‏5 اَساں ڈِٹھے جو ایہہ آدمی بہُوں خطرناک ہے۔ ایہہ دُنیا دے سارے یہُودیاں ءچ فتنہ انگیزی کریندا وَدے تے ناصری دے بِد عتی فرقہ دا سرغنہ ہے۔ ‏6 اِینیں تاں ہیکل کُوں وی ناپاک کرݨ دی کوشش کیتی۔ لہٰذا اَساں اِینکُوں پکڑ گِھدا۔ [اَساں آپنڑی شریعت دے مطابق اِیندے اُتے مُقدمہ چلاوݨ چاہندے ہاسے۔ ‏7 پَر پلٹن دا سپہ سالار لُوسِیاس اُونکُوں ساڈے ہَتھاں ءچوں زبردستی کَھس تے گِھن گِیا، ‏8 تے مُدعیاں کُوں تُہاڈے کولھ وَنجنڑ دا حُکم ڈِتا۔] اِیندی تفتیش کر تے تُہاکُوں اُنہاں اِلزاماں دی حقیقت معلوم تھی ویسی جیہڑے اَساں اِیندے اُتے لائے ہِن۔“

‏9 یہُودی وی وکیل نال مُتفق تھی تے آکھنڑ لگے جو ”ایہہ گالھیں اَصلُوں صحیح ہِن۔“

‏10 جِیں وَیلے گورنر نیں پَولُس کُوں بولنڑ دا اِشارہ کیتا تاں اُونیں جواب ڈِتا، ”کیوں جو میں جانڑدا ہاں جو تُساں بہُوں سالہاں تُوں اِیں قوم دی عدالت کریندے ہِیوے، اِیں واسطے میں خوشی نال آپنڑی صفائی پیش کریندا ہاں۔ ‏11 تُساں خود پتا کر سگدے ہِیوے جو بارہاں ڈینہہ پہلے میں یروشلیم ءچ عبادت کرݨ گِیا ہم۔ ‏12 میڈے مُدعیاں میکُوں ہیکل ءچ کہیں دے نال وی تکرار کریندے یا عبادت خانیاں ءچ یا اِڈے اُڈے شہر ءچ فساد کریندے نئیں ڈِٹھا۔ ‏13 ہُنڑ اوہ اِنہاں اِلزاماں کُوں جیہڑے اوہ میڈے اُتے لیندے پئے ہِن، تُہاڈے سامنڑے ثابت نئیں کر سگدے۔

‏14 پَر میں تُہاڈے سامنڑے اِقرار کریندا ہاں جو مسیح دی راہ جِینکُوں کُوں اوہ بِدعت قرار ڈیندے ہِن اُوندے مُطابق میں آپنڑے پیُو ڈاڈا دے خُدا دی عبادت کریندا ہاں تے جیہڑا کُجھ تَورَیت تے نبیاں دے صحائف ءچ لکھیا ہے اُنہاں ساریاں اُتے میڈا اِیمان ہے۔ ‏15 میں وی خُدا کنُوں اُوہو اُمید رکھیندا ہاں جیہڑی ایہہ رکھیندے ہِن جو راستباز تے نا راست ڈوہائیں دی قیامت تھیسی۔ ‏16 لہٰذا میڈی تاں اِیہو کوشش رَہندی ہے جو خُدا تے اِنسان ڈوہائیں دے سامنڑے میڈی نیت نیک رَہوے۔

‏17 بہُوں سالاں دے بعد میں آپنڑی قوم کیتے خیرات دی رقم تے نذرانے گِھن تے یروشلیم آیا ہم۔ ‏18 اُنہاں میکُوں طہارت دی حالت ءچ کوئی ہنگامہ یا فساد کریندے بغیر ہیکل ءچ ایہہ کَم کریندے ڈِٹھا۔ ہاں، آسیہ دے کُجھ یہُودی ہَن۔ ‏19 جے اُنہاں کُوں کوئی شکایت ہئی تاں واجب ہا جو اوہ اِتھاں تُہاڈے کولھ حاضر تھی تے میڈے اُتے دعویٰ کریندے۔ ‏20 یا ایہہ لوک جیہڑے اِتھاں موجود ہِن ڈساوݨ جو جِیں وَیلے میں صدر ِ عدالت ءچ پیش تھیّا ہم تاں اُنہاں میڈے ءچ کیا بُرائی ڈِٹھی ہئی؟ ‏21 سِوائے اِیں ہِک گالھ دے جیہڑی میں اُچی آواز ءچ آکھی ہئی جو اَج تُہاڈے سامنڑے میڈے اُتے مُردیاں دی قیامت دے بارے ءچ مُقدمہ کیتا گِیا ہے۔“

‏22 وَل فیلِکس نیں جیہڑا مسیح دی راہ دے بارے ءچ صحیح طرحاں جانڑدا ہا ایہہ آکھ تے مُقدمہ ملتوی کر ڈِتا جو ”جِیں وَیلے پلٹن دا سپہ سالار لُوسِیاس اِتھاں آسی تاں میں تُہاڈے مُقدمہ دا فیصلہ کریساں۔“ ‏23 تے صوبہ دار کُوں حُکم ڈِتا جو پَولُس کُوں پہرہ ءچ آرام نال رکھیا وَنجے تے اِیندے ساتھیاں ءچوں کہیں کُوں اُوندی خدمت کرݨ تُوں منع نہ کیتا وَنجے۔

‏24 کُجھ ڈینہاں بعد فیلِکس آپنڑی ذال دُروسِلہ کُوں جیہڑی یہُودی ہئی نال گِھن تے آیا۔ اُونیں پَولُس کُوں سَڈوا بھیجیا تے یسوع مسیح اُتے اِیمان گِھن آوݨ دے بارےءچ اُوندے گالھیں سُنڑیاں۔ ‏25 جِیں وَیلے اوہ راستبازی، پرہیز گاری تے آوݨ آلی عدالت دے بارے ءچ بیان کریندا پِیا ہا تاں فیلِکس ڈر تے آکھنڑ لگا جو”اجنڑ اِیہہ بہُوں ہے، تُوں وَنج سگدیں۔ میکُوں فُرصت مِلسی تاں میں تیکُوں وَلا سَڈ ویساں۔“ ‏26 فیلِکس کُوں پَولُس دی طرفوں پیسے مِلنڑ دی اُمید وی ہئی، اِیں واسطے اوہ اُونکُوں وَلا وَلا سَڈویندا تے اُوندے نال گالھیں کریند اہا۔

‏27 ڈو سالہاں بعد فیلِکس دی جاہ پُر کِیُس فیستُس گورنر مُقرر تھیّا تے فیلِکس خود کُوں یہُودیاں دا خیر خواہ ثابت کرݨ کیتے پَولُس کُوں قید ءچ ای چھوڑ گِیا۔