شادی ویاہ دے بارے ءچ سوالات
7
1 جیہڑے گالھیں تُساں لکھیاں ہِن، اُنہاں دے بارے ءچ میڈا جواب ایہہ ہے جو بے شک آدمی کیتے چنگا ہے جو عورت کُوں ہَتھ نہ لاوے۔ 2 پَر حرام کاری کنُوں بچنڑ کیتے ہر مَرد کُوں چاہیدے جو اُوندی ذال ہووے تے ہر عورت کُوں چاہیدے جو اُوندا پایا ہووے۔ 3 پایا آپنڑی ذال دا حق ادا کرے تے اُونویں ای ذال آپنڑے پائے دا۔ 4 ذال کُوں آپنڑے بدن اُتے اِختیار نئیں بلکہ اُوندے پائے کُوں ہے۔ اُونویں ای پائے کُوں وی آپنڑے بدن اُتے اِختیار نئیں بلکہ اُوندی ذال کُوں ہے۔ 5 تُساں ڈوہائیں ہِک ڈوجھے کنُوں اَنج نہ رَہوائے پَر آپس دی صلاح نال کُجھ عرصہ کیتے اَنج رہ سگدے ہِیوے تاں جو روزہ رکھنڑ تے دُعا کرݨ کیتے فرصت مِل سگے۔ بعد ءچ وَلا کَٹھے تھی وَنجو۔ کِتھائیں اِینویں نہ تھیوے جو تُساں برداشت نہ کر سگو تے شیطان تُہاکُوں اَزمائش ءچ سَٹ ڈیوے۔6 ایہہ میں رعایت ڈیندے ہوئے آہدھا پِیا ہاں، نہ جو حُکم ڈیندے ہوئے۔ 7 میں تاں چاہندا ہاں جو جِیویں میں ہاں سارے آدمی اُونویں ہووݨ۔ پَر ہر ہِک کُوں خُدا دی طرفوں خاص خاص توفیق مِلی ہے، کہیں کُوں کئیں طرحاں دی، کہیں کُوں کئیں طرحاں دی۔
8 میں غیر شادی شدہ تے بیواواں کُوں ایہہ آہدھا ہاں جو جے میڈے وانگوں رَہنڑ تاں اُنہاں کیتے چنگا ہے۔ 9 پَڑ جے برداشت دی طاقت نہ ہووے تاں شادی کر گَھننڑ کیوں جو شادی کر گِھننڑ نفس دی بھاہ ءچ سَڑدے رَہنڑ کنُوں چنگا ہے۔
10 پَر جیہڑے شادی شُدہ ہِن اُنہاں کُوں میں نئیں بلکہ خُداوند حُکم ڈیندے جو ذال آپنڑے پائے کُوں نہ چھوڑے۔ 11 پَر جے اُونکُوں چھوڑ ڈیندی ہے تاں وَلا شادی نہ کرے یا آپنڑے پائے نال وَلا صُلح کر گِھنے تے پایا وی آپنڑی ذال کُوں نہ چھوڑے۔
12 باقی لوکاں کُوں میں ای ایہہ آہدھا ہاں نہ جو خُداوند، جو جے کہیں اِیماندار بِھرا دی غیر ایماندار ذال ہووے پَر اُوندے نال رَہنڑ ءچ راضی ہووے تاں اوہ پایا اُونکُوں نہ چھوڑے۔ 13 تے جے کہیں اِیماندار دا پایا اِیماندار نہ ہووے پَر اُوندے نال رَہنڑ کیتے راضی ہووے تاں اوہ عورت پائے کُوں نہ چھوڑے۔ 14 کیوں جو جیہڑا پایا اِیماندار نئیں اوہ آپنڑی ذال دی وجہ کنُوں پاک ہے تے غیر مسیحی ذال آپنڑے اِیماندار پائے دی وجہ کنُوں پاک ہے، نہ تاں تُہاڈے بال ناپاک ہوندے پَر ہُنڑ پاک ہِن۔ 15 پَر جے کوئی اِیماندار نہ ہووے تاں اُونکُوں اَنج تھیوݨ ڈیوو۔ اِیں صورت ِحال ءچ کوئی اِیماندار بِھرا یا بھینڑ پابند نئیں، کیوں جو خُدا نیں ساکُوں میل مِلاپ کیتے سَڈیا ہے۔ 16 اے ذال ! تیکُوں کیا پتہ جو مَتاں تُوں آپنڑے پائے کُوں بچا گِھنیں تے اے شوہر! تیکُوں کیا پتہ جو مَتاں تُوں آپنڑی ذال کُوں بچا گِھنیں؟
خُدا دی بُلاہٹ دے مطابق زندگی گُزارو
