھرا سمجھ ویسن جو خُدا میڈے ہتُھوں اُنہاں کُوں رہائی ڈیسی پر او نہ سمجھے۔
‏26 وَل ڈُوجھے ڈینہہ اُوں اُنہاں ءچوں ڈُو کُوں آپس ءچ لڑدے ڈِٹھا تے ایہ آکھ تے اُنہاں ءچ صُلح کراوݨ دی کوشش کیتی جو ’جوانو! تُساں تاں بِھرا بِھرا ہیوے، کیوں ہِک بئے اُتے ظلم کریندے ہیوے؟‘
‏27 پر جیہڑا آپنڑے ہمسائے اُتے ظلم کریندا پِیا ہا، اُوں مُوسیٰ کُوں ہِک پاسے دھکا ڈے تے آکھیا جو ’تیکُوں کئیں ساڈے اُتے حاکم تے قاضی مقرر کیتے؟
‏28 کیا تُوں میکُوں وی قتل کرݨ چاہندیں جِینویں کل اُوں مِصری کُوں قتل کیتا ہا؟‘
‏29 مُوسیٰ ایہ گالھ سُنڑ تے بھج گِیا تے مُلک ِ مِدیان ءچ ہِک پردیسی دے طور تے راہنڑ لگا تے اُتھاں اُوندے ڈُو پوتر پیدا تھئےj۔
‏30 چالیہہ سال بعد کوہ ِ سِینا دے بیابان ءچ مُوسیٰ کُوں ہِک بلدی ہوئی جھاڑی دے شعلہ ءچ ہِک فرشتہ ڈِکھالی ڈِتا۔
‏31 ایہ ڈیکھ تے مُوسیٰ حیران تھیّا تے جِیں ویلے غور نال ڈیکھنڑ کیتے نیڑے گِیا تاں خُداوند دی اواز آئی
‏32 جو ’مَیں تیڈے پِیُو ڈاڈا دا خُدا یعنی ابرہام، اِضحاق تے یعقُوب دا خُدا ہاںk۔‘ وَل مُوسیٰ کمب گِیا تے اُونکُوں ڈیکھنڑ دی جُرأت نہ ریہی۔
‏33 خُداوند اُونکُوں آکھیا جو ’آپنڑے پیراں کنُوں جُتی لہا گِھن کیوں جو جیہڑی جاہ اُتے تُوں کھڑا ہیں، او پاک زمین ہے۔
‏34 مَیں مِصر ءچ آپنڑی اُمت دی مُصیبت ڈِٹھی تے اُنہاں دی دھاڑ پِٹ سُنڑی، تے اُنہاں کُوں چُھڑاوݨ کیتے تلے آیا ہاں۔ ہُنڑ مَیں تیکُوں مِصر ءچ بھجیساںl۔‘
‏35 جئیں مُوسیٰ دا اُنہاں ایہ آکھ تے اِنکار کیتا ہا جو ’کئیں تیکُوں حاکم تے قاضی مقرر کیتا؟‘ اُونہئی کُوں خُدا حاکم تے چُھڑاوݨ آلا بنڑا تے اُوں فرشتہ دے ذریعے بھیجیا جیہڑا اُونکُوں جھاڑی ءچ نظریا ہا۔
‏36 اِیہو بندہ اُنہاں کُوں کڈھ آیا تے مِصر تے بحر ِ قُلزم تے بیابان ءچ چالیہہ سال تئیں عجیب کم تے معجزے ڈِکھائے۔
‏37 ایہ اُوہو مُوسیٰ ہے جئیں بنی اِسرائیل کُوں آکھیا جو ’خُدا تُہاڈے بِھرانواں ءچوں تُہاڈے کیتے میڈے وانگُوں ہِک نبی پیدا کریسیm۔‘
‏38 ایہ اُوہو ہے جیہڑا بیابان دی جماعت ءچ اُوں فرشتہ دے نال وی ہا جیہڑا کوہ ِ سِینا اُتے اُوندے نال ہم کلام تھیّا، تے ساڈے پِیُو ڈاڈا نال وی ہا۔ اُونہئی کُوں زندہ کلام مِلیا جو ساڈے تئیں پُچا ڈیوے۔
‏39 پر ساڈے پِیُو ڈاڈا اُوندا تابعدار تھیوݨ نہ چاہیا بلکہ اُونکُوں رَد کر ڈِتا تے اُنہاں دے دل مِصر دو ولا لگ گئے۔
‏40 اُنہاں ہارُون کُوں آکھیا جو ’ساڈے کیتے ایجھے معبُود بنڑا جیہڑے ساڈے اگُوں اگُوں ٹُرݨ، کیوں جو ایہ مُوسیٰ جیہڑا ساکُوں مِصر ءچوں کڈھ آئے، اساں نئیں جانڑدے جو اُوندے نال کیا تھئےn۔‘
‏41 تے اُنہاں ڈینہاں ءچ اُنہاں ویہڑے دی شکل ءچ ہِک بُت بنڑایا تے اُوندے اگُوں قُربانی پیش کیتی تے آپنڑے ہتھاں دے کماں دی خوشی منائی۔
‏42 بس خُدا اُنہاں تُوں مُنہ پھیر تے اسمانی تاریاں دی عبادت کرݨ کیتے چھوڑ ڈِتا۔ اِیں واسطے نبیاں دی کتاب ءچ لِکھیا ہے جو
