‏7 ہفتے دے پہلے ڈینہہ جِیں وَیلے اَساں روٹی تروڑݨ کیتے جمع تھئے تاں پَولُس لوکاں نیں نال خطاب کیتا۔ اُونیں ڈوجھے ڈینہہ اُتھوں کنُوں روانہ تھیونڑا ہا، اِیں واسطے اوہ رات دیر تئیں کلام کریندا ریہا۔ ‏8 جِیں بالاخانہ اُتے اَساں کَٹھے ہاسے، بہُوں ڈیوے بَلدے پئے ہَن۔ ‏9 تے یُوتخُس ناں دا ہِک نوجوان کھڑکی ءچ بیٹھا ہا۔ اوہ پَولُس دی لمبی تقریر سُنڑدے سُنڑدے سَم گِیا تے ڈاڈھی نیندر ءچ تَریجھی مَنزل کنُوں تَلے وَنج ڈھٹھا۔ جِیں وَیلے اُونکُوں چاتا گِیا تاں اوہ مویا پِیا ہا۔ ‏10 پَولُس تَلے لَتھا تے اُوں نوجوان نال وَلٹیج گِیا تے آپنڑے بازوواں ءچ گِھن تے آکھنڑ لگا،”گھبراؤ نئیں، اِیندے ءچ جان ہے۔“ ‏11 وَل اُونیں اُتے وَنج تے روٹی تروڑی تے ساریاں دے نال رَل تے کھادی تے وَل کلام کرݨ لگا، اِتھوں تئیں جو سویر تھی گئی۔ وَل اُتھوں کنُوں روانہ تھی گِیا۔ ‏12 لوک اُوں نوجوان کُوں زندہ گھر گِھن گئے تے اُنہاں کُوں بہُوں تسلی تھئی۔

‏13 اَساں اَگُوں وَنج تے جہاز اُتے اسُّس کُوں روانہ تھئے تاں جو اُتھوں پَولُس کُوں جہاز اُتے سوار کر گِھنوں کیوں جو اُونیں پہلے کنُوں ای اُتھاں پیدل پُج وَنجنڑ دا ارادہ کر گِھدا ہا۔ ‏14 بس جِیں وَیلے اوہ ساکُوں اسُّس ءچ مِلیا تاں اَساں اُونکُوں جہاز اُتے چڑھا گِھدا تے مِتُلینے چلے گئے۔ ‏15 اُتھوں کنُوں اَساں جہاز اُتے روانہ تھئے تے ڈوجھے ڈینہہ خِیُس دے سامنڑے پُجے تے تَریجھے ڈینہہ سامُس تئیں آئے تے اَگلے ڈینہہ مِیلیتُس ءچ پُجے۔ ‏16 پَولُس نیں ایہہ فیصلہ کر گِھدا ہا جو اوہ اِفِسُس دے کولھوں لنگھے تاں جو اُونکُوں آسیہ ءچ مزید دیر نہ لگے ۔کیوں جو اوہ جلدی نال یروشلیم وَنج تے پِنتیکُست دا ڈینہہ اُتھاں گزارنڑاں چاہندا ہا۔

‏17 مِیلیتُس پُج تے پَولُس نیں اِفِسُس ءچ پیغام بھیج تے کلیسیا دے بزُرگاں کُوں سَڈوایا۔ ‏18 جِیں وَیلے اوہ آئے تاں اُنہاں کُوں آکھیا،”تُساں جانڑدے ہِیوے جو جئیں ڈینہہ کنُوں میں آسیہ ءچ پیر رکھیا ہے میڈی زندگی تُہاڈے سامنڑے کیجھی گُزردی پئی ہے۔ ‏19 میں بہُوں عاجزی دے نال ہنجو وہا وہا تے خُداوند دی خدمت کریندا ریہا، تے میکُوں یہُودیاں دی وَڈی وَڈی سازشاں دا سامنڑا کرنڑا پِیا ہا۔ ‏20 جیہڑے گالھیں تُہاڈے فائدے کیتے ہَن اُنہاں کُوں میں بغیر کہیں جھجک دے بیان کیتا بلکہ اعلانیہ تے گھر گھر وَنج تے سِکھایا۔ ‏21 میں یہُودیاں تے یُونانیاں ڈوہائیں دے سامنڑے گواہی ڈیندا ریہا ہاں جو اوہ خُدا دو رجوع کر تے توبہ کرݨ تے ساڈے خُداوند یسوع المسیح اُتے اِیمان گِھن آوݨ۔

