‏5 کیوں جو جِیں وَیلے اَساں مسیح دی مَوت ءچ شامل تھی گئے ہئیں تاں بے شک اُوندے مُردیاں ءچوں زندہ تھیوݨ ءچ وی شامل تھی ویسوں۔ ‏6 تے اَساں جانڑدے ہئیں جو ساڈی پُرانڑی اِنسانیت مسیح دے نال مصلُوب کیتی گئی جو گُناہ دا بدن بے کار تھی وَنجے تاں جو اَساں اَگُوں تے گُناہ دی غلامی ءچ نہ رَہوں۔ ‏7 کیوں جو جیہڑا مَر گِیا اوہ گُناہ کنُوں وی بَری تھی گِیا۔ ‏8 بس جیِں وَیلے اَساں مسیح دے نال مَر گئے تاں ساکُوں یقین ہے جو اُوندے نال زندہ وی تھی ویسوں۔ ‏9 کیوں جو ساکُوں معلوم ہے جو جِیں وَیلے مسیح مُردیاں ءچوں زندہ کیتا گِیا تاں وَلا کَڈھائیں نہ مَرسی، مَوت دا اُوندے اُتے کوئی اِختیار نئیں۔ ‏10 کیوں جو گُناہ دے اعتبار کنُوں تاں مسیح ہِکو واری مویا پَر خُدا دے اعتبار نال اوہ ہمیشاں زندہ ہے۔ ‏11 اِینویں ای تُساں وی آپنڑے آپ کُوں گُناہ دے اعتبار کنُوں تاں مُردہ، پَر خُدا دے اعتبار کنُوں یسوع مسیح ءچ زندہ سمجھو۔

‏12 بس گُناہ کُوں آپنڑے فانی جِسم اُتے حُکمرانی نہ کرݨ ڈیوو جو اوہ تُہاکُوں آپنڑی خواہشاں دے تابع نہ رکھ سگے۔ ‏13 تے نہ ای آپنڑے جِسم دے اَنگاں کُوں بَدی دے ہتھیار بننڑ کیتے گُناہ دے سپُرد کرو بلکہ آپنڑے آپ کُوں مُردیاں ءچوں زندہ جاݨ تے، تے آپنڑے جِسم دے اَنگاں کُوں راستبازی دے ہتھیار بننڑ کیتے خُدا دے سپُرد کرو۔ ‏14 کیوں جو تُساں شریعت دے ماتحت نئیں بلکہ فضل دے ماتحت ہِیوے اِیں واسطے گُناہ دا تُہاڈے اُتے اِختیار نہ ہوسی۔

‏15 وَل کیا کرؤں؟ کیا اَساں اِیں کیتے گُناہ کریندے رہ وَنجوں جو اَساں شریعت دے ماتحت نئیں بلکہ فضل دے ماتحت ہئیں؟ ہر گِز نئیں۔ ‏16 کیا تُساں نئیں جانڑدے جو تُساں جِیندی فرمانبرداری کیتے آپنڑے آپ کُوں غلاماں وانگوں سپُرد کر ڈیندے ہِیوے اُونہئی دے غلام ہِیوے۔ بھانویں گُناہ دی فرمانبرداری دے، جِیندا انجام موت ہے، بھانویں خُدا دی فرمانبرداری دے، جِیندا انجام راستبازی ہے؟ ‏17 پَر خُدا دا شُکر ہے جو بھانویں پہلے تُساں گُناہ دے غلام ہَوے پَر ہُنڑ دِل نال اُوندی تعلیم دے تابع تھی گئے ہِیوے جیہڑی تُہاڈے سپُرد کیتی گئی۔ ‏18 تُساں گُناہ دی غلامی کنُوں آزاد تھی تے راستبازی دے غلام تھی گئے۔ ‏19 میں تُہاڈی اِنسانی کمزوری دی وجہ کنُوں اِنسان وانگوں آہدھا ہاں۔ جیویں تُساں آپنڑے اَنگاں کُوں بدکاری کرݨ کیتے ناپاکی تے نافرمانی دی غلامی ءچ ڈے ڈِتا ہا، ہُنڑ آپنڑے اَنگاں کُوں پاک تھیوݨ کیتے راستبازی دی غلامی ءچ ڈے ڈیوو۔

‏20 جِیں وَیلے تُساں گُناہ دے غلام ہَوے تاں راستبازای کنُوں آزاد ہَوے۔ ‏21 پَر جیہڑے گالھیں کنُوں تُساں ہُنڑ شرمندہ ہِیوے، اُنہاں کنُوں تُہاکُوں کیا پھل مِلیا؟ کیوں جو اُنہاں دا انجام مَوت ہے۔ ‏22 پَر ہُنڑ گُناہ دی غلامی کنُوں آزاد تھی تے خُدا دی غلامی ءچ آگئے ہِیوے تے تُہاکُوں پاک تھیوݨ دا پھل مِلیا جِیندا انجام ہمیشہ دی زندگی ہے۔ ‏23 کیوں جو گُناہ دی مزدوری مَوت ہے پَر خُدا دی بخشش ساڈے خُداوند یسوع مسیح ءچ ہمیشاں دی زندگی ہے۔