’اِسرائیل دے گھرانڑے! کیا تُساں چالیہہ سال تئیں
بیابان ءچ میڈے کیتے قُربانیاں تے نذرانے پیش کریندے ریہے؟
‏43 نئیں بلکہ تُساں آپنڑے نال مولک دا تمبُو
تے رفان دیوتا دا تارہ چاتی ودے ہَوے،
یعنی اُنہاں مُورتاں کُوں جِنہاں کُوں تُساں عبادت کرݨ کیتے بنڑایا ہئی۔
بس مَیں تُہاکُوں بابلo تُوں پرے گِھن ویساںp۔‘
‏44 بیابان ءچ ساڈے پِیُو ڈاڈا کولھ عہد دا تمبُو ہا۔ او خُدا دے حُکم تے اُوں نمونہ دے مطابق بنڑایا گِیا ہا جیہڑا اُوں مُوسیٰ کُوں ڈِکھایا ہا۔
‏45 اُوں تمبُو کُوں ساڈے پِیُو ڈاڈا پہلے بزُرگاں تُوں حاصل کر تے یشُوع دے نال گِھن آئے جِیں ویلے اُنہاں قوماں دی ملکیت اُتے قبضہ کیتاq، جِنہاں کُوں خُدا ساڈے پِیُو ڈاڈا دے سامنڑے کڈھ ڈِتا۔ تے او تمبُو داؤد دے زمانہ تئیں ریہا۔
‏46 خُدا دے کرم دی نظر داؤد اُتے ہئی تے اُوں خُدا کُوں درخاست کیتی جو مَیں یعقُوب دے خُدا کیتے گھر بنڑاواںr۔
‏47 پر خُدا کیتے گھر بنڑاوݨ آلا سُلیمان ہا۔
‏48 پر خُدا تعالیٰ، اِنسانی ہتھاں دے بنڑائے ہوئے گھراں ءچ نئیں راہندا، جِینویں نبی آکھیا ہے جو
‏49 ’خُداوند فرمیندے،
اسمان میڈا تخت تے زمین میڈے پیراں دی چوکی ہے۔
وَل تُساں میڈے کیتے کیجھا گھر بنڑیسو
یا میڈے ارام کیتے کیہڑی جاہ بنڑیسو؟
‏50 کیا ایہ ساریاں چیزاں مَیں نئیں بنڑائیاںs؟‘
‏51 ضِدی لوکو، تُساں دل تُوں تے کَن تُوں اُنہاں آلی کار ہیوے جِنہاں دا ختنہ نہ تھیّا ہووےt، تُساں رُوح القُدس دی ہمیشاں مخالفت کریندے ہیوے جِینویں تُہاڈے پِیُو ڈاڈا کریندے ہَن۔
‏52 نبیاں ءچوں کِینکُوں تُہاڈے پِیُو ڈاڈا نئیں ستایا؟ اُنہاں تاں اُوں راستباز [یعنی المسیح] دے آوݨ دی خبر ڈیوݨ آلے کُوں قتل کر ڈِتا تے ہُنڑ تُساں اُوندے پکڑواوݨ آلے تے قاتل تھئے۔
‏53 تُساں فرشتیاں دے ذریعے شریعت تاں پائی پر عمل نہ کیتا۔“
ستِفُنس دی سنگساری
‏54 جِیں ویلے صدر عدالت آلیاں ایہ گالھیں سُنڑیاں تاں کوڑیج گئے تے اُوندے اُتے ڈند پِیہوݨ لگے۔
‏55 پر ستِفُنس رُوح القُدس نال بھریج تے اسمان دو غور نال نِگاہ کیتی تے خُدا دے جلال تے یسُوع کُوں خُدا دے سجے پاسُوں کھڑا ڈیکھ تے
‏56 آکھیا جو ”ڈیکھو، مَیں اسمان کُوں کُھلیا تے اِبنِ آدم کُوں خُدا دے سجے پاسُوں کھڑا ڈیدھا ہاں۔“
‏57 ایہ سُنڑ تے اُنہاں وڈے زور نال چیخ تے آپنڑے کَن بند کر گِھدے تے کٹھے تھی تے اُوندے اُتے جھپٹے۔
‏58 تے اُونکُوں شہر کنُوں باہر کڈھ تے سنگسار کرݨ لگے تے اُوندے خلاف گواہی ڈیوݨ آلیاںu آپنڑے کپڑے ساؤل ناں دے ہِک جوان دے پیراں کولھ رکھ ڈِتے۔
‏59 او ستِفُنس کُوں سنگسار کریندے ریہے تے اُوں ایہ دُعا کیتی جو اے خُداوند یسُوع! میڈی رُوح کُوں قبول کر۔
‏60 وَل اُوں گوڈے ٹیک تے وڈی اواز نال آکھیا جو ”اے خُداوند! ایہ گُناہ اِنہاں دے ذمہ نہ لا۔“ تے ایہ آکھ تے سَم گِیا۔