‏9 پَر تُساں جِسمانی نئیں بلکہ رُوحانی ہِیوے، شرط ایہہ ہے جو خُدا دا رُوح القُدس تُہاڈے ءچ وَسیا ہووے۔ پَر جِیندے ءچ مسیح دا رُوح القُدس نئیں اوہ مسیح دا نئیں۔ ‏10 پَر جے مسیح تُساں ءچ ہے تاں بے شک تُہاڈا جِسم تاں گُناہ دی وجہ کنُوں مُردہ ہے پَر تُہاڈی رُوح راستبازی دی وجہ کنُوں زندہ ہے۔ ‏11 خُدا نیں یسوع کُوں مُردیاں ءچوں زندہ کیتا تے اُوندا رُوح تُہاڈے ءچ وسیا ہویا ہے۔ اوہ اُونہئی رُوح القُدس دے وسیلے جیہڑا تُہاڈے ءچ ہے تُہاڈے فانی جِسماں کُوں وی زندہ کریسی جِیویں اُونیں مسیح کُوں زندہ کیتا۔

‏12 اِیں واسطے اے بِھراؤ! اَساں قرض دار تاں ہیں پَر جِسم دے نئیں جو جِسم دے مُطابق زندگی گُزارُوں۔ ‏13 کیوں جو جے تُساں جِسم دے مُطابق زندگی گُزریسو تاں ضرور مَرسو پَر جے رُوح دے ذریعے جِسم دے بُرے کَماں کُوں نیست و نابود کریسو تاں زندہ رَہسو۔ ‏14 کیوں جو جیہڑے خُدا دے رُوح القُدس دی ہدایت نال چلدے ہِن اُوہو خُدا دے پوتر ہِن۔ ‏15 کیوں جو تُہاکُوں ایجھی رُوح نئیں مِلی جیہڑی تُہاکُوں ڈرݨ آلے غلام بنڑیندی ہے بلکہ خُدا دی رُوح مِلی ہے جیہڑی تُہاکُوں لے پالک بنڑیندی ہے جِیندے وَسیلے نال اَساں ”ابّا“ یعنی ”اے باپ“ آکھ تے سَڈیندے ہئیں۔ ‏16 رُوح القُدس آپ ساڈی رُوح دے نال مِل تے گواہی ڈیندے جو اَساں خُدا دے فرزند ہئیں۔ ‏17 تے جے فرزند ہئیں تاں وارث وی ہئیں یعنی خُدا دے وارث تے مسیح دے ہم میراث ، شرط ایہہ ہے جو اَساں اُوندے نال ڈُکھ چاؤں تاں جو اُوندے نال جلال وی پاؤں۔

‏18 میں جانڑدا ہاں جو ایہہ ڈُکھ جیہڑا اَساں ہُنڑ سَہندے پئے ہئیں اُوں جلال دے مُقابلے ءچ کُجھ وی نئیں جیہڑا ساڈے اُتے ظاہر تھیوݨ آلا ہے۔ ‏19 کیوں جو ساری مخلوق بہُوں شوق دے نال خُدا دے پوتراں دے ظہور دی مُنتظر ہے ^a۔ ‏20 اِیں واسطے جو مخلوق لعنت دے اِختیار ءچ کر ڈِتی گئی ہئی، خوشی کنُوں نئیں بلکہ خُدا دی طرفوں اِیں اُمید نال ‏21 جو مخلوق وی آخر ءچ فنا دی غُلامی کنُوں چُھڑا گِھدی ویسی تے خُدا دے پوتراں دے جلال آلی آزادی ءچ شریک تھیسی۔ ‏22 اَساں جانڑدے ہئیں جو ساری مخلوق اَج تئیں کراہندی ہے جِیویں جو اُونکُوں درداں لگ گیّاں ہِن۔ ‏23 تے فقط اُوہو نئیں بلکہ اَساں وی جِنہاں کُوں رُوح دے پہلے پھل مِلے ہِن، آپنڑے باطن ءچ کراہندے ہیں یعنی اُوں وَیلے دا اِنتظار کریندے پئے ہیں جِیں وَیلے خُدا ساکُوں لےپالک بنڑا تے ساڈے بدن کُوں مخلصی بخشیسی^b ۔ ‏24 کیوں جو اِیہو اُمید دے وسیلے ساکُوں نجات مِلی پَر جے اوہ چیز جِیندی اُمید ہے جِیں وَیلے اوہ سامنڑے آ وَنجے تاں وَل کیجھی اُمید ؟ کیوں جو جیہڑی چیز کہیں دے سامنڑے مَوجود ہووے اُوندی اوہ کیوں اُمید کرے؟ ‏25 پَر جے اَساں اُوں چیز دی اُمید کریندے ہئیں جیہڑی ہُنڑ ساڈے کولھ مَوجود نئیں، تاں اَساں صبر نال اُوندے منتظر ہئیں۔

