یروشلیم ءچ اِجلاس
15
1 وَل کُجھ لوک یہُودیہ تُوں آ تے مسیحی بِھراواں کُوں ایہہ تعلیم ڈیوݨ لگے جو ”موسیٰ دی رسم دے مطابق جے تُہاڈا ختنہ نہ تھیّا ہووے تاں تُساں نجات نئیں پا سگدے۔“ 2 جِیں وَیلے پَولُس تے برنباس دی اُنہاں دے نال سخت تکرار تے بحث تھئی تاں کلیسیا نیں ایہہ مُقرر کیتا جو پَولُس تے برنباس تے اُنہاں ءچوں کُجھ بئے آدمی اِیں مسٔلہ کیتے رسُولاں تے بزُرگاں دے کولھ یروشلیم ونجنڑ۔3 بس کلیسیا نیں اُنہاں کُوں روانہ کیتا تے اوہ فینیکے تے سامریہ کنُوں تھیندے ہوئے، غیر قوماں دا مسیح اُتے اِیمان گِھن آوݨ دا بیان کریندے گئے تے سبھ بِھراواں کُوں خوش کریندے گئے۔ 4 جِیں وَیلے یروشلیم ءچ پُجے تاں کلیسیا، رسُول تے بزُرگ اُنہاں کُوں خوشی نال مِلے تے اُنہاں سبھ کُجھ بیان کیتا جیہڑا خُدا نیں اُنہاں دی معرفت کیتا ہا۔
5 پَر فریسیاں دے فِرقہ ءچوں جیہڑے اِیمان گِھن آئے ہَن، کُجھ کھڑے تھی تے آکھنڑ لگے جو ”غیریہُودیاں ءچوں اِیمان گِھن آوݨ آلیاں دا ختنہ کراوݨ تے اُنہاں کُوں موسیٰ دی شریعت اُتے عمل کرݨ دا حُکم ڈیوݨ ضرور ہے۔“
6 بس رسُول تے بزُرگ اِیں گالھ اُتے غور کرݨ کیتے جمع تھئے۔ 7 بہُوں بحث دے بعد پطرس نیں کھڑا تھی تے اُنہاں کُوں آکھیا جو ”اے بِھراؤ ! تُساں جانڑدے ہِیوے جو بہُوں عرصہ پہلے خُدا نیں تُساں لوکاں ءچوں میکُوں چُنڑیا جو غیر قوماں میڈی زبان تُوں خوشخبری دا کلام سُنڑ تے اِیمان گِھن آوݨ۔ 8 تے خُدا نیں جیہڑا دِلاں دا حال جانڑدا ہے اُنہاں کُوں وی ساڈے وانگوں رُوح القُدس ڈے تے اُنہاں دی گواہی ڈِتی a، 9 تے اِیمان دے وسیلہ نال اُنہاں دے دِل پاک کر تے ساڈے ءچ تے اُنہاں ءچ کوئی فرق نئیں کیتا۔ 10 بس ہُنڑ تُساں شاگرداں دی گِچی اُتے ایجھا بھار جِینکُوں نہ ساڈے پیُو ڈاڈا چا سگدے ہَن، نہ ای اَساں، رکھ تے خُدا کُوں کیوں اَزمیندے ہِیوے؟ 11 حالانکہ ساڈا اِیمان ہے جو جیویں اُنہاں کُوں خُداوند یسوع دے فضل دے وسیلے نجات مِلی، اُونویں ای ساکُوں وی مِلسی۔“
12 وَل ساری جماعت چُپ رہی تے پَولُس تے برنباس دا بیان سُننڑ لگی جو خُدا نیں اُنہاں دے ذریعے غیر قوماں ءچ کیجھے کیجھے معجزے تے عجیب کَم ظاہر کیتے۔ 13 جِیں وَیلے اُنہاں دے گالھیں ختم تھئیّاں تاں یعقوب آکھنڑ لگا جو ”اے بِھراؤ میڈی گالھ سُنڑو۔ 14 شمعون نیں تُہاکُوں ڈسائے جو خُدا نیں پہلے کیویں غیر قوماں اُتے نِگاہ کیتی تاں جو اُنہاں ءچوں لوکاں کُوں چُنڑ تے آپنڑے ناں دی ہِک اُمت بنڑا گِھنے۔ 15 تے نبیاں دے گالھیں وی اِیندے مطابق ہِن۔ چنانچہ لکھیا ہے جو
16 ’اِیندے بعد میں وَلا آساں
تے داؤد دے ڈھٹھے ہوئے تنبُو کُوں کھڑا کریساں
تے اُوندے پَھٹے ٹُوٹے دی مرمّت کر تے اُونکُوں وَلا تعمیر کریساں۔
17 تاں جو باقی لوک یعنی ساریاں قوماں
جیہڑیاں میڈے ناں دیاں اَکھویندیاں ہِن،
خُداوند کُوں گولھنڑ b۔ ‘
18 ایہہ اُوہو خُداوند فرمیندے جیہڑا دُنیا دے شروع تُوں اِنہئی گالھیں دی خبر ڈیندا آیا ہے۔
19 بس میڈا فیصلہ ایہہ ہے جو جیہڑے غیر قوماں ءچوں خُدا دی طرف رجوع کریندے ہِن اُنہاں کُوں اَساں تکلیف نہ ڈیؤں۔ 20 پَر اُنہاں کُوں خط لکھ تے ایہہ ڈساؤں جو اوہ بُتاں کُوں نذر چڑھائی چیزاں تے حرام کاری تے گَل گُھٹ تے مارے ہوئے جانوراں تے خون کنُوں پرہیز کرݨ۔ 21 کیوں جو ہر شہر ءچ پُرانڑے زمانے کنُوں موسیٰ دی شریعت دی منادی کیتی گئی ہے تے اوہ عبادت خانیاں ءچ ہر سَبت کُوں سُنڑائی وَیندی ہے۔“
