بُت پرستی دے خلاف آگاہی
10
1 بِھراؤ! میں تُہاکُوں یاد ڈیواونڑاں چاہندا ہاں جو ساڈے پیُو ڈاڈا کیویں بَدل تَلے ریہے تے سارے سمندر ءچوں تھی تے پار لنگھے۔ 2 اُنہاں ساریاں نیں موسیٰ دی پیروی ءچ بَدل تے سمندر ءچ بپتسمہ گِھدا۔ 3 تے ساریاں نیں ہِکو رُوحانی خوراک a کھادی۔ 4 ساریاں نیں ہِک رُوحانی پانڑی پیتا کیوں جو اوہ اُوں رُوحانی چٹان کنُوں پانڑی پیندے ہَن جیہڑی اُنہاں دے نال چلدی ہئی تے اوہ چٹان b مسیح ہئی۔ 5 وَل وی خُدا اُنہاں دی ہِک کثیر تعداد کنُوں راضی نہ تھیّا اِیں واسطے اوہ بیابان ءچ ای برباد تھی گئے۔6 ایہہ گالھیں ساڈے کیتے عِبرت دا باعث ہِن تاں جو اَساں بُرے چیزاں دی خواہش نہ کروں جِیویں اُنہاں کیتی۔ 7 تے تُساں بُت پرستی نہ کرو جِیویں اُنہاں ءچوں کُجھ لوکاں کیتی جِیویں جو لکھیا ہے، ”لوک کھاوݨ پیوݨ کیتے بیٹھے تے وَل اُٹھی تے نچنڑ ٹپنڑ لگےc۔“ 8 اَساں حرام کاری نہ کروں جِیویں اُنہاں لوکاں ءچوں کُجھ لوکاں کیتی تے ہِکو ڈینہہ ءچ تَریہوی ہزار مارے گئے ۔ 9 تے اَساں مسیح دی اَزمائش نہ کروں جِیویں اُنہاں ءچوں کُجھ نیں کیتی تے سَپاں نیں اُنہاں کُوں ہلاک کر ڈِتا۔ 10 بُڑ بُڑ نہ کرو جِیویں اُنہاں ءچوں کُجھ لوکاں نیں بُڑ بُڑ کیتی تے مَوت دے فرشتے دے ہَتھوں مارے گئے۔
11 ایہہ گالھیں اُنہاں دی عِبرت کیتے پیش آئیاں تے اَساں آخری زمانے آلیاں دی نصیحت کیتے لکھیاں گئیاں۔
12 بس جیہڑا کوئی آپنڑے آپ کُوں اِیمان ءچ قائم تے مضبوط سمجھدے، خبردار رَہوے جو کِتھائیں ڈھے نہ پوے۔ 13 تُہاڈے اُتے ایجھی اَزمائش نئیں آئی جیہڑی تُہاڈی برداشت تُوں باہر ہووےتے خُدا وفادار ہے، اوہ تُہاڈی برداشت کنُوں زیادہ سخت اَزمائش، تُہاڈے اُتے نہ آوݨ ڈیسی۔ بلکہ جِیں وَیلے اَزمائش آسی تاں اُوں کنُوں بچ نکلنڑ دی راہ وی پیدا کر ڈیسی تاں جو تُساں برداشت کر سگو۔
14 اِیں واسطے عزیزو! بُت پرستی کنُوں بھجو۔ 15 میں تُہاکُوں عقل مند جاݨ تے ایہہ گالھیں آہدھا ہاں۔ تُساں خود میڈے گالھیں کُوں پرکھو۔ 16 اوہ برکت دا پیالہ جِیندے اُتے اَساں برکت چاہندے ہئیں، کیا مسیح دے خون دی شراکت نئیں ؟تے اوہ روٹی جِینکُوں اَساں توڑیندے ہیں ،کیا مسیح دے بدن دی شراکت نئیںd ؟ 17 روٹی ہِکو ہے اِیں واسطے اَساں جیہڑے بہُوں سارے ہئیں ہِکو بدن ہئیں کیوں جو اَساں سارے اُوہو ہِک روٹی ءچ شریک تھیندے ہئیں۔