‏26 اِینویں ای رُوح القُدس وی ساڈی کمزوری ءچ ساڈی مدد کریندے۔ اَساں تے ایہہ وی نئیں جانڑدے جو کیہڑی چیز کیتے دُعا کرݨ چاہیدی ہے ۔پَر رُوح آپ ایجھی آہاں بھر بھر تے ساڈی شفاعت کریندے، جِیندا بیان نئیں تھی سگدا۔ ‏27 تے اوہ جیہڑا ساڈے دِلاں کُوں پَرکھدا ہے رُوح دی سوچ کُوں جانڑدے کیوں جو رُوح خُدا دی مَرضی دے مطابق مُقدّساں دی شفایت کریندے۔

‏28 تے اَساں جانڑدے ہئیں جو ساریاں چیزاں مِل تے خُدا دے نال مُحبت رکھنڑ آلیاں کیتے بھلائی پیدا کریندیاں ہِن یعنی اُنہاں کیتے جیہڑے اُوندے اِرادے دے مطابق سَڈے گئے ہِن۔ ‏29 کیوں جو جِنہاں کُوں خُدا نیں پہلے کنُوں جانڑیا، اُنہاں کُوں اُونیں پہلے مُقرر وی کیتا جو اوہ اُوندے پوتر دے وانگوں بننڑ تاں جو اُوندا پوتر بہُوں سارے بِھراواں ءچوں پلیٹھی دا شمار کیتا وَنجے۔ ‏30 تے جِنہاں کُوں اُونیں پہلے کنُوں مُقرر کیتا اُنہاں کُوں سَڈیا وی تے جِنہاں کُوں سَڈیا اُنہاں کُوں راستباز وی کھڑایا تے جِنہاں کُوں راستباز کھڑایا اُنہاں کُوں جلال وی بخشیا۔

‏31 بس اَساں اِنہاں گالھیں دے بارےءچ کیا آکھوں؟ جے خُدا ساڈے پاسے ہے تاں کوݨ ساڈا مخالف تھی سگدے؟ ‏32 جئیں آپنڑے پوتر کُوں وی دریغ نہ کیتا بلکہ ساڈے ساریاں کیتے اُونکُوں حوالے کر ڈِتا تاں اوہ اُوندے نال ساکُوں بِیا ساریاں چیزاں وی کیوں نہ بخشیسی؟ ‏33 کوݨ خُدا دے چُنڑے ہوئے لوکاں اُتے اِلزام لا سگدے؟ خُدا آپ اُنہاں کُوں راستباز بنڑیندے۔ ‏34 کوݨ اُنہاں کُوں مُجرم آکھ سگدے؟ مسیح یسوع جیہڑا مَر گِیا تے زندہ وی تھی گِیا تے جیہڑا خُدا دے سَجے پاسوں مَوجود ہے، اُوہو ساڈی شفاعت وی کریندا ہے۔ ‏35 کوݨ ساکُوں مسیح دی مُحبت کنُوں جُدا کریسی؟ مُصیبت یا تنگی یا ظُلم یا قحط یا ننگا پَن یا خطرہ یا تلوار؟ ‏36 چُنانچہ لکھیا ہے جو