10
1 بِھراؤ! اِسرائیلی قوم کیتے میڈی دِلی خواہش تے خُدا کنُوں میڈی دُعا ہے جو اوہ نجات پاوݨ۔ 2 کیوں جو میں اُنہاں دا گواہ ہاں جو اوہ خُدا کیتے غیرت تاں رکھیندے ہِن پَر سمجھ نال نئیں۔ 3 اِیں واسطے جو اوہ خُدا دی راستبازی کنُوں واقف نہ ہَن بلکہ خود راستبازی کُوں قائم کرݨ دی کوشش کریندے ریہے، اوہ خُدا دی راستبازی دے تابع نہ تھئےa ۔ 4 کیوں جو ہر اِیمان گِھن آوݨ آلے دی راستبازی کیتے مسیح ای شریعت دی تکمیل ہے۔نجات ساریاں کیتے
5 چُنانچہ موسیٰ نیں اُوں راستبازی دے بارے ءچ جیہڑی شریعت کنُوں ہے ایہہ لکھیا ہے جو
”جیہڑا اُوندے اُتے عمل کریندے
اوہ اُوندی وجہ کنُوں زندہ رَہسی۔ “
6 پَر جیہڑی راستبازی اِیمان کنُوں ہے اوہ ایہہ آہدھی ہے جو آپنڑے دِل ءچ ایہہ نہ آکھ جو ”اَسمان اُتے کوݨ چڑھ سی؟“ (یعنی مسیح کُوں تَلے گِھن آوݨ کیتے )۔ 7 یا ”کوݨ تَلے گہراؤ ءچ لَہسی ؟“ (یعنی مسیح کُوں مُردیاں ءچوں زندہ کر تے اُتے گِھن آوݨ کیتے )۔ 8 تے کیا آہدھی ہے؟ ایہہ جو ”کلام تیڈے کولھ ہے بلکہ تیڈے مُنہ ءچ تے تیڈے دِل ءچ ہے ۔“ ایہہ اِیمان دا اُوہو کلام ہے جِیندی اَساں تبلیغ کریندے ہئیں۔ 9 جو جے تُوں آپنڑی زبان نال ایہہ اقرار کریں جو یسوع خُداوند ہے تے آپنڑے دِل نال اِیمان گِھن آویں جو خُدا اُونکُوں مُردیاں ءچوں زندہ کیتے تاں نجات پا گِھنسیں۔ 10 کیوں جو راستبازی کیتے اِیمان گِھن آونڑاں دِل نال ہوندے تے نجات کیتے اِقرار مُنہ کنُوں کیتا وَیندے۔ 11 اِیں واسطے خُدا دا کلام ایہہ آہدھے جو ”جیہڑا کوئی اُوندے اُتے اِیمان گِھن آسی اوہ کَڈھائیں شرمندہ نہ تھیسی ۔“ 12 کیوں جو یہُودی تے غیریہُودی ءچ کوئی فرق نئیں اِیں واسطے جو اُوہو سبھ دا خُداوند ہے تے آپنڑے سارے دُعا کرݨ آلیاں کیتے فیاض ہے۔ 13 کیوں جو ”جیہڑا کوئی خُداوند دا ناں گِھنسی اُونکُوں نجات مِلسی ۔“
14 پَر جئیں اُتے اوہ اِیمان نئیں گِھن آئے اُوندا ناں کیویں گِھنسن؟ جئیں دا ذکر تئیں اُنہاں نئیں سُنڑیا، اُوندے اُتے اِیمان کیویں گِھن آوݨ؟ تے جِیں وَیلے تئیں کوئی اُنہاں کُوں خوشخبری نہ سُنڑیسی، اوہ کیویں سُنڑسن؟ 15 تے جِیں وَیلے تئیں اوہ بھیجے نہ وَنجنڑ ، خوشخبری کیویں سُنڑ یسن؟ چُنانچہ لکھیا ہے جو ”اُنہاں دے پیر کیجھے بختاں آلا ہِن جیہڑے چنگیاں چیزاں دی خوشخبری گِھن آندے ہِن۔ “
16 پَر ساریاں نیں اُوں خوشخبری اُتے کَن نئیں لائے۔ اِیں واسطے یسعیاہ آہدھے جو ” خُداوند ساڈے پیغام دا کئیں یقین کیتا؟ “ 17 بس اِیمان سُننڑ نال پیدا تھیندے تےسُننڑا مسیح دے کلام تُوں۔
18 پَر میں اَکھیندا ہاں، کیا اُنہاں نئیں سُنڑیا؟ بے شک سُنڑیا، جِیویں لکھیا ہے جو
”اُنہاں دی آواز پوری رُوئے زمین اُتے
تے اُنہاں دا پیغام دُنیا دی اِنتہا تئیں پُج گِیا ۔
19 میں پُچھدا ہاں، کیا بنی اِسرائیل آلیاں نئیں سمجھیا؟ پہلے تاں موسیٰ آہدھا ہے جو
”میں تُہاکُوں اُنہاں کنُوں غیرت ڈیویساں جیہڑے قوم ای نئیں،
تے ہِک نادان قوم کنُوں تُہاکُوں کاؤڑ ڈیویساں b۔“
20 وَل یسعیاہ بہُوں دلیری نال ایہہ آہدھے جو
”جِنہاں میکُوں نئیں گولھیا،
اُنہاں میکُوں گولھ گِھدا
تے جیہڑے میڈے طالب نہ ہَن،
میں اُنہاں اُتے ظاہر تھی گِیا ۔“
21 پَر بنی اِسرائیل دے بارے ءچ اوہ فرمیندا ہے جو
”میں سارا ڈینہہ سرکش تے حُجّتی قوم دے اَگوں آپنڑے ہَتھ وَدھائی ریہا ۔“