اُونہئی ڈینہہ اُوں کلیسیا اُتے جیہڑی یروشلیم ءچ ہئی، وَڈے ظلم دا سلسلہ شروع تھیّا تے رسُولاں دے سِوا سارے لوک یہُودیہ تے سامریہ دے چودھارُوں تِتر بِتر تھی گئے۔ ‏2 کُجھ اِیماندار لوکاں نیں ستِفُنس کُوں دفنایا تے اُوندے اُتے وَڈا ماتم کیتا۔

‏3 پَر ساؤل کلیسیا کُوں اِیں طرحاں تباہ کریندا ریہا جو گھر گھر گُھس تے مَرداں تے عورتاں کُوں گَھسیٹ تے قید کرویندا ہا۔

‏4 بس جیہڑے تِتر بِتر تھئے ہَن اوہ جاہ جاہ کلام دی خوشخبری سُنڑیندے ریہے، ‏5 تے فِلِپُس سامریہ شہر ءچ وَنج تے لوکاں ءچ المسیح دی تبلیغ کرݨ لگا۔ ‏6 تے لوک فِلِپُس دے معجزے ڈیکھ تے، تے اُوندے گالھیں سُنڑ تے، یک دل تھی تے اُوندے اَل متوجہ تھئے۔ ‏7 کیوں جو بہُوں سارے لوکاں ءچوں بدرُوحاں وَڈی آواز نال چیخاں مار تے نِکل گئیاں تے بہُوں سارے مفلوج تے مَنڈے چنگے کیتے گئے۔ ‏8 تے اُوں شہر ءچ وَڈی خوشی تھئی۔

‏9 اِیں کنُوں پہلے شمعون ناں دا ہِک شخص اُوں شہر ءچ جادُوگری کریندا ہا تے سامریہ دے لوکاں کُوں حیران کیتی رکھدا تے ایہہ آہدھاہا جو میں وی کوئی وَڈا شخص ہاں۔ ‏10 تے چھوٹے تُوں وَڈے تئیں سارے اُوندے اَل متوجہ تھیندے تے آہدھے ہَن جو ”ایہہ شخص خُدا دی اوہ قُدرت ہے جِینکُوں وَڈی اَکھیندے ہِن۔“ ‏11 اوہ اِیں واسطے اُوندے اَل متوجہ تھیندے ہَن جو اُونیں وَڈی مُدت کنُوں آپنڑے جادو دے سببّوں ساریاں کُوں حیران کیتا ہویا ہا۔ ‏12 پَر جِیں وَیلے اُنہاں فِلِپُس دا یقین کیتا جیہڑا خُدا دی بادشاہی تے یسوع مسیح دے ناں دی خوشخبری ڈیندا ہا تاں سبھ لوک خواہ مرد خواہ عورت بپتسمہ گِھننڑ لگے۔ ‏13 تے شمعون نیں خود وی یقین کیتا تے بپتسمہ گِھن تے فِلِپُس دے نال تھی پِیا تے نِشان تے وَڈے وَڈے معجزے تھیندے ڈیکھ تے حیران تھیّا۔

‏14 جِیں وَیلے یروشلیم ءچ رسُولاں نیں سُنڑیا جو سامریہ دے لوکاں نیں خُدا دا کلام قبول کر گِھدے تاں پطرس تے یُوحنّا کُوں اُنہاں دے کولھ بھیجیا۔ ‏15 اُنہاں وَنج تے اُنہاں کیتے دُعا کیتی جو رُوح القُدس پاوݨ۔ ‏16 کیوں جو اوہ اُوں وَیلے تئیں اُنہاں ءچوں کہیں اُتے نازل نہ تھیّا ہا ۔اُنہاں صرف خُداوند یسوع دے ناں اُتے بپتسمہ گِھدا ہا۔ ‏17 وَل پطرس تے یُوحنّا نیں اُنہاں اُتے ہَتھ رکھے تے اُنہاں نیں رُوح القُدس پایا۔

‏18 جِیں وَیلے شمعون ڈِٹھا جو رسُولاں دے ہَتھ رکھنڑ نال رُوح القُدس ڈِتا وَیندے تاں اُنہاں دے کولھ پیسے گِھن تے ‏19 آکھیا جو ”میکُوں وی ایہہ اختیار ڈیوو جو جئیں اُتے میں ہَتھ رکھاں اوہ رُوح القُدس پاوے۔“

‏20 پطرس نیں اُونکُوں آکھیا ”تیڈے پیسے تیڈے نال برباد تھیوݨ ، اِیں واسطے جو تُوں خُدا دی بخشش کُوں پیسیاں دے نال گِھننڑ دا خیال کیتا۔ ‏21 اِیں معاملہ ءچ تیڈا کوئی حصہ یا سانجھ نئیں کیوں جو تیڈا دِل خُدا دے نزدیک ٹھیک نئیں۔ ‏22 بس آپنڑیں اِیں بدی کنُوں توبہ کر تے خُداوند کنُوں دُعا کر جو شاید تیڈے دِل دے اِیں خیال کُوں معاف کر ڈیوے۔ ‏23 کیوں جو میں ڈیدھا ہاں جو تُوں شدید تلخی تے بُرائی ءچ گرفتار ہیں۔“

