‏4 نعمتاں تاں طرحاں طرحاں دیاں ہِن پَر رُوح القُدس ہِکو ہے۔ ‏5 خِدمتاں وی طرحاں طرحاں دیاں ہِن پَر خُداوند ہِک ای ہے۔ ‏6 خُدا دے کَم طرحاں طرحاں دے ہِن پَر خُدا ہِک ای ہے جیہڑا ساریاں ءچ ہر طرحاں دا اثر پیدا کریندے۔ ‏7 پَر ہر شخص کُوں رُوح القُدس دا ظہور ہِک ڈوجھے کُوں فائدہ ڈیوݨ کیتے ہوندا ہے۔ ‏8 کہیں کُوں رُوح القُدس دی طرفوں حکمت دا کلام عطا کیتا وَیندے تے کہیں کُوں اُونہئی رُوح دے وسیلے علم دا کلام۔ ‏9 کہیں کُوں اُونہئی رُوح نال اِیمان ^aتے کہیں کُوں شِفا ڈیوݨ دی توفیق مِلدی ہے۔ ‏10 کہیں کُوں معجزے ڈِکھاوݨ دی قُدرت تے کہیں کُوں نبوّت (کرݨ دی )، کہیں کُوں رُوحاں دا امتیاز (کرݨ دی )، کہیں کُوں طرحاں طرحاں دی زباناں (بولنڑ دی ) ، تے کہیں کُوں زباناں دا ترجمہ کرݨ دی توفیق مِلی ہے۔ ‏11 ایہہ ساریاں نعمتاں اُوہو ہِک رُوح القُدس عطا فرمیندے تے جِیویں جِینکُوں چاہندے وَنڈیندے۔

‏12 بدن ہِک ہے تے اُوندے اَنگ بہُوں ہِن، تے بھانویں جو ہِکو ای بدن دے بہُوں سارے اَنگ ہِن، پَر اوہ سارے رَل تے ہِک بدن ہِن، اُونویں ای مسیح وی ہے۔ ‏13 کیوں جو اَساں ساریاں نیں بھانویں یہُودی ہِن یا یُونانی، بھانویں غلام ہِن یا آزاد، ہِکو رُوح دے وسیلہ نال ہِک بدن تھیوݨ کیتے بپتسمہ گِھدے تے ساکُوں ساریاں کُوں ہِکو رُوح القُدس پلایا گِیا۔

‏14 چنانچہ بدن ہِک اَنگ اُتے نئیں بلکہ بہُوں سارے اَنگاں نال ہوندے۔ ‏15 جے پیر آکھے، ”کیوں جو میں ہَتھ نئیں اِیں واسطے بدن دا حصہ نئیں،“ تاں اوہ اِیں وجہ کنُوں بدن تُوں اَنج تاں نئیں۔ ‏16 تے جے کَن آکھے، ”کیوں جو میں اَکھ نئیں اِیں واسطے بدن دا حصہ نئیں،“ تاں اوہ اِیں وجہ کنُوں بدن تُوں اَنج تاں نئیں۔ ‏17 جے سارا بدن اَکھ ای ہوندا تاں سُننڑنا کِتھوں ہوندا؟ جے سارا سُننڑنا ای ہوندا تاں سُنگھنڑنا کِتھوں ہوندا؟ ‏18 پَر سچ ایہہ ہے جو خُدا نیں ہر اَنگ کُوں بدن ءچ آپنڑی مَرضی دے مطابق رکھیا ہے۔ ‏19 جے اوہ سارے ہِکو ای اَنگ ہوندے تاں بدن کِتھاں ہوندا۔ ‏20 پَر ہُنڑ اَنگ تاں بہُوں ہِن پَر بدن ہِکو ای ہے۔

‏21 اَکھ ہَتھ کُوں نئیں آکھ سگدی جو ”میکُوں تیڈی ضرورت نئیں،“تے نہ سِر پیراں کُوں آکھ سگدے جو ”میں تیڈا مُتھاج نئیں۔“ ‏22 بلکہ بدن دے اوہ اَنگ جیہڑے ڈوجھیاں دی نسبت بہُوں کمزور لگدے ہِن، اَصل ءچ اوہ بہُوں ضروری ہِن۔ ‏23 تے اوہ اَنگ جِنہاں کُوں اَساں ڈوجھیاں اَنگاں کنُوں بہُوں ای حقیر سمجھدے ہئیں، اُنہاں کُوں بہُوں عزت ڈیندے ہئیں، تے جیہڑے اَنگ چھکدے نئیں اُوہو بہُوں چھکنڑ پئے وَیندے ہِن۔ ‏24 حالانکہ ساڈے چھکنڑ آلے اَنگ اِیندے مُتھاج نئیں۔ پَر خُدا نیں بدن کُوں اِینویں بنڑائے جو جیہڑا حقیر ہے اُونکُوں زیادہ عزت ڈِتی وَنجے۔ ‏25 تاں جو بدن ءچ تفرقہ نہ ہووے بلکہ اَنگ ہِک ڈوجھے دی برابر فِکر رکھنڑ۔ ‏26 جے بدن دا ہِک اَنگ ڈُکھدے تاں سارے اَنگ اُوندے نال ڈُکھ پَیندےہِن، تے جے ہِک اَنگ کُوں عزت مِلدی ہے تاں سارے اَنگ اُوندے نال خوشی مَنیندے ہِن۔

‏27 بس تُساں رَل تے مسیح دا بدن ہِیوے تے کلھے کلھے اُوندے اَنگ ہِیوے۔ ‏28 تے خُدا نیں کلیسیا ءچ پہلے رسُول، ڈوجھے نبی، تَریجھے اُستاد، وَل معجزے ڈکھاوݨ آلے، وَل شِفا ڈیوݨ دی نعمت آلے، مددگار، اِنتظام کرݨ آلے تے طرحاں طرحاں دیاں زباناں بولنڑ آلے مقرر کیتے۔ ‏29 کیا یکے رسُول ہِن؟ کیا یکے نبی ہِن؟ کیا یکے اُستاد ہِن؟ کیا یکے معجزے ڈکھاوݨ آلے ہِن؟ ‏30 کیا ساریاں کُوں شفا ڈیوݨ دی نعمت مِلی ہے؟ کیا سارے طرحاں طرحاں دیاں زباناں بولیندے ہِن؟ کیا سارےاِنہاں زباناں دا ترجمہ کریندے ہِن؟ ‏31 بس تُساں اعلیٰ نعمتاں گِھننڑ دی سِک ءچ رَہو۔

پَر ہُنڑ میں تُہاکُوں ساریاں کنُوں چنگا طریقہ ڈسیندا ہاں۔