17 پَر جِیویں خُداوند نیں ہر شخص کُوں مُقرر کیتا ہے تے جِیویں خُدا نیں ہر ہِک کُوں سَڈیا ہے، اُونویں ای اوہ چلے۔ میں ساری کلیسیاواں ءچ اِیہو اصول مُقرر کریند اہاں۔ 18 جیہڑا مختونی دی حالت ءچ سَڈیا گِیا ہے، اوہ نامختون بننڑ دی کوشش نہ کرے تے جیہڑا نامختونی دی حالت ءچ سَڈیا گِیا ہے اوہ مختون نہ بنڑے۔ 19 ختنہ کراوݨ یا نہ کراوݨ کوئی خاص گالھ نئیں بلکہ خُدا دے حُکماں اُتے عمل کرنڑا ای سارا کُجھ ہے۔ 20 ہر شخص اُوں حالت ءچ ای رَہوے جِیندے ءچ اوہ سَڈیا گِیا ہے۔ 21 جے تُوں غلامی دی حالت ءچ سَڈیا گِیا ہیں تاں فِکر نہ کر، پَر جے تیکُوں آزاد تھیوݨ دا موقع مِلے تاں آزاد تھی وَنج۔ 22 کیوں جو جیہڑا خُداوند ءچ غلامی دی حالت ءچ سَڈیا گِیا ہے اوہ خُداوند دا آزاد کیتا ہویا ہے۔ اِینویں ای جیہڑا آزادی دی حالت ءچ سَڈیا گِیا ہے اوہ مسیح دا غلام ہے۔ 23 تُساں قیمت ڈے تے مُل گِھدے گئے ہِیوے، اِنساناں دے غلام نہ بنڑو۔ 24 بِھراؤ! جیہڑا کوئی جیہڑے حال ءچ سَڈیا گِیا ہے اوہ خُدا دے نال اُوں حال ءچ ای رَہوے۔
کنواریاں تے بیواواں دے بارے ءچ سوالات
25 کنواریاں دے بارے ءچ خُداوند دا ڈِتا ہویا کوئی حُکم میڈے کولھ نئیں، پَڑ خُدا وند دی رحمت نال ہِک دیانتدار بندے دی حیثیت نال میں آپنڑی شخصی رائے ڈیندا ہاں۔
26 میڈے خیال ءچ اِیں مُصیبت آلے دور ءچ تُہاڈے کیتے اِیہو چنگا ہے جو تُساں جِیویں ہِیوے اُونویں ای رَہو۔ 27 جے شادی شدہ ہیں تاں ذال کُوں چھوڑ ڈیوݨ دا خیال نہ کر۔ جے ذال نئیں تاں ذال دی تلاش ءچ نہ رہ۔ 28 پَر جے تُوں شادی کر وی گِھدی ہے تاں ایہہ کوئی گُناہ نئیں تے جے کوئی کنواری چھوہیر شادی کر گِھنے تاں ایہہ وی گُناہ نئیں۔ پَر ایجھے لوک مُصیبتاں برداشت کریسن تے میں تُہاکُوں بچاوݨ چاہندا ہاں۔
29 بِھراؤ! میں ایہہ آہدھا ہاں جو وقت گَھٹ ہے، اِیں واسطے اَگوں کنُوں ذال آلے اِینویں ہووݨ جِیویں اوہ بغیر ذال دے ہِن۔ 30 رووݨ آلے ایجھے ہووݨ جو جِیویں اوہ روندے نئیں تے خوشی مناوݨ آلے ایجھے ہووݨ جِیویں اوہ خوشی نئیں مَنیندے۔ مُل گِھننڑ آلے ایجھے ہووݨ جِیویں اُنہاں دے کولھ کُجھ وی نئیں۔ 31 تے دُنیا دا کاروبار کرݨ آلے اِینویں ہووݨ جو دُنیا ای دےنہ تھی وَنجنڑ کیوں جو دُنیا دی موجُودہ شکل بدلدی وَیندی ہے۔
32 میں ایہہ چاہندا ہاں جو تُساں بے فِکر رَہو۔ غیر شادی شدہ آدمی خُداوند دے گالھیں دی فِکر ءچ رَہندے جو کیویں خُدا وندکُوں خوش کرے۔ 33 پَر شادی شدہ دُنیا دے گالھیں دے بارے ءچ فِکر مند رَہندے جو کیویں آپنڑی ذال کُوں خوش کرے۔ 34 شادی شدہ تے غیر شادی شدہ ءچ وی فرق ہوندے۔ غیر شادی شدہ عورت خُداوند دے گالھیں دی فِکر ءچ رَہندی ہےa جو اُوندا جِسم تے رُوح ڈوہائیں پاک ہووݨ۔ پَر شادی شدہ عورت دُنیا دی فِکر ءچ رَہندی ہے جو کیویں آپنڑے پائے کُوں خوش کرے۔
35 میں ایہہ تُہاڈے فائدے کیتے آہدھا ہاں نہ جو پابندی لاوݨ کیتے تاں جو چنگے چال چلنڑ نال تُساں بغیر رکاوٹ دے خُداوند دی خدمت ءچ مشغول رَہو۔
36 جے کہیں کنواری چھوہیر دا پیُوb ایہہ سمجھدے جو اوہ آپنڑی چھوہیر دا حق مریندے تے اُوندی جوانی ڈھلدی وَیندی ہے تے شادی دی ضرورت وی معلوم تھیوے، اُونکُوں چاہیدے جو چھوہیر کُوں پرنا چھوڑے کیوں جو ایہہ کوئی گُناہ نئیں۔ 37 وَل وی اوہ جیہڑا ایہہ ضرورت محسوس نئیں کریندا تے آپنڑے دِل ءچ پکا اِرادہ کر گِھدے تے آپنڑی خواہش اُتے اِختیار ہے تے دِل ءچ نیت کیتی ہے جو اوہ آپنڑی چھوہیر کُوں کنواری ای رَہنڑ ڈیسی تاں اوہ چنگا کریندے۔ 38 بس جیہڑا آپنڑی کنواری چھوہیر دی شادی کر ڈیندے اوہ چنگا کریندے تے جیہڑا اِینویں نئیں کریندا اوہ وی چنگا کریندے۔