‏24 شمعون نیں جواب ءچ آکھیا، ”تُساں میڈے کیتے خُداوند کنُوں دُعا کرو جو جیہڑے گالھیں تُساں آکھیاں، اُنہاں ءچوں کوئی میکُوں پیش نہ آوے۔“

‏25 پطرس تے یُوحنّا گواہی ڈیوݨ تے خُداوند دا کلام سُنڑاوݨ دے بعد یروشلیم کُوں وَل گئے تے سامریہ دے بہُوں سارے دیہاتاں ءچ خوشخبری سُنڑیندے گئے۔

‏26 وَل خُداوند دے فرشتہ نیں فِلِپُس کُوں آکھیا جو ”اُٹھی تے جنوب دو اُوں راہ تئیں وَنج جیہڑی یروشلیم تُوں غَزّہ کُوں وَیندی ہے تے بیابان ءچ ہے۔“ ‏27 اوہ اُٹھی تے روانہ تھیّا تاں ڈیکھو ہِک حبشی خوجہ آندا پِیا ہا۔ اوہ حبشیاں^a دی ملکہ کنداکے دا ہِک وزیر تے اُوندے سارے خزانے دا مُختار ہا تے یروشلیم ءچ عبادت کیتے آیا ہا۔ ‏28 اوہ آپنڑی بگھی اُتے سوار ہا تے یسعیاہ نبی دا صحیفہ پڑھدا ہویا واپس وَیندا پیا ہا۔ ‏29 رُوح القُدس نیں فِلِپُس کُوں آکھیا جو ”نزدیک وَنج تے اُوں بگھی دے نال تھی پو۔“ ‏30 بس فِلِپُس نیں اُوندے اَل دِرک تے اُونکُوں یسعیاہ نبی دا صحیفہ پڑھدے سُنڑیا تے آکھیا جو ”جیہڑا کُجھ تُساں پڑھدے ہِیوے، کیا اُونکُوں سمجھدے وی ہِیوے؟“

‏31 اُونیں آکھیا جو ”ایہہ میں کیویں سمجھ سگدا ہاں جئیں تئیں کوئی میڈی رہنمائی نہ کرے؟“ تے اُونیں فِلِپُس کُوں درخاست کیتی جو میڈے کولھ آ بہہ۔ ‏32 پاک کلام ءچوں جیہڑا اوہ پڑھدا پِیا ہا، اوہ ایہہ ہا جو

‏34 خوجہ نیں فِلِپُس کُوں آکھیا،”میں تہاڈی مِنت کر تے پُچھدا ہاں جو نبی ایہہ کِیندے بارے ءچ آہدھے؟ آپنڑے یا کہیں بئے دے بارے ءچ؟“ ‏35 فِلِپُس نیں خُدا دے کلام دی اُوں جاہ تُوں شروع کر تے اُونکُوں یسوع دے بارے ءچ بشارت ڈِتی۔ ‏36 تے رستے ءچ وَیندے ہوئے، ایجھی جاہ اُتے پُجے جِتھاں پانڑی ہا۔ خوجہ آکھیا ”ڈیکھ اِتھاں پانڑی موجود ہے، ہُنڑ میکُوں بپتسمہ گِھننڑ کنُوں کیہڑی چیز روکیندی ہے؟“ ‏37 ( فِلِپُس آکھیا جو ”جے تُساں دِل تے جان نال اِیمان رکھو تاں بپتسمہ گِھن سگدے ہِیوے۔“ اُونیں جواب ءچ آکھیا ”میں اِیمان رکھیندا ہاں جو یسوع مسیح خُدا دا پوتر ہے۔“)

‏38 بس اُونیں بگھی کُوں روکنڑ دا حُکم ڈِتا تے فِلِپُس تے خوجہ ڈوہائیں پانڑی ءچ لتھے تے فِلِپُس نیں اُونکُوں بپتسمہ ڈِتا۔ ‏39 جِیں وَیلے پانڑی ءچوں نِکل تے باہر آئے تاں خُداوند دا رُوح فِلِپُس کُوں چا تے گِھن گِیا تے خوجہ نیں اُونکُوں وَلا نہ ڈِٹھا۔ پَر اوہ خوشی کریندا ہویا آپنڑی منزل دو روانہ تھی گِیا۔ ‏40 وَل فِلِپُس اشدُود ^bءچ وَنج نِکلیا تے قیصریہ ءچ پُجنڑ تئیں سارے شہراں ءچ خوشخبری سُنڑیندا گِیا۔