شریعت تے اِیمان دے بارے ء چ ابرہام دی مثال
4
1 اَساں ابرہام دے بارے ءچ جیہڑا ساڈا جِسمانی پیُو ہے، کیا آکھوں؟ اُونکُوں کیا معلوم تھیّا؟ 2 جے اوہ آپنڑے اعمال دی وجہ کنُوں راستباز تھیندا تاں اُونکُوں فخر کرݨ دا حق ہوندا پَر خُدا دے حضور ءچ نئیں۔ 3 کیوں جو خُدا دا کلام آہدھے جو ”ابرہام خُدا اُتے اِیمان گِھن آیا تے ایہہ اُوندے کیتے راستبازی شمار کیتا گِیا ۔“ 4 کَم کرݨ آلے دی مَزدوری کوئی بخشش نئیں بلکہ اُوندا حق سمجھی وَیندی ہے۔ 5 پَر جیہڑا شخص کَم نئیں کریندا بلکہ بے دیناں کُوں راستباز بنڑاوݨ آلے خُدا اُتے اِیمان رکھیندے، اُوندا اِیمان aاُوندے کیتے راستبازی شمار کیتا وَیندے۔ 6 بس جئیں شخص کُوں خُدا اُوندے اعمال دے بغیر راستباز آہدھے، داؤد وی اُوں آدمی دی مُبارک حالی دا ذِکر اِینویں کریندے، 7 جو”مُبارک اوہ ہِن جِنہاں دیاں بدکاریاں بخش ڈِتیاں گئیاں،
تے جِنہاں دے گُناہ ڈھکے گئے۔
8 مُبارک ہے اوہ شخص جِیندے گُناہ خُداوند حساب ءچ نہ گِھن آسی ۔“
9 بس کیا ایہہ مُبارک بادی فقط مَختُوناں کیتے ای ہے یا نامختُوناں کیتے وی ہے؟ کیوں جو اَساں آہدھے ہئیں جو ابرہام دا اِیمان اُوندے کیتے راستبازی شمار کیتا گِیا۔ 10 پَر اوہ کیہڑی حالت ءچ راستباز شمار کیتا گِیا؟ مَختُونی ءچ یا نامَختُونی ءچ؟ مَختُونی ءچ نئیں بلکہ نا مَختُونی ءچ۔ 11 تے اُونکُوں ختنہ دا نِشان اُوں راستبازی اُتے مُہر دے طور تے مِلیایعنی اوہ راستبازی جیہڑی اُونکُوں نامَختُونی دی حالت ءچ اِیمان رکھنڑ تُوں عطا تھئی تاں جو اوہ اُنہاں ساریاں دا پیُو بنڑے جیہڑے اِیمان گِھن آندے ہِن تے بھانویں اُنہاں دا ختنہ نئیں تھیّا راستبازاں ءچ شمار کیتے وَیندے ہِن۔ 12 تے اوہ اُنہاں مَختُوناں دا پیُو ہووے جیہڑے نہ فقط مختون ہِن بلکہ ساڈے پیُو ابرہام دے اُوں اِیمان دی وی پیروی کریندے ہِن جیہڑا اُونکُوں نامَختُونی دی حالت ءچ حاصل تھیّا ہا۔
خُدا دا وعدہ اِیمان دے وسیلے نال مؤثر تھیندے
13 کیوں جو ایہہ وعدہ جو اوہ دُنیا دے وارث ہوسن نہ تاں ابرہام کُوں تے نہ اُوندی نسل کُوں شریعت دے سببّوں کیتا گِیا ہا بلکہ اِیمان دی راستبازی دے سببّوں۔ 14 کیوں جو جے فقط شریعت آلے ای دُنیا دےوارث ہووݨ تاں اِیمان بے فائدہ ہوندا تے خُدا دا وعدہ وی بے مقصد ہوندا۔ 15 کیوں جو شریعت غَضب گِھن آندی ہے تے جِتھاں شریعت نئیں اُتھاں حُکم عدولی وی نئیںb ۔
16 اِیں واسطے ایہہ وعدہ اِیمان دی وجہ کنُوں ہے تاں جو فضل دے طور تے ہووے تے ابرہام دی کُل نسل کیتے ہووے، فقط اُنہاں کیتے نئیں جیہڑے اہل ِ شریعت ہِن بلکہ اُنہاں کیتے وی جیہڑے ابرہام وانگوں اِیمان آلے ہِن کیوں جو ابرہام اَساں ساریاں دا پیُو ہے۔ 17 چنانچہ لکھیا ہے جو ”میں تیکُوں بہُوں سارِیاں قوماں دا پیُو مُقرر کیتے۔“ ابرہام خُدا دے سامنڑے ساڈا پِیُو ہے جِیندے اُتے اوہ اِیمان رکھیندا ہا تے جیہڑا مُردیاں کُوں زندہ کریندے تے غیر موجود چیزاں کُوں اِینویں سَڈ گِھندے جیویں اوہ موجود ہِن۔ 18 ابرہام نا اُمیدی ءچ وی اِیمان رکھیندا ہا تے بہُوں ساریاں قوماں دا پیُو بنڑیا جیویں جو اُونکُوں آکھیا گِیا ہا جو ”تیڈی نسل اِینویںc ای ہوسی ۔“ 19 ابرہام تقریباً سَو سال دا ہا تے آپنڑے مُردہ جیہے بدن دے باوجود تے ایہہ جانڑدے ہوئے وی جو سارہ دا رَحم وی مُردہ جیہاہے، اُوندا اِیمان کمزور نہ تھیّا۔ 20 نہ اِیمان دی کمی دے باعث خُدا دے وعدہ اُتے شک کیتا بلکہ اِیمان ءچ مضبوط تھی تے خُدا دی تمجید کیتی۔ 21 اُونکُوں کامل اَعتقاد ہا جو جِیں خُدا نیں وعدہ کیتے اوہ اُونکُوں پورا کرݨ دی وی قُدرت رکھیندے۔ 22 اِیں واسطے ابرہام دا اِیمان اُوندے کیتے راستبازی شمار کیتا گِیا۔ 23 تے ایہہ گالھ جو ”اِیمان اُوندے کیتے راستبازی شمار کیتا گِیا،“ فقط اُوندے کیتے نئیں لکھیا گِیا 24 بلکہ ساڈے کیتے وی جِنہاں کیتے اِیمان راستبازی شمار کیتا ویسی۔ اِیں واسطے جو اَساں اُوں خُدا اُتے اِیمان گِھن آئے ہیں جئیں ساڈے خُداوند یسوع کُوں مُردیاں ءچوں زندہ کیتا۔ 25 اوہ ساڈے گُناہاں کیتے حوالے کیتا گِیا تے ساکُوں راستباز بنڑاوݨ کیتے زندہ کیتا گِیا۔