‏6 کیوں جو جِیں وَیلے اَساں سارے بے بس ہاسے تاں مسیح نیں عین موقع تے بے دیناں کیتے آپنڑی جان ڈِتی۔ ‏7 کہیں راستباز دی خاطر وی مشکل نال کوئی آپنڑی جان ڈیسی پَر شاید کوئی جرأت کر تے کہیں نیک شخص کیتے آپنڑی جان ڈیوے۔ ‏8 پَر خُدا ساڈے اُتے آپنڑی مُحبت دی خوبی اِینویں ظاہر کریندے جو جِیں وَیلے اَساں گُنہگار ای ہاسے تاں مسیح نیں ساڈی خاطر آپنڑی جان ڈِتی۔ ‏9 بس جِیں وَیلے مسیح دے خون دےوسیلے نال اَساں راستباز کھڑائے گئے تاں ساکُوں بِیا وی یقین ہے جو اَساں اُوندے وسیلے عذاب ِ خُدا کنُوں ضرور بچ ویسوں۔ ‏10 کیوں جو جِیں وَیلے خُدا دے دشمنڑ ہووݨ دے باوجود اُوندے پوتر دی مَوت دے وسیلے ساڈی اُوندے نال صُلح تھی گئی تاں صُلح تھیوݨ دے بعد تاں اَساں اُوندی زندگی دی وجہ کنُوں ضرور ای بچ ویسوں۔ ‏11 تے نہ فقط ایہہ بلکہ اَساں آپنڑے خُداوند یسوع المسیح دے ذریعے خُدا اُتے فخر کریندے ہئیں جِیندے وسیلے ساڈی خُدا دے نال صُلح تھی گئی ہے۔

‏12 بس جیویں ہِک آدمی دے ذریعے گُناہ دُنیا ءچ داخل تھیّا تے گُناہ دی وجہ کنُوں مَوت آگئی تے اِیں طرحاں مَوت ساریاں اِنساناں ءچ پھیل گئی کیوں جو ساریاں نیں گُناہ کیتا۔ ‏13 شریعت دے ڈیوݨ کنُوں پہلے دُنیا ءچ گُناہ تاں ہا پَر جِتھاں شریعت نئیں ہوندی اُتھاں گُناہ دا حساب وی نئیں ہوندا۔ ‏14 وَل وی آدم کنُوں موسیٰ تئیں مَوت نیں اُنہاں اُتے حکُومت کیتی، جِنہاں آدم دی نافرمانی وانگوں گُناہ نہ کیتا۔ جیہڑا آوݨ آلے دا مثیل ہا ^a۔ ‏15 پَر گُناہ دا جیہڑااثر ہے اوہ فضل دی نعمت دانئیں کیوں جو ہِک آدمی دے گُناہ دی وجہ کنُوں بہُوں سارے اِنسان مَر گئے پَر ہِک آدمی یعنی یسوع مسیح دے فضل دی وجہ نال بہُوں سارے اِنساناں کُوں خُدا دا فضل تے اُوندی بخشش عطا تھئی۔ ‏16 تے جیویں ہِک آدمی دے گُناہ دا انجام تھیّا، بخشش دا اُونویں نئیں کیوں جو ہِک گُناہ دا انجام سزا دے حُکم دی شکل ءچ سامنڑ ے آیا۔ پَر گُناہاں دی کثرت دے بعد فضل دا انجام اِنسان دی راستبازی دی شکل ءچ سامنڑے آیا۔ ‏17 کیوں جو جِیں وَیلے ہِک آدمی دے گُناہ دی وجہ کنُوں مَوت ساریاں اُتے حکومت کیتی تاں جیہڑے لوک فضل تے راستبازی دی نعمت اِفراط نال حاصل کریندے ہِن اوہ وی ہِک آدمی یعنی یسوع مسیح دے وسیلےنال ہمیشاں دی زندگی ءچ ضرور حکُومت کریسن۔

‏18 اِیں واسطے جیویں ہِک آدمی دے گُناہ دی وجہ کنُوں سارے آدمیاں کیتے مَوت دی سزا دا حُکم تھیّا اُونویں ای راستبازی دے ہِکو کَم دے وسیلے نال سارے آدمیاں کُوں اوہ نعمت مِلی جِیندے نال اوہ راستباز تھی تے زندگی پاوݨ۔ ‏19 کیوں جو جیویں ہِک آدمی دی نافرمانی کنُوں بہُوں سارے لوک گُنہگار تھئے، اُونویں ای ہِک آدمی دی فرمانبرداری کنُوں بہُوں سارے لوک راستباز تھی ویسن۔

‏20 بعد ءچ شریعت آ گئی تاں جو گُناہ زیادہ تھی وَنجے^b پَر جِتھاں گُناہ زیادہ تھیّا اُتھاں فضل اُوں کنُوں وی زیادہ تھیّا۔ ‏21 تاں جو جیویں گُناہ نیں مَوت دے ذریعے حکُومت کیتی اُونویں ای فضل وی راستبازی دے ذریعے حکُومت کریسی تے ساڈے خُداوند یسوع مسیح دے وسیلے نال ہمیشاں دی زندگی ڈیسی۔