3
1 بس یہُودی کُوں کیا برتری ہے تے ختنہ دا کیا فائدہ ہے؟ 2 ہر لحاظ نال بہُوں سارا ہے۔ خاص طور تے ایہہ جو خُدا دا کلام اُنہاں دے سپُرد کیتا گئے۔ 3 جے کُجھ بےوفا تھئے تاں کیا تھیّا؟ کیا اُنہاں دی بےوفائی خُدا دی وَفا داری کُوں باطل کر سگدی ہے؟ 4 ہر گز نئیں۔ بلکہ خُدا سچّا ہے تے ہر آدمی کُوڑا ہے۔ جِیویں پاک کلام ءچ لکھیا ہے جو”تُوں آپنڑے گالھیں ءچ راستباز ثابت ہوسیں
تے آپنڑے مُقدمے ءچ جیت سیں ۔“
5 (میں ایہہ اِنسان وانگوں اَکھیندا ہاں ) جے ساڈی بَدی خُدا دی راستبازی دی خوبی ظاہر کریندی ہے تاں اَساں کیا آکھوں؟ کیا اَساں ایہہ آکھوں جو خُدا ساڈے اُتے عذاب نازل کر تے بے اِنصافی کریندے؟ 6 ہر گز نئیں، نئیں تاں خُدا دُنیا دا اِنصاف کیویں کریسی؟
7 یا کوئی ایہہ آکھے جو ”جے میڈے کُوڑ دی وجہ کنُوں خُدا دی سچّائی اُوندے جلال کیتے زیادہ ظاہر ہوندی ہے تاں وَل میں کیوں قصُوروار سمجھیا وَیندا ہاں؟“ 8 کیوں نہ ایہہ آکھوں جو ”آؤ اَساں بُرائی کرؤں تاں جو چنگائی تھیوے؟“ کُجھ لوک ساڈے اُتے اِلزام لیندے ہِن جو ساڈی تعلیم اِیہو ہے۔ پَر ایجھیاں دا مُجرم کھڑایا وَنجنڑاں اِنصاف ہے۔
کوئی نیکو کار نئیں
9 بس اِیندا نتیجہ کیا ہے؟ کیا اَساں اُنہاں کنُوں چنگے ہیں؟ اَصلُوں نئیں۔ اَساں تاں پہلے ای آکھ ڈِتے جو یہُودی تے غیریہُودی سارے دے سارے گُناہ دے قبضے ءچ ہِن۔ 10 جِیویں لکھیا ہے جو
”کوئی راستباز نئیں۔ ہِک وی نئیں۔
11 کوئی سمجھدار نئیں۔ کوئی خُدا دا طالب نئیں۔
12 سارے گُمراہ تھی گئے ہِن،
سارے دے سارے کہیں کَم دے نئیں ریہے۔
کوئی نئیں جیہڑا چنگائی کریندا ہووے۔ ہِک وی نئیں ۔
13 اُنہاں دا گلّا کُھلی قبر وانگوں ہے۔
اُنہاں دی زبان کنُوں فریب دے گالھیں نکلدیاں ہِن۔
اُنہاں دے ہونٹاں ءچ سَپاں دا زہر ہے ۔
14 اُنہاں دا مُنہ لعنت تے کڑواہٹ کنُوں بھریا ہے ۔
15 اُنہاں دے قدم قتل کرݨ کیتے تیز رفتار ہِن۔
16 اُنہاں دے رستیاں ءچ تباہی تے بدحالی ہے۔
17 اوہ امن دے رستے کنُوں واقف نئیں۔
18 اُنہاں دے اَکھیں ءچ خُدا دا ڈر نئیں ۔“
19 بس اَساں جانڑدے ہیں جو شریعت جیہڑا کُجھ آہدھی ہے، اُنہاں کُوں آہدھی ہے جیہڑے شریعت دے پابند ہِن تاں جو ہر مُنہ بند تھی وَنجے تے ساری دُنیا خُدا دے سامنڑے سزا دی حقدار ہووے۔ 20 کیوں جو شریعت دے اعمال نال کوئی شخص خُدا دی بارگاہ ءچ راستباز نئیں تھی سگدا۔ اِیں وسطے جو شریعت دے وسیلے گُناہ دی پہچان تھیندی ہے۔
خُدا دے نال ساڈا رشتہ کیویں بحال ہوندا ہے
21 پَر ہُنڑ شریعت دے بغیر خُدا دی ہِک راستبازی ظاہر تھئی ہے جِیندی گواہی تَورَیت تے انبیا تُوں تھیندی ہے۔ 22 یعنی خُدا دی اوہ راستبازی جیہڑی یسوع مسیح اُتے اِیمان گِھن آوݨ نال اُنہاں ساریاں کُوں مِلدی ہے۔ کوئی طرفداری نئیں، 23 کیوں جو ساریاں نیں گُناہ کیتا تے خُدا دے جلال کنُوں محروم ہِن۔ 24 پَر خُدا دے فضل دی وجہ کنُوں اُوں مخلصی دے وسیلے نال جیہڑی یسوع مسیح ءچ ہے، مُفت راستباز کھڑائے وَیندے ہِن۔ 25 خُدا نیں اُونکُوں مُقرر کیتا جو اوہ آپنڑے خون دے باعث ایجھا کفارہ بنڑ وَنجے جیہڑا اِیمان گِھن آوݨ آلے کیتے فائدہ مند ہووے۔ ایہہ خُدا دی راستبازی دا اِظہار ہا جو اُونیں بہُوں صبر تے برداشت نال اُنہاں گُناہاں دی سزا نہ ڈِتی جیہڑے پہلے کنُوں تھی گئے ہَن۔ 26 بلکہ اِیں زمانہ ءچ وی اُوندی راستبازی ظاہر تھیوےکیوں جو اوہ خود وی عادل ہے تے ہر شخص کُوں جیہڑا یسوع اُتے اِیمان گِھن آندے، راستباز کھڑاوݨ آلا ہے۔
27 بس فخر کِتھاں ریہا؟ اِیندی گُنجائش ای نہ رہی۔ کیہڑی شریعت دی وجہ تُوں؟ کیا اعمال دے وسیلے نال ؟ نئیں، بلکہ اِیمان دی دے وسیلے نال۔ 28 اِیں واسطے اَساں اِیں نتیجے اُتے پُجدے ہئیں جو اِنسان شریعت اُتے عمل کرݨ نال نئیں بلکہ اِیمان گِھن آوݨ دے باعث راستباز کھڑایا وَیندا ہے۔ 29 کیا خُدا فقط یہُودیاں دا ہے؟ کیا اوہ غیریہُودیاں دا نئیں؟ بے شک اوہ غیریہُودیاں دا وی ہے۔ 30 کیوں جو ہِک ای خُدا ہے جیہڑا مَختُوناں کُوں اُنہاں دے اِیمان گِھن آوݨ دی وجہ تُوں تے نامَختُوناں کُوں اُنہاں دے اِیمان ای دے وسیلے نال راستباز بنڑیسی۔ 31 کیا اَساں شریعت کُوں اِیمان نال باطل کریندے ہئیں؟ ہر گز نئیں بلکہ شریعت کُوں قائم رکھیندے ہیں۔