23
1 پَولُس نیں عدالت دے ارکان کُوں غور نال ڈیکھ تے آکھیا، ”میڈے بِھراؤ! میں اَج تئیں بہُوں نیک نیتی نال خُدا دے حُکماں دے مطابق زندگی گُزریندا ریہا ہاں۔“2 سردار کاہن حننیاہ نیں اُوندے کولھ کھڑے لوکاں کُوں حُکم ڈِتا جو اُوندے مُنہ اُتے چاٹ مارو۔ 3 پَولُس نیں اُونکُوں آکھیا، ”اے سفیدی تھئی ہوئی کَندھ! خُدا تیکُوں مَریسی۔ تُوں اِتھاں شریعت دے مطابق میڈا اِنصاف کرݨ کیتے بیٹھیں پَر تُوں خود شریعت دے خلاف میکُوں مارݨ دا حُکم ڈیندیں؟“
4 جیہڑے نال کھڑے ہَن آکھنڑ لگے،”تیکُوں خُدا دے سردار کاہن کُوں بُرا آکھنڑ دی جر١ٔت کیویں تھئی؟“
5 پَولُس نیں آکھیا، ”بِھراؤ ! میکُوں معلوم نہ ہا جو ایہہ سردار کاہن ہے، کیوں جو لکھیا ہے جو تُوں آپنڑی قوم دے سردار کُوں بُرا نہ آکھ۔“
6 جِیں وَیلے پَولُس کُوں پتا چلیا جو اُنہاں ءچوں کُجھ صدوقی ہِن تے کُجھ فریسی تاں اُونیں عدالت ءچ اُچی آواز ءچ آکھیا،”بِھراؤ! میں فریسی ہاں تے فریسی پیُو دا پوتر ہاں۔ میڈے اُتے اِیں واسطے مقدمہ چلایا وَیندا پئے جو میں اُمید رکھیندا ہاں جو مُردے وَل زندہ تھیسن۔“
7 اُوندے ایہہ آہدھے ای فریسیاں تے صدوقیاں ءچ تکرار شروع تھی گئی تے حاضرین ءچ پُھٹ پئے گئی۔ 8 کیوں جو صدوقی تاں آہدھے ہَن جو قیامت نہ تھیسی تے نہ ای فرشتے کوئی چیز ہِن نہ رُوح، پَر فریسی اِنہاں سبھ کُوں مَنیندے ہِن۔ 9 بس اُتھاں ہنگامہ تھی گِیا تے فریسیاں ءچوں کُجھ فقیہہ کھڑے تھی گئے تے جھیڑا کر تے آکھنڑ لگے جو ”اَساں اِیں آدمی ءچ کوئی قصور نئیں ڈیدھے تے جے کہیں فرشتے یا رُوح نیں اِیندے نال گالھ کیتی ہے تاں کیا تھیّا؟“
10 تے جِیں وَیلے تکرار وَدھ گئی تاں پلٹن دےسپہ سالار کُوں اِیں گالھ دا ڈر تھیّا جو پَولُس دے ٹوٹے ٹوٹے نہ کر ڈِتے وَنجنڑ ، اُونیں فوج کُوں حُکم ڈِتا جو ”تَلے وَنجنڑ تے اُونکُوں اُتھوں زبردستی کَڈھ تے قلعہ ءچ گِھن آوݨ۔“
11 اُونہئی رات خُداوند پَولُس دے کولھ آ کھڑا تھیّا تے آکھیا، ”حوصلہ رکھ، جِیویں تَیں یروشلیم ءچ میڈی گواہی ڈِتی ہے، اُونویں ای تیکُوں رُوم ءچ گواہی ڈیونڑی پوسی۔“
پَولُس کُوں قتل کرݨ دی سازش
12 سویر نال یہُودیاں نیں رَل تے فیصلہ کیتا تے لعنت دی قَسم کھادی جو ”جیہڑے وَیلے تئیں اَساں پَولُس کُوں مار نہ گھتوں، اُوں تئیں نہ کُجھ کھاسوں نہ کُجھ پِیسوں۔“ 13 اِیں سازش ءچ چالیہہ آدمیاں کنُوں زیادہ شریک ہَن۔ 14 بس اوہ سردار کاہناں تے بزُرگاں دے کولھ گئے تے آکھنڑ لگے جو ”اَساں لعنت دی قَسم کھادی ہے جو پَولُس کُوں قتل کرݨ کنُوں پہلے کُجھ نہ کھاسُوں۔ 15 بس ہُنڑ تُساں صدر ِ عدالت آلیاں دے نال رَل تے پلٹن دے سپہ سالار کُوں درخاست کرو جو پَولُس کُوں تُہاڈے سامنڑے گِھن آوے تاں جو اِیں مقدمہ دی حقیقت مزید پُچھی وَنجے۔ اُوندے اِتھاں پُجنڑ کنُوں پہلے اَساں اُونکُوں قتل کر ڈیوݨ کیتے تیار ہئیں۔“
16 پَر جِیں وَیلے پَولُس دے بھڑینجے کُوں اِیں سازش دا پتا چلیا تاں اُونیں قلعہ ءچ وَنج تے پَولُس کُوں خبر ڈِتی۔ 17 وَل پَولُس نیں ہِک صوبہ دار کُوں سَڈوایا تے آکھیا جو ”اِیں نوجوان کُوں پلٹن دے سپہ سالار دے کولھ گِھن وَنج کیوں جو ایہہ اُونکُوں کُجھ ڈساوݨ چاہندا ہے۔“
