‏4 اُونیں غور نال ڈِٹھا تے ڈر تے آکھیا ”مالک، کیا ہے؟“

فرشتہ نیں اُونکُوں آکھیا ”تیڈی خیرات تے دُعاواں یادگاری کیتے خُدا دے حضور پُج گئیاں ہِن، ‏5 ہُنڑ یافا ءچ کُجھ آدمی بھیج تے شمعون کُوں جیہڑا پطرس اَکھویندے، سَڈ واگِھن۔ ‏6 اوہ شمعون چم رنگنڑ آلے دے گھرمہمان ہے جِیندا گھر سمندر دے کنارے ہے۔“

‏7 جِیں وَیلے اوہ فرشتہ چلیا گِیا جئیں اُوندے نال گالھیں کیتیاں ہَن تاں کُرنیلیُس نیں آپنڑے ڈو نوکراں کُوں تے آپنڑے خاص سپاہیاں ءچوں ہِک دیندار کُوں سَڈیا، ‏8 تے اُنہاں کُوں سارے گالھیں ڈسا تے یافا دو روانہ کیتا۔

‏9 ڈوجھے ڈینہہ جِیں وَیلے اوہ رستے ءچ ہَن تے شہر دے نزدیک پُجے تاں ڈوپہر دے نیڑے پطرس چھت اُتے دُعا کرݨ کیتے گِیا۔ ‏10 اُونکُوں بُھک لگی تے کُجھ کھاونڑا چاہندا ہا پَر جِیں وَیلے لوک کھانڑا تیار کریندے پئے ہَن تاں اُوندے اُتے بے خودی طاری تھی گئی۔ ‏11 تے اُونیں ڈِٹھا جو اَسمان کُھل گِیا تے کوئی چیز ہِک وَڈی چادر وانگوں چاروں کونیاں کنُوں لٹکدی ہوئی زمین دو آندی پئی ہئی، ‏12 جِیندے ءچ زمین دے سبھ قِسم دے چوپائے تے کیڑے مکوڑے تے ہوا دے پَکھی ہِن۔ ‏13 تے اُونکُوں ہِک آواز آئی جو ”اے پطرس اُٹھی! ذبح کر تے کھا۔“

‏14 پَر پطرس نیں آکھیا ”اے خُداوند! ہرگز نئیں! کیوں جو میں کڈھائیں کوئی حرام یا ناپاک چیز نئیں کھادی۔“

‏15 اوہ آواز اُونکُوں وَلا سُنڑائی ڈِتی جو ” تُوں کہیں کُوں وی جِینکُوں خُدا نیں پاک مُقرر کیتے حرام نہ آکھ۔“ ‏16 تَرے پھیری اِینویں ای تھیّا تے اوہ چادر فوراً اَسمان اُتے چا گِھدی گئی۔

‏17 جِیں وَیلے پطرس آپنڑے دِل ءچ سوچیندا پِیا ہا جو ایہہ رویا جیہڑی میں ڈِٹھی ہے کیا مطلب ہے، تاں ڈیکھو کُرنیلیُس دے بھیجے ہوئے آدمی شمعون دے گھر دا پتا معلوم کر تے دروازے اُتے آ کھڑے تھئے۔ ‏18 تے آواز ڈے تے پُچھنڑ لگے جو ”کیا شمعون جیہڑا پطرس اَکھویندے، اِتھائیں مہمان ہے؟ “

‏19 جِیں وَیلے پطرس اُوں رویا دے بارے ءچ سوچیندا پِیا ہا، تاں رُوح القُدس نیں اُونکُوں آکھیا جو ”ڈیکھ تَرے آدمی تیڈے بارے ءچ پُچھدے پئن۔ ‏20 بس اُٹھی تے تَلے وَنج تے جِھجکے بغیر اُنہاں دے نال چلیا وَنج کیوں جو میں ای اُنہاں کُوں بھیجے۔“ ‏21 پطرس تَلے لہہ تے اُنہاں آدمیاں کُوں آکھیا، ”جِینکُوں تُساں پُچھدے پئے ہِیوے اوہ میں ای ہاں۔ تُساں کیوں آئے ہِیوے؟“

