کلیسیا ءچ حرام کاری
5
1 میں سُنڑیا ہےجو تُہاڈی جماعت ءچ ایجھی حرامکاری تھیندی پئی ہے جیہڑی غیر قوماں ءچ وی نئیں تھیندی، یعنی ہِک آدمی ایجھا ہے جیہڑا آپنڑی مَترئی ماں دے نال گُناہ کریندا ہے۔ 2 تُساں وَل وی پُھنڈدے ہِیوے۔ تُہاکُوں تاں اِیں گالھ اُتے ماتم کرنڑا چاہیدا ہا۔ جئیں کہیں وی ایجھا کَم کیتے، اُونکُوں تُہاڈے ءچوں کَڈھ ڈیونڑا چاہیدے۔ 3 بھانویں میں بظاہر تُہاڈے ءچ موجود نہ ہم پَر رُوحانی طور تے اُتھاں تُہاڈے نال ہم ،تے جِیویں میں موجود ہم اُوں زانی دے خلاف فیصلہ کر ڈِتے۔ 4 وَل جِیں وَیلے تُساں جمع تھیسو تے ساڈے خُداوند یسوع المسیح دی قُدرت وی تُہاڈے نال ہوسی تے میں وی رُوحانی طور تے حاضر ہوساں تاں خُداوند یسوع دے ناں تُوں 5 اُوں آدمی کُوں جِسمانی ہلاکت کیتے شیطان دے حوالے کر ڈیوو تاں جو خُداوند یسوع دے ظہور دے ڈینہہ اُوندی رُوح بچ وَنجے۔6 تُہاڈا فخر کرنڑا ٹھیک نئیں۔ کیا تُساں نئیں جانڑدے جو ذرا جِیہا خمیر سارے لوئے اَٹے کُوں خمیر کر ڈیندے؟ 7 بُرائی دے پُرانڑے خمیر کنُوں آپنڑ ے آپ کُوں پاک کر گِھنو تاں جو تازہ لویا ہویا اَٹا بنڑ وَنجو۔ تُساں بے خمیر ہِیوے کیوں جو مسیح جیہڑا فسح دا برّہ ہے ساڈے کیتے قُربان تھی گئے۔ 8 بس آؤ اَساں عید مناؤں پَر پُرانڑے خمیرنال نئیں جیہڑا گُناہ تےبدی دا خمیر ہے بلکہ پاکیزگی تے سچائی دی بے خمیری روٹی نال۔
9 میں آپنڑے خط ءچ تُہاکُوں ایہہ لکھیا ہا جو حرام کار نال تعلق نہ رکھائے۔ 10 میڈا مطلب ایہہ نئیں جو دُنیا دے حرام کاراں نال، لالچیاں نال ،ظالماں یا بُتاں دی پوجا کرݨ آلیاں نال اَصلُوں نہ مِلائے، کیوں جو اِینویں تاں تُہاکُوں دُنیاتُوں نِکلنڑاں پوسی۔ 11 پَر میں ایہہ لکھیا ہا جو جے کوئی بِھرا اَکھویندے تے وَل وی حرام کار، لالچی، بُتاں دا مَننڑ آلا، مَندھے کَڈھنڑ آلا، شرابی یا ٹَھگ ہووے تاں اُوندے نال تعلق نہ رکھائے بلکہ ایجھیاں دے نال کھانڑا تئیں نہ کھوائے۔