‏2 میں تُہاڈی تعریف کریندا ہاں جو تُساں ہر گالھ ءچ میکُوں یاد رکھیندے ہِیوے تے اُنہاں تعلیمات کُوں قائم رکھیندے ہِیوے جیہڑیاں میں تُہاکُوں پُچایاں۔ ‏3 پَرمیں چاہندا ہاں جو تُساں ایہہ وی یا د رکھو جو ہر مَرد د ا سِر مسیح ہے تے عورت دا سِر مرد ہے تے مسیح دا سِر خُدا ہے۔ ‏4 اِیں واسطے جے کوئی مَرد دُعا یا نبوّت کریندے وقت آپنڑا سِر کجیندے تاں اوہ آپنڑے سِر ^aدی بے عزتی کریندے۔ ‏5 تے اِینویں ای جے کوئی عورت دُعا یا نبوّت کریندے وقت آپنڑا سِر نہ کجیندی تاں اوہ آپنڑے سِر دی بے عزتی کریندی ہے کیوں جو اوہ سِر مُنڈی دےبرابر ہے۔ ‏6 جے کوئی عورت بوچھنڑ استعمال نئیں کریندی تاں اوہ آپنڑا سِر وی مُنوا ڈِیوے پَر جے اوہ سِر مُنواوݨ کُوں بے حیائی سمجھدی ہے تاں اوہ بوچھنڑ نال آپنڑا سِر کجے۔ ‏7 ہاں، مَرد کُوں آپنڑا سِر نئیں کجنڑاں چاہیدا کیوں جو اوہ خُدا دی صُورت تے اُوندا جلال ہے^b پَر عورت مَرد دا جلال ہے، ‏8 اِیں واسطے جو مَرد عورت کنُوں نئیں بلکہ عورت مَرد کنُوں پیدا کیتی گئی ہے۔ ‏9 تے مَرد عورت دی خاطر نئیں بلکہ عورت مَرد دی خاطر پیدا کیتی گئی۔ ‏10 بس فرشتیاں دی وجہ کنُوں عورت کُوں چاہیدے جو آپنڑے سِر اُتے تابع ہووݨ دی نشانی رکھے۔ ‏11 وَل وی خُداوند ءچ عورت کُوں مَرد تے مَرد کُوں عورت دی ضرورت ہے۔ ‏12 کیوں جو جِیویں عورت مَرد کنُوں ہے، اُونویں ای مَرد وی عورت دے وسیلے نال ہے پر سارے چیزاں خُدا دی طرفوں ہِن۔

‏13 تُساں خود ای فیصلہ کرو، کیا کہیں عورت دا سِر کجے بغیر خُدا کنُوں دُعا کرݨ مناسب ہے؟ ‏14 کیا فطرت خود وی ایہہ نئیں سِکھیندی جو جے مَرد دے سِر دے وال لمبے ہووݨ تاں ایہہ اُوندے کیتے شرم دی گالھ ہے؟ ‏15 پَر جے عورت لمبے وال رکھے تاں ایہہ اُوندے کیتے زینت دا باعث ہِن کیوں جو لمبے وال اُونکُوں پردے کیتے ڈِتے گئے ہِن۔ ‏16 جے کوئی اِیندے اُتے تکرار کرݨ چاہندے تاں اوہ جاݨ گِھنے جو نہ ساڈا ایجھا دستور ہے نہ خُدا دی کلیسیاواں دا۔

