اِسرائیل اُتے خُدا دا رحم
11
1 اِیں واسطے میں پُچھدا ہاں کیا خُدا نیں آپنڑی قوم کُوں رد کر ڈِتا؟ ہرگز نئیں! کیوں جو میں وی اِسرائیلی تے ابرہام دی نسل ہاں تے بِنیمِین دے قبیلہ دا ہاں۔ 2 خُدا نیں آپنڑی اُمت کُوں رَد نئیں کیتا جِینکُوں اوہ پہلے کنُوں جانڑدا ہا۔ کیا تُساں نئیں جانڑدے جو خُدا دا کلام ایلیاہ دے بارے ءچ کیا فرمیندے، جو اوہ کیویں خُدا کُوں اِسرائیل دے خلاف ایہہ فریاد کریندا ہے جو 3 ”اے خُداوند! اُنہاں تیڈے نبیاں کُوں قتل کیتا تے تیڈی قُربان گاہاں کُوں ڈھا ڈِتا۔ ہُنڑ میں کلھا باقی رہ گِیا ہاں تے اوہ میکُوں وی جان کنُوں مارنڑا چاہندے ہِن۔“ 4 پَر خُدا نیں اُونکُوں جواب ڈِتا، ”میں آپنڑے کیتے سَت ہزار آدمی بچا گِھدے ہِن جِنہاں بعل دے بُت کُوں سِجدہ نئیں کیتا ۔“ 5 اِیں طرحاں اِیں زمانے ءچ وی فضل نال چُنڑے ہوئے کُجھ باقی ہِن۔ 6 جے فضل کنُوں چُنڑے گئے ہِن تاں وَل اعمال کنُوں نئیں، نہ تاں فضل، فضل نہ رَہندا۔7 تاں نتیجہ کیا نِکلیا؟ بنی اِسرائیل کُوں اوہ چیز نہ مِلی جِیندی اوہ مسلسل جُستجُو کریندا ریہا۔ پَر خُدا دے چُنڑے لوکاں کُوں مِل گئی تے باقی سارے سخت دِل کر ڈِتے گئے۔ 8 جِیویں جو لکھیا ہے جو
”خُدا نیں اُنہاں کُوں سُست طبیعت ڈِتی
تےایجھی اَکھیں جیہڑیاں نہ ڈیکھنڑ
تے ایجھے کَن جیہڑے نہ سُننڑ
تے اَج تئیں اوہ اِینویں ہِن ۔“
9 تے داؤد آہدھا ہے جو
”اُنہاں دا دسترخوان اُنہاں کیتے جال تے پھندا
تے ٹھوکر کھاوݨ تے سزا دا باعث بنڑ وَنجے۔
10 اُنہاں دے اَکھیں اَگوں اندھارا تھی وَنجے تاں جو اوہ ڈیکھ نہ سگنڑ
تے اُنہاں دیاں کمراں ہمیشاں جُھکیاں رَہنڑ ۔“
11 میں وَل اَکھیندا ہاں، کیا اُنہاں ایجھی ٹھوکر کھادی جو ڈھے پووݨ ؟ ہرگز نئیں! بلکہ اُنہاں دی گُمراہی کنُوں غیریہُودیاں کُوں نجات حاصل کرݨ دی توفیق مِلی تاں جو یہُودیاں کُوں غیرت آوے۔ 12 جِیں وَیلے اُنہاں دی گُمراہی دُنیا دی برکت دا باعث تھئی تے اُنہاں دا رُوحانی زوال غیریہُودیاں کیتے نعمت دی فراوانی دا باعث تھیّا تاں اُنہاں دی مکمل بحالی کیجھی زیادہ برکت دا باعث ہوسی۔
غیر قوماں کیتے نجات
13 ہُنڑ میں تُساں غیریہُودیاں کُوں آہدھا ہاں۔ کیوں جو میں غیریہُودیاں کیتے رسُول مُقرر تھیّا ہاں اِیں واسطے آپنڑی خدمت دی تعریف کریندا ہاں، 14 تاں جو کہیں طرحاں وی میں آپنڑی قوم آلیاں کُوں غیرت ڈیوا تے اُنہاں ءچوں بہُوں کُوں نجات ڈیوا سگاں۔ 15 کیوں جو جِیں وَیلے اُنہاں دا خارج تھی وَنجنڑ ، دُنیا کیتے خُدا دے نال صُلح دا باعث بنڑ گِیا تاں اُنہاں دا وَلا کنُوں قبول تھی وَنجنڑ مُردیاں ءچوں زندہ تھی وَنجنڑ دے وانگُوں نہ ہوسی؟
سبھ اِنساناں اُتے خُدا دی رحمت
زیتُون دا درخت خُدادے چُنڑے ہوئے لوک یعنی بنی اسرائیل ہے۔ پیوست تھی تے جنگلی زیتون یعنی غیر یہُودی خُدا دے لوکاں ءچ شامل تھی گئے تے اُنہاں برکتاں ءچ شریک تھی گئے جیہڑیاں پِیُو ڈاڈا کُوں وعدہ دے طور تے مِلیاں ہَن