18 بس اوہ اُونکُوں پلٹن دے سپہ سالار دے کولھ گِھن گِیا تے آکھنڑ لگا، ”پَولُس قیدی نیں میکُوں سَڈیا تے میکُوں درخاست کیتی جو اِیں جوان کُوں تُہاڈے کولھ گِھن آواں کیوں جو ایہہ تُہاکُوں کُجھ ڈساوݨ چاہندے۔“
19 پلٹن دا سپہ سالار اُوں جوان دا ہَتھ پکڑ تے اُونکُوں اَنج گِھن گِیا تے پُچھنڑ لگا، ”تُوں میکُوں کیا ڈساونڑا چاہندا ہیں؟ “
20 اُونیں آکھیا، ”یہُودیاں ایکا کر تے تُہاکُوں درخاست کرݨ دا فیصلہ کیتا ہے جو تُساں پَولُس کُوں مزید تفتیش کیتے کل صدر ِ عدالت دے سامنڑے گِھن آوو۔ 21 پَر تُساں اُنہاں دی گالھ نہ مَنائے کیوں جو اُنہاں ءچوں چالیہہ کنُوں زیادہ اُوندے اُتے حملہ کرݨ دی تاڑ ءچ ہِن، جِنہاں قَسم کھادی ہے جو پَولُس کُوں قتل کیتے بغیر نہ تاں اَساں کُجھ کھاسُوں تے نہ ای کُجھ پِیسوں تے ہُنڑ اوہ تیار ہِن ۔ فقط تُہاڈے فیصلے دا اِنتظار ہے۔“
22 بس سپہ سالار نیں اُوں نوجوان کُوں ایہہ تاکید کر تے بھیج ڈِتا جو ”اِنہاں گالھیں دا جیہڑیاں تَیں میکُوں ڈسائیاں، کہیں کُوں پتا نہ چلے۔“
پَولپس کُوں فیلِکس حاکم دے کولھ بھیجیا وَیندے
23 سردار نیں آپنڑے ڈو صوبہ داراں کُوں سَڈوا تے آکھیا، ”پلٹن دے ڈو سو سپاہی، سَتر گھُڑ سوار تے ڈو سو نیزہ بردار رات دے تَریجھے پہر a قیصریہ وَنجنڑ کیتے تیار رکھائے۔“ 24 وَل حُکم ڈِتا جو پَولُس کیتے سواری دا اِنتظام کیتا وَنجے تاں جو اوہ گورنر فیلِکس دے کولھ حفاظت نال پُج وَنجے۔ 25 تے اُونیں ہِک خط اِیں موضوع دا لکھیا۔
26 کلَودِیُس لُوسِیاس دی طرفوں معزز گورنر فیلِکس کُوں سلام۔
27 اِیں شخص کُوں یہُودی پکڑ تے مارݨ آلے ای ہَن جو میں سپاہیاں کُوں گِھن گِیا تے اُونکُوں چُھڑوا گِھدا کیوں جو میکُوں معلوم تھیّا ہا جو اوہ ہِک رُومی شہری ہے۔ 28 لہٰذا ایہہ تفتیش کرݨ کیتے جو اوہ اُوندے اُتے کیا اِلزام لیندے ہِن، میں اُونکُوں اُنہاں دی صدر ِ عدالت ءچ پیش کیتا۔ 29 معلوم تھیّا جو اُنہاں دا اِلزام اُنہاں دی شریعت دے مسٔلیاں نال تعلق رکھیندے پَر اُوندے خلاف ایجھا کوئی اِلزام نئیں جِیندی وجہ کنُوں اُونکُوں مَوت یا قید دی سزا ڈِتی وَنجے۔
30 تے جِیں وَیلے میکُوں خبر تھئی جو اُوندے خلاف کوئی سازش تھیندی پئی ہے تاں میں اِینکُوں فوراً تُہاڈے کولھ بھیج ڈِتا تے اُوندے اُتے دعویٰ کرݨ آلیاں کُوں حُکم ڈِتا جو اوہ تُہاڈے حضور ءچ آ تے آپنڑا مُقدمہ پیش کرݨ۔
31 بس سپاہی اُوندے حُکم دے مطابق پَولُس کُوں آپنڑے نال گِھن گئے تے راتوں رات اُنہاں کُوں انتیپترِس ءچ پُچا ڈِتا۔ 32 ڈوجھے ڈینہہ اوہ گُھڑسواراں کُوں اُنہاں دے نال اَگُوں وَنجنڑکیتے چھوڑ تے خود قلعہ دو وَل گئے۔ 33 جِیں وَیلے گُھڑ سوار قیصریہ پُجے تاں اُنہاں گورنر کُوں خط ڈے تے پَولُس کُوں اُوندے حضور ءچ پیش کر ڈِتا۔ 34 گورنر نیں خط پڑھ تے پُچھیا، ”ایہہ کیہڑے صوبے دا ہے؟“ تے ایہہ معلوم کر تے جو کلکیہ دا ہے 35 تاں اُونکُوں آکھیا، ”میں تیڈا مُقدمہ اُوں وَیلے سُنڑساں جِیں وَیلے تیڈے مُدعی وی اِتھاں حاضر ہوسِن۔“ وَل اُونیں پَولُس کُوں ہیرودیس دے قلعہ ءچ قید رکھنڑ دا حُکم ڈِتا۔