مُلکی حکومت تے ساڈے فرائض
13
1 ہر شخص اعلیٰ حکومتاں دی تابعداری کرے، کیوں جو کوئی حکومت ایجھی نئیں جیہڑی خُدا دی طرفوں نہ ہووے۔ جیہڑے حکومتاں موجود ہِن، خُدا ای دی طرفوں مُقرر کیتیاں ہوئیاں ہِن۔ 2 اِیں واسطے جیہڑا کوئی حکومت دی مخالفت کریندے اوہ خُدا دے قائم کیتے ہوئے اِنتظام دی مخالفت کریندے، اوہ سزاوار تھیسی۔ 3 کیوں جو نیک کَم کرݨ آلا حاکماں کنُوں نئیں ڈردا۔ پَر بُرے کَم کرݨ آلا ڈردے۔ جے تُوں حاکم کنُوں بے خوف رَہنڑ چاہندیں تاں نیکی کیتا کر، وَل اُوندی طرفوں تیڈی تعریف تھیسی۔ 4 حاکم تیڈی بھلائی کیتے خُدا دا خادم ہے۔ پَر جے تُوں بدی کریں تاں ڈر کیوں جو اُوندے ہَتھ ءچ تلوار اِینویں نئیں ڈِتی گئی ہے۔ اوہ خُدا دا خادم ہے تے ہر مُجرم کُوں سزا ڈے تے خُدا دا غضب ظاہر کریندے۔ 5 اِیں واسطے نہ محض خُدا دے غضب دی وجہ کنُوں تابعدار رَہو بلکہ آپنڑے ضمیر دی وجہ کنُوں وی۔6 تُساں حاکماں کُوں ٹیکس وی ڈیندے ہِیوے کیوں جو اوہ خُدا دے خادم ہوندے ہوئے آپنڑےکَم ءچ مصروف رَہندے ہِن۔ 7 ہر ہِک کُوں اُوندا حق ڈِتا کرو۔ جِینکُوں ٹیکس ڈیونڑا چاہیدے اُونکُوں ٹیکس ڈیؤ ، جِینکُوں محصُول ڈیونڑا ہووے اُونکُوں محصُول ڈیؤ، جئیں کنُوں ڈرنڑا چاہیدے، اُوں کنُوں ڈرؤ تے جِیندا احترام کرنڑا چاہیدے، اُوندا احترام کرو۔
ساڈے باہمی فرائض
8 آپس دی محبت دے سِوا کہیں چیز دے قرضدار نہ رَہو کیوں جو جیہڑا ڈوجھے نال محبت رکھیندے اوہ شریعت اُتے عمل کریندے۔ 9 اِیں واسطے ایہہ سارے حُکم جو ”زِنا نہ کر“ ، ”خُون نہ کر “، ”چوری نہ کر“ ، ”لالچ نہ کر“ تے اُنہاں دے علاوہ بئے حُکم جیہڑے باقی ہِن اُنہاں ساریاں دا خلاصہ اِیں ہِک حُکم ءچ موجود ہے جو ”آپنڑے ہمسائے نال آپنڑے وانگوں مُحبت رکھ۔“ 10 مُحبت آپنڑے ہمسائے نال بُرائی نئیں کریندی اِیں واسطے مُحبت شریعت دی تعمیل ہے۔
11 وقت کُوں پچھانڑو تے اِینویں ای کرو، اِیں واسطے جو اوہ وقت آ گِیا ہے جو تُساں نیندر کنُوں جاگو کیوں جوجِیں وَیلے اَساں اِیمان گِھن آئے ہاسے، اُوں وقت دی نسبت ہُنڑ ساڈی نجات بہُوں نزدیک ہے۔ 12 رات تقریباً گُزر گئی ہے تے ڈینہہ نِکلنڑ آلا ہے اِیں واسطے اَساں تاریکی دے کَماں کُوں چھوڑ تے نُور دے ہَتھیار بَدھ گِھنوں۔ 13 تے ڈینہہ دی روشنی دے مطابق حیادار زندگی گُزاروں جِیندے ءچ نچنڑ، نشہ بازی، زِناکاری، شہوت پرستی، جھیڑے تے حسد وغیرہ نہ ہووݨ۔ 14 بلکہ خُداوند یسوع المسیح کُوں پا گِھنوa تے جِسمانی خواہشات کُوں پورا کرݨ دی تدبیر ءچ نہ لگے رَہو۔