‏7 اَساں صور کنُوں اَگُوں گئے تے پَتُلمِیس ءچ جہاز کنُوں لَتھے۔ اُتھاں اَساں بِھراواں کُوں سلام کیتا تے اُنہاں دے نال ہِک ڈینہہ تئیں ریہے۔ ‏8 ڈوجھے ڈینہہ اَساں روانہ تھئے تے قیصریہ ءچ پُج تے فِلِپُّس ناں دے ہِک مُبشر دے گھر ٹِکے جیہڑا یروشلیم ءچ چُنڑے ہوئے سَت مددگاراں ءچوں ہا ۔ ‏9 اُوندیاں چار کنواریاں دِھیاں ہَن جیہڑیاں نبوت کریندیاں ہَن۔ ‏10 تے جِیں وَیلے ساکُوں اُتھاں رَہندے بہُوں ڈینہہ تھی گئے تاں ہِک نبی جِیندا ناں اگبُس ہا یہُودیہ کنُوں آیا۔ ‏11 اُونیں ساڈے کولھ آ تے پَولُس دا کمر بند گِھدا تےاُوندے نال آپنڑے ہَتھ پیر بَدھ تے آکھنڑ لگا، ”رُوح القُدس فرمیندے جو یروشلیم دے یہُودی اِیں کمر بند دے مالک کُوں اِینویں بَدھ تے غیر قوماں دے حوالے کر ڈیسن۔“ ‏12 ایہہ سُنڑ تے اَساں تے اُتھوں دے اِیمانداراں نیں پَولُس دی مِنت کیتی جو اوہ یروشلیم وَنجنڑ کنُوں باز رَہوے۔ ‏13 پَر پَولُس نیں جواب ڈِتا،”تُساں ایہہ کیا کریندے ہِیوے؟ کیوں رو رو تے میڈا دِل تُڑیندے ہِیوے؟ میں یروشلیم ءچ خُداوند یسوع دے ناں دی خاطر فقط بَدھیجنڑ کیتے ای نئیں بلکہ مَرݨ کُوں وی تیار ہاں۔“

‏14 جِیں وَیلے اوہ کہیں طرحاں وی راضی نہ تھیّا تاں اَساں ایہہ آکھ تے چُپ تھی گئے جو ”خُداوند دی مرضی پوری تھیوے۔“

‏15 اُوندے بعد اَساں سفر دی تیاری کیتی تے یروشلیم کیتے روانہ تھئے۔ ‏16 قیصریہ دے کُجھ شاگرد وی ساڈے نال تھی پئے تے ساکُوں مَنَاسون دے گھر گِھن آئے جِتھاں اَساں ٹِکنڑاں ہا۔ مَنَاسون کُپُرس دا باشندا ہا تے پَرانڑے شاگرداں ءچوں ہا۔

‏17 جِیں وَیلے اَساں یروشلیم پُجے تاں بِھرا بہُوں جوش نال ساکُوں مِلے۔ ‏18 ڈوجھے ڈینہہ اَساں پَولُس کُوں گِھن تے یعقوب کُوں مِلنڑ گئے۔ اُتھاں سارے بزُرگ پہلے کنُوں جمع ہَن۔ ‏19 پَولُس نیں اُنہاں کُوں سلام آکھیا تے تفصیل نال ڈَسایا جو خُدا نیں اُوندی خدمت دے ذریعے غیریہُودیاں ءچ کیا کُجھ کیتا۔

‏20 اُنہاں ایہہ سُنڑ یا تاں خُدا دی حمد کیتی تے وَل اُونکُوں آکھیا، ”بِھرا ! تُوں آپ ڈیدھا ہئیں جو ہزاراں یہُودی اِیمان گِھن آئے ہِن تے اوہ سارے شریعت اُتے عمل کرݨ ءچ بہُوں جوشیلے ہِن۔ ‏21 اُنہاں کُوں ایہہ ڈسایا گِیا ہے جو تُوں غیر قوماں ءچ رَہنڑ آلے یہُودیاں کُوں موسیٰ کُوں چھوڑڈیوݨ دی تعلیم ڈیندا ہیں جو بالاں دا ختنہ نہ کرو تے رَسماں کُوں نہ مَنو۔ ‏22 بس ہُنڑ کیا کیتا وَنجے؟ ہُنڑ تُوں آپ اِتھاں آ گِیا ہیں تے ایہہ گالھ لوکاں دے کَناں تئیں لازمی پُج ویسی۔ ‏23 اِیں واسطے جیہڑا کُجھ اَساں تیکُوں آہدھے ہئیں اوہ کر۔ ساڈے کولھ چار آدمی ہِن جِنہاں مَنت مَنّی ہے۔ ‏24 اُنہاں کُوں آپنڑے نال گِھن وَنج تے اُنہاں دے نال رَل تے پاک تھیوݨ دی ساریاں رَسماں کُوں پورا کر تے اُنہاں دا خرچا وی چا تاں جو اوہ آپنڑے سِر مُنڈوا سگنڑ۔ وَل ہر کہیں کُوں پتا چل ویسی جو جیہڑے گالھیں تیڈے خلاف کیتیاں گئیاں ہِن اوہ کُوڑیاں ہِن بلکہ تُوں خود وی شریعت اُتے عمل کر تےزندگی گُزریندا ہیں۔ ‏25 تے جئیں تئیں اُنہاں غیریہُودیاں دا سوال ہے جیہڑے اِیمان گِھن آئے ہِن، اُنہاں کیتے اَساں فیصلہ کر تے پہلے ای خط لکھ ڈِتے جو اوہ بُتاں دی قُربانیاں دے گوشت تے خون کنُوں، گَل گُھٹ تے مارے ہوئے جانوراں دا گوشت کھاوݨ کنُوں تے حرام کاری کنُوں پرہیز کرݨ۔“

