‏2 اِیں خوشخبری دا وعدہ خُدا نیں بہُوں پہلے کنُوں آپنڑے نبیاں دی معرفت پاک کلام ءچ ‏3 آپنڑے پوتر ساڈے خُداوند یسوع المسیح دے بارے ءچ کیتا جیہڑا جِسم دے اعتبار کنُوں تاں داؤد دی نسل ہا، ‏4 پَر پاکیزگی دی رُوح دے اعتبار کنُوں مُردیاں ءچوں زندہ تھیوݨ دے سببّوں بہُوں قُدرت دے نال خُدا دا پوتر اَکھوایا۔ ‏5 جِیندے وسیلے تے ناں دی خاطر ساکُوں فضل تے رسالت مِلی تاں جو سبھ قوماں ءچوں لوک اِیمان گِھن تے تابع ہووݨ۔ ‏6 تے تُساں وی اُنہاں لوکاں ءچ شامل ہِیوے تے یسوع مسیح دے لوک ہووݨ کیتے سَڈے گئے ہِیوے۔

‏7 ایہہ خط اُنہاں سارے خُدا دے پیاریاں دے ناں ہے جیہڑے رُوم ءچ ہِن تے مُقدّس تھیوݨ کیتے سَڈے گئے ہِن۔ ساڈے باپ خُدا تے خُداوند یسوع المسیح دی طرفوں تُہاکُوں فضل تے اِطمینان حاصل تھیندا رَہوے۔

‏8 پہلے تاں میں تُساں ساریاں کیتے یسوع مسیح دے وَسیلے نال آپنڑے خُدا دا شُکر کریندا ہاں جو تُہاڈے اِیمان دی مشہوری ساری دُنیا ءچ تھیندی پئی ہے۔ ‏9 خُدا جِیندی خدمت میں دِل و جان نال اُوندے پوتر دی خوشخبری سُنڑا تے کریندا ہاں، میڈا گواہ ہے جو میں تُہاکُوں آپنڑی دُعاواں ءچ ہمیشاں یاد کریندا ہاں۔ ‏10 تے آپنڑی سبھ دُعاواں ءچ ایہہ درخاست کریندا ہاں جو آخر کار خُدا دی مرضی نال میں تُہاڈے کولھ آسگاں۔ اِیہو میڈی دُعا ہے۔ ‏11 کیوں جو میں تُہاکُوں مِلنڑ دی بہُوں سِک رکھیندا ہاں تاں جو تُہاکُوں کوئی ایجھی رُوحانی نعمت ڈے سگاں جیہڑی تُہاڈے اِیمان دی مضبوطی دا باعث بنڑے۔ ‏12 ایہہ جو تُہاڈے نال میڈی وی اُوں اِیمان دے سببّوں تسلی وَدھے جیہڑا تُہاڈے تے میڈے ڈوہائیں ءچ ہے۔

‏13 بِھراؤ ! میں نئیں چاہندا جو تُساں اِیں گالھ کنُوں ناواقف رَہو جو میں کئی واری تُہاڈے کولھ آوݨ دا اِرادہ کیتا تاں جو جیویں ڈوجھیاں غیر قوماں ءچ میڈی خدمت پھل گِھن آئی، تُساں ءچ وی گِھن آوے، پَر میں اَج تئیں رُکیا ریہا۔ ‏14 میں یُونانیاں تے غیر یُونانیاں، داناواں تے ناداناں ڈوہائیں دا قرض دار ہاں۔ ‏15 بس میں تُہاکُوں وی جیہڑے رُوم ءچ ہِیوے خوشخبری سُاوݨ دی بہُوں سِک رکھیندا ہاں۔

‏16 میں خوشخبری کنُوں نئیں شرمیندا کیوں جو اوہ ہر اِیمان گِھن آوݨ آلے دی نجات کیتے خُدا دی قُدرت ہے۔ پہلے یہُودی کیتے، وَل غیریہُودی کیتے۔ ‏17 کیوں جو اُوندے ءچ خُدا دی اُوں راستبازی کُوں ظاہر کیتا گِیا ہے جیہڑی اِیمان ای دے ذریعے حاصل تھیندی ہے، جیویں پاک کلام ءچ لکھیا ہے جو ”راستباز اِیمان نال زندہ رَہسی ۔“

