ہم اِیمان مسیحیاں دے خِلاف مُقدمے
6
1 تُہاڈے ءچوں کہیں دی جُرأت کیویں تھئی جو تُساں ہِک ڈوجھے دے جھیڑے دے فیصلے کیتے مُقدّساں دی بجائے بے دیناں دی عدالت ءچ وَنجو ؟ 2 کیا تُساں نئیں جانڑدے جو مُقدّس لوک دُنیا دا اِنصاف کریسن؟ تے جِیں وَیلے تُہاکُوں دُنیا دا اِنصاف کرنڑا ہے تاں کیا تُساں اِیں قابل وی نئیں جو چھوٹے چھوٹے گالھیں د افیصلہ کر سگو ؟ 3 کیا تُساں نئیں جانڑدے جو اَساں فرشتیاں دا اِنصاف کریسوں ؟تاں کیا اَساں اِیں دُنیا دے معاملات دا فیصلہ نہ کر سگسوں؟ 4 جے تُساں ءچ ایجھے دُنیوی مُقدمے ہووݨ تاں کیا اُنہاں کُوں مُنصف مُقرر کریسو جیہڑے کلیسیا ءچ کوئی حیثیت نئیں رکھدے؟ 5 میں تُہاکُوں شرمندہ کرݨ کیتے ایہہ آہدھا ہاں۔ کیا سچ مُچ تُہاڈے ءچ ہِک وی عقل مند نئیں جیہڑا آپنڑے بِھراواں دا فیصلہ کر سگے؟ 6 بلکہ بِھرا ڈوجھے بِھراواں اُتے مُقدمہ دائر کریندے ہِن تے اوہ وی بے اِیماناں دی عدالت ءچ۔7 اَصل ءچ تُہاڈے ءچ وَڈا نُقص ایہہ ہے جو آپسءچ مُقدمہ بازی کریندے ہِیوے۔ اِیندے تُوں ظُلم برداشت کرنڑا چنگا نئیں؟ اِیندے تُوں نُقصان قبول کرنڑا چنگا نئیں؟ 8 بجائے اِیندے تُساں خود ظُلم کریندے ہِیوے، نقصان کریندے ہِیوے تے اوہ وی آپنڑے ای بِھراواں دا۔ 9 کیا تُساں نئیں جانڑدے جو بدکار خُدا دی بادشاہی دے وارث نہ تھیسن؟ دھوکے ءچ نہ رَواہے، نہ حرام کار خُدا دی بادشاہی دے وارث ہوسن، نہ بُتاں دی پوجا کرݨ آلے، نہ زِنا کار، نہ لَونڈے باز، 10 نہ چور، نہ لالچی، نہ شرابی، نہ مَندھے کَڈھنڑ آلے، نہ ظالم۔ 11 تُساں ءچوں کُجھ ایجھے ای ہَن، پَر تُساں خُداوند یسوع المسیح دے ناں تے خُدا دے رُوح القدس کنُوں دھویج گئے، پاک تھی گئے تے راستباز وی تھی گئے۔
آپنڑے بَدن خُدا دے جلال کیتے اِستعمال کرو
12 ”ساریاں چیزاں میڈے کیتے جائز ہِن“ پَر ساریاں چیزاں مفید نئیں۔ ساریاں چیزاں میڈے کیتے جائز تاں ہِن پَر میں کہیں چیز دا غلام نہ بنڑساں۔ 13 ”کھانڑا پیٹ کیتے تے پیٹ کھانڑے کیتے“ پَر خُدا اِنہاں ڈوہائیں کُوں ختم کر ڈیسی۔ پَر بدن حرام کاری کیتے نئیں بلکہ خُداوند کیتے ہے تے اُوہو اُوندا مالک ہے۔ 14 تے خُدا نیں خُداوند کُوں وی زندہ کیتا تے اوہ ساکُوں وی آپنڑی قُدرت نال زندہ کریسی۔
15 کیا تُساں نئیں جانڑدے جو تُہاڈے بدن مسیح دےاَنگ ہِن؟ کیا میں مسیح دے اَنگاں کُوں گِھن تے اُنہاں کُوں کہیں کَسبی دے نال جوڑ ڈیواں؟ ہرگِز نئیں! 16 کیا تُساں نئیں جانڑدے جو جیہڑا کہیں کَسبی نال سَمدے ،اوہ اُوندے نال ہِک تن تھی وَیندے؟ کیوں جو لکھیا ہے جو ”اوہ ڈوہائیں ہِک تن ہوسن ۔“ 17 پَر جیہڑا آپنڑے آپ کُوں خُداوند نال جوڑ ڈیندے اوہ رُوحانی طور تے اُوندے نال ہِک تھی وَیندے۔
18 حرام کاری کنُوں بَھجو۔ اِنسان دے ڈوجھے سارے گُناہ بدن نال تعلق نئیں رکھیندے پَر زانی آپنڑے بدن دا وی گُنہگار ہے۔ 19 کیا تُساں نئیں جانڑدے جو تُہاڈا بدن رُوح القُدس دا مَقدِس ہے جیہڑا تُہاڈے ءچ وَسدے تے جِینکُوں تُساں خُدا دی طرفوں گِھدے؟ تُساں آپنڑے نئیں 20 کیوں جو قیمت نال مُل گِھدے گئے ہِیوے۔ بس آپنڑے بدن کنُوں خُدا دا جلال ظاہر کروa ۔