‏22 ڈیکھو ہُنڑ میں رُوح دا پابند تھی تے یروشلیم وَیندا پِیا ہاں تے میکُوں پتا نئیں جو اُتھاں میڈے اُتے کیا گُزرسی۔ ‏23 فقط اِیہو جانڑدا ہاں جو رُوح القُدس دی طرفوں ہر شہر ءچ اِیہو آگاہی مِلدی رہی جو قید تے مُصیبتاں میڈے اِنتظار ءچ ہِن۔ ‏24 پَرمیں آپنڑی جان کُوں عزیز نئیں رکھیندا بس ایہہ چاہندا ہاں جو میڈا دَور پورا تھی وَنجے تے میں خُدا دے فضل دی خوشخبری سُنڑاوݨ دا کَم پورا کر گِھناں جیہڑا خُداوند یسوع نیں میکُوں ڈِتے۔

‏25 ہُنڑ میں جانڑدا ہاں جو تُساں جِنہاں ءچ میں خُدا دی بادشاہی دی تبلیغ کریندا ریہا ہاں میکُوں وَل نہ ڈیکھ سگسو۔ ‏26 اِیں واسطے اَج میں تُہاکُوں صاف آکھ ڈیندا ہاں جو میں تُہاڈے ءچوں کہیں دے خون دا ذمہ دار نئیں ^a۔ ‏27 کیوں جو میں بغیر کہیں جھجک دے خُدا دا پورا مقصد تُہاڈے اُتے ظاہر کریندا ہاں۔ ‏28 بس آپنڑا تے سارے گلّہ دا خیال رکھو جِیندے تُساں رُوح القُدس دی طرفوں نِگہبان مُقرر کیتے گئے ہِیوے تاں جو خُدا دی کلیسیا دی نِگہبانی کرو، جِیں کُوں اُونیں آپنڑے پوتر دے خون نال مُل گِھدے۔ ‏29 میں ایہہ جانڑدا ہاں جو میڈے وَنجنڑ دے بعد پھاڑ ڈیوݨ آلے بھیڈیے تُہاڈے ءچ آویسن تے گلّہ کُوں نہ چھوڑیسن۔ ‏30 بلکہ تُہاڈے ءچوں ای ایجھے لوک اُٹھ سن جیہڑے حق کُوں تروڑ مروڑ تے پیش کریسن تاں جو شاگرداں کُوں آپنڑے پاسے چھیک گِھننڑ۔ ‏31 اِیں واسطے خبردار رہوائے تے یاد رکھائے جو میں تَرے سال تئیں ڈینہہ رات ہنجو وہا وہا تے ہر ہِک کُوں خطرے کنُوں آگاہ کریندا ریہا۔

‏32 ہُنڑ میں تُہاکُوں خُدا تے اُوندے فضل دے کلام دے سپُرد کریندا ہاں جیہڑا تُہاڈی ترقی دا باعث تھی سگدے تے سارے مُقدّساں ءچ شامل کر تے میراث دا حقدار بنڑا سگدے۔ ‏33 میں کہیں دے سونے، چاندی یا کپڑے دا لالچ نئیں کیتا۔ ‏34 تُساں خود جانڑدے ہِیوے جو میں آپنڑے ہَتھاں نال آپنڑی تے آپنڑے ساتھیاں دیاں ضرورتاں پوریاں کیتیاں ہَن۔ ‏35 میں تُہاکُوں ایہہ سبھ کر تے ڈِکھایا جو اَساں کیویں محنت کر تے کمزوراں کُوں سنبھال سگدے ہیں۔ خُداوند یسوع دے لفظاں کُوں یاد رکھو جو اُونیں آکھیا، ’ڈیونڑا گِھننڑ کنُوں زیادہ مُبارک ہے‘۔“

‏36 اِنہاں گالھیں دے بعد پَولُس نیں اُنہاں ساریاں دے نال گوڈے ٹیک تے دُعا کیتی۔ ‏37 اوہ سارے بہُوں رُنّے تے پَولُس دے گَل لگ تے اُوندے بوسے گِھدے۔ ‏38 تے پَولُس دے اِنہاں لفظاں نال بہُوں ڈُکھی تھئے جو ”تُساں میکُوں وَلا نہ ڈیکھ سگسو۔“ وَل اُونکُوں جہاز تئیں چھوڑݨ گئے۔