‏18 کیوں جو خُدا دا قہر اُنہاں لوکاں دی ساری بے دینی تے ناراستی اُتے اَسمان کنُوں ظاہر تھیندے جیہڑے سچّائی کُوں آپنڑی ناراستی دے نال دَبا ڈیندے ہِن۔ ‏19 کیوں جو خُدا دے بارے ءچ جیہڑا کُجھ وی معلوم تھی سگدے اوہ اُنہاں کیتے ظاہر ہے، اِیں واسطے جو خُدا نیں آپ اُونکُوں اُنہاں اُتے ظاہر کر ڈِتے۔ ‏20 کیوں جو خُدا دی اَن ڈِٹھی صفات یعنی اُوندی اَزلی قُدرت تے الُوہیت ، دُنیا دی پیدائش کنُوں بنڑائی ہوئیاں چیزاں کنُوں صاف ڈِکھالی ڈیندیاں ہِن۔ اِیں واسطے اِنسان دے کولھ کوئی عُذر نئیں۔ ‏21 بے شک اوہ خُدا دے بارے ءچ جانڑدے تاں ہَن پَر اُنہاں اُوندی خُدائی دے لائق اُوندی تمجید تے شُکر گُزاری نہ کیتی۔ بلکہ اُنہاں دے خیال بے کار ثابت تھئے تے اُنہاں دے ناسمجھ دِلاں اُتے اَندھارا تھی گِیا۔ ‏22 اوہ عقلمند ہووݨ دا دعویٰ کریندے ہِن، پَر بےوقوف نکلے۔ ‏23 تے غیر فانی خُدا دے جلال کُوں فانی اِنسان، پَکھیاں، ڈھور ڈنگر تے کیڑے مَکوڑیاں دی صورت ءچ بَدل ڈِتا۔

‏24 اِیں واسطے خُدا نیں وی اُنہاں دے دِلاں دی گُناہ آلودہ خواہشاں دے مطابق اُنہاں کُوں ناپاکی ءچ چھوڑ ڈِتا تاں جو اُنہاں دے بدن آپس ءچ بے حُرمت کیتے وَنجنڑ۔ ‏25 اُنہاں خُدا دی سچّائی کُوں کُوڑ نال بَدل ڈِتا تے مخلوقات دی زیادہ پرستش تے عبادت کیتی بجائے خالق دی جیہڑا ہمیشاں تئیں تمجید دے لائق ہے۔ آمین۔

‏26 اِیں وَجہ کنُوں خُدا نیں اُنہاں کُوں شرمناک خواہشات ءچ چھوڑ ڈِتا۔ اِتھوں تئیں جو اُنہاں دی عورتاں آپنڑے فِطرتی جنسی فعل کُوں غیر فِطرتی فعل نال بَدل ڈِتا۔ ‏27 اِینویں ای مَرد وی عورتاں نال آپنڑے فِطرتی جنسی فعل کُوں چھوڑ تے آپس ءچ مَست تھی گئے یعنی مَرداں نیں مَرداں نال بُرائی کیتی تے اُنہاں آپنڑے آپ ءچ گُمراہی دے لائق سزا پاتی۔

‏28 تے جیویں اُنہاں خُدا کُوں پچھاننڑا پسند نہ کیتا، اِینویں ای خُدا نیں وی اُنہاں کُوں ناپسندیدہ خیالاں دے حوالے کر ڈِتا جو نامناسب حرکتاں کرݨ۔ ‏29 اوہ ہر طرحاں دی ناراستی، بدی، لالچ تے نااِنصافی کنُوں بھریج گئے تے حسد، قتل، جھیڑے، فریب تے بُغض کنُوں معمور تھی گئے۔ اوہ چغلی کرݨ آلے، ‏30 بد زبان، خُدا نال نفرت کرݨ آلے، گُستاخ، مغرور تے شیخی باز ، بدی دے بانی تے آپنڑے ماں پیُو دے نافرمان، ‏31 تے بے وقوف ، بے وفا، بے مُحبت تے بے رحم تھی گئے۔ ‏32 بھانویں اوہ خُدا دا ایہہ حُکم جانڑدے ہِن جو ایجھے کَم کرݨ آلے مَوت دی سزا دے حقدار ہِن، وَل وی نہ فقط اوہ آپ اِیہو کَم کریندے ہِن بلکہ ایجھا کرݨ آلے کُوں چنگا جانڑدے ہِن۔