اُنہاں جواب ڈِتا ”کائنا، اَساں کڈھائیں رُوح القُدس دے بارے ءچ نئیں سُنڑیا۔“

‏3 اِیں گالھوں پَولُس آکھیا جو ”وَل تُساں کِیندا بپتسمہ گِھدے؟“

اُنہاں جواب ڈِتا جو ”یُوحنّا دا بپتسمہ۔“

‏4 پَولُس نیں آکھیا ”یُوحنّا نیں تاں توبہ دا بپتسمہ ^a ڈِتا تے آکھیا جو ’اوہ جیہڑا میڈے بعد آوݨ آلا ہے تُساں اُوندے اُتے اِیمان گِھن آؤ یعنی یسوع اُتے‘۔“ ‏5 ایہہ سُنڑ تے اُنہاں خُداوند یسوع دے ناں دا بپتسمہ گِھدا۔ ‏6 جِیں وَیلے پَولُس اُنہاں دے اُتے ہَتھ رکھے تاں رُوح القُدس اُنہاں اُتے نازل تھیّا تے اوہ غیر زباناں بولنڑ تے نبوت کرݨ لگے۔ ‏7 تے اوہ سارے تقریباً بارہاں آدمی ہَن۔

‏8 وَل پَولُس تقریباً تَرے مہینے تئیں عبادت خانہ ءچ وَنج تے دلیری دے نال خُدا دی بادشاہی دے بارے ءچ بحث کریندا تے لوکاں کُوں قائل کریندا ریہا۔ ‏9 پَر اُنہاں ءچوں کُجھ سخت دِل تھی تے اِیمان نہ گِھن آئے بلکہ مسیح دی اِیں راہ کُوں لوکاں دے سامنڑے بُرا بھلا آکھنڑ لگے تاں پَولُس اُنہاں کُوں چھوڑ ڈِتا۔ اوہ مسیحی شاگرداں کُوں نال گِھن تے تُرنّس دے سکول ءچ وَنج تے ہر روز بحث کریندا رَہندا ہا۔ ‏10 ایہہ سلسلہ ڈو سال تئیں چلدا رہیا، اِتھوں تئیں جو آسیہ ءچ رَہنڑ آلیاں خواہ یہُودی تے یُونانی سبھ نیں خُداوند دا کلام سُنڑیا۔

‏11 تے خُدا پَولُس دے ہَتھوں وَڈے وَڈے معجزے ڈکھیندا ہا۔ ‏12 اِتھوں تئیں جو رومال تے پٹکے جیہڑے اُوندے جِسم نال لگدے ہَن، بیماراں اُتے سَٹے ویندے ہَن تے اوہ آپنڑی بیماریاں کنُوں شِفا پا گِھندے ہَن، تے بدرُوحاں اُنہاں ءچوں نِکل وَیندیاں ہَن۔ ‏13 پَر کُجھ اِڈے اُڈے پِھرݨ آلے یہُودی عامل وی خُداوند یسوع دے ناں نال بدرُوحاں کُوں کَڈھنڑ لگے۔ اوہ بدرُوحاں کُوں کڈھنڑ کیتے ایہہ آہدھے ہَن جو ”جئیں یسوع دی پَولُس تبلیغ کریندے، میں اُونہئی دے ناں دی قَسم ڈے تے تیکُوں نِکل وَنجنڑ دا حُکم ڈیندا ہاں۔“ ‏14 تے سِکِوا ناں دے یہُودی سردار کاہن دے سَت پوتر وی اِیہو کَم کریندے ہَن۔

‏15 پَر ہِک ڈینہہ بدرُوح اُنہاں کُوں آکھیا جو ”میں یسوع کُوں تاں جانڑدی ہاں تے پَولُس دا وی پتا ہے پَر تُساں کوݨ ہِیوے؟“ ‏16 وَل جئیں آدمی ءچ بدرُوح ہئی، اُونیں اُنہاں اُتے ٹَپا ماریا تے اُنہاں کُوں قابو کر تے ایجھا کُٹیا جو اوہ اُتھوں کنُوں زخمی تے ننگے ای بھج گئے۔ ‏17 تے جِیں وَیلے اِفِسُس دے یہُودیاں تے یُونانیاں کُوں اِیں گالھ دا پتا چلیا تاں اُنہاں اُتے خوف چھا گِیا تے خُداوند یسوع دے ناں دی تعریف تھئی۔ ‏18 تے بہُوں سارے لوکاں جیہڑے اِیمان گِھن آئے ہَن، آ تے آپنڑے بُرے کَماں دا اظہار تے اِقرار کیتا۔ ‏19 تے بہُوں سارے جادوگراں نیں آپنڑیاں کِتاباں کُوں جمع کر تے سارے لوکاں دے سامنڑے بھا لا ڈِتی تے جِیں وَیلے اُنہاں کِتاباں دی قیمت دا اندازہ کیتا گِیا تاں اوہ پنجھاہ ہزار چاندی دے سِکے ہئی۔ ‏20 اِیں طرحاں خُداوند دا کلام بہُوں مضبوطی دے نال جَڑ پکڑیندا تے پھیلدا گِیا۔

‏21 اِنہاں گالھیں دے بعد پَولُس نیں پَکا اِرادہ کر گِھدا جو ”میں مَکِدُنیہ تے اَخیہ دے علاقے ءچوں تھیندا ہویا یروشلیم چلیا ویساں تے وَل اُتھوں کنُوں رُوم وَنج تے اُوں شہر کُوں وی ڈیکھ ساں۔“ ‏22 بس اُونیں آپنڑے خدمت گزاراں ءچوں تِیمُتھِیُس تے اِراستُس کُوں مَکِدُنیہ روانہ کیتا تے خود کُجھ دیر آسیہ دے صوبہ ءچ ریہا۔