‏26 اِیں واسطے ڈوجھے ڈینہہ پَولُس اُنہاں آدمیاں کُوں نال گِھن گِیا تے اُنہاں دے نال خود وی پاک تھیوݨ دیاں رَسماں پوریاں کر تے ہیکل ءچ داخل تھیّا تے خبر ڈِتی جو پاک تھیوݨ دے سَت ڈینہہ پورے تھیوݨ دے بعد اوہ سارے آپنڑی آپنڑی نذر چڑھا ڈیسن۔

‏27 جِیں وَیلے پاک تھیوݨ دے سَت ڈینہہ پورے تھئے تاں آسیہ دے یہُودیاں نیں پَولُس کُوں ہیکل ءچ ڈیکھ تے لوکاں ءچ ہلچل مچا ڈِتی تے اُونکُوں پکڑتے ‏28 چیخنڑ لگے جو ”اے اِسرائیلیو! ساڈی مدد کرو۔ اِیہو آدمی ہے جیہڑا ہر جاہ لوکاں کُوں ساڈے خلاف، ساڈی شریعت دے خلاف تے اِیں ہیکل دے خلاف تعلیم ڈیندا ہے۔ تے اِیندے علاوہ اُونیں یُونانیاں کُوں وی ہیکل ءچ گِھن آ تے اِیں پاک جاہ کُوں نا پاک کر ڈِتے۔“ ‏29 کیوں جو اُنہاں پہلے ای ترُفِمُس اِفِسی کُوں شہر ءچ پَولُس دے نال ڈیکھ گِھدا ہا تے سوچیندے پئے ہَن جو پَولُس اُونکُوں ہیکل ءچ گِھن آیا ہے۔

‏30 سارے شہر ءچ ہلچل مچ گئی تے لوک بھج بھج تے جمع تھیوݨ لگے۔ اُنہاں پَولُس کُوں پکڑ گِھدا تے ہیکل کنُوں گِھیل تے باہر کَڈھ آئے تے دروازے بند کر ڈِتے۔ ‏31 جِیں وَیلے اُونکُوں قتل کرݨ دی کوشش ءچ ہَن تاں رُومی پلٹن دے سپہ سالار کُوں خبر پُجی جو سارے یروشلیم ءچ ہلچل مچ گئی ہے۔ ‏32 اوہ فوراً پلٹن دے سپاہیاں تے افسراں کُوں گِھن تے اُنہاں دے کولھ تَلے بھج آیا۔ جِیں وَیلے لوکاں نیں پلٹن دے سپہ سالار کُوں تے سپاہیاں کُوں ڈِٹھا تاں پَولُس دی مار کُٹ کنُوں رُک گئے۔

‏33 پلٹن دے سپہ سالار نیں نزدیک آ تے اُونکُوں آپنڑے قبضہ ءچ گِھن گِھدا تے اُونکُوں ڈو زنزیراں نال بَدھنڑ دا حُکم ڈِتا۔ وَل پُچھیا ایہہ آدمی کوݨ ہے تے اِینیں کیا کیتے؟ ‏34 بِھیڑ ءچوں کہیں کُجھ آکھیا تےکہیں کُجھ۔ تے شور اتنا مچ گِیا جو سپہ سالار کُوں حقیقت معلوم نہ تھی سگی لہٰذا اُونیں حُکم ڈِتا جو پَولُس کُوں قلعہ ءچ پُچا ڈِتا وَنجے۔ ‏35 جِیں وَیلے پوڑیاں اُتے پُجیا تاں عوام دی زبردستی دی وجہ کنُوں سپاہیاں کُوں اُونکُوں چا تے گِھن وَنجنڑاں پِیا۔ ‏36 کیوں جو لوکاں دی بِھیڑ پَولُس دے پِچھوں چیخ تے ایہہ آہدھی پئی ہئی جو ”اُونکُوں مار گھتو۔“

‏37 سپاہی پَولُس کُوں قلعہ دے اندر گِھن وَنجنڑ آلے ای ہَن جو اُونیں پلٹن دے سپہ سالار کُوں آکھیا، ”کیا میں تیکُوں کُجھ آکھ سگدا ہاں؟“

اُونیں پُچھیا، ”کیا تُوں یُونانی جانڑدا ہیں؟ ‏38 کیا تُوں اوہ مصری نئیں جئیں کُجھ عرصہ پہلے بغاوت کیتی ہئی تے چار ہزار قاتلاں کُوں بیابان ءچ گِھن گِیا ہویں؟ “

‏39 پَولُس آکھیا، ”میں یہُودی ہاں تے کلکیہ دے مشہور شہر تَرسُس دا باشندہ ہاں۔ میں تہاڈی مِنت کریندا ہاں جو میکُوں لوکاں نال گالھ کرݨ دی اِجازت ڈیؤ۔“

‏40 جِیں وَیلے سپہ سالار کنُوں اِجازت گِھن گِھدی تاں اُونیں پوڑیاں اُتے کھڑا تھی تے لوکاں کُوں ہَتھ دا اِشارہ کیتا۔ جِیں وَیلے اوہ چُپ تھی گئے تاں اُنہاں کُوں عبرانی زبان ءچ اِینویں آکھنڑ لگا جو