‏17 ہُنڑ جیہڑی ہدایت میں تُہاکُوں ڈیندا ہاں اُوندے ءچ تُہاڈے کیتے تعریف دی کوئی گالھ نئیں کیوں جو تُہاڈا عبادت کیتے جمع تھیونڑاں تُہاڈے کیتے فائدہ نئیں بلکہ نقصان دا باعث ہے۔ ‏18 پہلی گالھ ایہہ ہے جو میں سُنڑے جو جیں ویلے تُہاڈی کلیسیا جمع تھیندی ہے تاں تُہاڈے ءچ تفرِقےتھیندے ہِن تے میں اِیں گالھ کُوں کہیں حد تئیں قابل ِ یقین سمجھدا ہاں۔ ‏19 تُساں لوکاں ءچ بدعتاں ^cدا ہووݨ ضرور ہے تاں جو ظاہر تھی وَنجے جو تُہاڈے ءچ کیہڑے لوک راہ ِ راست اُتے ہِن۔ ‏20 بس جِیں وَیلے جمع تھیندے ہِیوے تاں تُہاڈا کھاونڑا حقیقی عشائے ربّانی نئیں تھی سگدا۔ ‏21 کیوں جو ہر ہِک ڈوجھے کنُوں پہلے ای کھانڑا کھا گِھندے۔ کوئی تاں بُھکا رہ وَیندے تے کہیں کُوں نشہ تھی وَیندے۔ ‏22 کیا کھاوݨ تے پیوݨ کیتے تُہاڈے گھرنئیں؟ یا وَل خُدا دی کلیسیا دی تُہاڈے نزدیک کوئی اہمیت نئیں تے جِنہاں کولھ نئیں اُنہاں کُوں شرمندہ کریندے ہِیوے؟ میں تُہاکُوں کیا آکھاں؟ کیا اِیں کیتے تُہاڈی تعریف کراں؟ میں تُہادی تعریف نئیں کر سگدا۔

‏23 کیوں جو ایہہ گالھ میں تئیں خُداوند تُوں پُجی تے میں تُہاڈے تئیں پُچا ڈِتی جو خُداوند یسوع نیں جِیں رات اوہ پکڑوایا گِیا، روٹی گِھدی، ‏24 تے شُکر ادا کر تے تروڑی تے آکھیا، ”ایہہ میڈا بدن ہے جیہڑا تُہاڈے کیتےڈِتا وَیندے، میڈی یادگاری کیتے اِیہو کیتا کرو۔“ ‏25 اِینویں ای اُونیں کھانڑے دے بعد پیالہ وی گِھدا تے آکھیا، ”ایہہ پیالہ میڈے خون ءچ نواں عہد ہے^d ۔ جِیں وَیلے وی پِیو، میڈی یادگاری کیتے اِیہو کیتا کرو۔“

‏26 کیوں جو جِیں وَیلے تُساں ایہہ روٹی کھاندے تے اِیں پیالے ءچوں پِیندے ہِیوے تاں خُداوند دی مَوت دا اعلان کریندے ہِیوے جئیں تئیں اوہ وَلا نہ آ وَنجے۔ ‏27 اِیں واسطے جیہڑا کوئی نامناسب طریقے نال خُداوند دی روٹی کھاوے یا اِیں پیالے ءچوں پِیوے اوہ خُداوند دے بدن تے خون دا گُنہگار ہوسی۔ ‏28 بس اِیں روٹی ءچوں کھاوݨ تے اِیں پیالے ءچوں پیوݨ کنُوں پہلے ہر شخص آپنڑے آپ کُوں پرکھ گِھنے۔ ‏29 کیوں جو جیہڑا کوئی کھاندے پِیندے وقت خُداوند دے بدن کُوں نئیں سُنجانڑدا اوہ اِیں کھاوݨ تے پیوݨ کنُوں سزاوار ہوسی۔ ‏30 اِیہو وجہ ہے جو تُہاڈے ءچوں بہُوں سارے لوک کمزور تے بیمار ہِن تے کئی موت دی نیندر ءچ سَم وی گئے ہِن۔ ‏31 پَر جے اَساں آپنڑے آپ کُوں پرکھدے تاں سزاوار نہ تھیندے۔ ‏32 پَر خُداوند ساکُوں سزا ڈے تے ساڈی تربیت کریندے تاں جو اَساں دُنیا دے نال مُجرم نہ بنڑوں۔

‏33 اِیں واسطے میڈے بِھراؤ! جِیں وَیلے تُساں کھاوݨ کیتے کَٹھے تھیندے ہِیوے تاں ہِک ڈوجھے دا اِنتظار کرو۔ ‏34 جے کوئی بُھکا ہووے تاں آپنڑے گھرُوں کھا گِھنے تاں جو تُہاڈا کَٹھا تھیوݨ سزا دا باعث نہ بنڑے۔ میں بئے گالھیں اُتھائیں آ تے ٹھیک کریساں۔