‏23 اُوں وَیلے مسیح دی راہ دے بارے ءچ وَڈا ہنگامہ اُٹھی کھڑا تھیّا۔ ‏24 کیوں جو دیمیترِیُس ناں دا ہِک سُنیارا ہا جیہڑا اَرتمِس ^bدے مَندر دے چھوٹے چاندی دے نمونے بنڑویندا ہا تے اُوں پیشہ آلیاں کُوں بہُوں کَم ڈویندا ہا۔ ‏25 اُونیں آپنڑے سارے ہم پیشہ کاریگراں کُوں جمع کیتا تے آکھیا، ”بِھراؤ ! تُساں جانڑدے ہِیوے جو ساڈی دولت اِیں کَم دی وجہ کنُوں ہے۔ ‏26 پَر تُساں ڈیدھے تے سُنڑدے ہِیوے جو ایہہ آدمی پَولُس اِفِسُس تے تقریباً سارے آسیہ ءچ بہُوں سارے لوکاں کُوں قائل کر تے گُمراہ کریندا پِیا ہے تے آہدھے جو ہَتھ دے بنڑائے بُت اَصلوں خُدا نئیں ہِن۔ ‏27 بس فقط اِیں گالھ دا ای ڈر نئیں جو ساڈے پیشے دی بے قدری تھیسی بلکہ عظیم دیوی اَرتمِس دے مَندر دی حیثیت وی گَھٹ ویسی تے جیہڑی دیوی کُوں سارا صوبہ آسیہ بلکہ دُنیا پوجدی ہے اُوندے ناں دی عظمت وی نہ رَہسی۔“

‏28 جِیں وَیلے اُنہاں ایہہ سُنڑیا تاں قہر ءچ آ گئے تے زور نال نعرے مارݨ لگ پئے جو ”اِفِسِیاں دی دیوی اَرتمِس بہُوں عظیم ہے۔“ ‏29 سارے شہر ءچ افراتفری مچ گئی تے لوکاں نیں گَیُس تے ارِسترخُس مَکِدُنیہ آلیاں کُوں جیہڑے پَولُس دے نال آئے ہَن پکڑ گِھدا تے اُنہاں کُوں گھلیندے ہوئے تماشا گاہ دو بھج پئے۔ ‏30 پَولُس وی مجمع ءچ وَنجنڑ چاہندا ہا پَر شاگرداں اُونکُوں وَنجنڑ نہ ڈِتا۔ ‏31 تے آسیہ دے حاکماں ءچوں کُجھ جیہڑے پَولُس دے دوست ہَن، اُوں کُوں پیغام بھیج تے مِنت کیتی جو تماشا گاہ ءچ وِنجنڑ کنُوں باز رَہوے۔

‏32 مجمع ءچ کھلبلی مچی ہوئی ہئی کیوں جو سارے لوک چِلا چِلا تے آپنڑی آپنڑی آہدھے پئے ہَن۔ تے بہُوں سارے لوکاں کُوں تاں ایہہ وی معلوم نہ ہا جو اوہ اُتھاں کیوں جمع تھئے ہِن۔ ‏33 ایہہ ڈیکھ تے یہُودیاں اِسکندر کُوں مجمع ءچوں کَڈھ تے اَگُوں کر ڈِتا۔ اِسکندر نیں لوکاں کُوں چُپ تھی وَنجنڑ دا اِشارہ کیتا تاں جو اوہ اُنہاں کُوں آپنڑی صفائی پیش کر سگے۔ ‏34 پَر جیویں ای لوکاں کُوں معلوم تھیّا جو اوہ یہُودی ہے تاں سارے ہِک آواز تھی تے ڈو گھنٹے تئیں نعرےمَریندے ریہے جو ”اِفِسِیاں دی دیوی اَرتمِس عظیم ہے۔“

‏35 وَل شہر دے ناظم نیں لوکاں کُوں ٹھڈا کر تے آکھیا،”اے اِفِسِیو! کیہڑا بندہ نئیں جانڑدا جو اِفِسِیاں دا شہر وَڈی دیوی اَرتمِس دے مَندر تے اُوں مُورت دا محافظ ہے جیہڑی اَسمان دی طرفوں ڈھٹھی ہئی؟ ‏36 بس جِیں وَیلے اِنہاں گالھیں دے خلاف کوئی کُجھ نئیں آکھ سگدا تاں واجب ہے جو تُساں چُپ رَہو تے سوچے بغیر کُجھ کَم نہ کرو۔ ‏37 کیوں جو تُساں جیہڑے آدمیاں کُوں اِتھاں گِھن آئے ہِیوے اُنہاں نہ تاں مَندراں کُوں لُٹیا ہے تے نہ ای ساڈی دیوی دی شان ءچ گُستاخی کیتی ہے۔ ‏38 اِیں واسطے جے دیمیترِیُس تے اُوندے ہم پیشہ کاریگر کہیں دے خِلاف دعویٰ رکھیندے ہووݨ تاں عدالت دے دروازے کُھلے ہِن تے مُنصف موجود ہِن۔ جِتھاں اوہ ہِک ڈوجھے اُتے مقدمہ کر سگدے ہِن۔ ‏39 تے جے کوئی ڈوجھا مسٔلہ وی ہے تاں اُوندا فیصلہ وی باقاعدہ شہر دی مجلس ءچ تھی سگدے۔ ‏40 ساکُوں تاں خطرہ ہے جو اَج دے ہنگامے دے مُجرم نہ کھڑائے وَنجوں کیوں جو اِیں تماشے دے بارے ءچ ساڈے کولھ کوئی جواب نئیں۔“ ‏41 ایہہ آکھ تے اُونیں مجمع کُوں برخاست کر ڈِتا۔