‏3 میکُوں پرکھنڑ آلیاں کیتے اِیہو میڈا جواب ہے ^a۔ ‏4 کیا ساکُوں کھاوݨ پیوݨ دا حق نئیں؟ ‏5 کیا ایہہ حق نئیں جو کہیں اِیماندار عورت کُوں پرنا گِھنوں تے اُونکُوں آپنڑا ہم سفر بنڑا گِھنوں جِیویں بئے رسُول تے خُداوند دے بِھرا تے کیفا ^bکریندے ہِن؟ ‏6 یا فقط میکُوں تے برنباس کُوں محنت مشقت کنُوں باز رَہنڑ دا حق نئیں؟ ‏7 کیہڑا سپاہی آپنڑے خرچے اُتے جنگ کریندے؟ کیہڑا ہے جیہڑا انگور دا باغ لا تے انگور نئیں کھاندا؟ یا کیہڑا آجڑی ہے جیہڑا آپنڑے اِجڑ داکھیر نئیں پِیندا؟

‏8 کیا میں ایہہ گالھیں اِنسانی سوچ نال آہدھا ہاں ؟کیا شریعت وی اِیہو نئیں آہدھی؟ ‏9 چُنانچہ موسیٰ دی شریعت ءچ لکھیا ہے جو ”گہائی دے وقت ڈاند دا مُنہ نہ بَدھائے۔ “کیا خُدا کُوں ڈانداں دی ای فِکر ہے؟ ‏10 کیا اوہ خاص کر ایہہ ساڈے کیتے نئیں آہدھا؟ ہاں ایہہ ساڈے کیتے لکھیا گِیا کیوں جو ہَل وہاوݨ آلا اُمید اُتے ہَل وہیندے تے گہائی آلا اُمید اُتے گہیندے جو اُنہاں کُوں فصل دا کُجھ حصہ ضرور مِلسی۔ ‏11 جے اَساں تُہاڈے فائدے کیتے رُوحانی بیج رہایا تاں کیا ایہہ کوئی وَڈی گالھ ہے جو اَساں تُہاڈے ءچوں جِسمانی چیزاں دی فصل کَپوں؟ ‏12 جِیں وَیلے ڈوجھیاں کُوں ایہہ حق ہے جو تُہاڈے کنُوں کُجھ گِھننڑ تاں کیا ساڈا اُنہاں کنُوں زیادہ نہ ہوسی؟ وَل وی اَساں اِیں حق کُوں استعمال نہ کیتا بلکہ سارا کُجھ برداشت کریندے ریہے تاں جو ساڈے سببّوں مسیح دی بشارت ءچ رکاوٹ نہ تھیوے۔ ‏13 کیا تُساں نئیں جانڑدے جو جیہڑے ہیکل ءچ خدمت کریندے ہِن اوہ اُتھاں کھاندے ہِن؟ تے جیہڑے قُربان گاہ اُتے قُربانیاں چڑھاوݨ دی خدمت کریندے ہِن، اوہ اُنہاں قُربانیاں دا حصہ گِھندے ہِن؟ ‏14 اِینویں ای خُداوند نیں وی مقرر کیتے جو جیہڑےخوشخبری دی تبلیغ کریندے ہِن اوہ خُوشخبری ای دے وسیلے گُذارہ کرݨ^c ۔

‏15 پَر میں اِنہاں حقوق کُوں استعمال نئیں کیتا تے نہ ای اِیں خیال کنُوں لکھدا پِیا ہاں جو ہُنڑکُجھ مِلسی۔ میں مَر وَنجنڑ زیادہ چنگا سمجھدا ہاں بجائے اِیندے جو کوئی میڈے فخر دی وجہ کُوں ضائع کر ڈیوے۔ ‏16 جے میں خُوشخبری دی تبلیغ کریندا ہاں تاں اِیندے ءچ میڈا کوئی فخر نئیں کیوں جو ایہہ تاں میڈے کیتے ضروری ہے۔ بلکہ میڈے اُتے افسوس ہے جے میں خُوشخبری دی تبلیغ نہ کراں۔ ‏17 جے میں آپنڑی مرضی نال تبلیغ کریندا ہاں تاں میڈے کیتے اَجر ہے۔ پَر جے آپنڑی مرضی نال نئیں تاں مُختاری میڈے سپُرد کیتی گئی ہے ‏18 بس میڈا اَجر کیا ہے؟ محض ایہہ جو خُوشخبری کُوں مُفت کر ڈیواں تے اُوں حق دا فائدہ نہ چاواں جیہڑا تبلیغ دی وجہ کنُوں میکُوں مِلدا ہے۔

‏19 بھانویں میں سارے لوکاں تُوں آزاد ہاں، وَل وی میں آپنڑے آپ کُوں ساریاں دا غلام بنڑا ڈِتے تاں جو زیادہ لوکاں کُوں مسیح دے کولھ گِھن آ سگاں۔ ‏20 میں یہُودیاں کیتے یہُودی بنڑیا تاں جو یہُودیاں کُوں گِھن آواں۔ اہل ِ شریعت کیتے شریعت آلا بنڑیا تاں جو شریعت آلیاں کُوں گِھن آواں بھانویں جو میں آپ شریعت دے ماتحت نہ ہم۔ ‏21 جیہڑے لوک شریعت نئیں رکھیندے، میں اُنہاں کیتے بے شرع بنڑیا تاں جو بے شرع لوکاں کُوں گِھن آواں۔ ( میں بھانویں خُدا دی نظر ءچ بے شرع نہ ہم بلکہ مسیح دی شریعت دے تابع ہم )^d۔ ‏22 کمزوراں دی خاطر کمزور بنڑیا تاں جو کمزوراں کُوں گِھن آواں ۔میں ساریاں لوکاں دی خاطر سارا کُجھ بنڑیاہویا ہاں تاں جو کہیں نہ کہیں طرحاں کُجھ کُوں بچا سگاں۔

‏23 میں ایہہ سارا کُجھ خُوشخبری دی خاطر کریندا ہاں تاں جو اُنہاں دے نال خُوشخبری دی برکتاں ءچ شریک تھی سگاں۔ ‏24 کیا تُساں نئیں جانڑدے جو میدان ءچ بھجنڑ آلے بھجدے تاں سارے ہِن پَر اِنعام ہِک کُوں مِلدے؟ تُساں وی اِینویں بھجو تاں جو جیتو۔ ‏25 مُقابلہ ءچ حصہ گِھننڑ آلے ہر طرحاں دا پرہیز کریندے ہِن۔ اوہ لوک ہِک مُرجھاوݨ آلا ہار گِھننڑ کیتے اِینویں کریندے ہِن، پَر اَساں اُوں ہار کیتے اِینویں کریندے ہیں جیہڑا کڈھائیں نہ مُرجھیسی۔ ‏26 بس میں وی اِیں طرحاں بھجدا ہاں، پَر بغیر مقصد نئیں تے مُکے باز دے وانگوں لَڑدا ہاں، ہوا کُوں مارݨ آلے دے وانگوں نئیں۔ ‏27 بلکہ میں آپنڑے بدن اُتے سختی کریندا ہاں تے اُونکُوں قابو ءچ رکھیندا ہاں تاں جو اِینویں نہ تھیوے جوڈوجھیاں کُوں منادی کر تے، میں خود محروم رہ وَنجاں۔