غیر یہُودی اِیمانداراں دے ناں خط
22 وَل رسُولاں تے بزُرگاں نیں ساری کلیسیا سمیت مناسب سمجھیا جو آپنڑے ءچوں کُجھ آدمیاں کُوں چُنڑ تے پَولُس تے برنباس دے نال انطاکیہ کُوں روانہ کرݨ یعنی یہُوداہ کُوں جیہڑا برسبّا اَکھویندے تے سِیلاس کُوں، ایہہ بِھراواں ءچ قابل ِ احترام ہَن۔ 23 تے اُنہاں دے ہَتھ ایہہ خط بھیجیا جو
رسُولاں تے بزُرگ بِھراواں دی طرفوں انطاکیہ، سُوریہ تے کلکیہ دے مسیحی بِھراواں کُوں جیہڑے غیر قوماں ءچوں ہِن، سلام پُجے۔
24 چونکہ اَساں سُنڑیا ہے جو ساڈے ءچوں کُجھ لوکاں نیں جنہاں کُوں اَساں حُکم نہ ڈِتا ہا تُہاکُوں آپنڑے گالھیں نال پریشان کر ڈِتے۔ 25 اِیں واسطے اَساں رَل تے مناسب جانڑیا جو کُجھ چُنڑے ہوئے آدمیاں کُوں آپنڑے عزیزاں پَولُس تے برنباس دے نال تُہاڈے کولھ بھیجُوں۔ 26 ایہہ ڈوہیں ایجھے آدمی ہِن جِنہاں نیں آپنڑیاں جاناں کُوں ساڈے خُداوند یسوع مسیح دے ناں کیتے خطرے ءچ پایا ہویا ہے۔ 27 چنانچہ اَساں یہُوداہ تے سِیلاس کُوں بھیجیا ہے، جیہڑے ایہہ گالھیں زبانی وی بیان کریسن۔ 28 کیوں جو رُوح القُدس نیں تے اَساں مناسب سمجھیا جو اِنہاں لازمی گالھیں دے علاوہ تُہاڈے اُتے کوئی بِیا بھار نہ سَٹُوں، 29 جو تُساں بُتاں دی قُربانیاں دے گوشت ، خون تے گلا گُھٹ تے مارے ہوئے جانوراں دے گوشت تے حرام کاری کنُوں پرہیز کرو۔ جے تُساں آپنڑے آپ کُوں اِنہاں چیزاں کنُوں بچائی رَکھیسو تاں سلامت رَہسو۔
والسّلام۔
30 بس اوہ روانہ تھی تے انطاکیہ ءچ پُجے تے جماعت کُوں کَٹھا کر تے خط ڈے ڈِتا۔ 31 اوہ خط دے تسلی بخش کلام کُوں پڑھ تے خوش تھئے۔ 32 تے یہُوداہ تے سِیلاس جیہڑے خود وی نبی ہَن، بِھراواں کُوں نصیحت کر تے مضبوط کر ڈِتا۔ 33 کُجھ ڈینہہ بعد اوہ بِھراواں تُوں سلامتی دی دُعا گِھن تے آپنڑے بھیجنڑ آلیاں دے کولھ روانہ کیتے گئے۔ 34 [پَر سِیلاس کُوں اُتھاں رَہنڑ چنگا لگیا۔]
35 پَر پَولُس تے برنباس انطاکیہ ءچ ای کھڑ گئے تے بہُوں سارے بئے لوکاں دے نال خُداوند دا کلام سَکھیندے تے اُوندی منادی کریندے ریہے۔
پَولُس تے برنباس ءچ تکرار تے جُدائی
36 کُجھ ڈینہہ بعد پَولُس نیں برنباس کُوں آکھیا جو ”جِنہاں شہراں ءچ اَساں خُداوند دا کلام سُنڑایا ہا، آؤ وَل اُنہاں ءچ جُل تے بِھراواں کُوں ڈیکھوں جو اُنہاں دا کیا حال ہے۔“ 37 برنباس یُوحنّا کُوں جیہڑا مرقس اَکھویندا ہے، نال گِھننڑ چاہندا ہا۔ 38 پَر پَولُس نیں ایہہ مناسب نہ سمجھیا جو جیہڑے شخص نیں اُنہاں دے نال پمفیلیہ ءچ وَنجنڑ تُوں کنارہ کیتا تے اِیں کَم کیتے اُنہاں دے نال نہ گِیا ہا، اُونکُوں نال گِھن وَنجوں۔ 39 بس اُنہاں ءچ ایجھی تکرار تھئی جو اوہ ہِک بئے کنُوں اَنج تھی گئے۔ برنباس مرقس کُوں گِھن تے جہاز تُوں کُپرُس کُوں روانہ تھیّا۔ 40 پَر پَولُس نیں سِیلاس کُوں نال گِھن گِھدا تے بِھراواں کنُوں خُداوند دے فضل دے سپُرد تھی تے اُتھوں روانہ تھیّا۔ 41 پَولُس سُوریہ تے کلکیہ کنُوں تھیندے ہوئے کلیسیاواں کُوں مضبوط کریندا گِیا۔