شادی دی مثال تُوں وضاحت
7
1 بِھراؤ ! کیا تُساں نئیں جانڑدے (میں اُنہاں کُوں آہدھا ہاں جیہڑے شریعت کنُوں واقف ہِن ) جو اِنسان فقط اُوں وَیلے تئیں شریعت دے ماتحت ہے، جئیں تئیں اوہ زندہ ہے؟ 2 جیویں شادی شدہ عورت ، شریعت دے مطابق پائے دے زندہ ہووݨ تئیں اُوندی پابند ہوندی ہےa پَر جے اُوندا پایا مَر وَنجے تاں اوہ آپنڑے پائے دی شریعت کنُوں آزاد تھی وَیندی ہے۔ 3 جے اوہ آپنڑے پائے دے زندہ ہووݨ دے باوجود کہیں بئے آدمی دی تھی وَنجے تاں زانیہ اَکھویسی۔ پَر جے اُوندا پایا مَر وَنجے تاں اوہ اِیں شریعت کنُوں آزاد تھی وَیندی ہے۔ اُوں حالت ءچ اوہ کہیں بئے آدمی دی تھی وی وَنجے تاں اوہ زانیہ نہ اَکھویسی۔ 4 بِھراؤ ! تُساں وی مسیح دے بدن دے وسیلےنال شریعت دے اعتبار نال مَر گئے ہِیوے تاں جو کہیں بئے دے تھی وَنجو یعنی مسیح دے جیہڑا مُردیاں ءچوں زندہ کیتا گِیا تاں جو خُدا کیتے پھل گِھن آؤ۔ 5 جِیں وَیلے اَساں آپنڑے جِسمb دے مطابق زندگی گُزریندے ہاسے تاں گُناہ دیاں خواہشاں جیہڑیاں شریعت دی وجہ کنُوں پیدا تھیندیاں ہَن، جِیندی وجہ کنُوں ساڈے اَنگ مَوت دا پھل پیدا کریندے ہَن۔ 6 اَساں شریعت دے قیدی ہاسے پَر ہُنڑ اُوندے اعتبار نال مَر تے اُوندی قید کنُوں ایجھے چُھٹ گئے جو لفظاںc دے پُرانڑے طریقے دے مطابق نئیں بلکہ رُوح القُدس دے نویں طریقہ دے مطابق خِدمت کریندے ہئیں۔شریعت تے گُناہ
7 بس اَساں کیا آکھوں؟ کیا شریعت گُناہ ہے؟ ہر گز نئیں بلکہ بغیر شریعت دے میں گُناہ کُوں نہ جانڑدا مثلاً جے شریعت ایہہ نہ آہدھی جو”تُوں لالچ نہ کر“ تاں میں لالچ کُوں نہ جانڑدا۔ 8 پَر گُناہ اِیں حُکم کنُوں فائدہ چا تے میڈے اندر ہر طرحاں دا لالچ پیدا کر ڈِتا کیوں جو شریعت دے بغیر گُناہ مُردہ ہے۔ 9 ہِک وقت ہا جو میں شریعت دے بغیر زندہ ہم پَر جِیں وَیلے حُکم آیا تاں گُناہ زندہ تھی گِیا تے میں مَر گِیا۔ 10 تے جیہڑے حُکم دی منشا زندگی ڈیوݨ ہا اُوہو میڈے کیتے مَوت دا باعث بنڑ گِیا۔ 11 کیوں جو گُناہ اِیں حُکم کنُوں فائدہ چا تے میکُوں وَرغلایا تے اِیندے ذریعے میکُوں مار سَٹیا۔
12 بس شریعت تاں پاک ہے تے حُکم وی پاک ، راست تے چنگا ہے۔ 13 تاں کیا اُوہو چیز جیہڑی چنگی ہے میڈے کیتے مَوت بنڑ گئی؟ ہر گز نئیں بلکہ گُناہ ہِک چنگی چیز کنُوں فائدہ چا تے میڈی مَوت دی وجہ بنڑ گِیا تاں جو گُناہ دی اَصلیت ظاہر تھی وَنجے تے حُکم دے ذریعے گُناہ حد کنُوں زیادہ مکروہ معلوم تھیوے۔
ساڈی جسمانی تے رُوحانی کشمکش
14 اَساں جانڑدے ہئیں جو شریعت ہِک رُوحانی چیز ہے پَر میں جِسمانی ہاں تے گُناہ دی غلامی ءچ وِک گِیا ہاں۔ 15 جیہڑا میں کریندا ہاں اُونکُوں نئیں سمجھدا کیوں جو جیہڑا کُجھ کرݨ چاہندا ہاں اُونکُوں تاں نئیں کریندا پَر جیہڑے کَم کنُوں نفرت ہے اُوہو کر گِھندا ہاں۔ 16 تے جے اوہ کریندا ہاں جِینکُوں میں کرݨ نئیں چاہندا تاں میں منیندا ہاں جو شریعت چنگی ہے۔ 17 اِیں واسطے ایہہ کرݨ آلا میں نئیں بلکہ اوہ گُناہ ہے جیہڑا میڈے ءچ وَسدے۔ 18 میں جانڑدا ہاں جو میڈے ءچ یعنی میڈے جِسم ءچ تاں کوئی نیکی نئیں وَسدی۔ بھانویں نیکی کرݨ دا اِرادہ میڈے ءچ موجود ہے، پَر میں اِیں اِرادے کُوں عمل ءچ نئیں گِھن آندا۔ 19 اِیں واسطے جیہڑی نیکی کرݨ چاہندا ہاں اُونکُوں تاں نئیں کریندا پَر اوہ بُرائی جِینکُوں کرݨ نئیں چاہندا اُونکُوں کر گِھندا ہاں۔ 20 بس جے میں اوہ کریندا ہاں جِینکُوں کرݨ نئیں چاہندا تاں کرݨ آلا میں نہ ریہا بلکہ گُناہ ہے جیہڑا میڈے اندر وَسدے۔
21 چُنانچہ میں ایجھی شریعت d پَیندا ہاں جو جِیں وَیلے میں نیکی کرݨ دا اِرادہ کریندا ہاں تاں بُرائی میڈے کولھ آ موجود تھیندی ہے۔ 22 کیوں جو باطن ءچ تاں میں خُدا دی شریعت کنُوں بہُوں خوش ہاں، 23 پَر میکُوں آپنڑے اَنگاں ءچ ہِک بئی چیز نظر آندی ہے جیہڑی میڈی عقل دی شریعت نال لَڑ تے میکُوں گُناہ دی شریعت دا قیدی بنڑا ڈیندی ہے۔ 24 ہائے ! میں کیجھا بد بخت اِنسان ہاں۔ اِیں مَوت دے بدن کنُوں میکُوں کوݨ چُھڑویسی؟ 25 خُدا دا شُکر ہے جو اوہ ساڈے خُداوند یسوع مسیح دے وسیلے میکُوں چُھڑویسی۔
اِیں واسطے میڈا حال ایہہ ہے جو میں آپنڑی عقل کنُوں خُدا دی شریعت دا تے جِسم کنُوں گُناہ دی شریعت دا غلام ہاں۔