‏22 اُنہاں آکھیا، ” کُرنیلیُس صوبیدار جیہڑا راستباز تے خُدا ترس آدمی ہے تے یہُودیاں دی ساری قوم ءچ نیک ناں ہے، اُونیں خُدا دے پاک فرشتہ کنُوں ہدایت پا تی جو تیکُوں آپنڑے گھر سَڈ تے تہاڈے تُوں کلام سُنڑے۔“ ‏23 بس پطرس نیں اُنہاں کُوں اَندر سَڈ تے اُنہاں دی مہمان داری کیتی۔

سویر نال اوہ اُٹھی تے اُنہاں دے نال روانہ تھیّا تے یافا ءچوں کُجھ بِھرا اُوندے نال تھی پئے، ‏24 تے ڈوجھے ڈینہہ قیصریہ ءچ داخل تھیّا۔ کُرنیلیُس اُنہاں دا اِنتظار کریندا پِیا ہا تے آپنڑے قریبی رشتہ داراں تے دوستاں کُوں سَڈی بیٹھا ہا۔ ‏25 جِیں وَیلے پطرس اَندر داخل تھیّا، کُرنیلیُس نیں اُوندا اِستقبال کیتا تے اُوندے قدماں ءچ ڈھے تے سِجدہ کیتا۔ ‏26 پَر پطرس نیں اُونکُوں کھڑا کر تے آکھیا، ”کھڑا تھی، میں وی تاں اِنسان ہاں۔“ ‏27 تے پطرس اُوندے نال گالھیں کریندا ہویا اَندر گِیا تے بہُوں سارے لوکاں کُوں کَٹھا ڈیکھ تے ‏28 اُنہاں کُوں آکھیا، ” تُساں جانڑدے ہِیوے جو کہیں یہُودی دا غیرقوم نال اُٹھنڑ باہنڑ یا اُوندے کولھ وَنجنڑ شرع دے خلاف ہے پَر خُدا نیں میڈے اُتے ظاہر کیتے جو میں کہیں آدمی کُوں نِجس یا ناپاک نہ آکھاں۔ ‏29 اِیں واسطے جِیں وَیلے میں سَڈیا گِیا تاں بغیر عُذر دے چلیا آیاں۔ بس ہُنڑ میں پُچھدا ہاں جو میکُوں کیوں سَڈیا گِیا؟“

‏30 کُرنیلیُس نیں آکھیا،”چار ڈینہہ پہلے میں آپنڑے گھر ءچ اِیں وَیلے یعنی تَریجھے پہر دے نیڑے دُعا کریندا پِیا ہم تے ڈیکھو ہِک شخص چمکدار پُشاک ءچ میڈے سامنڑے کھڑا تھیّا ‏31 تے آکھیا، ’اے کُرنیلیُس خُدا نیں تیڈی دُعا سُنڑ گِھدی تے تیڈی خیرات دی خُدا دے حضور یاد تھئی ہے۔ ‏32 بس کہیں کُوں یافا بھیج تے شمعون کُوں جیہڑا پطرس اَکھویندے آپنڑے کولھ سَڈ۔ اوہ سمندر دے کنارے شمعون چم رنگنڑ آلے دے گھر مہمان ہے۔‘ ‏33 بس میں فوراً تُہاکُوں سَڈوا بھیجیا تے تُساں وی بہُوں چنگا کیتا جو آ گئے۔ ہُنڑ اَساں سارے خُدا دے حضور ءچ حاضر ہئیں تاں جو جیہڑا کُجھ خُداوند نیں تُہاکُوں آکھیا ہے، اُونکُوں سُنڑوں۔“