16 جے نذر دا پہلا پیڑا پاک ہووے تاں سارا لُویا ہویا اَٹا وی پاک ہوسی تے جے جَڑھ پاک ہے تاں اُوندی لَڑیاں وی پاک ہوسن۔ 17 بے شک کُجھ لَڑیاں کَپ ڈِتیاں گئیاں تے تُوں جنگلی زیتون ہوندے ہوئے اُنہاں دی جاہ پیوند تھی گِیا تے زیتون دے درخت دی جَڑھ دے روغن ءچ حصہ دار تھی گِیا۔ 18 پَر اُنہاں ترُوٹی لَڑیاں دے مقابلے ءچ تُوں فخر نہ کر۔ جے فخر کریں تاں یاد رکھ جو تُوں جَڑھ کُوں نئیں بلکہ جَڑھ تیکُوں سَنبھالی کھڑی ہے۔
19 تُوں ضرور ایہہ اَکھیسیں جو ”اوہ لَڑیاں اِیں واسطے کَپ ڈِتیاں گئیاں جو میں پیوند تھی وَنجاں۔“ 20 ٹھیک ہے، اوہ تاں اِیمان نہ گِھن آوݨ دی وجہ کنُوں کَپ ڈِتیاں گئیاں تے تُوں تاں اِیمان گِھن آوݨ دی وجہ کنُوں قائم ہیں، بس مغرور نہ تھی بلکہ ڈردا رہ۔ 21 کیوں جو جِیں وَیلے خُدا نیں اَصلی لَڑیاں کُوں نہ چھوڑیا تاں اوہ تیکُوں وی نہ چھوڑیسی۔ 22 اِیں واسطے خُدا دی مہربانی تے سختی ڈوہائیں اُتے غور کر، سختی اُنہاں اُتے جیہڑے ڈھے پئے، مہربانی تَیں اُتے پَر شرط ایہہ ہے جو تُوں اُوندی مہربانی اُتے قائم رَہویں نہ تاں تُوں وی کَپ ڈِتا ویسیں۔ 23 تے اوہ وی جے بے اِیمان نہ رَہنڑ تاں پیوند کیتے ویسن کیوں جو خُدا اُنہاں کُوں وَلا پیوند کرݨ دی قُدرت رکھیندے۔ 24 جِیں وَیلے تُوں زیتون دے اُوں درخت کنُوں جیہڑا قُدرتی طور تے جنگلی ہے، قُدرت دے خلاف چنگے زیتون دے درخت ءچ پیوند کیتا گِیا ہیں تاں ایہہ جیہڑیاں اَصل لَڑیاں ہِن آپنڑے ای زیتون دے درخت ءچ ضرور پیوند کیتیاں ویسن۔
25 بِھراؤ! میں اِیں راز کُوں تُہاکُوں سمجھاونڑاں چاہندا ہاں تاں جو تُساں آپنڑے آپ اُتے فخر نہ کرو، جو اِسرائیل دا ہِک حصہ سخت دِل تھی گِیا ہے تے جئیں تئیں غیر قوماں پوری دی پوری داخل نہ تھی وَنجنڑ اوہ اُونویں ای رَہسی۔ 26 وَل پوری قوم اِسرائیل کُوں نجات مِلسی۔ کیوں جو لکھیا ہے
”چُھڑاوݨ آلا صِیُون ءچوں نِکل سی
تے اوہ بے دینی کُوں یعقوب کنُوں کَڈھیسی۔
27 تے اُنہاں دے نال میڈا ایہہ عہد ہوسی
جِیں وَیلے میں اُنہاں دے گُناہ دُور کر ڈیساں ۔“
28 اِسرائیل دے بہُوں سارے لوک خوشخبری دے دشمنڑ ہِن تے اِیندے نال تُہاکُوں فائدہ ہے پَر ہُنڑ وی اوہ خُدا دے چُنڑے لوک ہِن تے پیُو ڈاڈا دی وجہ کنُوں خُدا دے پیارے ہِن۔ 29 کیوں جو خُدا دی نعمتاں تے اُوندا بُلاوا لا تبدیل ہے۔ 30 کیوں جو جِیویں تُساں وی پہلے نافرمان ہَوے پَر یہُودیاں دی نافرمانی دی وجہ کنُوں ہُنڑ تُساں اُتے خُدا دا رحم تھیّا ہے، 31 اِینویں ای ہُنڑ یہُودی نافرمانی کریندے ہِن تاں جو تُساں اُتے رحم تھیوݨ دے باعث اُنہاں اُتے وی رحم تھیوے۔ 32 اِیں واسطے جو خُدا نیں ساریاں کُوں نافرمانی ءچ گرفتار تھیوݨ ڈِتا تاں جو اوہ ساریاں اُتے رحم فرماوے۔
خُدا دی حمد
33 واہ ! خُدا دی دولت ، اُوندی حکمت تے اُوندا علم بہُوں گہرا ہے ! اُوندے فیصلے سمجھ کنُوں اَصلُوں باہر ہِن، تے اُوندیاں راہواں کوݨ تلاش کر سگدے !
34 ”خُداوند دی عقل کُوں کون جاݨ سگدے؟
یا کوݨ اُوندا صلاح کار بنڑ سگدے؟
35 یا کئیں اُونکُوں پہلے کُجھ ڈِتا،
جِیندا صِلہ اُونکُوں ڈِتا وَنجے ؟ “
36 کیوں جو ساریاں چیزاں اُونہئی دی طرفوں، اُونہئی دے وسیلے کنُوں تے اُونہئی کیتے ہِن۔ اُوندی تمجید ہمیشاں تئیں تِھیندی رَہوے۔ آمین۔