‏6 بِھراؤ! میں تُہاڈی خاطر اِنہاں گالھیں ءچ آپنڑا تے اپُلّوس دا ذِکر مثال دے طور اُتے پیش کیتے تاں جو تُساں ساڈے ذریعے سِکھو جو ”لکھے ہوئے کنُوں اَگاں نہ وَدھو۔“ تے تُساں ءچوں کوئی کہیں ہِک دی حمایت ءچ ڈوجھے دے خلاف نہ پُھنڈے۔ ‏7 آخر کوݨ ہے جیہڑا تَیں ءچ تے ڈوجھے ءچ فرق کریندے؟ تیڈے کولھ کیجھی خاص گالھ ہے جیہڑی تیکُوں خُدا کنُوں نئیں مِلی؟ تے جِیں وَیلے تیکُوں مِلیا ہے تاں فخر کیجھا جِیویں نئیں مِلی؟

‏8 تُساں تاں پہلے کنُوں ای آسودہ حال ہِیوے ! پہلے کنُوں ای دولت مند ہِیوے تے ساڈے بغیر بادشاہی وی کرݨ لگے ہِیوے! کاش تُساں واقعی بادشاہی کریندے تاں جو اَساں وی تُہاڈے نال بادشاہی کر سگدے ! ‏9 میکُوں تاں اِینویں لگدے جو خُدا اَساں رسُولاں کُوں حقیر بنڑا تے اُنہاں وانگوں پیش کیتا ہے، جِنہاں کیتے مَوت مُقرر تھی گئی ہے^a کیوں جو اَساں دُنیا تے فرشتیاں تے اِنساناں کیتے تماشا بنڑ گئے ہئیں۔ ‏10 اَساں مسیح دی خاطر بے وقوف ہیں، پَر تُساں مسیح ءچ عقل مند ہِیوے۔ اَساں کمزور ہئیں تے تُساں زور آور ہِیوے۔ تُساں عزت دار تے اَساں بے عزت ۔ ‏11 اَساں اِیں وقت تئیں بُھکے ترِسے ہئیں، تھِگڑیاں آلے کپڑے پَیندے ہئیں، مُکے کھاندے تے مارے مارے پِھردے ہئیں۔ ‏12 اَساں آپنڑے ہَتھاں نال سخت محنت کریندے ہئیں۔ لوک ساکُوں بُرا بھلا آہدھے ہِن پَر اَساں اُنہاں کُوں دُعا ڈیندے ہئیں۔ جِیں وَیلے اَساں ستائے وَیندے ہئیں تاں برداشت کریندے ہئیں۔ ‏13 اوہ ساکُوں بدنام کریندے ہِن پَر اَساں نرم مزاجی نال جواب ڈیندے ہئیں۔ اَساں اَج تئیں دُنیا دے گند تے کُوڑے وانگوں ہئیں۔

‏14 اِنہاں گالھیں دے لکھنڑ دا میڈا مقصد تُہاکُوں شرمندہ کرݨ نئیں بلکہ میں تُہاکُوں آپنڑے عزیز فرزند سمجھ تے خبردار کریندا ہاں۔ ‏15 کیوں جو جے مسیح ءچ تُہاڈے ہزار اُستاد وی ہووݨ تاں وَل وی پیُو بہُوں سارے نئیں ۔اِیں کیتے جو تُہاکُوں خوشخبری سُنڑاوݨ دے باعث میں ای تُہاڈا پیُو تھیّا۔ ‏16 بس میں تُہاڈی مِنت کریندا ہاں جو میڈے نمونے اُتے چلو۔ ‏17 اِیں واسطے میں تِیمُتھِیُس کُوں جیہڑا خُداوند یسوع ءچ میڈا عزیز تے دیانتدار فرزند ہے، تُہاڈے کولھ بھجیندا پِیا ہاں ۔اوہ تُہاکُوں میڈے اوہ طریقے یاد ڈیویسی جِنہاں اُتے میں یسوع مسیح ءچ ہوندے ہوئے عمل کریندا ہاں تے جیہڑے میں ہر کلیسیا تے ہر جاہ سِکھیندا ہاں۔

‏18 تُہاڈے ءچ کُجھ بہُوں شیخی باز ہِن، ایہہ سوچ تے جو میں تُہاڈے کولھ آوݨ آلا ا ی نئیں۔ ‏19 پَر جے خُداوند دی رضا تھئی تاں میں بہُوں جلدی تُہاڈے کولھ آساں تے وَل میں اِنہاں شیخی بازاں دی نہ فقط گالھیں بلکہ اِنہاں دی قُدرت وی جاݨ گِھنساں۔ ‏20 کیوں جو خُدا دی بادشاہی فقط گالھیں اُتے نئیں بلکہ قُدرت اُتے منحصر ہے۔ ‏21 تُساں کیا چاہندے ہِیوے، جو میں سوٹی گِھن تے تُہاڈے کولھ آواں یا محبت تے نرم مزاجی دے نال ؟