‏34 وَل پطرس آکھنڑ لگا، ”میں چنگی طرحاں جاݨ گِیا ہاں جو خُدا کہیں دا طرفدار نئیں ‏35 بلکہ ہر قوم ءچ جیہڑا اُوں کنُوں ڈردے تے راستبازی دے کَم کریندے، اوہ اُونکُوں پسند آندے۔ ‏36 اُونیں بنی اِسرائیل دے کولھ آپنڑا کلام بھیجیا تےیسوع مسیح دے وسیلے، جیہڑا ساریاں دا خُداوند ہے، صُلح دی خوشخبری سُنڑائی۔ ‏37 اُوں گالھ کُوں تُساں جانڑدے ہِیوے جیہڑی یُوحنّا بپتسمہ ڈیوݨ آلے دی منادی دے بعد گلیل کنُوں گِھن تے سارے یہُودیہ ءچ مشہور تھی گئی، ‏38 جو خُدا نیں یسوع ناصری کُوں رُوح القُدس تے قُدرت نال کیویں مسح ^b کیتا۔ اوہ بھلائی کریندا تے اُنہاں ساریاں کُوں جیہڑے اِبلیس دے ظلم دا شکار ہَن، شِفا ڈیندا ریہا کیوں جو خُدا اُوندے نال ہا۔ ‏39 اُساں اُنہاں سارے کَماں دے گواہ ہیں جیہڑے اُونیں یہُودیاں دے مُلک تے یروشلیم ءچ کیتے۔ اُنہاں اُونکُوں صلیب اُتے چڑھا تے قتل کر ڈِتا۔ ‏40 خُدا نیں اُونکُوں تَریجھے ڈینہہ زندہ کر ڈِتا تے ظاہر وی کیتا، ‏41 نہ جو ساری اُمت اُتے بلکہ اُنہاں گواہاں اُتے جِنہاں کُوں خُدا نیں پہلے کنُوں چُنڑ گِھدا ہا یعنی اَساں اُتے جِنہاں نیں اُوندے مُردیاں ءچوں زندہ تھیوݨ دے بعد اُوندے نال کھادا پِیتا۔ ‏42 تے اُونیں ساکُوں حُکم ڈِتا جو لوکاں ءچ منادی کروں تے گواہی ڈیووں جو ایہہ اُوہو ہے جیہڑا خُدا دی طرفوں زندیاں تے مُردیاں دا مُنصف مُقرر کیتا گئے۔ ‏43 اِیں شخص دی سارے نبی گواہی ڈیندے ہِن جو جیہڑا کوئی اُوندے اُتے اِیمان گِھن آسی، اُوندے ناں نال گُناہاں دی معافی حاصل کریسی۔“

‏44 پطرس ایہہ گالھیں کریندا ای پِیا ہا جو رُوح القُدس اُنہاں ساریاں اُتے نازل تھیّا جیہڑے کلام سُنڑدے پئے ہَن۔ ‏45 تے پطرس دے نال آوݨ آلے یہُودی جیہڑے اِیماندار تھی گئے ہَن، اوہ سارے حیران تھیوݨ لگے جو غیریہُودیاں اُتے وی رُوح القُدس دی نعمت بخشی گئی۔ ‏46 کیوں جو اُنہاں کُوں طرحاں طرحاں دیاں زباناں بولیندے تے خُدا دی حمد کریندے سُنڑیا۔ وَل پطرس نیں آکھیا، ‏47 ”جِیویں ساکُوں رُوح القُدس مِلیا، اِنہاں کُوں وی مِلیا ہے۔ کیا کوئی اِنہاں لوکاں کُوں پانڑی دا بپتسمہ گِھننڑ کنُوں روک سگدے؟“ ‏48 تے اُونیں حُکم ڈِتا جو یسوع مسیح دے ناں نال بپتسمہ ڈِتا وَنجے۔ وَل اُنہاں پطرس کُوں درخاست کیتی جو ساڈے کولھ کُجھ ڈینہہ بئے ٹِک۔