‏5 پَر یہُودیاں حسد دی وجہ کنُوں بازاری لوکاں ءچوں کُجھ بدمعاشاں کُوں آپنڑے نال گِھدا تے شہر ءچ ہنگامہ شروع کر ڈِتا تے یاسون دے گھر اُتے دھاوا بول ڈِتا کیوں جو پَولُس تے سِیلاس کُوں لوکاں دے سامنڑے گِھن آوݨ چاہندے ہَن۔ ‏6 پَر جِیں وَیلے اُنہاں کُوں اوہ نہ ملے تاں یاسون تے بہُوں سارے ڈوجھے مسیحی بِھراواں کُوں گھیل تے شہر دے حاکماں دے کولھ گِھن گئے تے چیخ تے آکھیا ”اوہ آدمی جنہاں ساری دُنیا کُوں باغی کر ڈِتے، ہُنڑ اِتھاں وی آگئے ہِن، ‏7 تے یاسون نیں اُنہاں کُوں آپنڑے گھر ءچ ٹِکایا ہے۔ تے ایہہ سارے لوک قیصر دے حُکماں دے مُخالف ہِن تے آہدھے ہِن جو بادشاہ تاں کوئی بِیا ای ہے جِیندا ناں یسوع ہے۔“ ‏8 ایہہ گالھ سُنڑ تے عوام تے شہر دے حاکم گھبرا گئے۔ ‏9 تے اُنہاں یاسون تے باقی مسیحی لوکاں کُوں ضمانت اُتے چھوڑ ڈِتا۔

‏10 رات تھیندے ای مسیحی بِھراواں نیں پَولُس تے سِیلاس کُوں اُتھوں کنُوں بیرِیّہ دو روانہ کر ڈِتا۔ جِیں وَیلے اوہ اُتھاں پُجے تاں یہُودی عبادت خانہ ءچ گئے۔ ‏11 ایہہ لوک تھِسّلُنیکے دے لوکاں کنُوں زیادہ مُہذب ہَن کیوں جو اُنہاں کلام کُوں بہُوں شوق نال قبول کیتا تے اوہ ہر روز خُدا دے کلام دا مطالعہ کریندے ہَن جو ڈیکھنڑ ایہہ گالھیں اِینویں ای ہِن۔ ‏12 بس بہُوں سارے یہُودی تے معزز یُونانی مَرد تے عورتاں وی اِیمان گِھن آئے۔ ‏13 جِیں وَیلے تھِسّلُنیکے دے یہُودیاں کُوں معلوم تھیّا جو پَولُس بیرِیہ ءچ خُدا دے کلام دی تبلیغ کریندا پِیا ہے تاں اوہ اُتھاں وی آ پُجے تے لوکاں کُوں ہنگامہ کرݨ اُتے اُکساوݨ لگے۔ ‏14 وَل بِھراواں نیں فوراً پَولُس کُوں ساحل ِ سمندر دو روانہ کر ڈِتا پَر سِیلاس تے تِیمُتھِیُس بیرِیہ ءچ ای ریہے۔ ‏15 جیہڑے لوک پَولُس دی رہبری کریندے پئے ہَن اوہ اُونکُوں اتھینے ءچ چھوڑ تے اِیں حُکم دے نال وَل آئے جو سِیلاس تے تِیمُتھِیُس جلدی تُوں جلدی پَولُس دے کولھ آوݨ۔

‏16 جِیں وَیلے پَولُس اتھینے ءچ اُنہاں دا اِنتظار کریندا پِیا ہا تاں ایہہ ڈیکھ تے جو سارا شہر بُتاں کنُوں بھریا پِیا ہے، اُوندا ہاں سَڑ گِیا۔ ‏17 اِیں واسطے اوہ عبادت خانہ ءچ یہُودیاں تے خُدا پرست یُونانیاں نال بحث کریندا رَہندا ہا تے اُنہاں کُوں وی جیہڑے اُونکُوں ہر روز بازار ءچ مِلدے ہَن۔ ‏18 کُجھ اِپکُوری تے ستوئیکی فیلسُوف ^aاُوندے نال بحث ءچ پے گئے۔ اُنہاں ءچوں کُجھ نیں آکھیا جو ”ایہہ بکواسی کیا آکھنڑ چاہندا ہے؟“ کُجھ ایہہ آکھنڑ لگے جو ”ایہہ تاں اَن سُونویں دیوتاواں دی خبر ڈیوݨ آلا معلوم تھیندے۔“ کیوں جو پَولُس یسوع تے قیامت دی خوشخبری ڈیندا ہا۔ ‏19 وَل اوہ اُونکُوں آپنڑے نال اریوپگُس^b اُتے گِھن گئے تے آکھنڑ لگے ”کیا اَساں جاݨ سگدے ہئیں جو ایہہ نویں تعلیم جیہڑی تُوں ڈیندیں کیا ہے؟ ‏20 اَساں تیڈے مُنہ کنُوں بہُوں حیران کرݨ آلے گالھیں سُنڑدے پئے ہئیں۔ اَساں ایہہ جاننڑا چاہندے ہئیں جو اِنہاں دا کیا مطلب ہے؟“ ‏21 (کیوں جو اتھینے دے لوک کیا مقامی کیا پردیسی، آپنڑا سارا فارغ وقت فقط نویں نویں گالھیں سُننڑ یا سنڑاوݨ ءچ گزریندے ہَن۔)