18 جیہڑے جِسمانی لحاظ نال اِسرائیلی ہِن، اُنہاں اُتے نِگاہ کرو۔ کیا قُربانی دا گوشت کھاوݨ آلے قُربان گاہ دی عبادت ءچ شریک نئیں؟ 19 بس میں کیا ایہہ آہدھا ہاں جو بُت کوئی چیز ہِن یا بُتاں دی قُربانی کوئی چیز ہے؟ 20 نئیں، بلکہ ایہہ آہدھا ہاں جو جیہڑے قُربانیاں غیر قوم آلے کریندے ہِن اوہ خُدا کیتے نئیں بلکہ شیاطین کیتے ہوندیاں ہِن تے میں نئیں چاہندا جو تُساں شیاطین نال کوئی واسطہ رکھو۔ 21 تُساں خُدا ونددے پیالے تے شیاطین دے پیالے ڈوہائیں ءچوں نئیں پی سگدے۔ تُساں خُداوند دے دسترخوان تے شیاطین دے دسترخوان ڈوہائیں ءچ شریک نئیں تھی سگدے۔ 22 کیا اَساں اِینویں کرݨ نال خُداوند دے قہر کُوں نئیں بھڑکیندے؟ کیا اَساں اُوں کنُوں زیادہ زور آلے ہئیں؟
خُدا دے جلال کیتے زندگی گُزارو
23 ”سارے چیزاں جائز ہِن“ پَر سارے چیزاں مفید نئیں۔ سارے چیزاں جائز تاں ہِن پَر سارے چیزاں ترقی دا باعث نئیں۔ 24 کوئی آپنڑا فائدہ نہ گولھے بلکہ ڈوجھے دا۔
25 جیہڑا گوشت بازار ءچ وِکدے، اوہ کھاؤ تے دینی امتیاز دے سببّوں کُجھ نہ پُچھوe ۔ 26 کیوں جو ”زمین تے اُوندیاں ساریاں چیزاں خُداوند دیاں ہِن ۔“
27 جے کوئی غیر ایماندار تُہاکُوں کھانڑے دی دعوت ڈیوے تے تُساں وَنجنڑ چاہو تاں جیہڑا کُجھ تُہاڈے سامنڑے رکھیا وَنجے اُونکُوں کھاؤ تے دینی امتیاز دے سببّوں کُجھ نہ پُچھو۔ 28 پَر جے کوئی تُہاکُوں چتاوے جو ”ایہہ بُتاں دی قُربانی دا گوشت ہے“ تاں چتاوݨ آلے کیتے تے ضمِیر دے سببّوں اُونکُوں نہ کھاؤ۔ 29 میں تیڈے ضمِیر دی نئیں بلکہ ڈوجھے شخص دےضمِیر کیتے آہدھا ہاں۔ میڈی آزادی ڈوجھے شخص دے ضمِیر دے سببّوں کیوں پرکھی وَنجے f؟ 30 جے میں اُوں کھانڑے کُوں شُکر کر تے کھا گِھندا ہاں تاں جیہڑی چیز کیتے شُکر کریند اہاں، اُوندے سببّوں کیوں بدنام کیتا وَیندا ہاں؟
31 بس تُساں خواہ کھاؤ یا پِیو یا جیہڑا کُجھ کرو، سبھ خُدا دے جلال کیتے کرو۔ 32 تُساں نہ یہُودیاں کیتے نہ یُونانیاں کیتے تے نہ ای خُدا دی کلیسیا کیتے ٹھوکر دا باعث بنڑو۔ 33 میں ساریاں کُوں سبھ گالھیں ءچ خوش کرݨ دی کوشش کریندا ہاں تے میں آپنڑا نئیں بلکہ ڈوجھیاں دا فائدہ گولھیندا ہاں تاں جو اوہ نجات پاوݨ۔