خُدا دی عدالت
2
1 اِیں واسطے اے اِلزام لاوݨ آلے ! تُوں جیہڑا کوئی وی ہونویں تیڈے کولھ کوئی عُذر نئیں، کیوں جو تُوں جِیں گالھ دا اِلزام ڈوجھے اُتے لیندیں، اُونہئی دا تُوں آپنڑے آپ کُوں مُجرم بنڑیندیں، کیوں جو خود اُوہو کَم کریندیں۔ 2 اَساں جانڑدے ہیں جو خُدا ایجھے کَم کرݨ آلے دی عدالت حق دے مطابق کریندے۔ 3 اے اِنسان ! تُوں جیہڑا ایجھے کَم کرݨ آلیاں اُتے اِلزام لیندیں تے خود اُوہو کَم کریندیں، کیا ایہہ سمجھدیں جو تُوں خُدا دی عدالت کنُوں بچ ویسیں؟ 4 کیا تُوں خُدا دی مہربانی، برداشت تے صبر کُوں نا چیز سمجھدیں؟ تے کیا ایہہ نئیں جانڑدا جو خُدا دی مہربانی تیکُوں توبہ کرݨ دی توفیق دا رستہ ڈکھیندی ہے؟ 5 پَر تُوں آپنڑے سخت تے توبہ نہ کرݨ آلے دِل دی وجہ کنُوں آپنڑے کیتے روز ِ محشر کیتے غضب کَٹھا کریندا پِیا ہیں جِیں وَیلے خُدا دا سچا اِنصاف ظاہر تھیسی۔ 6 اوہ ”ہر شخص کُوں اُوندے اعمال دے مطابق بدلہ ڈیسی۔“ 7 جیہڑے نیک کَماں ءچ قائم رہ تے جلال، عزت تے فنا نہ ہوونڑا چاہندے ہِن اُنہاں کُوں ہمیشاں دی زندگی ڈیسی۔ 8 پَر جیہڑے خود غرض ہِن تے سچّائی کُوں چھوڑ تے بُرائی اُتے چلدے ہِن اُنہاں اُتے قہر تے عذاب نازل تھیسی۔ 9 ہر اِنسان اُتے جیہڑا بُرائی کریندے، مُصیبت تے تنگی آسی، پہلے یہُودی اُتے وَلا غیریہُودی اُتے۔ 10 پَر ہر اُوں شخص کُوں جیہڑا نیکی کریندے جلال، عزت تے سکون مِلسی، پہلے یہُودی کُوں وَلا غیریہُودی کُوں۔ 11 کیوں جو خُدا کہیں دی طرفداری نئیں کریندا۔12 جیہڑے لوکاں کُوں شریعت نئیں مِلی تے وَل وی گُناہ کریندے ہِن، اوہ سارے شریعت دے بغیر مَر سن تے اوہ جِنہاں کولھ شریعت ہے اوہ گُناہ کریندے ہِن، اُنہاں دی سزا شریعت دے مطابق ہوسی۔ 13 کیوں جو شریعت کُوں سُننڑ آلے خُدا دی نِگاہ ءچ راستباز نئیں ہوندے بلکہ شریعت اُتے عمل کرݨ آلے ای راستباز کھڑائے ویسن۔ 14 ہاں جِیں وَیلے اوہ قوماں جِنہاں کولھ شریعت نئیں پَر قُدرتی طور اُتے شریعت دے مطابق کَم کریندیاں ہِن تاں شریعت نہ ہوندے ہوئے وی اوہ خود آپنڑے کیتے ہِک شریعت ہِن۔ 15 اوہ ایہہ ظاہر کریندے ہِن جو شریعت دے حُکم اُنہاں دے دِلاں اُتے نقش ہِن تے اُنہاں دا ضمیر وی اِیں گالھ دی گواہی ڈیندا ہے، تے اُنہاں دے آپس دے خیالات یا تاں اُنہاں اُتے اِلزام لیندے ہِن یا اُنہاں کُوں معذور رکھیندے ہِن۔ 16 ایہہ اوہ ڈینہہ ہوسی جِیں وَیلے خُدا یسوع مسیح دی معرفت آدمیاں دی لُکی گالھیں دا اِنصاف کریسی جِیویں میں خوشخبری سُنڑیندا ہاں۔
یہُودی تے شریعت
17 پَر جے تُوں یہُودی اَکھویندیں تے شریعت اُتے بھروسہ کریندیں تے خُدا اُتے فخر کریندیں، 18 تے اُوندی مَرضی جانڑدیں تے شریعت دی تعلیم گِھن تے چنگے گالھیں پسند کریندیں، 19 تے تیکُوں اِیں گالھ اُتے وی یقین ہے جو تُوں اَندھیاں دا رَہنما تے اَندھاریاں ءچ رَہنڑ آلیاں کیتے روشنی ہیں، 20 تے احمقاں کُوں سکھاوݨ آلا تے بالاں دا اُستاد ہیں کیوں جو تیڈے کولھ شریعت ءچ علم تے حق دا نمونہ ہے۔ 21 بس جِیں وَیلے تُوں بئیاں کُوں سکھیندیں تاں آپنڑے آپ کُوں کیوں نئیں سکھیندا؟ تُوں جیہڑا وعظ کریندیں جو چوری نہ کر، تاں خود کیوں چوری کریندیں؟ 22 تُوں جیہڑا آہدھیں جو زِنا نہ کر، خود کیوں زِنا کریندیں؟ تُوں جیہڑا بُتاں کنُوں نفرت کریندیں، خود کیوں بُت خانیاں کُوں لُٹ گِھندیں؟ 23 تُوں جیہڑا شریعت اُتے فخر کریندیں، تُوں خود کیوں شریعت دی نافرمانی کر تے خُدا دی بے عزتی کریندیں؟ 24 اِیہو وجہ ہے جو پاک کلام ءچ لکھیا ہے جو ”تُہاڈی وجہ کنُوں غیر قوماں ءچ خُدا دے ناں اُتے کُفر بکیا وَیندا ہے ۔“
25 ختنہ دا فائدہ تاں ہے بشرطیکہ تُوں شریعت اُتے عمل کریں، پَر جے تَیں شریعت دی نافرمانی کیتی تاں تُوں اُنہاں دے برابر ہیں جیہڑے ختنہ نئیں کریندے۔ 26 جے نامختون شخص شریعت دے حُکماں اُتے عمل کرے تاں کیا اُوندی نامختونی ختنہ دے برابر نہ شمار کیتی ویسی؟ 27 تے جیہڑا شخص نامختون قوم دا ہے پَر شریعت اُتے عمل کریندا ہے تاں اوہ تیکُوں جیہڑا کلام تے ختنہ دے باجود شریعت دی نافرمانی کریندا ہے، قصور وار نہ کَھڑیسی؟ 28 کیوں جو اوہ یہُودی نئیں جیہڑا ظاہر دا ہووے تے نہ ای اوہ ختنہ ہے جیہڑا ظاہری تے جِسمانی ہے۔ 29 بلکہ یہُودی اُوہو ہے جیہڑا باطن ءچ یہُودی ہے تے ختنہ اُوہو ہے جیہڑا دِل دا تے رُوحانی ہے نہ جو کلامی، ایجھے اِنسان دی تعریف آدمیاں دی طرفوں نئیں بلکہ خُدا دی طرفوں ہوندی ہے۔