اَساں جانڑدے ہئیں جو ”اَساں سارا علم رکھیندے ہیں“ پَر علم غرور پیدا کریندےپَر محبت ترقی بخشیندی ہے۔ ‏2 جے کوئی ایہہ سمجھدا ہے جو اوہ کُجھ جانڑدا ہے تاں جِیویں جاننڑا چاہیدا ہے اوہ اُونویں ہُنڑ تئیں نئیں جانڑدا۔ ‏3 پَڑ جیہڑا خُدا نال محبت رکھیندے، خُدا اُونکُوں جانڑدے۔

‏4 ہُنڑ بُتاں دیاں قُربانیاں دا گوشت کھاوݨ دے بارے ءچ اَساں جانڑدےہئیں جو دُنیا ءچ بُتاں دی حقیقت کُجھ وی نئیں۔ خُدا ہِک ہے تے اُوندے سِوا کوئی معبود نئیں۔ ‏5 بھانویں اَسمان ءچ تے زمین اُتے بہُوں ساریاں چیزاں معبود اَکھویندیاں ہِن، تے بہُوں سارے ”خُدا“ تے ”خُداوند “ ہِن ‏6 پَر ساڈے کیتے تاں ہِکو ای خُدا ہے یعنی اَسمانی باپ جیہڑا ساریاں چیزاں دا خالق ہے تے اَساں اُوندے کیتے زندہ ہیں ۔تے ہِک ای خُداوند ہے یعنی یسوع مسیح جِیندے وسیلے نال ساریاں چیزاں موجود تھیّاں تے اَساں وی اُوندے وسیلے نال زندہ ہئیں۔

‏7 پَر ایہہ علم ساریاں دے کولھ نئیں، بلکہ کُجھ لوک ہُنڑ تئیں بُتاں کُوں حقیقی سمجھنڑ دے عادی ہِن۔ اِیں واسطے جِیں وَیلے اوہ اِیں گوشت کُوں اِیں خیال نال کھاندے ہِن جو ایہہ کہیں بُت کُوں چڑھایا گِیا ہے تاں آپنڑے ضمیر دی کمزوری دی وجہ کنُوں آپنڑے آپ کُوں قصُوروار سمجھنڑ لگدے ہِن۔ ‏8 کھانڑا ساکُوں خُدا دے قریب نہ گِھن آسی۔ جے اَساں نہ کھاؤں تاں ساڈا کوئی نقصان نئیں تے جے کھا گِھنوں تاں فائدہ وی نئیں۔

‏9 پَر خبردار رَہو، اِینویں نہ تھیوے جو تُہاڈی ایہہ آزادی کمزور اِیمان آلیاں کیتے گُمراہی دا باعث بنڑ وَنجے۔ ‏10 کیوں جو جے کوئی کمزور اِیمان آلا تَیں صاحب ِ علم کُوں بُت خانہ ءچ^a کھانڑا کھاندے ڈیکھے تاں کیا اُونکُوں آپنڑے ضمیر دے خلاف بُتاں دی قُربانی دے گوشت کُوں کھا گِھننڑ دا حوصلہ نہ مِل ویسی؟ ‏11 اِینویں تیڈا علم اُوں کمزور اِیمان آلے دی ہلاکت دا باعث تھیسی جِیندے کیتے مسیح نیں آپنڑی جان قُربان کر ڈِتی۔ ‏12 تے تُساں آپنڑے کمزور ضمیر آلے بِھراواں دی دِل آزاری کر تے نہ فقط اُنہاں دے گُنہگار تھی گئے بلکہ مسیح دے وی گُنہگار تھیندے ہِیوے۔ ‏13 اِیں واسطے جے میڈا کھانڑا میڈے مسیحی بِھرا کیتے ٹھوکر دا باعث ہے تاں میں گوشت کڈھائیں نہ کھاساں تاں جو آپنڑے بِھرا کیتےٹھوکر دا باعث نہ بنڑاں۔