‏22 پَولُس نیں اریوپگُس دے اَدھ ءچ کھڑا تھی تے آکھیا جو ”اے اتھینے آلیو! میں ڈیدھا ہاں جو تُساں ہر گالھ ءچ بہُوں مذہبی ہِیوے۔ ‏23 کیوں جو جِیں وَیلے میں تُہاڈے شہر ءچ پھردا پِیا ہم تاں میڈی نِگاہ تُہاڈے معبُوداں اُتے وی پئی ۔میں ڈِٹھا جو ہِک قُربان گاہ اُتے ایہہ لکھیا پِیا ہے ’نا معلوم خُدا کیتے۔‘ بس تُساں جِینکُوں بغیر جانڑدے عبادت کریندے ہِیوے، میں تُہاکُوں اُونہئی دی خبر ڈیندا ہاں۔

‏24 جئیں خُدا دُنیا تے اُوندے سارے چیزاں کوں پیدا کیتا اوہ اَسمان تے زمین دا مالک ہے، اوہ ہَتھ دے بنڑائے مَندراں ءچ نئیں رَہندا۔ ‏25 اوہ اِنسان دے ہَتھاں کنُوں خدمت نئیں گِھندا کیوں جو اوہ کہیں چیز دا متھاج نئیں، اوہ تاں سارے اِنساناں کُوں زندگی، ساہ تے سارا کُجھ ڈیندے۔ ‏26 اُونیں ہِک آدمی کنُوں لوکاں دی ہر قوم کُوں پیدا کیتا تاں جو پوری زمین آباد تھیوے، تے اُونیں اُنہاں دی زندگی دا وقت تے رَہنڑ کیتے حد بندی مُقرر کیتی۔ ‏27 خُدا نیں ایہہ سبھ کُجھ کیتا، تاں جو اوہ اُوندی تلاش کرݨ تے اُوندے قریب آ تے اُونکُوں پا گِھننڑ۔ بے شک اوہ ساڈے ءچوں کہیں کنُوں دُور نئیں۔ ‏28 کیوں جو اَساں اُونہئی ءچ زندہ، ٹُردے پِھردے تے موجود ہئیں جیویں جو تُہاڈے کُجھ شاعراں نیں وی آکھیا ہے جو ’اَساں تاں اُوندی اولاد وی ہئیں۔‘

‏29 جے اَساں خُدا دی اولاد ہیں تاں ساکُوں ایہہ نئیں سوچنڑاں چاہیدا جو خُدا تعالیٰ دی ذات سونے، چاندی یا پتھر دی مُورت ہے جیہڑی کہیں اِنسان دی ماہرانہ کاریگری دا نمونہ ہووے۔ ‏30 خُدا نیں ماضی دی ایجھی جہالت کُوں نظرانداز کر ڈِتا پَر ہُنڑ اوہ سارے اِنساناں کُوں ہر جاہ حُکم ڈیندے جو توبہ کرݨ۔ ‏31 کیوں جو اُوں ہِک ڈینہہ مُقرر کر ڈِتے جِیں وَیلے اوہ عدل دے نال ساری دُنیا دی عدالت اُوں آدمی دے ذریعے کریسی جِینکُوں اُونیں مُقرر کیتا ہے تے اُونکُوں مُردیاں ءچوں زندہ کر تے ایہہ گالھ سارے اِنساناں اُتے ثابت کر ڈِتی ہے۔“

‏32 جِیں وَیلے لوکاں نیں مُردیاں دی قیامت دے بارے ءچ سُنڑیا تاں اُنہاں ءچوں کُجھ نیں اِیں گالھ کُوں کِھل ءچ اُڈا ڈِتا تے کُجھ آکھیا جو ”اَساں اِیں موضوع اُتے وَل کہیں وَیلے تیڈے کنُوں سُنڑسوں۔“ ‏33 اِیں واسطے پَولُس اُنہاں دے ءچوں نِکل گِیا۔ ‏34 پَر کُجھ لوک پَولُس نال آ مِلے تے اِیمان گِھن آئے۔ اُنہاں ءچوں ہِک دِیونُسییُس اریوپگُس دی مجلس دا رُکن ہا تے دَمَرِس ناں دی ہِک عورت ہئی تے اُنہاں دے علاوہ بئے وی ہَن۔